گۈلمېھرە:كۈتۈش (نەسر)

     كۈتۈش

گۈلمېھرە ئابدۇراخمان
  
                     
   بۈگۈن پىغانىم ئۆرلەپلا  قالدى ، كۆڭلۈم  قاتتىق يېرىم .
   
   يامغۇرنىڭ شۇنچە قاتتىق يېغىۋاتقىنىغا قارىماستىن سېنى كۈتىۋاتىمەن . ئەتراپىمدىكى ئادەملەر مېنى مەسخىرە قىلۋاتقاندەك نەزەردە قاراپ قويۇپ نەگىدۇر ئالدىرىشىپ ئىلدام كېتىپ بارماقتا . .

  مەن سەن كېلىدىغان يولغا قاراپ ئۈن - تۈنسىز بىر نوقتىغا تىكىلىپ سېنى كۈتىۋاتىمەن . ئىللىق مېھىر ، تەلپۈنۈش مېنى بىئارام قىلماقتا .   
   كۈتىۋاتىمەن ... خۇددى ئەتىۋارلىق  بىر نەرسەمنى يوقىتىپ قويغاندەك ئەنسىزلىك ئىچىدە تەرەپ - تەرەپكە قاراۋاتىمەن .   كىملەرنىڭدۇ ئوخشاپ قالغان تەققى - تۇرقى  ، يۈرىكىم دۈپۈلدەپ سوقماقتا .

يەنىلا ناتۇنۇش چىرايلار ...
كۈتىۋاتىمەن ...   
ساقلاۋاتىمەن ...   
سوغۇقتىن مۇزلاۋاتقان  جىسمىم ... ئۆزۈمگە ئىشەنمەيلا قالدىم ، سەزگۈمنىڭ مېنى ئالدىشىغا ئىشەنمەيتىم  ، چۈنكى ، مەن ئەزەلدىن مۇنداق تۇيغۇغا ئالدىنىپ باقمىغان ... لىكىن مەن  بۈگۈن شۇنچە تەشنا بولۇپ كۈتىۋاتقان سەن قەيەرلەرگىدۇر غايىپ بولغان ئىدىڭ .

     قاتتىق خورلانغان قەلبىم بۇ ئازاپقا بەرداشلىق بېرەلمىدى ، پىغان بىلەن تەڭرىمگە نىدا قىلدىم :

  - ئۇلۇغ رەببىم ، يۈركىمگە ساداقەت ، ۋاپا ، سەمىمىيلىك ئۇرقىنى چېچىپ ، باشقىلاردەك قارا يۈرەك قىلىپ ياراتماپتىكەنسەن ، ئۇلاردىن پەرقلەندۈرۈپ يارتىپتىكەنسەن !  شۇنداق تۇرۇپ مەن يەنە ئالدىنامدىم ؟ ھەسرەت چېكەمدىم ؟ مەن ئازابىڭغىلا يارالغانمىدىم ؟ مېنىڭ ۋۇجۇمدىكى بۇ مېھىرنى يوق قىلۋەتكىن ، مەنمۇ باشقىلاردەك  ساداقەت ، ۋاپا  ، چىن سۆيگۈ پەردىسىنى يىراق - يىراققا چۆرۈپ تاشلاپ ، بارچە ئازاپلاردىن بىراقلا قۇتۇلۇپ ، كۈلۈپ ياشاپ باقاي ...   
   كۆز ياشلىرىم توختىماي چۈشمەكتە ، ۋۇجۇدۇم ئۈششۈك تەگكەن ياپراقتەك تىترىمەكتە ...  

  شۇ تەرىزدە قانچىلىك تۇرغىنىمنى  ، ۋاقىتىنىڭ نەچچە بولغىننى بىلمەيمەن . بىر ۋاقىتتا قۇلقىمغا شۇنداق بىر نىدا ئاڭلانغاندەك بولۇپ ، يەر - جاھان نۇرلانغاندەك بىلىندى .   
  - سەۋرىچانلىق بىلەن كۈتكىن . سەن ساقلاۋاتقان بۇ سۆيگۈ ئىگىسى سەن تامام كەلمەكتە ، ئۇنىڭىغا پۇرسەت بېرىپ يەنە كۈت ، يەنە ساقلا ...

شۇئان قەلبىم لەرزىگە كېلىپ كۈچكە تولدۇم .  
خىيالىمدا ساڭا شۇنداق پىچىرلىدىم :   


- ئاچچىق ھەسرەت  دىشۋارلار قىينىسىمۇ گەر مېنى ،   
ئاھ ، بولدىلا  كەچۈرۈپ  ، كۈتەي جېنىم مەن سېنى ...  
كەلسەڭ كۈلۈپ بىرىلكتە تۇتۇشساق بىز جۈپ قولىنى ،  
دەردكە تولغان بۇ يۈرەك تىزرەك تاپسۇن دەرماننى ...


2015- قەشقەر .
بۇ يازمىنى ئاخىرىدا   Erchin تەھرىرلىگەن. ۋاقتى  2016-1-13 17:35  

   كەچ كۈزنىڭ ئاچچىق شامىلى يۈزلىرىمگە ئۇرۇلۇپ ئازاپ قوينىغا ئىتتىرمەكتە. سەنسىزلىكنىڭ دەردىنى يەتكۈچە تارتقان يۈرىكىم توختىماي تۆكۈلۈۋاتقان يوپۇرماقلارنىڭ ئاھۇ-زارىغا قاراپ ئۈنسىز ياش تۆكمەكتە...  
　ئەي كەچكۈز ، سېنىڭ باغرىڭ شۇنچە سوغۇقمۇ؟... سېنىڭ ئالتۇن كۈز،  بەرىكەتلىك كۈز... دىگەن ناملىرىڭ، سېخيىلىقىڭ نەگە كەتتى؟... سوغۇق شاماللىرىڭ ۋۇجۇدۇمنى مۇزلىتىپ ، ئازاپلىرىمنى ئاۋۇتتى ، ئازاپلىرىم ئاۋۇغانچە ھاياتقا بولغان ئىشەنچىم ئاجىزلىدى...

　ئەتراپ جىمجىت . دەرەخ تۈۋىدە يالغۇز ئورۇندۇق، ئۇنىڭ ئەتراپىدا غازاڭ، غازاڭ ئاستىدا بىر جۈپ ئاياق ئىزى. غازاڭ باسقان شۇ تونۇش يوللاردىن ئىككىمىز جۆر بولغان مۇڭلۇق ناخشا ئاۋازى كېلىدۇ.
　بىلەمسەن جېنىم، غازاڭ باسقان شۇ يوللار باھارنى سېغىنىۋاتىدۇ، قايتىدىن بۈك-باراقسان بولۇشنى، گۈللەپ-ياشىرىشنى ئۈمىد قىلىۋاتىدۇ... سارغايغان يوللار بىر جۈپ يۈرەكنىڭ تىنىقى ، بىر جۈپ ئاياقنىڭ تىۋىشىنى كۈتىۋاتىدۇ. گۈزەل كۈيلەرنى، شىرىن تۇيغۇ، گۈزەل ئەسلىمىلەرنى سېغىنىۋاتىدۇ...   
　　ئاھ، غازاڭلار... ئاھ غازاڭلار... ئازابىمغا ھەمراھ بولۇپ سەنسىزلىك دەردىنى تارتىشىپ بېرىۋاتقان غازاڭلار...   
غازاڭلار نالىسىگە جۆر بولۇپ سېنى كۈتىۋاتىمەن، ھەم كۈتىمەن، سېنى كۈتىمەن ، كۆزۈمدە ، يولۇمدا يۈرىكىمدە !  
سەن مېنىڭ باھارىم ئىدىڭ ، سەن مېنىڭ ھاياتىم ئىدىڭ... مەن سېنى كۈتىمەن، ھاياتلا بولىدىكەنمەن قەلبىم سېنى نەقەدەر ياخىشى كۆرىدىغانلىقىمنى دەلىللەيدۇ،  يۈرىكىم پەقەت ۋە پەقەت سەن ئۈچۈنلا سوقىدۇ!...  
　ئازاپلىق كۈنلەر ھامان ئۆتۈپ كېتىدۇ... دىگەن ئۈمىدتىمەن. بۇ كۈنلەر ئۆتۈپ كەتكەندە مەن ساڭا ئېرىشىمەن، ماڭا سەندىن باشقا ھېچقانداق ئىنسان ياردەم قىلالمايدۇ...

　مەن سېنى شۇنچە ئۇزاق كۈتتۈم، سەن بۇنىڭدىن خەۋەرسىز، سەن ماڭا ھېچقانداق ئىمكان بەرمىدىڭ. مەن ھەر قانداق جاپا-مۈشكۈلاتلارغا يولۇقساممۇ سەندىن ۋاز كېچەلمەيمەن، مەن سەن ئۈچۈنلا ياش تۆككەن بۇ قەلبىمنى ساڭا تاڭىمەن...

　مەن سېنىڭ ئالدىڭدا خۇددى ئاق بايراق كۆتۈرگەندەك تەسلىم بولىمەن... سەن بۇنى ھەقىقى مۇھەببەت مەيدانىدا تۇرۇپ چۈشىنەلەمسەن؟ پىشقان، نۇرغۇن ئاچچىق-سوغۇقلارنى باشتىن كەچۈرۈپ ئاچىق ھاياتنىڭ تەمىنى تېتىغان مېنىڭ مۇھەببەت كۈتۈپ ئاچچىق ئازاپ - ھەسرەت قوينىدا ئاستا يوقاپ كېتىشىمنى كۆرگۈڭ بارمۇ؟...
ئاڭلا جېنىم ، مەن سېنى كۈتىمەن، يولۇمدا ، كۆزۈمدە ، يۈرىكىمدە !!!   

　　
　 سۈرىتڭگە قاراپ قانچىلىك ئۇزۇن ئولتۇرغىنىمنى بىلمەيمەن. كۆزلىرىڭدىن تاراۋاتقان نۇر ۋۇجۇدۇمنى لەرزىگە سالسا ، كىرپىك ئوقيالىرىڭ يۈرىكىمدىن قان تامچىلاتماقتا...

    ئېلىپتەك قاڭشارلىق بۇرنۇڭ، دېڭىزدەك چاقناپ تۇردىغان نۇرانە كۆزلىرىڭ ناۋاترەڭ چىرايىڭغا خۇيمۇ ياراشقان، تەمكىنلىك چىقىپ تۇردىغان تۇرقۇڭ سېنى تېخىمۇ سالاپەتلىك كۆرسىتەتتى. خياللىرىمغا ئەگىشىپ تۇنجى ئۇچراشقان قارلىق كېچە ئېسىمگە كەلدى...


　كەچ كىرىپ كېتىۋاتقاچقاھەم ھەرئىكىمىز قولىمىزدىكى كىتابقا قاراپ ماڭغاچقا، بىر-بىرىمىزگە سوقۇلۇپ كەتتۇق- دە، قوللىرىمىزدىكى كىتابلار تەڭلا يەرگە چۈشۈپ كەتكەتتى. سەن ناھايىتى چاققانلىق بىلەن ئېڭىشىپ كىتابلارنى ئالغاچ، جىددىيلىك بىلەن كەچۈرۈم سورىدۇڭ ھەمدە ماڭا سۇنۇۋاتقان كىتابقا قاراپ چەكچىيىپلا تۇرۇپ قالدىڭ. نىمە ئىش بولغانلىقىنى بىلىپ بولغىچە قولۇمدىكى كىتابنى قايتىدىن ئېلىپ، قولۇڭدىكى كىتاب بىلەن سېلىشتۇرۇپ ياندۇرۇپ ماڭا سۇندۇڭ....
　توۋا،  ھەر ئىككىمىزنىڭ سېتىۋالغىنى ئوخشاش كىتاب، يەنە كېلىپ ھەر ئىككىمىز بىر كىتابخانىدىن سېتىۋالغان ئىدۇق ، سېنىڭ چەكچىيىپ قاراپ قېلىشىڭدىكى سەۋەبنى چۈشەنگەندىن كىيىن سېنىڭ تۇرقۇڭغا قاراپ ئىختىيارسىز كۈلۈپ تاشلدىم...
　بىزنىڭ مۇناسىۋىتىمىز مانا مۇشۇ دىكابىرنىڭ قارلىق كېچىسى باشلانغان ئىدى.

　سەن ھاياتقا قىزغىن ئىدىڭ ، ھاياتنى ، كەسپىڭنى ، ۋاقتىنى قەدىرلەيتىڭ . باشقىلارغا ئىللىق مۇئامىلە قىلاتتىڭ. تەمكىن، كۆيۈمچان، چىقىشقاق ئىدىڭ. ئىللىقلىقىڭ ، تىرىشچانلىقىڭ بىلەن ھاياتقا بولغان ئىشەنچىمنى ئاشۇراتتىڭ ، كۆڭلۈمنى ئاۋۇندۇراتتىڭ ... 
  
　« -گۈل ، مەن سېنى سۆيىمەن، ھەردائىم سېنى سېغىنىمەن، مەن قەيەردىلا بولماي سەن بىلەن بىللە. سەن مېنىڭ يۈرىكىمدە. مەن سېنى يۈرىكىمنىڭ ئەڭ چوڭقۇر قاتلاملىرىدا ساقلايمەن، سېغىنغاندا يۈرىكىمدىن چىقىرىپ ھېدلايمەن، قۇچاقلايمەن، كۆز بۇلاقلىرىڭىدا قانغۇچە ئۈزىمەن...   
　بىلەمسەن گۈل، سەن ھاياتىمدىكى ئەڭ چوڭ بەختىم، ئەڭ چوڭ خۇشاللىقىم، يورۇق دۇنيادىكى يۇلتۇزۇمسەن. ھايات ياشاشتىكى  بىردىنبىر ئىلھامىم سەن ، باھانەم سەن. ھاياتىمدىكى بارلىق گۈزەللىك سەندىن كېلىدۇ، بۇ ھايات سەن بولغاچقىلا ماڭا رەڭدار، سەنسىز ياشاش مەن ئۈچۈن ھارام... سېنىڭ سۆيگۈڭگە يەتمىسەم بىكارغىلا ياشغان بولىمەن. سەن ھېچبىر ئادەمگە ئوخشىمايسەن، سەندىن كېلىدىغان بەخىت تۇيغۇسىمۇ ھېچ نەرسىگە ئوخشىمايدۇ، سېنىڭ تەڭدىشىڭ يوق. شۇنىڭ ئۈچۈن سەن مېنى تاشلاپ كەتمە، ھەر قانداق شارائىتتا مەندىن ئايرىلما. چۈنكى، مەن سەندىن ئايرىلسام ئۆلۈپ قالىمەن. روھىم ، جىسمىم، ھەممە-ھەممىسى ئۆلىدۇ، قاراپ تۇرۇپ مېنى ئۆلتۈرمە !...
　مەن سېنى ياخىشى كۆرىمەن، ھېچكىمگە بەرمەيدىغان سۆيگۈمنى ساڭىلا بېرىمەن. بۇنداق چاغلاردا ـــ سېنى ئۇلۇغلىغان، سېنى سۆيگەن ۋاقىتلاردا ئۆزۈڭنى ئەڭ بەختىلىك ھېس قىلىسەن جېنىم ! ... سەن بەختىلىك بولغاچقىلا ، ئۆزۈمنى چەكسىز بەخىت ئىچىدە ھېس قىلمەن گۈلۈم...
  
سەن مېنىڭ گۈزەل كىچىك تەبىئىتىم، بۇ گۈزەل تەبىئىتىمدە- سېنىڭ باھارىڭدا مېنىڭ بوستانلىرىم بار. سۆيگۈ-مۇھەببەت ۋە ھېجران- ۋىسال، سۆيۈش... نۇرغۇن گۈزەللىكلەر بار ئەزىزىم...
　پەرھاد شىرىن ئۈچۈن پەرياد چەككىنىدەك بۇ يۈرەك سەن ئۈچۈنلا پەرياد چېكىدۇ گۈلۈم ، سەن مېنىڭ ئىسسىق سازلىقىم گۈل ...»  
　مۇشۇنداق شىرىن سۆزلىرىڭ مېنى بەخت ئىچىدە ھوزۇرلاندۇرۇپ، ئەقلىمنى لال قىلغانئىدى. سەن مەجنۇن بولساڭ، مەن لەيلى ئىدىم، سەن ئاشىق بولساڭ، مەن مەشۇق ئىدىم...
  
　ئەپسۇس ، پەلەك بىزگە كاج كەلدى، گۈزەل كۈنلىرىمىز ئۇزۇنغا بارمايلا ھالاكەتكە يۈزلىنىپ، سەندىن ئايرىلىپ قالدىم، سەن بىر كەتكىنىڭچە قايتىپ كەلمىدىڭ ، قايتا-قايتا يازغان خەتلىرىممۇ جاۋابسىز قالدى...
　مۇھەببەت تۈگىدى دىگەنگىلا تۈگىسىچۇ كاشكى !...   
بۇ يۈرەك دىگەن نەرسە شۇنداق جاھىلكى، گېزى كەلسە ئەقىلنىڭ بۇيرۇقىغا بويسۇنماي ئۆزبېشىمچىلىق قىلىدىكەن. ئەقلىڭ ئۇنتۇپ كېتىشكە دەۋەت قىلغانسىرى تېخىمۇ مەھكەم چىرمىشىۋالىدىكەن، بىرگە قارىساڭ قېچىشقا تېگىشلىك دەپ قارىغان مۇھەببەتنىڭ ئەڭ چوڭقۇر يېرىگە چۈشۈپ قالىدىكەنسەن، يىراقلاشتىم دەپ ھەرقانچە ئويلىساڭمۇ يىراقلىشىپ كېتەلمەيدىكەنسەن...
  

مەنمۇ سېنى تاشلاپ كېتىمەن،   
سەنمۇ مېنى تاشلاپ كەتكەندەك.
سۆيگۈمنىمۇ بەرمەيمەن ساڭا، 
سەنمۇ ماڭا بەرمەي قاچقاندەك.   
كەچۈر ئەمدى ئىشەنمەيمەن يار،  
سەنمۇ ماڭا ئىشەنمىگەندەك.  
چۈشەنمەيمەن كۆڭلۈڭنىمۇ ھەم،
سەنمۇ مېنى چۈشەنمىگەندەك.
بىراق رايىم بارماس باشقىغا،  
سەن كۆڭلۈمنى كىشەنلىگەندەك.  
ئۆمرۈم شۇنداق ئۆتەرمۇ ئەمدى،
ئوتقا چۈشۈپ تولغانغان قىلىدەك...  

تىلغا ناھايىتى پىششىقسىز قار گۈلى،بۇ يېڭىچە نەسىرى شىېئر يېزىش يولى ئۆزگىچە چىقىپتۇ،تېتىملىق تىللار بىلەن خۇلاسىلەنگەن مەزمۇن ئاخىرىنى شىېئرى تىل بىلەن خۇلاسىەچىقىرىشىڭىز يەنە بىر يېڭىلىق.ئامەتلىك بولۇڭ.

سەنمۇ مېنى تاشلاپ كەتكەندەك،
مەنمۇ سېنى تاشلاپ كېتىمەن.
تاشلاپ كەتسە كىتىۋەرسۇن،
سىزنى باققا باشلاپ كىتىمەن.
سىزگە تاشلاپ كەتكەنلەرنىڭ،
كۆزىنى ئازاپتىن ياشلاپ كىتىمەن.
ماقۇل دىسىڭىز رازىلىق بىلەن،
دەريا-دېڭىزدىن ئاتلاپ ئۆتىمەن.
بۇ يازمىنى ئاخىرىدا   mahatjan تەھرىرلىگەن. ۋاقتى  2016-1-13 19:13  

سەنمۇ مېنى تاشلاپ كەتكەندەك،
مەنمۇ سېنى تاشلاپ كېتىمەن.
تاشلاپ كەتسە كىتىۋەرسۇن،
سىزنى باققا باشلاپ كىتىمەن.
سىزگە تاشلاپ كەتكەنلەرنىڭ،
كۆزىنى ئازاپتىن ياشلاپ كىتىمەن.
ماقۇل دىسىڭىز رازىلىق بىلەن،
دەريا-دېڭىزدىن ئاتلاپ ئۆتىمەن.

تامام \ تامان؟

قار گۈلى، بۇ نەسىرىڭىز خۇددى ئىسمىڭىزغا ئوخشاشلا ئاسماندىن ئەمدىلا چۈشىۋاتقان قار گۈلىدەك چىرايلىق، يەڭگىل، ھوزۇرلۇق چىقىپتۇ.  ئىچكى ھېسياتلىرىڭىز ياخشى ئىپادىلىنپتۇ. ئوقۇپ زوقلاندىم.تەكلىپىم:ئەسەر تىلىغا يەنىمۇ ئىشلەپ باقسىڭىز، ئىملانى تېخىمۇ توغىرلىسىڭىز بوپتىكەن. شۇنداق تېتىملىق، چىرايلىق چىققان ئەسەرنىڭ ئىملاسىدا نۇقسان بولسا خۇددى ساھبجامالنىڭ يۈزىدىكى كۆيۈك يارىسىدەك گۈزەللىكىگە نۇقسان يېتىدىكەن.

نەسىرنىڭ تىل گۈزەللىكى ۋە جۈمىلىلەرنىڭ تۈزۈلىشىدىن سۆيۈندۈم!

كۆرسەتمە بەرگىنىڭىزگە رەھمەت، ئىملادا خاتالىق كۆرۈنۈپتۇ، تۈزىتىمەن.

تەكلىپىڭىزنى قوبۇل قىلىمەن، دىققەت قىلاي .

رەھمەت سىزگە !!

         ياخشى چىققان ئەسەرلەر ئىكەن. قۇت بولسۇن !

    قەلبىم شۇنچلىك ئېغىر ... ئەتراپىم قىستاڭچىلىق ، قاتلاڭچىلىق دەستىدىن ئەركىن نەپەس ئالالماي قىينىلىۋاتىمەن بۇ كۈنلەردە... كۆڭلۈمدىن چىقىرالمىغان  گەپلىرىم شۇنچىلىك زەئىپ، ئاجىز... گەپلىرىم  خۇددى قويۇق تۇمانلاردا شۈمشىيىپ قالغان كۈننىڭ ناۋاسىدەك ئىچىمگە چۈشۈپ كېتىۋاتىدۇ...  

     يىراقلارغا نەزەر تاشلدىم ، ئۇزاققىچە كۆككە تىكىلدىم ، ئاسمانمۇ مەڭگۈلۈك ئارامىنى  يوقاتماقتا  ،  خۇددى مېنىڭ كۆڭۈل ئارامىم يوقالغاندەك ، يىراق بوشلۇقتىكى پىنھان  يۇلتۇزلارمۇ ئۈن - تۈنسىز پىچىرلاشماقتا ، خۇددى ئىچىمگە  چۈشۈپ  كېتىۋاتقان ئاۋازىمدەك ...

     مالامەتلەرگە تولغان يالىڭاچ قەلبىم ، پۈتۈن سەزگۈلىرىنى يوقاتقان جانىسىز قەلبىم ...

ھەسرىتا ... ھەسرىتا ..دەردلىرىمنى  يۈرەكلىك ھالدا تۆكەلىسەمچۇ، دىمەكچى بولغانلىرىمنى دىيەلىسەمچۇ...  ئەركىنلىك ئىچىدىكى ئەركسىزلىكىمنى، بەخىت ئىچىدىكى بەخىتسىزلىكىمنى  ، قاينام - تاشقىنلىق ئىچىدىكى يىگانىلىقمنى يوقۇتۇش  ئۈچۈن جەڭ دۇمبىقى چالالىسامچۇ...

     ئەركىنى يوقاتقان روھىم سەرسان بۇلۇتلارغا ئوخشايدۇ . كىشەنلەنگەن ۋۇجۇدۇم قاراڭغۇ تۈننىڭ پارە- پارە بولۇشىنى تىلەيدۇ ، زىمىستان قاپلىغان قەلبىم كەل باھار ... دەپ توۋلايدۇ...

  ئەركىم توسمىلارنىڭ بىر- بىرلەپ غۇلاپ، كەلكۈن - قىيانلارنىڭ ئەركسىزلىكىمنى ئېقىتىپ كېلىتىشىنى ئارزۇ قىلىدۇ، چىڭقالغان نېرۋىلرىم ۋۇجۇدۇمنى باسقان قاراڭغۇ سېپىللارنىڭ غۇلاپ ، مۇقەددەس يورۇقلۇقنىڭ بۆسۈپ كىرىشىنى ئۈمىد قىلىدۇ...  

    ئۆمۈر بوستانلىقىمدا چېچەك ئاچقان رەيھانلار ئۈششۈك ئازابىدىن ئاھ ئۇرۋاتىدۇ ... كۆڭۈل ئاسمىنىمنى بۇلۇتلار  قاپلاپ ، زىمىستان ئۈششۈكلىرى ۋۇجۇدۇمنى مۇزلىتىۋاتىدۇ.. تاڭ قۇشلىرى يىراقلاپ   تۈن قاپقاراڭغۇ ھەم سوغۇق تېنى بىلەن يورۇق دۇنيانى گۆرۈستانغا ئايلاندۇرۋاتىدۇ...

    تىلىمنى  كېسىپ سۆزلىيەلمەس قىلىپ قويغان گۇمراھلىقىم گۇمراھلار جەندىسىنى كىيىۋاتىدۇ...


2015 -يىلى يېڭىسار.

     ئازابىمنىڭ چېكى يوق ، ئۈمىدسىزلىگىمگىمۇ ئامال يوق ، قاراڭغۇلۇق ئىچىدە تىمسىقىلاپ يۈرمەكتىمەن . ئېغىر قىسمەتلار يەلكەمنى باسقاچ ئۈگە - ئۈگىلىرىم بىر- بىرلەپ ئاجراپ كېتىۋاتىدۇ...
       گۇمراھلىق ئوقلىرى ئەكەلگەن سېھىر يۇلتۇزلىرى قان تومۇلىرىمنى چۈلۈكلەپ ھەم چەكسىز ئازاپقا سېلىپ ، قەلبىمدە غايىبانە تور يېيىلماقتا . يۈرىكىمدىن فونتان بولۇپ چىقىۋاتقان ھەسرەت ، ئىزتىراپ، پەرىشانلىق ئوتلىرى بارغانچە كۈچەيمەكتە...   
    ھاۋامۇ جانسىز، ، ياپراقلارمۇ قېتىپ قالغان، ئورمان قۇشلىرىنىڭ ئەڭ ئاخىرىقى ناخشىسىمۇ قاپقاراڭغۇ تۈن ، زۇلمەت ، گۇمراھلىق قوينىغا چۆكۈپ كەتكەن ...   
     ئەتراپىم قاتمۇ - قات غەم - غۇسسىلەرنىڭ قاراڭغۇلىقى بىلەن تولغان، ۋائىزلىق كەلكۈنلىرى شاۋقۇن سېلىپ ئاققان مۇشۇ كۈنلەردە مەسىللەر تاغدەك دۆۋلىنىپ غەلتە- پاراڭ ۋە مۇھاكىمىلەر ئادەمنىڭ قۇلاق مېڭىسىنى يەپ شۈبھە ۋە گۇمانلار بارغانچە ئەزۋەيلىمەكتە...

     2015 -يىلى 12- ئاينىڭ1- كۈنى ، سەھەر