تەبەسسۇم شېئىرلىرىدىن [ئۇلانما كۆچۈرۈش]

ئەسسالامۇ ئەلەيكۇم ھۆرمەتلىك تورداشلار! يازغۇچىلار جەمئىيىتىنىڭ كونا مۇنبىرىدىكى بىر قىسىم يازمىلىرىمنى ساقلىۋېلىش ئېھتىياجى بىلەن مەزكۇر مۇنبەرگە توپلام شەكلىدە يوللىدىم. كۆپىچىلىكنىڭ كۆزدىن كەچۈرىشىنى ۋە تەكلىپ پىكىر، تەنقىدى

پىكىر بىرىشىنى قارشى ئالىمەن.

ئىلتىجا قىلدىم

ئايشەم ئىسمايىل تەبەسسۇم

شېئىر

شېئىر مىنى يازماقچى بولۇپ ،
ئەگىپ يۈرەر خىيالىم ئارا .
قەلەم گۆھەر قازماقچى بولۇپ ،
جىمجىتقىنا چۆكەر دىلىمغا .

مەن شېئىرغا دەردىمنى تۆكۈپ ،
سىزىپ چىقتىم پورتىرىتىمنى .
يىغلىۋالدىم بۇلۇتتەك ئۆكسۈپ ،
مىسرالارغا چېچىپ قېنىمنى .

داۋالغۇدى پىكىر ئېقىنى ،
جىلۋىلەندى ئويچان تىلەكلەر ،
مەن شېئىرنىڭ ئامراق يېقىنى ،
شېئىر تۇغار شىرىن ئىستەكلەر .

ئىھ رومانتىك قەلىب ساھىلى ،
شېئىر بىلەن مىنىڭ ماكانىم .
خۇشتارىمنى تاپتىم ئاخىرى ،
ئۇ سۆيۈملۈك دىلكەش جانانىم .

ئىلتىجا قىلدىم

سىردىشىم قەلەمگە ئىلتىجا قىلدىم ،
ئىشقىڭنى خەنجەر قىل، تەخىرسىز قىل، دەپ .
باغرىمدىن ئويۇپ چىق شېئىرلىرىمنى ،
ياتمىسۇن غەپلەتتە ئۆلۈمنى تىلەپ .

مۇڭدىشىم قەغەزگە ئىلتىجا قىلدىم ،
باغرىڭنى يېيىپ بەر تۆكەي دەردىمنى .
شېئىرغا باغلىدىم ئوتلۇق مۇھەببەت ،
سەن بىلەن تۆلەيمەن ئۇشبۇ قەرزىمنى .

ئىسيانكار تۈنلەرگە ئىلتىجا قىلدىم ،
مېھماندوست بولۇڭلار، شېئىر كەلمەكچى !
ئىھتىمال بۇ مەھشەر كۈنۈم مەن ئاڭا ،
دەرد-پىراق، ئىشقىمدىن ھىساپ بەرمەكچى .

ھىجران گۈلى

ئايشەم ئىسمايىل تەبەسسۇم

ئەتلەس كۆڭلىكىم

ئايشەم ئىسمايىل تەبەسسۇم

يۇلۇپ ئالدىم كۆكتىن رەڭدار ھەسەن-ھۈسەننى ،
قوشتۇم ئاڭا توز قانىتى، ئالتۇن لىگەننى .
لالە، چوغلۇق، رەيھانلاردىن ھۆسۈن تالىشىپ ،
گۈزەللىكى داغدا قويدى گۈلزار چىمەننى .

ئاق مەشۈتتىن رەت-رېتىگە كۆزلۈك تاشلىدىم ،
تاڭدا كۈلگەن يۇلغۇنلاردىن چىچەك باغلىدىم ،
گۇگۇمدىكى شەپەق رەڭگى،قاراپ قانمىدىم ،
تاپالمىدىم روخسارىدىن قىلچە ئىۋەننى .

نازىنىنغا ئۇندىن ئارتۇق زىننەت بولمىغاي ،
ئىپتىخاردا مۇندىن بەكرەك قىممەت بولمىغاي ،
ھايا، نازاكەتتىن ئۈستۈن نۇسرەت بولمىغاي ،
بىلگىن-ئۇيغۇر بەلگىسى شۇ ئەتلەس ئىكەننى .

خان نەسلىگە لايىق ئىسىل ئەتلەس كۆڭلىكىم ،
ئەتلەس كۆڭلەك مىھرىم مېنىڭ قەدرىم، سۆلىتىم ،
ئۇيغۇر دېسە، ئەتلەس بىلەن ئاشار ھۆرمىتىم ،
جاھان كېزىپ تاپالماسمەن ئۇنداق لىۋەننى .

كىيىپ چىقسام ئالقىشلىدى ھەممىگە ياراپ ،
داغدا قالسۇن پەرىلەر ئۇز ئەپتىمگە قاراپ ،
ئاللاھ ئۇنى ياراتقانكەن ئۇيغۇرغا ئاتاپ ،
پەرىزاتتەك ئۇيغۇر كېيسۇن ئەتلەس دىگەننى !

2011-يىلى 10-ئاينىڭ 6-كۈنى (خوتەن)

ئىككى شېئىر

ئايشەم ئىسمايىل تەبەسسۇم

چۈش ۋە كۈتۈش

كىرەر ئىدى چۈشۈمگە پات-پات ،
ئىللىق باھار،ھال رەڭلىك چىچەك .
ئالمىلار ھەم ئۆرۈك شاپتۇللار ،
ئارتىۋېلىپ چىرايلىق لىچەك .

چىچەكلىكتىن چىقىپ كىلەتتى ،
يارىم كۈلۈپ باھار گۈلىدەك .
چولپان كۆزى،غۇنچە لىۋىدىن ،
چىچەكلىككە قوشقاندەك بىزەك .

قايتىلانغان گۈزەل چۈشلەردىن ،
سۈيۈنەتتى ئالەمچە يۈرەك .
ھەر چۈشۈمنىڭ ئەسلىمىسىدىن ،
تۇغۇلاتتى گۈزەل ئاق تىلەك .

قانچە باھار كەتتى، يار كەلمەي ،
سەزدىم ئۇنى جۇدۇن پەسلىدەك .
كەتتى بەلكىم گۈللەرنى ئىزدەپ ،
چۈشۈمدىكى ئاپئاق كىپىنەك...

سىنى ئەسلەيمەن

ھەر تاڭدا قۇياش زەر نۇرلار تارىتىپ،
پارلىسا يار سىنى كەلسىكەن دەيمەن.
تاڭ سەھەر ساباسى چېچىمنى سىلاپ،
مەڭزىمگە سۆيگەندە سىنى ئەسلەيمەن...

ھەر تاڭدا باغلارغا خۇشھىد تارىتىپ،
ئىشقىدا بۇلبۇلنى خەندان سايرىتىپ،
ھۆسنىدىن گۈزەل بىر دۇنيا يارىتىپ،
قىزىلگۈل كۈلگەندە سىنى ئەسلەيمەن...

ئاشىقلار يۈرۈشەر قول تۇتۇپ ئەنە،
گۈللەنگەن بەختىگە قىلىپ تەنتەنە،
ئىككىمىز ئايلانغان يوللاردا يەنە،
مەن يالغۇز يۈرگەندە سىنى ئەسلەيمەن...

غېىرپلىق كۆزلەرگە چىللايدۇ شەبنەم،
قاچانمۇ بۇلارسەن ھىجرىمگە مەلھەم،
ئامان بول ئامرىقىم ،سۈيىمەن دىسەم،
يۈرىكىم كۆيگەندە سىنى ئەسلەيمەن...

دوپپىڭىزنىڭ گۈلىمەن

ئايشەم ئىسمايىل تەبەسسۇم

بىلەرمۇ دەپ قەدرىمنى ،
خىيال قىلىپ يۈرىمەن .
خويمىغىنا ياراشقان ،
دوپپىڭىزنىڭ گۈلىمەن .

2011-يىلى 8-ئاينىڭ 10-كۈنى (خوتەن)

ئەسلى ئادرىسى: http://new.xjzjxh.com/Topic.aspx?BoardID=14&TopicID=5247

سىزنى ئەسلىسەم

ئايشەم ئىسمايىل تەبەسسۇم

بىلەرسىزمۇ ئەزىزىم يۈرەك سۆزۈمنى ؟
تاتلىققىنا ئەركىلەپ سۆزلەپ بەرمىسەم .
ھەركۈن غېرىپ تۈنلەردە ئەسلەمسىز مىنى؟
گۈلخان يانار قەلبىمدە سىزنى ئەسلىسەم .

مۈرىڭىزگە باش قۇيۇپ مۇڭداشقۇم كىلەر ،
گۈزەل ئايدىڭ كەچلەردە سىرداشقۇم كىلەر ،
سۇلار چېچىپ قوغلۇشۇپ ئويناشقۇم كىلەر ،
ۋىسالىڭىز قەستىمدە، سىزنى ئەسلىسەم .

گۈل ئېچىلدى باغلاردا ئۈزۈپ بىرەمسىز ؟
سۇدا ئالما ئېقىپتۇ سۈزۈپ بىرەمسىز ؟
ئوماققىنا جىلمىيىپ كۈلۈپ بىرەمسىز ؟
دۇنيا كۈلەر چىھرىمدە سىزنى ئەسلىسەم .

بىر جۈپلەرگە ھەۋەستە قارا قالىمەن ،
ھەسەت بىلەن باغرىمنى چاناپ قالىمەن .
ئۆزۈمنى بەك بىچارە ساناپ قالىمەن ،
بۇلۇت يىغلار ئەرزىمدە، سىزنى ئەسلىسەم .

كىلىدۇ دەپ ساقلىدىم،كىلىدىغانسىز ؟
سېغىنچىمنى ،سۆيگۈمنى بىلىدىغانسىز ؟
سىزمۇ مەندەك ھىجراندا يۈرىدىغانسىز ،
داستان پۈتەر دەردىمدە، سىزنى ئەسلىسەم .

سېغىنسىڭىز دەپ تۇرۇڭ كۆڭلۈم ئېچىلۇر ،
يولىمىزغا ۋاپادىن گۈللەر چېچىلۇر ،
ناخشىمىزغا ئەڭ لىرىك كۈيلەر قېتىلۇر ،
ساداقەت بار لەۋزىمدە سىزنى ئەسلىسەم .

2011-يىلى 29-ئىيۇل تاڭ سەھەر(خوتەن)

ئەسلى ئادرىسى: http://new.xjzjxh.com/Topic.aspx?BoardID=14&TopicID=4966

ئارمان كۈيلىرى

ئايشەم ئىسمايىل تەبەسسۇم

لەۋلىرىڭگە دەريا باشلىسام ،
گۈلگە تولسا ئارمان باغلىرىم .
ھىسلىرڭغا چالما تاشلىسام ،
داۋالغۇسا ياشلىق چاغلىرىم .

يۇلتۇزلارنى چاچسام ئۆيۈڭگە ،
مەن پارلىسام تولۇنئاي بۇلۇپ .
ناۋا قوشسام ۋاپا كۈيۈڭگە ،
قالسا ھىجران باغرىنى مۇجۇپ .

پىشانەڭگە ھەر كۈنى سەھەر ،
تۇمار ئاسسام تىلەكلىرىمدىن .
ئايرىلمىساق كۆز يۇمغان قەدەر ،
سۆيسەڭ مىنى يۈرەك قېتىڭدىن .

باغلىۋالسام سۇمبۇللىرىمدا ،
كۆرەلمىسەڭ مەندىن باشقىنى .
ئۆمۈر بويى بولساڭ يېنىمدا ،
تېپىلمىسا سەندىن ياخشىسى .

چىچەكلىسەم باغرىڭدا ھەركۈن ،
خەندان ئۇرساڭ شېخىمغا قونۇپ .
پىدا بولسا جېنىم سەن ئۈچۈن ،
كەلسەڭ سۆيگۈ شەربىتى سۇنۇپ .

2011.7.6

ئىزلىرىڭنى قىلغىلى كەلدىم تاۋاپ

گۈلگە باقسام تۇرىدۇ قات-قات كۈلۈپ،
خۇشھىدى قىينايدىكەن سەندەك پۇراپ.
ئەسلىتىپ قويدى گۈزەل روخسارىسى،
دورىغانكىن گۈل سىنى كىمدىن سوراپ.

بىرئۆمۈر كۈتسۇن دىدىڭمۇ بىلمىدىم،
يۈتتى سەۋرىم ياش تۆكۈپ يولغا قاراپ.
كەلمىدىڭ سۆيمەككە رايىڭ يوقمىدى؟
بۇ پىراق ئاتەش گۇيا باغرىم كاۋاپ.

ئايغا باقسام ئۈزىدۇ مۇڭغا پېتىپ،
بۇ كىچە ئۆتتى يەنە يۇلتۇز ساناپ.
كۆپ كۈتۈشتىن يۈرىكىم لەختەيۇ-قان،
مەيلىمۇ شۇنداقلا چەكسەم ئىزتىراپ.

ئۇشبۇ ھىجراندىن سەپەر مۈشكۈل ئەمەس،
خاتىمە تاپسۇن جۇدالىق ۋە ئازاپ ،
كۈلكىگە قالساممۇ مەيلى ئەل ئارا،
ئىزلىرىڭنى قىلغىلى كەلدىم تاۋاپ...

2010-يىلى 6-ئاينىڭ 14-كۈنى(خوتەن)

گۈللەرنىڭ بەرگىدە شېئىرىم قالدى

ئايشەم ئىسمايىل تەبەسسۇم

سۆيەلمەي قانچە تاڭ ئارماندا ئاتقان ،
غۇنچىنىڭ رەڭگىدە ھىسلىرىم قالدى .
زىناقتەك نۇرلىنىپ پىچىرلاۋاتقان ،
شەبنەمنىڭ جۇلاسى شېئىر ئاتالدى .

ياپراقتەك تىترىدىم جۇدۇن سوققاندا ،
باھاردىن سالامخەت كۈتمىگەنمىدىم؟!
خىيالىم ئەنسىز بىر تەسۋىش تۇغقاندا ،
ئەسەبىي تۇيغۇدا كۆيۈپ ئۆرتەندىم .

قۇياشنىڭ تەپتىنى بىلگەن كائىنات ،
بىلمەسمۇ شەپەقنىڭ كۆيۈش سىرىنى ؟
ئۆزۈمنى بۇلۇتقا ئوخشاتقىنىم راست ،
تۆكمىدىم دەردىمنىڭ مىڭدىن بىرىنى .

روھىمغا مېھماندۇر مۇڭلۇق خىياللار ،
قارارىم تەنھالىق كۈيىنى چالدى .
چىچەكلەپ باغرىمدا كۈرمىڭ سۇئاللار ،
گۈللەرنىڭ بەرگىدە شېئىرىم قالدى .

ئالمىشىش

سەن ئۇنتارسەن ئازاپلىرىڭنى ،
ئاچچىق مەيدە مەيلىنىپ تۇرۇپ .
مەن ئۇنتۇيمەن ھاياتلىقىمنى ،
كۆز يېشىمغا چىلىشىپ، قۇرۇپ .

كۆز يېشىمدا مەيلىنىپ قالساڭ ،
ۋىسالىڭغا يىتەتتىم چۇقۇم .
بەلكىم ئاچچىق مەيگە چىلاشسام ،
كىلەرمىكىن سىنى ئۇنۇتقۇم...

ئەسلى ئادرىسى: http://new.xjzjxh.com/Topic.aspx?BoardID=14&TopicID=4414