«شىنجاڭ گېزىتى»نىڭ26-يانۋار«ئەدەبىيات گۈلزارى» بېتىنىڭ مۇندەرىجىسى [ئۇلانما كۆچۈرۈش]

«شىنجاڭ گېزىتى»نىڭ26-يانۋار«ئەدەبىيات گۈلزارى» بېتىنىڭ مۇندەرىجىسى
مەسئۇل مۇھەررىر:جۈرئەت كامىل
مۇھەررىر:ئابدۇلھەي ئابدۇلھەق
كوررېكتور:رەيھانگۈل خۇدابەردى
شېئىرىيەت:
ئاشۇنداق چىداملىق تاشيولچى دېگەن................ ئەكبەر ئابدۇرېشىت
ئىككى شېئىر........... ...........................يالقۇن ئەزىزى
ئىزگۈ ئارمان قۇچقان خىياللار........................ئۈمىدجان قادىرى
كەچكۈزدىكى رەڭ...........................سائادەت ساتتار ئايتۇغ
دىلنى ئالدى شېرىن تىنىقلار.......................مەھمۇد ھېيت مەھدى
نەسىر گۈلىستانى
مەن تاشيولچى................................نۇرىمانگۈل ۋاھىت
مەجنۇن خىياللار...........................ئابلەت مۇھەممەت كۈيزار
فوتو سۈرەت
يول«مۇئەككەل»لىرى....................ئۆركەش جاپپار
«پېشانەڭ ئوڭ بولغاي»......................ئابلىز ئابدۇللا

ئىزگۈ ئارمان قۇچقان خىياللار
ئۈمىدجان قادىرى
يۇرتۇمدىكى دەريا
ئىڭڭەيىمدىن قىرىققا قەدەر،
ياشاپ كەلدىم سېنىڭ بويۇڭدا.
ئارمانلىرىم سۈزۈك جىلۋىگەر،
خۇي-پەيلىممۇ چىقتى خۇيۇڭدا.

دولقۇنۇڭدىن ئىرادەم ھاسىل،
بۇژغۇنلىرىڭ سۆيگۈمنى تۇغقان.
تورالمايدۇ يولۇمنى پاسىل،
بۇ ئۇدۇممۇ سېنىڭدىن يۇققان.

ئېھ،توختىماس يۇرتۇم دەرياسى،
پەقەت ھارماس كارۋانسەن گويا.
چۆلدە قالغان مەشۇق زىباسى،
ئاشىقتىكى ئارمانسەن گويا.

مەن تەۋەللۇت سېنىڭ بويۇڭدا،
يەنە بىر كۈن ئۆلۈپ كېتەرمەن.
ھامان بىر كۈن ۋىسال تويۇڭدا،
شادلىنارمەن كۈلۈپ كېتەرمەن.
ئەللەي كۈيى
زېمىن مۈگدەر سۈكۈت ئىچىدە،
ھۇجرىدا چۈش كۆرەر تۇلۇنئاي.
بىر ئۆي يورۇق،تىمتاس كېچىدە،
ئەللەي ئېيتار ئانا ئۇخلىماي.

ئۈشبۇ كۈينى ئاڭلاپ شاماللار،
رۇجەك تامان ئۇرۇلار بىھۇش.
ئىزگۈ ئارمان قۇچقان خىياللار،
دىل-ۋۇجۇدنى ئەيلەيدۇ مەستخۇش.

بۆشۈك تەۋرەر لەرزان تىنىمسىز،
يۇمران تىنىق بۇندا تويۇنغان.
شۈنچە زىلال،شۇنچىلىك شەكسىز،
ئانا مېھرى بىلەن يۇيۇنغان.

ھاياجانلىق ئىلھامغا پېتىپ،
سۈرەت سىزار شائىر قەلىمى.
سۆيگۈ بىلەن كېلىدۇ يېتېپ،
زىيا قۇچقان تاڭنىڭ قەدىمى.
دوستلارغا تىلەك
جان-تېنىمنى ساتساڭلار مەيلى،
سىرلىرىمنى ساتماڭلار دوستلار.
يولىمىسۇن نامەردلەر پەيلى،
پىنھاندىن ئوق ئاتماڭلار دوستلا.

ساپ دىللارغا پىچاق بىلىسەم،
سالامىمنى كۆرمەڭلار قۇبۇل.
ئۆزۈم ئۈچۈن باھار تىلىسەم،
كاچكۇل تامان تاشلاڭلار ئۇدۇل.

ئەلنىڭ يۈكى،ئاۋام ئىشىنى،
ئالالمىسام زىممەمگە ئەگەر،
تامام ئېتىپ نۇرنىڭ ئىشكىنى،
يولاتماڭلار ھويلامغا سەھەر.

دوستلار ھامان كېتىمىز بىر كۈن،
ھايات بىلەن خوشلىشىپ،ئۆلۈپ.
ئەل ئالدىدا بولماستىن زەبۇن،
ياشايلى بىز كۈلدۈرۈپ،كۈلۈپ.

كەچكۈز رەڭگى-غېرىپ رەڭ

سائادەت ساتتار ئايتۇغ

كىلەلمىدىڭ،بارالمىدىم ھېچ،
ئۆتتى تالاي دىدارسىز كۈنلەر.
قۇۋۇقتىكى بىچارە دەمدەر،
بەكمۇ مىسكىن بىر كۈيدە ئۈنلەر.

چۈشسە ياپراق كۆڭلۈممۇ يېرىم،
كەچكۈزدىكى غېرىپ رەڭلەردەك.
مىسكىن دۇنيا، ئۈنسىز ياشلىرىم،
ئاقار يەنە قانچە يىل سەلدەك؟

ياش ئەمەستۇر كۆزدىن ئاققىنى،
تۇز سۈيىدەك قىرتاق بىر ئازاپ.
ھېجران دىلنى ئەزدى توختىماي،
سۆيۈلمىدۇق ئىنتىلىپ ياشاپ.

تىلەپ كەلدۇق شىرىن دەملەرنى،
ھەر كېچىسى باھارنى چۈشەپ.
ئۆتۈپ كەتتى شۇنچە ئاي-يىللار،
سۆيۈلمىدۇق سۆيۈشنى ئىستەپ.

شىنجاڭ گېزىتى2014-26-يانۋار