ئۇيغۇرىيە : مۇھەببەتنىڭ كەسمە يۈزى

مۇھەببەتنىڭ كەسمە يۈزى

نەسىرلەر

گۈلبانۇم ئابابەكرى

1
ئۇنىڭ يىراققا نەزەر سالغىنىچە تۇرغان جىمجىت ھالىتى خىيال ياپراقلىرى شىلدىرلاپ تۇرغان قىران دەرەخكە ئوخشايدۇ. نادامەتلىك ئورمانلارنىڭ ئۇنىڭغا باش ئەگكەنلىكىنى، گۈللەرنىڭ ھەسرەتلىك مۇھەببەت ناخشىلىرىدا ئۇنىڭغا پىنھان كۆز تاشلاۋاتقانلىقىنى ئۇ بىلەمدىغاندۇر؟
بۇندىن نۇرغۇن - نۇرغۇن ئۇلۇغ ئېھتىراملارنىڭ ئۇنىڭ سەھەرلىرىگە ھەر كۈن ئۇچۇپ كېلىپ ئۇنىڭ دىدارىدىن سۇ ئىچىدىغانلىقىنى ئۇ بىلەمدىغاندۇر؟
كىمدۇر بىرى مېنى سۈرەتكە تارتىۋالدى. قارىغاندا ،ئۇ مېنىڭ چاناقلىرىمدىكى پىنھان ياشلىرىمنى كۆرمىگەن چېغى...

2

گۆش چاناۋاتىمەن، يۈرىگىم چانالغاندەك قاناپ-قاناپ كەتتىم.

3

سۆزلەر ئۇسۇل ئوينىغىنى بىلەن كۆزلىرى ياش.
ئۇنتۇمىغىن، كەينىڭگە قاراشنى، ئىچكىنىڭدە بىر چىنە ئاش...

4
سەن گويا يۇمۇلاق سېھىرلىك شارەككە ئوخشايسەن. نازۇك ،ئىنچىكە بارماقلىرىم بىلەن سېنى ئاۋايلاپ  يۇمران ئالقانلىرىمغا ئالغىنىمدا دۇنيا گۈزەللىك  ناخشىللىرى بىلەن چايقىلىپ كەتتى. گۈزەل ئالقانلار  سېنىڭ  مەڭگۈلۈك ئىللىق ماكانلىرىڭ  بولۇش ئىستىگىدە ئاستا -ئاستا يۇمۇلماقتا، ناۋا قىلماقتا ئىدى. ئەي دۇنيانىڭ ئۇنتۇلغۇسىز تاتلىق دەقىقىللىرى،  چۈش تىزمىللىرىدەك مەۋھۇم قىرغاقلاردا قالغان يىگانە مەخپىيەتلىرى!  مېھىر ئالىمىنىڭ مۇھەببەت قۇياشىدا  ھەر بىر سېھىرلىك نۇر چاچقىنىڭدا ،  تۈمەنمىڭ گۈل پورەكلىرىدەك ساڭا ئىگىلىپ  خۇش ھىد چاچقىنىمدا ئىسسىق ياشلىرىمنىڭ مۇڭلۇق تاراملىرى  ساڭا تېگىپ كەتتى.زىمىن تولۇن ئاينى قۇچاقلىغاندەك روھىيەت ئالىمى سېنى قۇچاقلىدى .يىراق ۋىساللىرى يېقىن ۋىساللىرىنى بەربات قىلدى.لەۋلەر ئەبەت چاڭقاشلار ئىچىدە قالدى.قوللىرىم قاخشال، قارا سىزىقچىلار ئىچىدە زورۇقۇپ تالدى. ۋاقىت  ئۆتمۈش ئىزنالىرى بىلەن قوللىرىمنى بويىۋەتتى.سېنى چىڭ تۇتۇپ تۇرالمىدىم. قوللىرىم ماغدۇرسىز، تالجىققان...ئەي دۇنيانىڭ ئۆمرى قىسقا ئاسىي دەقىقىللىرى! سەن يەرگە چۈشۈپ كەتكىنىڭدە  مېنىڭمۇ قان تەپچىرەپ  تۇرغان ئىسسىق يۈرۈگۈم يەرگە چۈشۈپ كەتكەندەك يۈرەكسىز  تىپىرلاپ كەتتىم.
سەن دومىلاپ-دومىلاپ  يىراق-يىراق يەرلەرگە كەتتىڭ.سېنى چاقىرغان ئاۋازلىرىم شاماللاردا، ياپراقلاردا قالدى.
كۆڭۈل دەرىخىم خازان پەسلىگە كىرمەكتە ئىدى.مۇھەببەت گۈللىرىمگە خۇددى ئۈششۈك چۈشۈپ كەتكەندەك قارىداپ كەتكەن ئىدى.دۇنيادا نىمە يامان؟ يازدىكى ئۈششۈك ،كىشىگە دىيەلمىگەن كۆيۈك...
بىر ئايال خازان ياپراقلىرىمنى سۈپۈرۈپ توپا ئارىلاش سۈزۈك  ئېقىن سۇلارغا غەرق قىلىۋەتتى.سۇنىڭ ھەسرىتى نىمە، مېنىڭ ھەسرىتىم نىمە؟ ئىككى سۇئال، ئىككى ئالەم بار ئېقىن سۇلاردا...
مەن بىلمەسكە سېلىۋالغان بۇ دۇنيادا...

« مۇھەببەتنىڭ كەسمە يۈزى» دە  يەنە نۇرغۇن ھېكمەت دۇردانىللىرى بار ،چوقۇم. داۋامىنى كۈتىمىز،ئۇيغۇرىيە.

  مۇھەببەتنىڭ كەسمە يۈزى دە پورەكلىگەن تاتلىق تويغۇلىرىڭىزدىن زوق ئ‍الدىم، ئ‍ىلھاملىرىڭىزنىڭ تېخىمۇ زىيادە بولۇشىغا تىلەكداشمەن، بەرىكەتلىك بولۇڭ ئ‍ۇيغۇرىيە!

جانلىق ۋە مەزمۇنلۇق چىقىپتۇ.

سىز بارمۇ؟  يوقاپ كەتتىڭىز . مېنىڭ ئاۋازىممۇ دەرەخلەردە ،ياپراقلاردا قالدى.

5
   ئوي - پىكرىمنىڭ يېڭى ھاسىلات، يېڭى جەۋھەرلىرى قەغەز يۈزىگە تامچىلىغان مۇنچاق - مۇنچاق جان تەرلىرىم بىلەن بىرلىشىپ كەتتى. سېنىڭ ئېلىپ قاچقان سەرسان كۆزلىرىڭ ھايات ئاتەشلىرىدە ھالسىرىغان بىر سەۋدا يۈرەكنى سىزىۋالدى.
ئەنە «قېتىپ قالغان شارقىراتمىلار»...
   قەلب كۈيلىرىمنىڭ ئەسەبىي شاۋقۇنلىرىنى ئىچىمگە سىغدۇرالماي، ئەجەللىك تىپىرلاشلىرىمدا قېتىپ قالغان پىنھان ياشلىرىمنى كۆردۈم. ئۇندا تۈنۈگۈن، بۈگۈن ۋە ئەتىنىڭ سەرسان ئەكسى جۇلالايتتى.
   تەسەددۇق قەلەملەر، ھارماس قەدەملەر، تۈگىمەس دەرد - ئەلەملەر... خىياللار چوڭقۇرلىقىدىن ھالقىپ ئۆتۈپ ،رېئال كەڭلىكلەرگە يېيىلماقتا ئىدى. ئۇ تەتۈرلۈكنىڭ ھەسرىتىنى، قاششاقلىقنىڭ ھەۋىسىنى تاشلاپ كۈيلەر ئىچىگە شوڭغۇماقتا ئىدى.
بۇ دەمدە بىلىكىمدە نۇر چاچقىنى ئۈمىدنىڭ قاشتېشى بىلەيزۈكى ئىدى.


بۇ يازمىنى ئاخىرىدا   bagyar تەھرىرلىگەن. ۋاقتى  2015-10-7 13:10  

6


بىر تال ھارام شېىخىمنى رەھىمسىزلەرچە كېسىپ تاشلىغان ئىدىم. كۈرمىڭ ھارام شاخلار ئىچىدە قالدىم، نە چارە؟
مېنى بۇ  نىقاپلانغان سىرلىق قەسىرگە سۆيگۈنۈمنىڭ تەڭلىكتە قالغان ئازابلىق بىلەكلىرى باغلاپ قويدى. شۇنى بىلىپ يەتتىمكى، ھازىرى ھەر بىر ئۇلۇغ كىچىك تىنىشىم، ئىلگىرىكى خاتالىقىم...
- ئۇنداقتا، مەن خاتا بالىمۇ؟- دېدى بالام تەئەججۈپ كۆزلىرىدە ماڭا مۆلدۈرلەپ قاراپ.
دۇنيا ئۆزىنىڭ ئازاب - ئوقۇبىتىنى مەن بىلەن ئاخىرى سۆيۈشتۈردى. پۈتكۈل بەدەنلىرىمدىن يۇپۇرۇلۇپ كەلگەن ياش كەلكۈنلىرىدە ئۇنى باغرىمغا مەھكەم باستىم:
-سەن خاتا بالا ئەمەسسەن، جېنىم بالام. پەقەت سەن بولغاچقىلا دۇنيا گۈزەل، ھايات گۈزەل...
نىقاپلانغان سىرلىق قەسىرلەر گۆدەك بالامنىڭ ئاشۇ بىر ئېغىز گۆدەك سوئالى بىلەن تاڭ قالغۇدەك ئالەمشۇمۇل نۇرلۇق قەلىبنى ئېچىۋەتتى.

7


ئەي تاڭ زىياسى، شۇ تاپتا سېنىڭ ئامانەتلىرىڭنى ئوتلۇق قۇچاقلاپ جۇدالىق ئاخشامنىڭ قايغۇ ئارىلاش ئۈمىد - ئىستەكلىرىدە بۈيۈك ۋىسالىڭنى كۈتىۋاتىمەن.
ئەي سەلكىن تاڭ شامىلى، گۈزەل سەھەر! ئەجىبا خۇددى تارغاقتا تاراپ قويغاندەك تۈن گۈللىرىنىڭ لەرزان يەلپۈنۈشلىرىنى، ساڭا تونۇش، ئاجايىپ تونۇش ھىجران تىنىقلىرىنى ئۇنتۇپ قالدىڭمۇ؟
كۇتۇش، ئەي كۇتۇش...
تۈن نېمە دېگەن ئۇزاق، مۇقەددەس دەقىقىلەر نېمە دېگەن يىراق...
سېزىپ تۇرىمەن، ۋىسالىڭغا يەتكەن ئاخىرقى نىگاھلىرىمدا ئۆچكەن گۈلخانلىرىم بىقارار يېنىپ كېتىدۇ. نامسىز بەرگىلىرىم يانغىن ئوت لاۋالار ئارا ئاسمان قەرى كۆتۈرۈلۈپ كېتىدۇ. ئېسىڭدە مەھكەم تۇت، ئەي جاھان  قوياشى ، ئالدىڭغا ئۇچۇپ بارغان ئاشۇ قارامتۇل بەرگىلىرىم بىلسەڭ پەرۋانە كەبى كۆيۈپ چۇل - چۇل بولغان ساڭا ئاشىق قاناتلىرىم!
ئۇھ دەيمەن، پەقەت شۇ چاغدىلا ئۇھ دەيمەن. ئامانەت ئۆز دەرگاھىدا قارار تاپقاندا، ئوت كەتكەن بەرگىلىرىم پۈتكۈل جاھانغا چاچقۇ قىلىپ چېچىلغاندا...

8


ئەي ئايال، ئورنۇڭدىن تۇرغىن، كۆز ياش ھېچكىمنى قۇتۇلدۇرالمايدۇ. بالاڭ ئۆيدە يالغۇز قالدى. ئۇ سېنى ئىشىك تۈۋىدە ساقلاۋاتىدۇ. قايتقىن، ئۆيۈڭگە قايتقىن.
بۇ كۈنلەرمۇ ئۆتۈپ كېتىدۇ. ئېرىڭمۇ ياخشى بولۇپ كېتىدۇ. ئاچچىقىڭغا ھاي بەرگىن. «يولۋاسنى يەڭگەن باتۇر ئەمەس، ئاچچىقنى يەڭگەن باتۇر» ئېرىڭنىڭمۇ كۈنى تەس، پۇل تېپىش شۇنداق ئاسان دەمسەن؟ سەن تولا بېسىم قىلىۋەرمە، كۈچلۈك بېسىمدا ھەر قانچە چىداملىق قاپمۇ يېرىلىپ كېتىدۇ. ئۇنىڭغا يەنە پۇرسەت بەرگىن.
ئىنسان تەڭرى ئەمەس، ئۇنىڭدا يۇچۇقلار بار. ئۇنىڭ يۇچۇقلىرىنى نەقىش بىلەن ئېتىپ قوي. ئاڭلاۋاتامسەن، يۇچۇق زىننەتلىرى ئارقىلىق روھىڭنى  زىننەتلەيسەن ئەمەسمۇ؟ يۈر، ئۆيگە قايتقىن، «ئېيىق بولسىمۇ ئېرىڭ ياخشى، ئۆڭكۈر بولسىمۇ ئۆيۈڭ ياخشى» قىلىچلىۋەت، پاچاقلىۋەت، كاج پەلسەپە يالغۇزلۇقۇڭنى، بېرىپ قۇچاقلا، سېنى ساقلاۋاتقان سۇلغۇن ئوغلۇڭنى. ئەي ئايال، بىلسەڭ ئۇ، تەڭرى بەرگەن بۈيۈك ئىلتىپات، پارلاپ تۇرغان ئۈمىدلىك قوياش!

9



يىپ ئېگىرىشنى بىلمەيدىغان، كىيىم كىيىشنى بىلىدىغان، گۈل نەپەسلىرىنى بىلمەيدىغان ،گۈل ئۈزۈشنى بىلىدىغان يايرىم، مېنى قەپەزگە سولاپ قويدى.
مەن كىم كۆرسە بولىۋېرىدىغان رەسىم ئەمەسمەن.
مەن كىم قاتلىسا قاتلىنىۋىرىدىغان رەخت ئەمەسمەن .
مېنى قويۇۋەت ياكى كۈلۈپ تۇرۇپ دەپنە قىلىۋەت!...

10


مېنىڭ بارلىق تەئەللۇقاتىمنىڭ ئائىلىدە مونۇپۇل قىلىنىشىدىن مېنى ئۆزىنى كۈچەيتىش، تاۋلاش روھى يوق ئاجىز ئايال دېگىلى بولامدۇ؟ ياق، ئۇنداق ئەمەس.
تاش ئۈستىدە ئېچىلغان يىگانە گۈلنى ھەر قاچان، ھەر زامان ئۆزۈمگە ئۆرنەك قىلىمەن. پەقەت ئاشۇ قۇرام تاشلار بولغاچقىلا، يىگانە گۈل ئىللىق قوياش تەپتىدە خۇشبۇي پورەكلەپ ئېچىلىشقا قانچە مەستانە بولغان - ھە! ئۇنىڭ بۇنداق ياشاش مېلودىيەسىنىڭ قۇرام تاشسىز جەۋلان قىلىشى مۇمكىن ئەمەس.
توسقۇنلۇق - بىلسەڭ نىجادىيەت ئەڭگۈشتەرىڭ!

11


ياشلىق دولقۇنلىرى ۋاقىت قىرغاقلىرىغا قانچە ئۇرۇلغىنى بىلەن كەينىگە قايتقىنى قايتقان. ياشلىق -تۈن قوينىدىكى تاتلىق قىسقىغىنا بىر چۈش.
قېنى گىتتار بىلەن ئورۇندالغان كارابوشكا ناخشىلىرى؟
باغ ئاراسى، باغ ئاراسى،
باغدا بۇلبۇل ناۋاسى.
گىتتار بىلەن جېرجېرلىغان،
بىز غۇلجا بالاسى.
...
قىنى، تالاي ئەسلىمە،سىغىنىش بىلەن تولغان غۇلجا كۈيلىرى!
تاڭ زىياسىنىڭ قىزغۇچ شولىلىرىدا ئويغىنىپ كەتتىم. ۋاقىت شاھىنىڭ رەھىمسىز قەلەملىرى، ئۇنىمىغىنىمغا قارىماي ياشلىق چاچلىرىمغا ئاق سىزىقچىلارنى سىزىۋەتتى.
قوياش دەرىزە تەكچىللىرىدە يېنىك ئۇھ تارتتى.
قايتۇرۇۋالغىلى بولمايدۇ، چۈش قىيانلىرىدەك گۈزەل ياشلىقنى، دېدى ئۇ ،ئاق چاچلىرىمنى سىيلاپ تۇرۇپ.

12


تۇنجى مۇھەببەت  - روھىڭغا بىر ئۆمۈر يېپىشقان قارا كۆلەڭگىدۇر...

13



مېنى مېھمان سارايلاردىكى خىرۇستال قاچىلارغا چىلاپ قويماڭلار، چۈنكى ،ئۇ يەردە مېنى كۈيلەر غېرىپ بۇلبۇل يوق، مېنى سۆيگەن نامرات شائىر يوق! مېنى ماشىنىلارغا بېزەك قىلماڭلار، چۈنكى ،ئۇ يەردە ، گۈزەل قىزلار بار. غەمكىن ئانام يوق.

14



تەن دەرگاھىمدا ۋىرۇسلار...
پۈكۈلۈپ - پۈكۈلۈپ يەرگە يىقىلىمەن. ئەمما، شۇنداق پىداكار ھۈجەيرىلەر باركى ،سېنىڭ يۇمۇلغان كۆزلىرىڭنى ھاياتلىق نۇرى بىلەن قايتا ئۇچراشتۇرىدۇ.
كۆزۈمنى ئاچتىم، قاچانلاردۇر، قانداقتۇر مۇقەددەس كىتاپلاردا ئوقۇغان سۈرلۈك بىر سىيما ئالدىمدىن ئۆتتى. ياشاڭغۇرىغان نۇرسىز كۆزلىرىمدە ئۇنى ئىزلىدىم. مەن ئاقارتالماي ئۆتۈپ كەتكەن كونا تاملىرىمدا ئۇ، ئاپئاق نۇر چېچىپ تۇراتتى.
تۇغۇلۇپ تا بۈگۈنگە قەدەر، نە ئىس - تۈتۈن چىقارماي جىمجىت كۆيگەن يۈرىكىمنى يەرگە يېقىپ ھايات ئاتەشلىرىم بىلەن خوشلاشتىم.
سەھەر شامىلىدا ئاق رومالىم سۇس يەلپۈنەتتى. قولۇمدا قەلەم، خۇددى ئۇنىڭ ئۇچۇپ كېتىشىدىن ئەنسىرەپ قەلىمىم چاپماقتا، يېزىقلار ئارقىنى بىلەن ئۇنى چىڭ باغلاپ ئالماقتا ئىدى...
مامات كۈيلىرى سەھەر شامىلىغا خىرىس قىلماقتا ئىدى.
مەن شۇ ياتقانچە ئورنۇمدىن تۇرالمىدىم. خەير، ئەي كاككۇك، مەن ھايات ئۈندەشلىرىڭگە جۈر بولالمىدىم، ئەي يېشىل ئاسمان، سېنىڭ چەكلىرىڭگە جاۋاپ تاپالمىدىم.
توققۇز ياشلىىق قىزىم مارجاندەك كۆز ياشلىرى بىلەن مېنى چىڭ قۇچاقلىماقتا.
تەڭرى قانۇنىيەتلىرى ئالدىدا مەن نىمىمۇ دىيەلەيتتىم،ئۇنۇڭ تۆكىلىۋاتقان دىل ياپراقلىرىغا؟