شېئىرلار ( پاشاگۈل نىياز) [ئۇلانما كۆچۈرۈش]

1                     
   
  مىڭ يىلغىچە ھىجران ئۈنى ئۈزۈلمەس

-پاشاگۈل نىياز (توقسۇن)

باشلاپ ياشلىق باغلىرىمغا زىمىستان،
بەكمۇ ئەلەم قىلغان سۆيگۈ جاپاسى.
سۇ سىڭمىگەن تۇپراق كەبى دىلىستان،
يۈرىكىمدە گۈلخان  ئۇنىڭ لاۋاسى.

كۆزلىرىمدە تەۋرىنەتتى مۇڭسىراش،
چاك يېرىلغان نېچۈن قەلب دالاسى.
سۈزۈك،پاكىز كېچىلەردە پىچىرلاش،
سىيلىغايمۇ كۈلۈپ تاڭنىڭ ساباسى؟.

دىل ئازابى  پايانى يوق تۈگىمەس،
يامغۇرغىمۇ سىڭىپ كەتكەن نىداسى؟.
مىڭ يىلغىچە ھىجران ئۈنى ئۈزۈلمەس،
تىترىمەكتە ئۇنىڭ مۇڭلۇق ناۋاسى.

پەردازلانغان كۈلۈشلەردىن بىزارمەن،
بۇلغانمىسۇن ۋۇجۇدۇمنىڭ ھاۋاسى.
كىچىككىنە بەختتىنمۇ بىدارمەن،
نېچۈن غەملىك،زادى كىمنىڭ خاتاسى؟

بارخانلارنى ماكان تۇتسام تۇيۇقسىز ،
ئۇزاقلاردىن كەلسە كارۋان ساداسى.
بەخىت گۈلۈم توزىغايمۇ پورەكسىز،
قېنى؟ نەدە؟ مۇھەببەتنىڭ داۋاسى؟....
.2012-يىلى 7-ئاينىڭ 29-كۈنى،جەنۇبى تاغ ،يازغۇچىلار ئائىلىسىدە يېزىلدى.

2

مەنزىلىمدە مەڭگۈ ئۆڭمەس ھىدايەت بار

-پاشاگۈل نىياز (توقسۇن)

سىرغىپ-سىرغىپ كۈيلەر تامغان يۈرىكىمدە،
ئۆزگىلەرنى مەست قىلغۇچى كارامەت بار.
بۇقۇلدىغان مۇڭلۇق ئىزگۈ ئۈنلىرىمدە،
سەۋر-تاقەت قۇچاقلىغان ئامانەت بار.

بوران-چاپقۇن دومۇلاتتى سوقۇپ ھەريان،
ھەر كۈنلۈكى بۇ باشىمدا مالامەت بار.
رۇخسارىمدا زەپىرانلىق بولدى ئايان،
ھەسرەتلەرگە سىرداش بولغان ئالامەت بار.

يۈزلىرىمگە سانسىز يول-يول قورۇق تولغان،
ئوقۇپ-ئوقۇپ تۈگەتكۇسىز تالاي خەت بار
دىلىم پاكىز،ئاسمان بىلەن بوي تالاشقان،
نازۇك ئەمما يىمىرىلمەس بىر قامەت بار.

چېچەكلىرى روھنىڭ بۇندا يىمىرىلمەس،
ئىستەكلەردە مۈگدەپ قالغان شاپائەت بار.
چولپان سۆيگەن ئىزلىرىمنى كىشى بىلمەس،
گۈل سەرۋىدەك بويلىرىمدا ماتانەت بار.

كېچىلەردە دولقۇنلىغان ھاياجاندا،
چەكسىزلىككە سوزۇلغان بىر  ساداقەت بار.
ھەسرەت،بەخت تەڭ تۇتاشقان باياۋاندا،
قانچە ئەسىر داۋاملاشقان جاراھەت بار.

يوپۇرماققا مىسال ئەتمەڭ غازاڭ بولغان،
مەنزىلىمدە مەڭگۈ ئۆڭمەس ھىدايەت بار.
يىقىلسىمۇ يېتىپ مىڭ يىل كۆكلەيدىغان،
قۇملۇقتىكى توغراق كەبى شىجائەت بار.

2012-يىلى 7-ئاينىڭ 29-كۈنى كەچ،جەنۇبىي تاغ .

3

پەزىلەت بابىدا ياشىغىن لىللا


خام-خىيال چۆلىگە باشلىماڭ كارۋان،
ئىستەكلەر بارخاندا سولۇپ تۈگەيدۇ.
چاڭقىغان قەلبتىن تۆكۈلسە ھىجران،
ئىشىق غەۋغاسىغا قويۇپ  تۈگەيدۇ.

چېچەكلەپ پاك روھى مۇڭلۇق يۈرەكنىڭ،
لەپىلدەپ –لەپىلدەپ چۈشۈپ تۈگەيدۇ.
پۇشايمان ئوتلىرى  تۈمەن ھەسرەتنىڭ،
تىلەكلەر باغرىدا  كۆيۈپ تۈگەيدۇ.

بىداۋا تەنھالىق، قىرتاق كېچىلەر،
مىڭ پاتمان ھىجرانغا تويۇپ تۈگەيدۇ.
مانانلىق شاخلاردىن توزغان چېچەكلەر،
چاڭقىغان تىنىقتا  قۇرۇپ  تۈگەيدۇ.

ۋاپاسىز نامەرتكە بەرمىگىن پۇرسەت،
نادانلىق نۇرىدا سويۇپ تۈگەيدۇ.
ئىشەنچنىڭ پېچىدا تاۋلىغىن مىڭ رەت،
چىناردەك بويۇڭنى ئورۇپ تۈگەيدۇ.

ھاياتلىق كۆكىدە قىلسىمۇ جۇلا،
تىنىمسىز جىمىرلاپ كۈلۈپ تۈگەيدۇ.
پەزىلەت بابىدا ياشىغىن لىللا،
ئەي ئىنسان، ھەممىسى ئۆلۈپ تۈگەيدۇ.

(2012-يىلى 7-ئاينىڭ 29-كۈنى كەچ،جەنۇبىي تاغ)

بۇ يازمىنى ئاخىرىدا   paxagul تەھرىرلىگەن. ۋاقتى  2012-8-8 20:11  

تېتىملىق يېزىلغان شېئىرلارنى ئۇقۇپ شاتلاندىم . بۇ يازمىنى ئاخىرىدا   yidayat تەھرىرلىگەن. ۋاقتى  2012-8-1 16:12  

ئېلھاملىرىڭىز ئۈزۈلمىگەي!

باھاردىكى مىسكىنلىك  

-پاشاگۈل نىياز (مۇڭلۇق)

ھەر سۈبھىدە قىزىل شەپەق زېمىننى سۆيۈپ،
گۈزەل يايلاق يېپىنغاندەك ياپيېشىل كىمخاپ.
قارىغايلار تۇرار مەزمۇت قەددىنى كېرىپ،
كەڭ ئالەمگە غالىبانە نەزەردە قاراپ.
گۈل تەبىئەت تۇرسا شۇنداق يېقىملىق كۈلۈپ،
مېنىڭ كۆڭلۈم تۇرار مىسكىن،مۇڭلۇنۇپ يىغلاپ.

مەيىن شامال زوق-شوق بىلەن جاھاننى كەزسە،
ئاق بۇلۇتلار گاھى كۈلۈپ،گاھىدا يىغلاپ.
يۇمران قوزا ئاچچىق مەرەپ مەممە ئىزدىسە،
ئات ئۈستىدە چوپان يىگىت پادىنى قوغلاپ.
جىمى ئالەم شۇنچە تاتلىق جىلمىيىپ كۈلسە،
يۈرىكىمدە ئاچچىق ئازاپ باغرىمنى تىلغاپ.

چىغىر يوللار ياتار مەستخۇش سەھرانى سۆيۈپ،
باغۇ-بوستان،گۈل-چېچەكتىن خۇش ھىد تارايدۇ.
بۇلاقلارمۇ يىراقلاردىن شىلدىرلاپ ئېقىپ،
بارچە قۇشلار ۋىچىر-ۋىچىر مۇڭلۇق سايرايدۇ.
يېشىل دۇنيا  تەبەسسۇمدا تاتلىق جىلمىيىپ،
يۈرىكىمنى مۇڭغا بۆلەپ ھەسرەت مارايدۇ.

سۇسىرىغان جىلغىلارنى لۆمۈلدەپ يۇتۇپ،
ئەزىم دەريا ئۆركەش ياساپ ئاقىدۇ راۋان.
ئېتىلغانچە چايكا ئوقتەك بېلىقنى تۇتۇپ،
كۆپكۆك دېڭىز دولقۇنلىنىپ سۆزلەيدۇ بايان.
جىمى ئالەم شوخ يىگىتتەك مەيلىمنى ئۇتۇپ،
يۈرىكىمنى قاماللايدۇ تېڭى يوق ھىجران.

مۇز چوققىلار تۇمان ئارا سۆيۈشەر تىمتاس،
مانانلاردىن  قار گۈللىرى كۈلەر چېچەكلەپ.
لاۋۇلدىغان ماگمىلار ھەم سالغاندەك قىقاس،
يانار تاغلار ۋولقانلارنى چاچار ئېتەكلەپ.
مۇشۇ مۇڭلۇق سىياقىمنى قىلامسەن قىياس،
يۈرىكىمدە مەڭگۈلۈك بىر ھەسرەت پورەكلەپ.

ناۋات رەڭلىك بىپايان بىر سېلىنچا گويا،
مۇز ئوكيانلار ئىچىمدە ئېھ لاۋۇلداپ كۆيەر.
ئوخچۇپ-ئوخچۇپ يۈرىكىمدىن ھەسرەتلىك سادا،
پۈتكۈل تېنىم قوقاس كەبى سېنىلا سۆيەر.
مەڭگۈ-مەڭگۈ بوزلىماقتا پىغانلىق نىدا،
كەل باغرىڭنى باغرىمغا ياق سۆيۈملۈك دىلبەر !.

2012-يىلى 8-ئاينىڭ 1-كۈنى چارشەنبە.

جەنۇبىي تاغ يازغۇچىلار ئائىلىسىدە يېزىلدى.


بۇ يازمىنى ئاخىرىدا   paxagul تەھرىرلىگەن. ۋاقتى  2012-8-6 10:26  

قىران ،ھىدايەت ،دىلداش قاتارلىقلارنىڭ شېئىرلىرىمغا ئەستايىدىل باھا بەرگىنىگە رەھمەت، كۆپرەك پىكىر- تەلەپ ،تۈزىتىش بەرگەيسىلەر!

لېرىكا  تۈسى قويۇق،ياخشى  سىزىلغان تەبىئەت كارتىنىسى!....

ئىجادىيەتلىرىڭىزنىڭ ئۇتۇقلۇق بولۇشىغا تىلەكداشمەن.

ئەزىزلەرنىڭ كۆپرەك پىكىر-تەلەپ بېرىپ تۈزىتىشىنى ئۈمىت قىلىمەن.رىغبەتلىرىڭلارغا تەشەككۈر.

يۇلتۇزدەك تۆكۈلسە يۇلتۇز كۆزۈمدىن،
-پاشاگۈل نىياز(توقسۇن)
يۇلتۇزدەك تۆكۈلسە يۇلتۇز كۆزۈمدىن،
ئەزىزىم مېھرىڭدە كۆيىمەن تىمتاس.
قاراسلاپ سۇنساممۇ كەچمەي ئۆزۈمدىن،
مېھىرلىك باغرىڭنى قىلىمەن قىياس.

يۇلتۇزدەك تۆكۈلسە يۇلتۇز كۆزۈمدىن،
ئەسەبىي ھالەتتە كۈلمەكتە لېۋىم.
مۇڭلىنىپ غېرىبلىق-مۇھتاجلىقىمدىن،
يىغلاشنى تامامەن ئۇنۇتتۇم جېنىم.

دەرەخنىڭ شاخلىرى شەرەتلەپ گويا،
تۇيغۇمنى چالغىتىپ ئويلاتتى سېنى.
ھەپتە ۋە ئايلارنىڭ ئاراچلىرىدا،
قىياندەك باسىدۇ يالغۇزلۇق مېنى.
(2012-يىلى 2-ئاينىڭ 10 –كۈنى جۈمە توقسۇندا يېزىلدى.)

ياخشى يېزىپسىز.

ماۋۇ شېئىرلار تولىمۇ ياخشى چىقىپتۇ،قولىڭىزغا قۇۋۋەت،ئىجادىيىتىڭزگە بەرىكەت تىلەيمەن.

بوزقۇت قاتارلىقلارنىڭ شېئىرىمغا باھا بەرگىنىگە رەھمەت

كۆپرەك يېزىۋىلىڭ، مۇنداق ئىلھامغا باي كۈنلەر ئادەمگە ئاز نىسىپ بولىدۇ.شېئىرلار بەكمۇ تېتىملىق چىقىپتۇ، سۆيۈنۈپ تۇرۇپ ئوقۇۋالدىم. سىزگە تەشەككۈرلەر.....

  بۇ توردىكى شائىرە قىزلارنىڭ يۈرىكى ئۆت، تىلى چوغ، تىنچسىز ھاياتتىن تىنچلىق ئىزدەيدىغان مەردانىلەردۇر.