ئەلىجان ئۇبۇل [ئۇلانما كۆچۈرۈش]

ئەلىجان ئوبۇل خەنجەر 1973-يىلى 9-ئايدا قەشقەر يېڭىشەھەر ناھىيىسىنىڭ باغچى يېزىسىدا بىر مەرىپەتپەرۋەر ئائىلىدە دۇنياغا كەلگەن. 1991-يىلىغىچە يېڭىشەھەر ناھىيىسىدە باشلانغۇچ، تولۇقسىز ۋە تولۇق ئوتتۇرا مەكتەپلەردە ئوقۇپ، 1991-يىلى9-ئايدىن 1996-يىلى 7-ئايغىچە شىنجاڭ ئۇنىۋېرسىتېتىنىڭ ئەدەبىيات فاكۇلتېتىدا ئوقۇغان. 1996-يىلى 7- ئايدا ئۇنىۋېرسىتېتنى ئەلا نەتىجە بىلەن پۈتتۈرۈپ قاراماي شەھەرلىك 2-ئوتتۇرا مەكتەپكە تەقسىم قىلىنغان. ئۇ ھازىرغىچە بۇ مەكتەپتە ئوقۇتقۇچىلىق قىلىۋاتىدۇ.
ئەلىجان ئوبۇل خەنجەرنىڭ ئەدەبىي ئىجادىيىتى ئوتتۇرا مەكتەپتە ئوقۇۋاتقان مەزگىلدىن باشلانغان بولۇپ،1991-يىلى «تارىم غۇنچىلىرى» ژۇرنىلىدا ئېلان قىلىنغان «مېنىڭ دادام» ناملىق ھېكايىسى بىلەن رەسمىي ئىجادىيەت سېپىگە قەدەم قويغان. شۇنىڭدىن تارتىپ ئۇ «تارىم»، «شىنجاڭ سەنئىتى»، «شىنجاڭ ياشلىرى»، «تەڭرىتاغ»، «ئەدەبىي تەرجىمىلەر»، «تارىم غۇنچىلىرى»، «قەشقەر»، «قۇمۇل ئەدەبىياتى»، «مايبۇلاق»، «شىنجاڭ گېزىتى»، «شىنجاڭ ئىقتىساد گېزىتى»، «ئۈرۈمچى كەچلىك گېزىتى»، «شىنجاڭ ئۆسمۈرلىرى گېزىتى»، «شىنجاڭ رادىئو-تېلېۋىزىيە گېزىتى» ۋە «قاراماي گېزىتى» قاتارلىق مەتبۇئاتلاردا پوۋېست، ھېكايە، نەسىر، شېئىر، ئوبزور، ئەدەبىي تەرجىمە بولۇپ 650 پارچىدىن ئارتۇق ئەسەر ئېلان قىلغان. ئۇنىڭ «تۈتۈنگە ئايلانغان روھ»، «ئاخىرلاشمىغان چۈش» قاتارلىق پوۋېستلىرى، «كېچىكىپ يېرتىلغان كونۋېرت»، «نۇرلۇق سىيما» قاتارلىق ھېكايىلىرى، «كېچىكىپ ئېچىلغان گۈلدىن ئىجتىمائىي  رېئاللىققا نەزەر »، «‹ شور دەريا ›نىڭ ئۇ تەرىپىدە كۆرگەنلىرىم»، «ئىجادىيلىق ئىلمىي ماقالىنىڭ جېنى»، «تەپسىلاتلار تەسۋىرىنىڭ ئەدەبىي ئەسەردىكى رولى»، «مېنى ئەللەيلەتكەن لىرىك كۈي»، « رېئاللىققا نەزەر»، «ئۆلتۈرۈش كېرەكمۇ ياكى قۇتقۇزۇشمۇ؟»، «‹ھەسرەتلىك ھايات›تىكى چوڭقۇرلۇق» قاتارلىق كىنو-تېلېۋىزىيە ئوبزورلىرى،  «بىر ناخشا، بىر پىكىر»، «نېفىتلىك ئاپتورلىرىدا خاسلىق» قاتارلىق ماقالە-ئوبزورلىرى ئوقۇرمەنلەر ئارىسىدا بەلگىلىك تەسىر قوزغىغان. «قارغا دەپنە قىلىنغان چۈش»، «شەھەر ئەدەبىياتى ھەققىدە مۇلاھىزە» قاتارلىق ئەسەرلىرى ھەرخىل مۇكاپاتلارغا ئېرىشكەن. ئۇ ھازىر شىنجاڭ يازغۇچىلار جەمئىيىتى ۋە قاراماي شەھەرلىك يازغۇچىلار جەمئىيىتىنىڭ ئەزاسى.
ئەلىجان ئوبۇل خەنجەر ئوقۇتۇشنىڭ ئالدىنقى سېپىدە پېداكارلىق بىلەن ئىشلەشتىن سىرت، يەنە «شىنجاڭ مائارىپى» ژۇرنىلى، «شىنجاڭ مائارىپ گېزىتى»، «كىتاب مۇنبىرى»، «قاراماي مائارىپى» قاتارلىق ئىلمىي ژۇرناللاردا 30 پارچىدىن ئارتۇق ئىلمىي ماقالە ئېلان قىلىپ كەسىپداشلىرى ئارىسىدا بەلگىلىك تەسىر قوزغىدى.