بىر ناچارغا ساتىرا
زۇنۇنجان مەمتىمىن شۈكران
ناچارنىڭ ئەسلىمۇ ۋەسلىمۇ ناچار،
نەپ چىقسا يېنىڭدا سېنى دوست تاپار
بېشىڭغا كۈن كەلسە نەگىدۇر قاچار،
يەپ تۇرۇپ تۇزىڭنى تۇزلۇقنى چاقار.
"ھەقىقەت..." دەپ تېخى شالىنى چاچار.
زالالەت ھامىيگە قىلىدۇ تازىم،
دەيدۇكى:" سىز ئۇچۇن بار تۈمەن نازىم-
كېرەكمۇ؟! قاۋايمەن تۆت پەسىل يازىم-
ئاھ!! ساختا شان-شەرەپ بەك ماڭا لازىم···"
جاھالەت ئشىكىدە ئىت كەبى ياتار·
كەپ قالسا ئامىتى ئەگەر تېرىقتەك،
قىلنىمۇ يارىدۇ قىلغا قىرىقتەك،
كۆرسىتەر دەريانى گاھى ئېرىقتەك....
توۋا !! شۇ قېلغىنى توغرا قىلىقتەك-
ھەقىقەت نۇرىنى ئېتەكتە ياپار·
ھاياتلىق كۈيىنى تەتۈر چالىدۇ،
"دوپپسنى ئال " دىسە باشنى ئالىدۇ،
ھەتتا جان-جىگەرگە زەھەر سالىدۇ،
ئۇ سەۋەپ نۇرغۇنلار دەردتە قالىدۇ.
پەرۋاسىز شۇ يولدا تىنىمسىز چاپار....
ناچارنىڭ ئوقىدىن ساقلىسۇن ئىگەم!
يولىدىن،قولىدىن،تىلىدىنمۇ ھەم،
ھەر دىلغا پاك غۇرۇر بولسۇن مۇجەسسەم،
پاكلانغان ھاياتتا بولىدۇ زوق، تەم·
ياخشىلىق ئىنسانغا كەڭرى يول ئاچار!···
.
9-يانۋار ئاتۇش
|