پارلاق:ئۇيغۇر كېلىنلىرى [ئۇلانما كۆچۈرۈش]

جامالىدىن تۆكۈلسە نۇر،قەمەر شاھ ،كۈن بۇلۇر سەۋدا،
چىرايىدا تەڭدىشى يوقتۇر،جىمى شەيئى قىلۇر غەۋغا،
باغاشلايدۇ زىمىن ئانا،تەبەسسۇمدا يېيىپ سەينا،
پەزىلەت بابىدا يارقىن،بويى ئۇز،كۆزلىرى شەھلا؛
باقالايدۇ جاھانغا تىك،دىيانەتكە ھامان شەيدا،
ھايات ەۈلشەنىدە لەززەت كېلىنلەر ۋەسلىدىن شەيدا.

ۋاپا چاقماق دېيىلسە گەر،ئۇلار يارقىن چېقىنلاردۇر،
ئەگەر دەريا مىزان،پاكلىق،ئۇلار سۈزۈك ئېقىنلاردۇر،
كىشى كۆڭلى خالار بولسا،يۈرەككە ئەڭ يېقىنلاردۇر،
يىگىت بولسا سۇۋادان گەر،ئۇلار يېشىل قىيىنلاردۇر؛
باقالايدۇ جاھانغا تىك،دىيانەتكە ھامان شەيدا،
ھايات گۈلشەنىدە لەززەت كېلىنلەر ۋەسلىدىن پەيدا.

گۈزەل قىزلار دېمەك-شەپقەت،جۇلالار بەستىدە ئىپپەت،
قىزى بارنىڭ قۇياش چېھرى،ھايات،تۇرمۇش قۇچار نۇسرەت،
چوڭايسا قىز،قىلىش ياتلىق ئەزەلدىنلا پۈتۈك قىسمەت،
ئاتا-ئانا بۇلۇر رازى،يېڭى ئۆيدە تاپار ئىززەت؛
باقالايدۇ جاھانغا تىك،دىيانەتكە ھامان شەيدا،
ھايات گۈلشەنىدە لەززەت كېلىنلەر ۋەسلىدىن پەيدا.

ئاسان بولمايدۇ يات ئۆيگە ئۈنۈپ گۈلدەك سىڭىپ كەتمەك،
كۆڭۈللەرنىڭ ئىشىكىنى مېھىر-سۆيگۈ بىلەن چەكمەك،
خىيال ھەر كاللىدا ھەر خىل،جىمى ئوينى بىلىپ يەتمەك،
پەزىلەت ھەم مۇھەببەتتىن يېڭى ئۆينى ھەشەم ئەتمەك؛
باقالايدۇ جاھانغا تىك،دىيانەتكە ھامان شەيدا،
ھايات گۈلشەنىدە لەززەت كېلىنلەر ۋەسلىدىن پەيدا.

سەھەر تۇرغاي ئورۇندىن،يورۇماستا باغۇئېرەملەر،
چاچار ئۆز مېھرىدىن ھويلا،ئىشىك ئالدىغا زەمزەملەر،
ئۇزايىدىن باراقسانلاپ تۇرار كۆكلەمدە ئەردەملەر،
چۈشەر ھەر ئىش تازا رەتكە،چېچەك سۆيمەستە شەبنەملەر؛
باقالايدۇ جاھانغا تىك،دىيانەتكە ھامان شەيدا،
ھايات گۈلشەنىدە لەززەت كېلىنلەر ۋەسلىدىن پەيدا.

تائام ئەتسە گويا بالدۇر،يىگەن تىلدا قالار لەززەت،
قولىدىن گۈل ئۈنەر دائىم،پورەكلەر كەشتىسى جەننەت،
ئېسىلدۇر ھەر ئىشى،كۈلگەي ھاياتقا بەخىش ئېتىپ سەنئەت،
كۆيۈنگەي چوڭ-كىچىكلەرگە،قارار گاھى قىلىش خىزمەت؛
باقالايدۇ جاھانغا تىك،دىيانەتكە ھامان شەيدا،
ھايات گۈلشەنىدە لەززەت كېلىنلەر ۋەسلىدىن پەيدا.

سۆيۈندۈرگەچ،قېينئانا دېگەي:«باشىڭغا قۇت قونسۇن»،
قېيىنئاتا دۇئادا دەر:«كىلىن بالام ئەزىز بولسۇن!»
ئېرى ئېيتار:«جېنىم خوتۇن،تېنىڭگە يەنە كۈچ تولسۇن»،
قۇلۇم -قوشنا تەرىپلەپ دەر:«ئېسىل كېلىن ھامان كۈلسۇن...»
باقالايدۇ جاھانغا تىك،دىيانەتكە ھامان شەيدا،
ھايات گۈلشەنىدە لەززەت كېلىنلەر ۋەسلىدىن پەيدا.

ئۆتۈپ كۈنلەر، توشۇپ زىرقى،ھالال جۈپتى كىتىپ قالسا،
كۈلەلەيدۇ يەنە مەغرۇر،كۆزىدە دەرد قېتىپ قالسا،
ئۆزى بىر رەھنەما،پەرزەنت خوشال قانات قېقىپ قالسا،
ھاياتىدىن پۈتەر دەستان،ئەگەر شائىر بىلىپ قالسا؛
باقالايدۇ جاھانغا تىك،دىيانەتكە ھامان شەيدا،
ھايات گۈلشەنىدە لەززەت كېلىنلەر ۋەسلىدىن پەيدا.

كېلىن بار قايسى مىللەتتە چېۋەرلىكتە ئاڭا يەتكەن؟
ۋۇجۇدى سۈپسۈزۈك قەترە ،كىشى بارمۇ ئىنكار ئەتكەن؟
پەرىلەر شاھىدۇر گويا،كۆڭۈل دىلتارىنى چەككەن،
بەخت سۇلتانىدۇر،ئەركەك  ۋىسالىغا ئۇنىڭ يەتكەن؛
باقالايدۇ جاھانغا تىك،دىيانەتكە ھامان شەيدا،
ھايات گۈلشەنىدە لەززەت كېلىنلەر ۋەسلىدىن پەيدا.

قۇچاقلايمەن نىگارىمنى،ساداقەتتە بۇلۇپ ئەرمەك،
تىۋىنغايمەن ھاياسىغا،دىلىمدا نۇرلىنىپ ئىستەك،
ئۇلۇغلايمەن چىدامىنى،ماڭا چىن ئىش ئىزى ئۆرنەك،
ھاياتنى گۈلگە پۈركەيمەن،مۇھەببەتتە بۇلۇپ ئىستەك:
باقالايدۇ جاھانغا تىك،دىيانەتكە ھامان شەيدا،
ھايات گۈلشەنىدە لەززەت كېلىنلەر ۋەسلىدىن پەيدا.