بالام تەڭرىقۇت باتۇر روزى ئۈچۈن...

                  ئەي باتۇر...!
سېنى ئەستىن چىقارمىغانلار باردۇر...!
...................................

        ئەسسالامۇ ئەلەيكۇم  ئامانگۈل سىڭلىم تېچلىقمۇ .ئائىلىڭىزگە خاتىرىجەملىك - ئامانلىق
تىلەيمەن !       2002-يىلى 11-سىنتەبر  مەرھۇم باتۇر روزى بىلەن قارامايدا ‹‹مايبۇلاق ››ژۇرنىلى
تەھرىر بۆلۈمىدە دىدارلاشقان ۋە ئەدەبىياتىمىز ھەققىدە خېلى ئۇزۇن پاراڭلاشقانىدۇق . باتۇر ماڭا
‹‹باش زىندانلىرىغا ھۇجۇم ››، ‹‹ شۇڭقار بولغان مەلىكە ››  - ئىككى كىتاۋىنى تەقدىم قىلغانىدى .
شۇندىن بېرى ،بۇ يالدامىلارنى  پات-پات ئوقۇپ، مەرھۇمنى  ياد ئېتىپ تۇرىمەن .  ئائىلىڭىز ۋە
سىزنىڭ  بېشىڭىزغا كەلگەن قىسمەتلەردىن بىخەبەر قاپتۇق . بىز قەلەمكەشلەر  بارىمىز  - دوست ،
كىمدە كىم مۇشكۈل كۈنلەرگە قالسا ،قاراپ تۇرۇش -دوستلۇق ئەمەس .باتۇرنىڭ روھى ۋە بالىلارنىڭ
ئۈمۈدى ئۈچۈن بەردەم ،جاسارەتلىك بولغايسىز ،سىز يەنىلا بەختلىك -قوينىڭىزدا ئەقىللىق قىزىڭىز
قەيسەر ئوغلىڭىز بار .يېنىڭىزدا  جىق،جىق ،كۆپ-كۆپ دوستلىرىڭىز باردۇر . ئاللا خالىغان كۈنى
قۇتلۇقجان دادىسى  -يازغۇچى باتۇرنىڭ كىتابلىرىنى ئوقۇپ چىقىپ ،قولىغا قەلەم ئالىدىغانلىقىغا  100 پىرسەنت ئىشىنىڭ ! مەن  تېل نومۇرىڭىز - 15899042532  نى يېزىۋالدىم ،ھېلى تېل
قىلىمەن .

ئەسسالامۇ ئەلەيكۇم ئاكا-ھەدىلەر، نەچچە كۈندىن بۇيان تورغا چىقىپ بولالمىدىم، بۇ تېمىنى يوللىغاندىن بۇيان نۇرغۇن كىشىلەر بىزگە تېلىفون قىلىپ ئەھۋال سورىدى، بۈگۈنگىچە 14000 يۈەن يىغىلدى. ( بۇ پۇللار ئۈرۈمچى، قاراماي، بۆرتالا، قەشقەر يېڭىسار ۋە ئاتۇشتىكى قەلەمكەشلەردىن كەلدى).  مۇشۇ مۇناسىۋەت بىلەن ئۇلارغا كۆپتىن كۆپ رەھمەت ئېيتىمىز.

ئەسسالامۇ ئەلەيكۇم، ياخشىمۇ سىلەر؟ مەن ئازراق چۈشەنچە بېرىشنى لايىق تاپتىم، مەن تولۇق ئوتتۇرىغا ئىمتىھان بېرىدىغان يىلى (يەنى 2007-يىلى ) دادام ۋاپات بولدى، دادامنى يەرلىك قويۇپ بولغاندىن كېيىنلا يەكەن ناھىيىسىدىكى ئەركىن دادام (ئەركىن ئاۋۇت) :«بۈگۈندىن باشلاپ نازىنە مېنىڭ قىزىم، ھەر قانداق ئىشىغا مەن ئىگە ، تاكى ئالىي مەكتەپنى پۈتتۈرگىچە مەن ئوقۇتىمەن» دېدى. شۇنىڭ بىلەن مەن ئۈرۈمچىدە تولۇق ئوتتۇرا ئالىي مەكتەپنى قوشۇپ 7 يىل ئوقۇدۇم، ئەركىن دادامغا بولغان مىننەتدارلىقىمنى تەشەككۈرۈمنى قانداق ئىپادىلەشنىمۇ بىلمەيمەن، قانداقلا ئىپادىلىسەم ئاجىزلىق قىلىدۇ.
رەھمەت ئېيتىشقا تېگىشلىك يەنە بىر كىشى ئەركىن ئىبراھىم دادام ، ئۇ ئىزچىل بىزنىڭ تۇرمۇشىمىزغا كۆڭۈل بۆلۈپ بىزگە ماددىي ۋە مەنىۋى جەھەتتىن ياردەم بېرىپ كېلىۋاتىدۇ، 2012-يىلى 5-ئايدا ئۇ ماڭا كومپىيوتىردىن بىرنى، خەت بېسىپ چىقىرىش ماشىنىسىدىن بىرنى سوۋغا قىلدى. ھېيت بايرام ۋاقىتلىرىدا بىزدىن ئەھۋال سوراشنى ئۇنۇتمايدۇ. يەنە مىجىت ناسىر ، يالقۇن روزى، پولات ھېزىۋۇللا، راھىلە داۋۇت،ئابدۇقادىر جالالىدىن ، ياسىنجان سادىق، ئەسقەر ياسىن، ئالىمجان ھامۇدۇن، مەمتىمىن ھېلىم، ئەنۋەر راخمان، ئابلىكىم ھەسەن، ئىمىن ئەخمىدى، مەمەتتۇرسۇن ئېلى، ئىمىنجان قاتارلىق دادامنىڭ ساۋاقداشلىرى، يېقىنلىرى، دوست-بۇرادەرلىرى بىزدىن دائىم دېگۈدەك ئەھۋال سوراپ، بىزگە يېقىندىن ياردەم قىلىپ، ئاپام بىلەن ئۇكام داۋالانغان چاغلاردا بىزگە ئىقتىسادىي جەھەتتىن ياردەم قىلىپ كەلدى، مەن بۇ نەچچە يىلدىن بۇيان مېھىر مۇھەببەت ئىچىدە ياشاپ كەلدىم. دادام كۆپ پۇل تاپمىغان بولسىمۇ ، يۈز تېپىپتىكەن، ئۇنى ھۆرمەتلەيدىغان، يادىدىن چىقارمايدىغان، قەلبىدىن چىقارمىغانلار ئىنتايىن كۆپكەن. مەن بۇنىڭدىن تولىمۇ خۇرسەن.
  ئۇكامنىڭ سالامەتلىك مەسىلىسىگە كەلسەك، مەن ئۈرۈمچىدە ئوقۇۋاتقان بۇ يەتتە يىلدىن بۇيان ئاپام بەك جاپا تارتتى، ئۇكام ھەر قېتىم تارتىشىپ قالغاندا ئۆزى يالغۇز ئۇكامنى يۈدۈپ دوختۇرخانىغا ئاپىرىپ داۋالىتىپ كەلدى، نۇرغۇن جاپالاردا قالغاندىمۇ بىرەر قېتىم ۋايسىغىنىنى بىلمەيمەن، ئۇكام ئىككىمىزگە ھەم دادا ھەم ئانا بولۇپ كەلدى. ئاللاھقا مىڭ شۈكرى، ئۇكامنىڭ تۇتقاقلىق كېسىلى ھازىر خېلىلا ياخشى بولۇپ قالدى، بىراق ئۆزىنىڭ ھاجىتىدىن ئۆزى چىقالمايدۇ، گەپلەرنى تولۇق قىلالمايدۇ، ئۇكامنى كۆرۈپ باققان تورداشلار بولسا ئۇكامنىڭ ئەھۋالىنى بىلىدۇ دەپ ئويلايمەن. پۇتىنىڭ ئۇچىنىلا دەسسەيدۇ، تاپىنىنى دەسسىيەلمەيدۇ، چۈنكى پۇتىنىڭ ئارقا پېيى ئۆسمەپتۇ، شۇنىڭ ئۈچۈن پەي ئۇلاش ئوپراتسىيىسى قىلىش قارارىغا كەلگەن ئىدۇق.
  مەن بۇ تېمىنى مۇشۇ سەۋەبتىن مۇنبەرگە يوللىغان. بىراق ھەر قانداق بىر ئىشنىڭ ياخشى ھەم يامان تەرىپى بىرلا ۋاقىتتا مەۋجۇت بولىدۇ ئەلۋەتتە. بەلكىم بۇ ئائىلىنىڭ ئەھۋالى راستىنلا مۇشۇنداقمىدۇ، دەپ گۇمانىي نەزەردە بولۇپ قالغانلارمۇ بولۇشى مۇمكىن، بۇنى نەزەردىن ساقىت قىلىشقا بولمايدۇ، ئەگەر شۇنداق گۇمان قىلىپ قالغانلار بولۇپ قالسا، تونۇشلاردىن، بىز بىلەن قۇيۇق ئالاقە قىلىپ كېلىۋاتقانلاردىن بىزنىڭ ئەھۋالىمىزنى سۈرۈشتۈرسە بولىۋېرىدۇ، بىز كۆڭلىمىزگە ئالمايمىز. دېمىسىمۇ ئەھۋالى ياخشى تۇرۇپمۇ، يالغان ياۋداق گەپ قىلىپ ، يالغاندىن بىچارە بولىۋېلىپ كىشىلەرنى ئالداپ پۇل تېپىۋاتقانلارمۇ يوق ئەمەس، شۇڭلاشقا كىشىلەرنىڭ بىزدىن گۇمان قىلىشىنىمۇ توغرا چۈشىنىمىز. بىراق بىردىنبىر ئۈمىدىم، كەينىمىزدىن گەپ قىلماي، قالايمىغان گەپ تارقاتماي، نېمە گەپ بولسا بىۋاسىتە بىزدىن ۋە ياكى بىزنىڭ يېقىنلىرىمىزدىن سورىسا.... بۇ گەپلەرنى قانداقتۇر مەلۇم بىرسىگە قارىتىپ دېگىنىم يوق... توغرا چۈشىنىشىڭلارنى ئۈمىد قىلىمەن.
  شۇنداقلا بۇ تېمىنى كۆرۈپ بىزگە تېلىفون قىلىپ ھال -ئەھۋال سورىغان، بىزگە كۆيۈنگەن قېرىنداشلىرىمىزغا كۆپتىن كۆپ رەھمەت. ئۇلۇغ ئاللاھ تېنىڭلارنى سالامەت قىلغاي.

مەرھۇم دوستۇم باتۇر روزىنىڭ ۋاپاتىغا
نۇردۇن ئىبراھىم جىلال

ئەلھۆكمى لىللا ،كېتىپ قاپسەن ئارىدىن بىئامان باتۇر،
يا بىزنى بىمەھەل چەكسۇن دىدىڭمۇ دەرت-پىغان باتۇر.
ئىدىڭغۇ ياش تېخى گۈلدەك ساڭا كىمنىڭ كۆزى تەگدى،
سېنى بۇنداق كېتەرغۇ دەپ ھېچكىم ئويلىمىغان باتۇر،
ئىجات بەيگىسىدە تۇلپار ئىدىڭغۇ ئەسلىدىن داڭلىق،
سامادا ئۆرلىگەن قۇشنىڭ قاناتى نەۋقىران باتۇر.
نى-نى مەن-مەن دىگەنلەرمۇ قەلىمىڭگە ئىدى قايىل،
غۇرۇردا مىسلى پىر ئۇستاز ،ئەقىلدە سەل قىيان باتۇر.
ئىشەنگىم كەلمىدى ھەيھات توردىن كۆرۈپ جىنازاڭنى،
بىلمىدىم نە ئۈچۈن شۇنچە رەھىمسىز بۇ قاھان باتۇر.
يامانغا ئەجەپ يول كەڭرى ،نىمىشقا ياخشىغا كۈن يوق،
ئىدىڭ تىك چوققىدا بىر تۇغ ،يىقىتتى قاي بوران باتۇر.
ئارىدىن كەم چىقار بەلكى سېنىڭدەك يازغۇچى شائىر،
قايەردە بولسا تۈن شۇندا قۇياشتەك پارلىغان باتۇر.
چىدامىڭ ئالدىدا ھەتتا ئىدى لال  نى چىنارلارمۇ،
گويا چۆلدىكى توغراقتەك بوراندا ئاينىغان باتۇر.
دەرىخ ! بۇندىن كېتىپ قالدىڭ نىمە دەي ئۈشبۇ قىسمەتكە،
ھاياتنىڭ سۆيگۈ مېھرىگە تۈزۈك بىر قانمىغان باتۇر.
تېنچ يات ،كەتكىنىڭ بىرلە ئارىدىن كەتمىدى روھىڭ،
كۆزۈمدىن تامچىلىغان ياش، يۈرەكتە لەختە قان باتۇر...

2009-يىلى 6-ئاي





بۇ يازمىنى ئاخىرىدا   qaraxan تەھرىرلىگەن. ۋاقتى  2014-11-26 15:12  

ئەسسالامۇ ئەلەيكۇم، ياخشىمۇ سىلەر؟ مەن ئۇتكەندە ئوقۇغۇچىلارنى ياردەم قىلىشقا سەپەرۋەر قىلساق دەپ ئىنكاس يازغان .... مەكتەپتە ئۇزۇم بۇ ئىشنى باللارغا تەۋسىيە قىلدىم .... نۇرغۇن باللار ئاز بولسىمۇ ياردەم قىلدى نۇرغۇن مۇناپىق ئەمەلدارلار ‹‹ ئوقۇغۇچىلارنى ئالداپ ، قانۇنسىز ئىئانە يىغقان .....›› دىگەن قالپاق بىلەن مىنى بۇ ئىشتىن توستى ... ھەتتا ماڭا چارە كۇرىدىغانلىقىنى ئېيتىپ پوپوزا قىلىشتى.... ئامالسىز  مەخپى ئىئانە يىغىپ ئاران 1200كوي ئەتراپىدا پۇل بوپتۇ... بۇ پۇلنى خۇدايىم بۇيرىسا بۇ
سودا - سانائەت بانكىسى  6222023010000810610 كارتىغا سېلىپ بىرىمەن ..... ئائىلىڭىزدىكى ھەممىڭلارنىڭ تىنىنى ئۇلۇغ ئاللاھ سالامەت قىلغاي.....

      ئامانگۈل ھەدەمنىڭ جۈدەپ كەتكەن ھالىتى، قۇتلۇقجاننىڭ پۇتىنىڭ ئۇچىدا دەسسەپ مېڭىشلىرى، غەمكىن چوڭ ئانىمىز(ئامانگۈل ھەدەمنىڭ ئانىسى)، رەھمىتى يازغۇچىمىزغا  قۇيۇپ قويغاندەك ئوخشايدىغان نازىنە سىڭلىم،(ئۆمرىڭىز ئوخشاپ قالمىسۇن) تۈنۈگۈندىن بۇيان سىلەرنى ئويلىساملا يۈرىكىم ۋىژژىدە قىلىپ قالىدۇ...
   ئامانگۈل ھەدەمدىكى ئۈمىدۋارلىق،غەيرەت شىجائەت ماڭىمۇ كۈچ بەردى، قىسقىغىنە بىرسائەتلىك سۆھبەتتىن مەن بەك تەسىرلەندىم، قايتىدىن كۈچ-ماغدۇرۇمغا كەلگەندەك ھېس قىلىپ قالدىم. قۇتلۇقنىڭ پاكىزە ،زېرەك چىرايىغا قارىساملا يىغا تۇتىدۇ. چوڭ ئاپاش بىلەن بەش مىنۇت سىردىشىپ ئۆتكىنىمگە بىر كېچە رەھمەتلىك مومامنى چۈشەپ چىقىپتىمەن. ھەممىسى ئاللاھنىڭ سىناقلىرى، بەردەم بولۇڭلار،بىز ئاخىرغىچە سىلەر بىلەن بىللە...
      بۇنىڭدىن كېيىن داۋاملىق سىلەرنى يوقلاپ تۇرىمەن، ئەمدى ئۆيۈڭلارنى ئاسانلا تاپىمەن. كۈچۈمنىڭ يېتىشىچە سىلەرگە ياردەم قىلىمەن.

ئەسسالام نازىنە سىڭلىم ئىنىمىزنىڭ ئەھۋالىدىن خەۋەر بەرگەن بولسىڭىز ؟

ئەسسالامۇ ئەلەيكۇم ئامانگۈل ھەدە، نازىنە سىڭلىم، ئامان- ئېسەن تۇرۇۋاتامسىلەر؟
سىلەرنىڭ قىيىنچىلىقتا قالغانلىقىڭلارنى ئاڭلاپ يۈرىكىم ئىچىشتى، چۈنكى بىر- ئىككى يىلنىڭ ئالدىدا مەنمۇ ئوغلۇمنى داۋالىتىش ئۈچۈن مۇشۇنداق قىيىنچىلىقلارنى تارتقان بولغاچقا بۇ خىل تۇيغۇنى ياخشى چۈشىنىمەن. شۇ چاغدا مەنمۇ شىنجاڭ يازغۇچىلار جەمىئىيىتىدىكى ئازات سۇلتان مۇئەللىم، ئەيبۇ ياقۇپ ۋە ياشلار نەشرىياتىدىكى دوستۇم ئابلىكىم ھەسەنلەرنىڭ ياردىمى ۋە بىر تۈركۈم قەلەمكەش دوستلىرىمنىڭ خالىس ياردىمى بىلەن ئوغلۇمنى ئوڭۇشلۇق ئوپىراتسىيە قىلدۇرۇۋالغان ئىدىم.
توردىكى بۇ مۇراجىئەتنامىنى ئاڭلىغاندىكىن كىيىن بىىشىمدىكى ئاشۇ ئىشلارنى ئويلىدىم ۋە سىلەرگە ياردەم قىلىش نىيىتىگە كەلدىم. شۇنىڭ بىلەن تۈنۈگۈن ۋە بۈگۈن كورلىدا ئېچىلغان 100 نەچچە كىشىلىك كارخانىچى- تىجارەتچىلەرنىڭ ئۈگىنىش كۇرسىغا قاتنىشىپ، مەن بىلەن بىر شىركەتتە ئىشلەۋاتقان ئىجتىھاتلىق قەلەم ساھىبى تۇرغۇن ئەھەدنىڭ باش بولۇپ، يىقىندىن ياردەمدە بولۇشى ۋە بۇ قىتىمقى كۇرىسنى تەشكىللىگەن «ئۈرۈمچى توغراق ئېنتىرنىت چەكلىك شىركىتى»نىڭ لىدىرى ئابدۇراخمان پەتتار ئەۋف مۇئەللىمنىڭ تەشكىلىي جەھەتتىكى قوللىشى بىلەن ئىككى كۈن ئىچىدە 9800 يۈەن ئېئانە توپلىدىم( بۇنىڭ ئىچىدىكى  5000 يۈن پۇلنى كۇچا "يانار تاغ" سودا چەكلىك شىركىتىنىڭ لىدىرى ئايگۈل روزى خانىم ئىئانە قىلدى، باشقا 4800 يۈەن ئاز- ئازدىن يېغىلدى) ئابدۇراخمان پەتتار ئەۋف مۇئەللىم ئەتە 2000 يۈەن بەرمەكچى بولدى. ئاللا خالىسا ئەتە(12- ئاينىڭ 15- كۈنى) 12 مىڭ يۈەننى جەملەپ  تۇرغۇن ئەھەد ۋە ئابدۇراخمان پەتتار ئەۋفلەر بىلەن بىللە سىلەرگە ئاپىرىپ بېرىمەن.  ئاللاھ ئىشلىرىڭلارنى ئاسان قىلغاي.

ھۆرمەت بىلەن: غوجىمۇھەممەد مۇھەممەد بۇ يازمىنى ئاخىرىدا   غوجىمۇھەممەد تەھرىرلىگەن. ۋاقتى  2014-12-15 02:12  

غۇجىمۇھەممەد ئاكىمىزغا ئاپرىن!

ئۇكام يۆتەل بولۇپ قالغانلىقى ۋە ھاۋانىڭ سوغۇق بولۇپ كەتكەنلىكى سەۋەبلىك ئۇنى مەكتەپكە ئاپارمىدۇق، ئۆيدە بېقىۋاتىمىز، ھازىر خۇداغا شۈكرى، خېلىلا ياخشى، بىراق شۇ تۇرمۇشتىكى چوڭ كىچىك ھاجىتىدىن چىقالمايدۇ، پۇتىنىڭ ئۇچىدا دەسسەپ ماڭىدۇ... كۆڭۈل بۆلگىنىڭىزگە كۆپتىن كۆپ رەھمەت.

ۋە ئەلەيكۇم ئەسسالام ، ئاكا، بۈگۈن سىلەرنى كۆرۈپ ھەممىمىز شۇنچىلىك خۇشال بولدۇق ،ئابدۇراخمان پەتتار ئاكاشقا، ئايگۈل ھەدىمىزگە ۋە بىزگە ياردەم قىلغان بارلىق كىشىلەرگە ئاللاھنىىڭ سالامى بولغاي، ئۇلۇغ ئاللاھ ئۇلارنىڭ تېنىنى سالامەت قىلغاي.. سىزگە كۆپ رەھمەت ئاكا، بىز ئۈچۈن كۆپ جاپا چېكىپسىز، كۆپ كۈچ چىقىرىپسىز. بالىڭىزنىڭ تېنىنىڭ سالامەت بولۇشىنى، ئائىلىڭىزنىڭ بەختلىك بولۇشىنى ئاللاھتىن تىلەيمەن. ھەممىڭلارغا يەنە بىر قېتىم كۆپ تەشەككۈر.

قەيسەر بولۇڭ ئامانگۈل ھەدە!
بۇ كۈنلەرمۇ ئۆتۈپ كېتىدۇ ، ئۆمىدۋارلىق ھەممەيلەننى ئەڭ ياخشى كۈنگە ئۇلاشتۇرىدۇ ...

بۇ مۇنبەردىكى ھەممەيلەن بىر ئائىلە كىشىلىرىمىز ، بىرى يىغلىسا يۈزى كېلىپ يېشىنى سۈرتىدىغان ، بىرى يىقىلسا مىڭى يۆلەيدىغان ، مېھرى-مۇھەببەت بىلەن رىشتىلەرنى چىڭ باغلايدىغان قېرىنداشلارمىز !
مەنمۇ بىر كورلىدا بولغاندىكىن بارىمەن ، ئەمما ئۆزۈم بارغۇچە كۆڭلۈمنى ئاز بولسىمۇ يولغا سالغاچ تۇردۇم .

ئامانگۇل،سىزلەرگە ياردەم قىلدىعان دوسىتلار،ئىنە-سېڭىللار چوقۇم چىقىدۇ، كۆڭلىڭلارنى يېرىم قىلماي ئازراق ساقلاپ تۇرۇڭلار.

بىز سىزلەرگە ياردەم قىلىش ئۈچۈن  ئابدۇرشىت ئېلى بىلەن ھەركەت قىلىۋاتىمىز.
ئىنشائاللا ھەركىتىمىز نەتىجىلىك ئاخىرلاشقۇسى... بۇ يازمىنى ئاخىرىدا   yoruq تەھرىرلىگەن. ۋاقتى  2015-1-9 13:26