ئەھەدى____ ھىجران مۇڭلىرى (2) [ئۇلانما كۆچۈرۈش]

        ھىجران مۇڭلىرى (2)

بىۋاپا ، كۆڭلى قارا باغرىمنى قان - قان ئەيلىدى ،
مىسلى ھالىمنى مۈشۈك ئالدىدا ساچقان  ئەيلىدى
.
زۇلپىنى سىرتماق قىلىپ ئاستى جۇدالىق  دارىغا،
كىرپىگىدىن ئوق ئۈزۈپ تېغىمنى تالقان ئەيلىدى .

قەترە مەي لەۋ جامىدىن ئوتلاشقا ئىمكان بەرمەيىن ،
خۇددى ئوۋچى ئالدىدا بىچارە تۇشقان   ئەيلىدى .

جۈپ زىناق مەڭزى ئارا قىلغاي نامايىش دەممۇ - دەم ،
سۆڭرى ھىجران دەستىدىن كۆكسۈمنى خۇمدان ئەيلىدى .

گاھ ئوڭۇم ، گاھى  شىرىن چۈشلەر ئارا بەرمەي تۇتۇق ،
گۈل سىياق  روخسارىنى  خىلۋەتتە  پىنھان   ئەيلىدى .

ئاھ ئۇرۇپ قان يىغلىسام نەزەر كۆزىن  سالماقتا  يوق ،
ئەكسىچە قەھ - قەھ ئۇرۇپ ھالىم پەرىشان  ئەيلىدى .

ئەھەدى ھەيرانكى، گۈلدىن كۆرمىسە بۇلبۇل   ۋاپا ،
نەۋاپا،قىلدى جاپا  ھالىمنى نىمجان   ئەيلىدى ...
                                (2)
ئەي پەرى ، ئىشقىڭدا ئۆچمەس چوغ بولۇپ ياندى يۈرەك ،
زار بولۇپ ۋىسالغا ، ھىجران  ۋەسلىگە  قاندى   يۈرەك .

جۈپ ئانار مەي باغلىغان ئالتۇن لىگەندۇر  كۆكسىڭىز ،
بۇندا باغرىم بىر قەپەس، تۇتقۇنغا   ئايلاندى  يۈرەك .

بىر دەقىق جىم تۇرسا كاشكى ، يۇلقۇنۇپ بەرمەس ئارام ،
قانچە كىشنەپ چاپچىغانچە  شۇنچە داغلاندى يۈرەك .

تاش كۆمۇرگە ئوتنى ياقسا كۈل بىلەن داشقال قالۇر ،
بىقەدىر جىسمىمدا ئوت كۆيگەنچە چوغلاندى يۈرەك .

مەن تۆرەلدىم قايسى كۈن ئىشقى -پىراق سەيناسىدا،
سۆڭرى ھىجرانغا بەنت - زەنجىردە باغلاندى يۈرەك
.
نە ئەجەپتۇر ئەيلىسەڭ كۆكسۈمنى خۇمدانغا قىياس ،
شۇ ئەزىم خۇمدان ئارا يالقۇنغا ئايلاندى يۈرەك .

بەس!كۆتۇر باشىڭنى نىمجان  ياتما غەپلەت ئۇيقىدا ،
چاچ ، ساقالىڭغا  قىرو قۇنغاندا  ئويغاندى  يۈرەك  !  
                               (3)
ئەييۇھەنناس !بىر ئالامەت زاتنى كۆردۇم  رەستىدە ،
تۇرقى دەرۋىش،قولدا دەستار،جەندە باربوي بەستىدە .

بىر كۆزى يالغان ئىكەنۇ،بىر پۇتى سۈنئى ئىكەن ،
بۇ كارامەت ئاز ئىكەنمىش زاتى ئىنسان نەسلىدە .

    قاي كۈنى بىر چۈش كۆرۇپ بوپ قاپتىمىش غەيرى مىجەز ،
ئول بىشارەت بىرلە تىترەپ يۈرگىدەك ياز پەسلىدە .

تەركى دۇنياغا شەيىخ بولماقنى ئەيلەپتۇ   ھەۋەس ،
   گاھ بىھۇش، گاھ ئوڭ ئىمىش شول ئىشتىياقنىڭ دەستىدە .

<سۈف> دېسە بار يوق بولارمىش،يوق شۇئان زاھىر بولۇپ ،
بەزىلەر چايقاپتۇ باش، بۇ چۈشنى بۇزماق قەستىدە .

تۇتىدەك سايرايدىكەن زات،مەن نېمە يۇ ، سەن نېمە ؟
ساڭا نىم بار، ماڭىچۇ ؟ بۇ تەركى ھىجران دەشتىدە .

ئەھەدى قالدى تۇيۇپ بۇ كاتتا  زاتنىڭ   پەيلىنى ،
خەقنى بىر ئەخمەق قىلايچۇ ، دەپتىكەنمىش ئەسلىدە...

جۈپ زىناق مەڭزى ئارا قىلغاي نامايىش دەممۇ - دەم ،
سۆڭرى ھىجران دەستىدىن كۆكسۈمنى خۇمدان ئەيلىدى .
.........
ھاياتلىقتىكى شىرىن تەم سۆيگۈ چەشمىسىدىن فونتاندەك ئېتىلىپ چىققان قايناق ھېسسىيات، غەزەل مىسرالىرىدىكى جانلىق ئىماگ،ئوبرازلىق تىل پاساھىتى بىلەن ئۆز ئىپادىسىنى تېپىپتۇ. لۇتفى،ناۋايىلاردىن موللا بىلال، ئابدۇخالىق ئۇيغۇرغىچە شېئرىيەتتە بېسىلغان ئابىدىلىك شانلىق ئىزلارنىڭ ئىزلارغا ئۇلىشىپ داۋام قىلىشىغا تىلەكداشمەن. قەلەمداش قېرىندىشىم ئەھەدى، قولىڭىزدىكى قەلەم ھارمىغاي...
   

        مۇشۇنداق ۋايىغا يەتكەن غەزەللەرنى ئوقىسا خېلى ئۇزاقلارغىچە لەۋنى تامشىپ قالىدىكەن كىشى! بۇ يازمىنى ئاخىرىدا   hojakabiz تەھرىرلىگەن. ۋاقتى  2012-5-10 18:57  

  ئەھەدى ئاكا، سىلىنىڭ غەزەللەرنى ئوقۇسام-ئوقۇسام قانمايمەن.
بىر تەكلىپ: پۈتۈن غەزەللىرىنى مۇشۇ ماۋزۇ ئاستىغا يىغىپ قويسىلا، بىرنچىدىن، ئۆزلىرنىڭ تېپىشلىرىغا ئاسانلىق تۇغۇلىدۇ، ئىككىنچىدىن، باشقىلارنىڭ تولۇق ئوقۇپ بەرە ئېلىشى ئۈچۈن قولايلىق بولىدۇ. ئۈچىنچىدىن، تەتقىق قىلىدىغانلارنىڭ پايدىلىنىشى ئۈچۈن قۇلاي بولىدۇ.
    شادلىقلىرى زىيادە، دۈشمەنلىرى پىيادە بولغاي!

ئىسىل غەزەللەردىن ھۇزۇرلاندىم.سالامەت بولۇڭ.