سەن مېنى ، مەن سېنى ... [ئۇلانما كۆچۈرۈش]

سەن مېنى ، مەن سېنى
( ئۆمەر مۇھەممەتئېمىن كروران )
1
سەن مېنى پاكار ، دەپ ،
مەن سېنى ناكا، دەپ ،
بوپ كېتەرمىز قايسىمىز قاۋۇل ؟
مەن ساڭا چىشىمنى بىلەپ ،
سەن ماڭا دوزاخنى تىلەپ ،
قايسىمىز
كىرىپ كېتەرمىز جەننەتكە ئۇدۇل ؟!
2
تاشلاندى
ئوتتۇرىمىزغا بىر تائام ،
يا سۆڭەككە تەۋە ئەمەس
يا گۆشكە تەۋە ،
تالىشىپ كەتتى ئۇنى
كىشىنەشتۇق ، چىشلەشتۇق ...
ساڭا ياكى گۆش تەگمىدى
ماڭا يا سۆڭەك .  
ئىككى قوينىڭ ئۈسسۈشۈشىدىن
ھايان تاپتى ئارىدا بۆرە .
ئويۇنلاردا رول ئېلىپ شۇنداق
نېسىۋە تالىشىپلا ئۆتەرمىزمۇ
بىرەر قېتىم قىلىشماي تۆۋە ؟!
3
سەندىن قالار ،
مەندىن قالار بۇ جاھان .
كېمىمىز ئوخشاش ،
غېمىمىزمۇ ھەم .
شۇنداق تۇرۇپ ئويلىدۇقمىكىن
كۈتەر بىزدىن نېمىنى نىشان ؟


<<قەبرىدىكى پالۋان>> دىن ئېلىندى .

ئۆمەر مۇھەممەتئىمىن كروران مەن شېئىرلىرىنى ئەڭ ياقتۇرۇپ ئوقۇيدىغان شائېرلىرىمىزنىڭ بىرى.( ئىپادىلەش ئۇسۇلى تولىمۇ ئۆزگىچە دەپ قارايمەن.) شائېرىمىزغا ۋە بۇ تېمىنى يوللىغان مۇھەممەت توختى مۇئەللىمنىڭ ئەجرىگە تەشەككۈر!