سائادەت ساتتار ئايتۇغ: قوشاقلار

سائادەت ساتتار · ۋاقتى: 2012-4-4 21:06:47


	بۇ يىل قىشتا تېخىچە، قار ياغمىدى لەپىلدەپ. يۈرىدىكىن نەلەردە، مىنىڭ يايرىم لەكىلدەپ؟ كۆنۈپ قالدۇق ئۆز-ئارا، تۇيماستىنلا ئىچىكىپ. گاھ دىيىشتۇق سەمىمى: -تۇنۇشۇپتۇق كېچىكىپ. يوق ئەمەستۇر بەزىدە، ھەسەتخورنىڭ ئۆسىكى. تېپىلغاندەك ھەرجايدا، ئىتقا غاجار سوڭىكى. ................ كۆز تەگمىسۇن دوستلارغا، دەپ تىلەيمەن ھەرقاچان. سىلەر ئۈچۈن جۈپ قولۇم، كۆكسۈمدىدۇر ھەر زامان. ئېتىز بويلاپ يول ئاچتىم، بولسۇن دەيمەن تىرگىنى* گەپ-سۆزنىڭمۇ ھەرجايدا، بولسۇن لايىق تىزگىنى.

سائادەت ساتتار · ۋاقتى: 2012-4-4 21:07:21


	بۇغدايلىقتا كۈز كەلسە، قالار بۇغداي ئېڭىزى. نىمە كەلسە دەيدىكەن، بەزىلەرنىڭ ئېغىزى. زەپ چىرايلىق بېغىم بار، تەنگە شىپا ھاۋاسى. شۇنچە كۈتسەم كۆرۈنمەس، سۆيگەن يارنىڭ قاراسى. زەڭگەر كۆزلۈك بۇلاپكا، زەپ ياراشتى ياقامغا. يارغا خوش دېگەن بىلەن، نەچچە باقتىم ئارقامغا. قارلىغاچنىڭ ماكانى، ھويلىدىكى پىشايۋان. ئالدىراپلا خوش دىمە، قىپ قالىسەن پۇشايمان. ئۇزارغانچە زىمىستان، باھارلارنى سېغىندۇق. غېرىپچىلىق باسقاندا، ئۆزيارلارنى سېغىندۇق. باھار كەلسە باغلارغا. بۇلبۇل كىلىپ سايرىسۇن. ئۇلۇغ ھېيت-ئايەمدە، بارچە دىللار يايرىسۇن.

سائادەت ساتتار · ۋاقتى: 2012-4-4 21:08:01


	ئەنئەنىمىز ئەزەلدىن، ئۆي-ئۆيلەرنى پەتىلەش. كەتمەس ھەرگىز چاقىرىش، يا نازلىنىپ-ئەركىلەش. ياشلىقىدا سۆيگۈ دەپ، توۋلىمىغان كىملەر بار. قىزچاقلارنىڭ كۆڭلىنى، ئوۋلىمىغان كىملەر بار. ياراشمايدۇ يىگىتكە، دەرت دەپ قاپاق تۈرگۈلۈك. ھېيت-ئايەمدە دەرتلەرنى، ئۇنتۇپ خۇشال يۈرگۈلۈك. باردۇر بىرجۈپ ئوغلىقىم، كۈندە ئۈچ ۋاق باقىمەن. قۇلۇم سەللا بوشىسا، قوشاقلارنى قاتىمەن. ئۆستەڭدىن سۇ ئەكەلدىم، لىق تولدۇرۇپ چېلەككە. يايرىم بېغەم يۈرىيدۇ، ئۆتنى سېلىپ يۈرەككە.

سائادەت ساتتار · ۋاقتى: 2012-4-4 21:08:53


	نوگاي سالسام ئۆستەڭگە، بۈلۈندى ئاي شولىسى. بۇ زاماندا ۋاپاسىز، يىگىتلەرنى تولىسى. ئۇنتۇپ قاپتۇ قۇشقاچلار، تاڭغۇچە ۋىچىرلاشنى. ئۇنتۇپ قاپتۇ بىغەم يار، ئاخشامقى پىچىرلاشنى. جىگدىلىكتىن يانغۇچە، قاقاسلىققا ئات سالدىم. بىۋاپانى يار تۇتۇپ، ئالدانغىلى تاس قالدىم. ئەجەپ تەستكەن چىقارماق، ئاق كۆينەكنىڭ كىرىنى. راستلا كۆيسە يايرىڭىز، ھامان ئېيتار سىرىنى. ئاغرىپ قاپتۇ ئوغلىقىم، يەم يىگىلى تاۋى يوق. يۈرەككە ئوت سەپ قويۇپ، بېغەم يارنىڭ كارى يوق.

سائادەت ساتتار · ۋاقتى: 2012-4-4 21:09:33


	پالاق ئويناپ ئېڭىزدا، يۈگرەپ يۈرەر بالىلار. يار قەدرىنى بىلمەيدۇ، ئەقىدىسى چالىلار. تاللاپ ئۈزگەن قوغۇنلار، تېخى سويما-توڭ ئىكەن. چىرايى يوق سەت تازنىڭ، ئەجەپ ھالى چوڭ ئىكەن. ئاپام مىنى ساقلايدۇ، ئۇيۇققا ئاش ئەپ قويۇپ. قاش ئاتىدۇ بوۋايلار، يۈرەكلەر ياش دەپ قويۇپ. ئوتتۇز يىگىت،توققۇز قىز، چۈشتى خۇشال بەزمىگە. ئەمدى گەپمۇ قىلماسمەن، يارىم نىمجان-ئەزمىگە. ئالىقاغا بازىرى، يەكشەنبىدە قىزارمىش. ماڭا ئاتاپ جانانىم، گۈلدەستىلەر تىزارمىش. ئۈچئۆستەڭگە بارغىچە، سۇندى ھارۋا ئوقلىرى. ئەجەپمۇ يامان ئىكەن، يېڭى يارنىڭ ئوتلىرى.

سائادەت ساتتار · ۋاقتى: 2012-4-4 21:11:00


	ئىشىك ئالدى چوڭ ئېرىق، بىرلا ئاتلاپ ئۈتىمەن. يارغا كۆيگەندىن بېرى، تىلفۇن ساقلاپ، كۈتىمەن. قوشئاۋاتتىن قايرىلساق، كۆرۈنىدۇ ئۆچكۈلۈك. بىۋاپانى سۆيگۈچە، يارسىز تەنھا ئۆتكۈلۈك. مەلىدىكى بالىلار، ھاشارنى تاماملاپتۇ. چىق دىگەندە چىقمىسام، يار مەندىن يامانلاپتۇ. ھويلامدىكى باراڭدا، ئىككى شىڭگىل ئۈزۈم بار. يار كۆڭلىنى ئالغۇدەك، ئىككى ئېغىز سۆزۈم بار. تاشقىن كەلسە ئۆستەڭگە، كۆۋرۈك سېلىپ ئۆتكۈلۈك. تۆت كۈنلۈك بۇ ئالەمدە، يارغا قېنىپ ئۆتكۈلۈك.

زۆھرەگۈل ھامۇت · ۋاقتى: 2012-4-5 02:03:16


	ئاپىرىن قوشاقلارغا!

تۇرسۇنگۈل ساۋۇت · ۋاقتى: 2012-4-5 11:50:29


	مەندىنمۇ ئازراق كەتتى ئەمىسە: ھويلامدىكى گۈللۈككە ، ئۇرۇق سېلىپ ئۈندۈرەي. پۇراق چاچسا قىزىل گۈل ، يارغا تۇتۇپ كۈلدۈرەي. ئاق رومالنى سالماپسەن،، قىزىل رومال ئېپ بېرەي. كەلگىن گۈلۈم سىرداش بول، دەرتلىرىمنى دەپ بىرەي. بېغىڭدىكى تاللارنى ، ھەركىم كېلىپ ئەگمىسۇن، ئاگاھ بولغىن جانانىم، يامان كۆزلەر تەگمىسۇن. بۇ يازمىنى ئاخىرىدا تۇرسۇنگۈل ساۋۇت تەھرىرلىگەن. ۋاقتى 2012-4-5 11:52

سەۋىردىن · ۋاقتى: 2012-4-6 09:32:19


	قوشاق دەپ قاپسىز ،مانا ئەمسە :قوشاقلار ئاپئاق، ئاپئاق مامۇق قار ، جىلۋە قىلار يۇلغۇندا . زىمىستاننىڭ باھارى ، چېچەك ئاچار قۇملۇقتا . ۋىچىر –ۋىچىر قۇشقاچلار ، تىنماي سايرار تېرەكتە . تىمتاسقىنە تەبىئەت ، ھەۋەس قوزغار يۈرەكتە . كەڭ تەبىئەت كېيىپتۇ . ئاق لىباستىن يېپىنچا . چۇشلۇرىمدىن ئورگەلدىم ، سەن كىيىپسەن غىچ زىلچا . ئوتكۇزمەكمۇ تەس ئىكەن ، يالغۇزلۇقتا كۇنلەرنى . يۇلتۇزلارغا ھال ئېيتىپ ، سېغىنىشتا تۇنلەرنى . باياۋاندا ئۇزاق يول ، ماڭغانسىرى تۇگمەس . ئىزدەپ بارسام مەن سىنى ، ئاكاڭ ئەمدى يەكلىمەس . قىشنىڭ سۇرى ھەيۋەتلىك ، جېمى جانلار ئوچەكتە ، سەن يارىمنىڭ پىراقى ، گۇلخان بولدى يۇرەكتە . ئويلاپ كېچە مەن سېنى ، چۇشەپ چىقتىم تاڭغىچە . ساقلاپ تۇرغىن ئەزىزەم ، مەن يېنىڭغا بارغۇچە . يىراقتىكى قىشلاقتىن، چوپان ئۇنى كېلىدۇ . سەلكىنلەردىن پۇرايمەن ، سېنىڭ ھېدىڭ كېلىدۇ . چىپارتاغ نېفىتلىگى ، قۇم بارخانلىق ئىگىز -پەس . ئىككىمىزنى ئايرىدى ، دۇشمەن دىگەن تېگى پەس . چىپار تاغنىڭ يولىدا ، تۆرغاي تېنماي سايرايدۇ . يارنىڭ قىلغان سوزلىرى ، خىيالىمدىن كەتمەيدۇ . يىراقتىكى ئاق مۇنار ، غەم سالىدۇ بۇ باشقا ، شۇ مۇناردا ئىشلەيدۇ ، مېنىڭ يايرىم مائاشقا . ئەجەپمۇ تاڭ ئاتمىدى ، قىشنىڭ ئۇزۇن كېچىسى . مېنىڭ سۆيگەن شۇ يارىم ، قىزىل گۇلنىڭ غۇنچىسى . ئادەم يۇقتۇر قېشىڭدا ، تەييار بولدۇم بارغىلى . قوغلىمىغىن تۇنلەردە ، سەۋرىم باردۇر قۇنغىلى . قەدرىڭ ئەجەپ ئۆتۇلدى ، بورۋايدا ،قۇملۇقتا . نە مەنا بار بىلمىدىم ؟ سەن ئەۋەتكەن يوللۇقتا . ئاسماندىكى كەپتەرلەر، يايرىمغا سالام دەڭلار . بورۋايدا ئالدىراش ، سورسا ئامان دەڭلار . ئەجەپ سايرىدىڭ كەكلىك ، سەنمۇ مەندەك غېرىپمۇ . سەنمۇ ياردىن ئايرىلىپ ، يۇرەك- باغرىڭ يېرىقمۇ . كەل دىگەنگە كەلمەيدۇ ، يارنىڭ ئويى دوقمۇشتا . يازدا يازغان خېتىنى ، تاپشۇرۋالدىم بۇ قىشتا . تۇرخۇنىڭدىن چىققان ئىس ، ئاق بۇلۇتتەك ھەم كۆكۆش . چىلىق –چىلىق تەرلەپسەن ، قېنى بەرگەن يەلپۇگۇچ . بورۋايدا ئىشلەيدۇ ، ھەر مىللەتنىڭ باللىرى . ئۇتتېرۋىتىپ قىماردا ، تۇگۇمەيدۇ غەملىرى . ئۆيىمىزدىن ئايرىلىپ ، چىپار تاغدىن قايرىلىپ . بىر ئاي چولدە ئشلەيمىز، سېغىنىشتا ياش ئېلىپ . ئىشلىگەنگە تۇگۇمەس ، بورۋاينىڭ ئىشلىرى . تاپا –تەنە ،بىسىمدىن ، ئۇيقا يوقتۇر كەچلىرى . بىر ئاي چۆلدە ئىشلىسەك ، ئون كۇن ئويدە بولىمىز . قېنىشماستىن يار بىلەن ، چولگە راۋان بولىمىز . بوسىغىدىن ئاتلىساق ، يىغا باسار كوزلەرنى . قۇچاقتىكى بالىمىز ، سېيپاپ كېتەر يۇزلەرنى . بورۋايدا كادىرنىڭ، نەشتەر ئىكەن گەپلىرى . كۆنۇپ كەتكەن جاپاغا ، ھەر مىللەتنىڭ باللىرى . دىزىل ماتۇر ئاۋازى ، پاڭ قىلىدۇ قۇلاقنى . باشلىق قىلغان تاپىلار ، قان قېلىدۇ يۇرەكنى . ئەتىرەتكە چىق دەيدۇ ، ئاغرىپ ياتسام ياتاقتا . مائاشىڭنى ئالالماي، ئەمدى قالما چاتاقتا . تۇتسا تۇتسۇن مائاشتىن ، ئاچچىق گەپنى قىلمىسۇن . ئوزى ئويناپ ئويۇننى ، بىزگە تاپا قىلمىسۇن . ئىشلىگەنگە ئولمەيدۇ ، ئادەم جېنى جان ئىكەن . يارلانغاندا قول -پۇتلار ، ئاققانلىرى قان ئىكەن . تۇگمەي قالسا ۋەزىپە ، ئىتتەك قاۋاپ تىللامسەن ، بىزگە سىلىپ زۇلۇمنى ، ئوزەڭ بەگدەك ياتامسەن. قۇرۇپ كەتتى كۆز ياشلار، تولا يىغلاپ جاڭگالدا . ئاق يول تىلەپ يار قالدى . مەن بۇ ياققا ماڭغاندا . پۇقۇرايدۇ قۇيۇن تاز ، شامىلىنىڭ تاينى يوق. ئالتاي يازدا ئىشلىسەك ، مۇكاپاتنىڭ تاينى يوق . چەكتىم ئاچچىق مۆخۇركا ، مۇڭداشقىلى ئادەم يوق . جىمى گەپنى مەن ئاڭلاپ، سەن ئوينىغىن كۆڭلۇڭ توق . بۇ يازمىنى ئاخىرىدا سەۋىردىن تەھرىرلىگەن. ۋاقتى 2012-5-19 12:56

ي.ت.توغراق · ۋاقتى: 2012-4-6 14:48:54


	مۇمكىن بولسا ئاخىرىنى داۋاملاشتۇرساق بولاتتى

ئۇچتېكىن · ۋاقتى: 2012-4-6 19:18:11


	ئىنكاس يازدىم مةن سىزگة، قۇشاقچىلارغا قېتىلاي دةپ. ئةگةر رۇخسةت قىلسىڭىز، رىشتىلةرگة چېتىلاي دةپ.

ساجىدە سۇلايمان · ۋاقتى: 2012-4-6 23:13:06


	كۆپ قىرلىق قەلەم ساھىبى سائادەتنىڭ بۇ قوشاقلىرىنىڭ بەزىلىرىنى كونا مۇنبەردە ئوقۇغان ئىدىم، بۈگۈن قالغانلىرىنى ئوقۇپ چىقتىم، سائادەتنىڭ پوۋىستلىرىنىمۇ ياخشى كۆرۈپ ئوقۇيتتىم، ئۇنىڭ شېئىرلىرىمۇ يېقىندىن بېرى مەتبۇئاتلارنىڭ سەھىپىرىلىرىدىن ئورۇن ئېلىۋاتىدۇ. ئۇنىڭ تىرىشچانلىقىغا قايىللىقىم كەلسە، قايناق بۇلاقتەك بۇلدۇقلاپ تۇرىدىغان ئىلھاملىرىغا ھەۋىسىم كېلىدۇ. قەلەملىرىڭىز ھارمىغاي دوستۇم، ئىجادىيەت سەپىرىڭىزگە ئاقلىق تىلەيمەن!

سائادەت ساتتار · ۋاقتى: 2012-4-8 23:32:25


	قوشىقىمغا قەدەم تەشرىپ قىلغان بارلىق دوستلارغا رەھمەت! ساجىدە، مۇشۇنداق تاتلىق رېغبەتلىرىڭىز بىلەن قولۇمدىن يىتىلەشلىرىڭىز ماڭا تاتلىق ھىسلارنى ئاتا قىلىدۇ دوستۇم.

سائادەت ساتتار · ۋاقتى: 2012-4-8 23:41:58


	قوشاقلارنى داۋاملاشتۇرۇش ئۈمىدىدە بولغان ۋە قەلەم تەۋرەتكەن دوستلارغا قولۇمنى كۆكسۈمگە قويۇپ تۇرۇپ رەھمەت سالىمىمنى يوللايمەن! باھار كەلسە جىممىدە، يورار ھەر دىل ۋىللىدە. تاللاپ سۆيگەن شۇ يايرىم، بىر كەلمىدى دىككىدە. قار باسقان كەڭ دالىدا، كىيىك يولدىن ئازىدۇ. سائادەتنىڭ قوشاققا، خۇمارى بار يازىدۇ.

گۆھەر ئابلا · ۋاقتى: 2012-4-10 00:52:29


	مۇنبەرگە بۈگۈن بىرەر ئىش بولدىمىكىن ياكى مېنىڭ كومپىيوتىرىمدا مەسىلە كۆرۈلدىمىكىن بىلەلمىدىم ، خەت شەكلى تازا راۋان بولمايۋاتىدۇ

سائادەت ساتتار ئايتۇغ: قوشاقلار

باھالاش