يازغۇچى تۇرسۇنجان مۇھەممەتكە تون كەيگدۈرۈلدى [ئۇلانما كۆچۈرۈش]

يازغۇچى تۇرسۇنجان مۇھەممەتكە تون كەيگدۈرۈلدى.
  
ئىختىيارى مۇخبىرىمىز ئەخمەتجان مەتقۇربان(مۇڭداش) خەۋىرى، فوتوسى:
  
چىرا ناھىيەلىك يازغۇچىلار جەمئىيىتى 17- ئىيۇن، ناھىيە تەۋەسىدىكى ئاپتۇرلارنىڭ ئاكتىپ ئاۋاز قۇشۇشى ئارقىلىق، بىر يەرگە جەم بولۇپ، تۇنۇلغان يازغۇچى، ئۇيغۇر رۇمانچىلىقىنىڭ كۆزگە كۈرۈنگەن ۋەكىللىرىنىڭ بىرى بولغان يولداش تۇرسۇنجان مۇھەممەتنىڭ ئىجادىيەت مۇۋاپىيەتلىرىنى قۇتلۇقلاش،  مۇئەييەنلەشتۈرۈش مۇناسىۋىتى بىلەن، قىممىتى ۋە ئەھمىيىتى يۇقىرى بولغان  مۇھاكىمە يىغىنى ئۆتكۈزۈپ،  ئۇنىڭغا تون كەيدۈرۈلدى. مۇھاكىمە يىغىنىغا 25 نەپەردىن ئارتۇق يازغۇچى- شائىر، ھەۋەسكارلار قاتناشتى.
تۇرسۇنجان مۇھەممەت 1965- يىلى 2- ئايدا چىرا ناھىيەسىنىڭ گۇلاخما يېزىسىدا ئوقۇتقۇچى ئائىلىسىدە تۇغۇلغان. 1983- يىلى 7- ئايدا كېرىيە دارىلمۇئەللىمىن مەكتىۋىنىڭ ئومۇمى پەن كەسپىدە ئوقۇپ، شۇ يىلى 9-ئايدا گۇلاخما يېزا ياپىلاق باشلانغۇچ مەكتىپىدە ئوقۇتقۇچى بولغان. 1986- يىلى 9- ئايدىن 1988- يىلى 7- ئايغىچە خۇتەن ۋىلايەتلىك مائارىپ ئىنىستىتوتىنىڭ تىل- ئەدەبىيات كەسپىدە ئوقۇغان. ئوقۇش پۈتتۈرگەندىن كېيىن  چىرا ناھىيە دامىكۇ يېزىلىق ئوتتۇرا مەكتەپتە ئوقۇتقۇچى بولغان. 1991- يىلى 8- ئايدا خۇتەن ۋىلايەتلىك «يېڭى قاشتېشى» ژۇرنىلى تەھرىر بۈلۈمىگە يۆتكىلىپ كېلىپ مۇھەررىر بولغان. 1996- 1997- يىللىرى شىنجاڭ ئۇنۋېرسىتىتىنىڭ چوڭلار مائارىپى بويىچە ئۆزلىكىدىن ئۈگىنىش ئىمتىھانىغا قاتنىشىپ ئەدەبىيات پەنلىرى بويىچە تولۇق كۇرۇسنى تۈگەتكەن. ھازىر بۇ ژۇرنالنىڭ مۇئاۋىن باش مۇھەررىرى بولۇپ ئىشلەپ كەلمەكتە. كاندىدات ئالىي مۇھەررىرلىك ئۇنۋانىغا ئىگە.
تۇرسۇنجان مۇھەممەتنىڭ ئىجادىيىتى 1987- يىلى خۇتەن مائارىپ ئىنىستىتوتىدا ئوقۇۋاتقان چاغلىرىدا باشلانغان بولۇپ، «يېڭى قاشتېشى» ژۇرنىلىنىڭ 1987- يىللىق 3- سانىدا ئېلان قىلىنغان «ھۈنەر ئالماشتۇرۇش» ناملىق ھېكايىسى بىلەن ئەدەبىي ئىجادىيەت سېپىگە كىرىپ كەلگەن. شۇندىن بۇيان «تارىم»، «تەڭرىتاغ»، «يېڭى قاشتېشى»، «شىنجاڭ مەدەنىيىتى»، « ئىلى دەرياسى»، «شىنجاڭ گېزىتى»، «ئۈرۈمچى كەچلىك گېزىتى» قاتارلىق گېزىت- ژۇرناللاردا «ئانا قەدرى»، «بۆرە جىلغىسى»، «ئالۋۇن»، «قىيادىكى ئاي» قاتارلىق 14 پوۋېست، «قارا مۈشۈك»، «يېڭى تاۋۇس ئەللەيىن»، « مەھشەر كۈنى» قاتارلىق 150 پارچىدىن ئارتۇق ھېكايە، «كۈمۈش لېنتىدە چاقنىغان نۇر»، «دېھقان يېنىدا ئېشەك بار»، «ئەل غېمىنى ئەر يەيدۇ» قاتارلىق ئون نەچچە پارچە ئەدەبىي ئاخبارات، نەزىرىيىۋى ماقالىلىرى ئېلان قىلىنغان. مىللەتلەر نەشىرىياتى، شىنجاڭ خەلق نەشىرىياتى، شىنجاڭ ئۇنۋېرسىتىتى نەشىرىياتى، شىنجاڭ ياشلار-ئۆسمۈرلەر نەشرىياتى تەرىپىدىن «ھىجران» (ئىككى توملۇق)، «جەزىرە»، «كۈز يامغۇرى» قاتارلىق رومانلىرى، « قۇدۇقتىكى ئاي شولىسى»، «كۇھىقاپتىكى تەبەسسۇم»، «سېھىرلىك نەي»، « ۋىجدان كۆزى» قاتارلىق پوۋېستلار توپلاملىرى، «ئەل ئايىغى بېسىققاندا»، « تۈندىكى پەرىشتە» قاتارلىق ھېكايىلەر توپلاملىرى نەشىر قىلىنغان. قەشقەر ئۇيغۇر نەشىرىياتى نەشىر قىلغان، تەتقىقاتچى كېرىمجان ئابدۇرېھىم تۈزگەن « ئۇيغۇر پوۋېستلىرىدىن تاللانما» ناملىق يۈرۈشلۈك كىتابنىڭ 3- تومى­–« كروران گۈزىلى» دېگەن توپلامغا «قۇرۇلتاشتىكى كۈنلەر» ناملىق پوۋېستى تاللاپ كىرگۈزۈلگەن. ئۇنىڭ يەنە «جەزىرە» ناملىق رومانى، «قىيادىكى ئاي»، «يېڭى تاۋۇس ئەللەيىن»، «بۇ چۈش ئەمەس»، «شىۋىرغانلىق كېچە»، « توزغاق»، «كىرپىكتىكى نەم» قاتارلىق پوۋېست-ھېكايىلىرى خەنزۇ تىلىغا تەرجىمە قىلىنغان.  
تۇرسۇنجان مۇھەممەتنىڭ «جاھاننىڭ ئېتىكى كەڭرى»، «قۇدۇقتىكى ئاي شولىسى»، «قىيادىكى ئاي» قاتارلىق ئۈچ  پوۋېستى ئايرىم ئايرىم ھالدا « خانتەڭرى ئەدەبىيات مۇكاپاتى» غا، «ئانا قەدرى»، «قۇرۇلتاشتىكى كۈنلەر»، « ئەلۋىدا كىرپىك»، «شەيتانكەرىش» قاتارلىق 8 پارچە پوۋېست- ھېكايىلىرى خۇتەن ۋىلايىتى بويىچە مۇنەۋۋەر ئەدەبىي ئەسەرلەرنى باھالاشتا 1- دەرىجىلىك مۇكاپاتلارغا ئېرىشكەن. تەھرىرلىك كەسپىدە ئۇ تەھرىرلىگەن «خەتەرلىك ئۈچىنچى باسقۇچ» قاتارلىق بىر نەچچە ئەسەر ئاپتونۇم رايۇنلۇق ئاخبارات نەشىرىيات ئىدارىسى تەرىپىدىن تەھرىرلىك مۇكاپاتىغا ئېرىشكەن. شۇنداقلا ئۇ 2007-يىلى 5- ئايدا «تارىم» ژۇرنىلىنىڭ 555 سان نەشىر قىلىنغانلىقىنى تەبرىكلەش كاتتا يىغىنىدا ئاپتونۇم رايۇنلۇق ئەدەبىيات- سەنئەتچىلەر بىرلەشمىسى ۋە «تارىم» ژۇرنىلى تەھرىر بۆلۈمى تەرىپىدىن «ئالاھىدە تۆھپە» مۇكاپاتىغا،  2008- يىلى 8- ئايدا ئاپتونۇم رايۇنلۇق ئەدەبىيات- سەنئەتچىلەر بىرلەشمىسى، شىنجاڭ ئۇيغۇر ئاپتونوم رايونلۇق يازغۇچىلار جەمئىيىتى قاتارلىق ئورۇنلار بىرلىشىپ ئۇيۇشتۇرغان «2- نۆۋەتلىك ياش يازغۇچىلار مۇكاپاتى» نى باھالاش پائالىيىتىدە «ياش يازغۇچىلار نەتىجە مۇكاپاتى» غا، ئۇنىڭ «ھىجران» ناملىق ئىككى توملۇق رومانى 2009- يىلى 12- ئايدا ئاپتونۇم رايۇنلۇق پارتكوم، ئاپتونۇم رايۇنلۇق خەلق ھۆكۈمىتى تەرىپىدىن 3- نۆۋەتلىك «تەڭرىتاغ ئەدەبىيات- سەنئەت مۇكاپاتى» غا ئېرىشكەن. 2011- يىلى 4- ئايدا تۇرسۇنجان مۇھەممەت ئاپتونوم رايونلۇق ئەدەبىيات- سەنئەتچىلەر بىرلەشمىسى، «تارىم» ژۇرنىلى نەشىرىياتى تەرىپىدىن «مۇنەۋۋەر ئەدىپ» مۇكاپاتىغا ئېرىشكەن.  
تۇرسۇنجان مۇھەممەت جۇڭگو يازغۇچىلار جەمئىيىتىنىڭ، شىنجاڭ ئۇيغۇر ئاپتونۇم رايۇنلۇق يازغۇچىلار جەمئىيىتىنىڭ، ئاپتونۇم رايۇنلۇق 12 مۇقام تەتقىقات جەمئىيىتىنىڭ ئەزاسى، ئاپتونۇم رايۇنلۇق يازغۇچىلار جەمئىيىتى 6-، 7- قۇرۇلتىيىنىڭ ۋەكىلى. خوتەن ۋىلايەتلىك ئەدەبىيات- سەنئەتچىلەر بىرلەشمىسىنىڭ مۇئاۋىن باش كاتىپى، ۋىلايەتلىك يازغۇچىلار جەمئىيىتىنىڭ باش كاتىپى.
مۇھاكىمە يىغىنىدا، خوتەن پېداگوگىكا ئالى تېخنىكۇم مەكتىپى تىل- ئەدەبىيات فاكولتېتىنىڭ مۇدىرى، تۇنۇلغان ئوبزورچى ئەنۋەر ھۇشۇر، چىرا ناھىيەلىك 1- ئوتتۇرا مەكتەپنىڭ ئوقۇتقۇچىسى يازغۇچى مەھمۇد سېدىق، چىرا ناھىيەلىك مەدەنىيەت- تەنتەربىيە ئىدارىسىنىڭ پىنسىيونېرى تۇنۇلغان يازغۇچى مەمتىمىن ئابدۇۋېلى، چىرا ناھىيەلىك سىياسى كېڭەشنىڭ كادىرى يازغۇچى مېھرىگۈل ئابلىز قاتارلىقلار تۇسۇنجان مۇھەممەتنىڭ ئىجادىيەت ئەھۋالى ۋە ئۇنىڭ ئەسەرلىرى توغرىسىدا ئۆزلىرىنىڭ كۆزقاراشلىرىنى ئوتتۇرىغا قويۇپ، ئۇنىڭ ھازىرقى زامان ئۇيغۇر ئەدەبىياتىغا قوشقان تۆھپىسى ۋە تەشكىلاتچىلىق رۇلىغا يۇقىرى باھا بىرىلدى.   
سۈرەتتە: مۇھاكىمە يىغىنىدىن كۈرۈنۈشلەر  
  
ئىختىيارى مۇخبىرىمىز ئەخمەتجان مەتقۇربان(مۇڭداش) خەۋىرى، فوتوسى
(چىرا ناھىيەلىك خەلق ھۆكۈمىتى ئۇچۇر مەركىزىدىن)
تېلىفۇن: ئىشخانا- 6713409—13070073313--18999055233  

فوتو كۆرۈنمەيدىغۇ؟

تولۇمۇ ياخشى،ئەھمىيىتى زور بىر ئىش بوپتۇ،قەدىرلىكلەر قەدىرلىنىشى كېرەك.

تۇرسۇنجان ئاكىمىزنىڭ بۇنىڭدىن كېيىنكى ئىجادىيەت مۇساپىسى تېىىمۇ ھوسۇللۇق بولغاي.

تۇرسۇنجان ئاكىمىزغا تېخىمۇ زور ئۇتۇق ۋە سالامەتلىك يار بولسۇن!

تۇرسۇنجان ئاكىمىزنىڭ بۇنىڭدىن كېيىنكى ئىجادىيەت سەپىرى تېخىمۇ مول-ھوسۇللۇق،تېنى سالامەت بولغاي!

موبارەك بولسۇن ، تۇرسۇنجان ئاكامنىڭ بۇندىن كېيىنكى يوللىرى تېخىمۇ داغدام بولغاي !!!

مۇبارەك بولسۇن تۇرسۇنجان ئاكا ،  ئەلنى سۆيگەن يازغۇچىلارنى ئەلمۇ سۈيىدۇ. سۈيۈش ۋە سۈيۈلۈشتىن قەلىبلەر شادلىققا تولسۇن.                 ئىجادىيتىڭىز تېخىمۇ بەرىكەتلىك بولغاي ئاكا .                 موھەممەدروزىدىن سىزگە سالام .

تۇرسۇنجان مۇھەممەت ئاكىنىڭ تېنىنىڭ سالامەت ،ئىجادىيەتلىرىنىڭ ئۇتۇقلۇق بولىشىنى تىلەيمەن.

تۇرسۇنجان ئاكا بۇ خەۋەرنى كۆرۈپ ،سىزگە بولغان ھۆرمىتىم تېخىمۇ ئاشتى .تىنىڭىزگە سالامەتلىك ،بارلىق ئىشلىرىڭىزغا ئاسايىشلىق تىلەيمەن.

ئىستىداتلىق يازغۇچى تۇرسۇنجان مۇھەممەت ئاكىمىزغا  مۇبارەك بولسۇن!  لېكىن رەسىملەر كۆرۈنمەيدۇ-يا ئەخمەتجان!

كاتتا ئىش بوپتۇ، ئۇ بۇ تونغا ھەقىقىي مۇناسىپ كېلىدىغان يازغۇچىمىز. ئۇنىڭ تېنىگە ئامانلىق، ئىجادىيەتلىرىگە يەنىمۇ ئۇتۇق تىلەيمەن.

مۇبارەك بولسۇن بۇرادەر ئەزىز!! ھارماڭ!!!
پائالىيەتنى ئۇيۇشتۇرغۇچىلارغا ئاپىرىن! تۇرسۇنجانغا قانچىلىك قىلساق ئەرزىيدۇ.

   يازغۇچى تۇرسۇنجان مۇھەممەت مەسئۇلىيەتچان مۇھەررىر بولۇپلا قالماي،مول ھوسۇللۇق ئەدىبلىرىمىزنىڭ بىرى.ئۇنىڭغا ساقلىق ،ئىشلىرىغا ئۇتۇق يار بولغاي!

سۇرەت چىقماپتىغو؟! بولسا سۇرىتىنىمو يوللاپ قويغان بولساڭلا تېخىمو ياخشى بولاتتى!!!