«ئالتۇن ئۈزۈككە ياقۇت كۆز» نەشردىن چىقتى

            مەرھۇم جۈمە ئابدۇغېنى (چوققا) نىڭ قىسقىچە تەرجىمھالى

مەسئۇلىيەتچان مۇھەررىر، ئىجتىھاتلىق مۇخبىر ، مەرھۇم جۈمە ئابدۇغېنى (چوققا ) 1961- يىلى 10-ئاينىڭ 11-كۈنى خوتەن ۋىلايىتىىنڭ لوپ ناھىيەسى تامئېغىل يېزىسىدا تۇغۇلغان. باشلانغۇچ ۋە ئوتتۇرا مەكتەپلەرنى ئۆز يۇرتىدا تاماملاپ، 1980-يىلى 9-ئايدا شىنجاڭ ئۇنىۋېرسىتېتىنىڭ ئەدەبىيات فاكۇلتېتىغا قوبۇل قىلىنغان. 1985-يىلى ئوقۇشنى تاماملاپ باكلاۋىرلىق ئۇنۋانىغا ئېرىشكەن. شۇ يىلى ئاپتونوم رايونلۇق مائارىپ نازارىتى ئالىي مائارىپ بويىچە ئۆزلۈكىدىن ئۆگەنگۈچىلەردىن ئىمتىھان ئېلىش ئىشخانىسىغا تەقسىم قىلىنغان. 1991- يىلى مائارىپ نازارىتى گېزىت- ژۇرنال نەشرىياتىغا يۆتكىلىپ «شىنجاڭ مائارىپ گېزىتى» دە خىزمەت قىلغان. 2002- يىلى گېزىت - ژۇرنال نەشرىياتى مائارىپ نەشرىياتىغا قوشۇۋېتىلگەندىن كېيىنمۇ ئۆز خىزمىتى بىلەن داۋاملىق شۇغۇللانغان ھەمدە مۇھەررىرلىك، مۇخبىرلىق ۋە تەرجىمانلىق بىلەن شۇغۇللانغان ۋە بۇ جەرياندا ئۇ «شىنجاڭ مائارىپ گېزىتى» نىڭ مەزمۇنىنىڭ سەرخىل ۋە ساغلام، سەھىپىسىنىڭ رەڭدار بولۇشى ئۈچۈن يۈرەك قېنىنى سەرپ قىلغان .ئۆزىنىڭ ئۇنىۋېرسال تەربىيەلىنىشىگە ئالاھىدە ئەھمىيەت بېرىپ، گېزىتچىلىكتە مۇئەييەن نەتىجە ياراتقان.

شائىر ھەرقايسى دەۋرلەردە ياشاپ ئىجادىيەت بىلەن شۇغۇللانغان داڭلىق شائىرلارنىڭ مۇنەۋۋەر غەزەللىرىگە تەخمىس يېزىپ، ئەسلىي غەزەلنىڭ مەزمۇنىنى موللاشتۇرۇش ۋە پىكرىنى يارقىنلاشتۇرۇش ھەمدە جەمئىيەتتىكى ھەر خىل تۇرمۇش كارتىنىلىرىغا بولغان قارىشىنى بەدىئىي يوسۇندا ئىپادىلىگەن.بۈگۈنكى دەۋر كىشىلىرىنى ئىلىم- مەرىپەتكە چاقىرىپ، ياخشىلىق بىلەن يامانلىق، گۈزەللىك بىلەن رەزىللىك، مۇھەببەت بىلەن نەپرەت قاتارلىقلارغا سەزگۈرلۈك بىلەن مۇئامىلە قىلىشقا چاقىرغان.

مەزكۇر توپلامغا شائىرنىڭ بىر قىسىم شېئىرلىرى تاللاپ كىرگۈزۈلگەن بولۇپ،بۇ شېئىرلار كەڭ ئوقۇرمەنلەرنىڭ ئۇيغۇر شېئىرىيىتىنىڭ تەخمىس شەكلىنى بىلىش ۋە شائىرنىڭ بەدىئىي تەپەككۇرىنى چۈشىنىشتە مۇئەييەن قىممەتكە ئىگە.