«ئىزگۈ تور ئەدەبىياتى مۇكاپاتى»نى تەسىس قىلىش ھەققىدە ئۇقتۇرۇش   [ئۇلانما كۆچۈرۈش]

             «ئىزگۈ تور ئەدەبىياتى مۇكاپاتى»نى تەسىس قىلىش ھەققىدە ئۇقتۇرۇش

　شىنجاڭ يازغۇچىلار جەمئىيىتى تور ئەدەبىياتىنى ساغلام تەرەققى قىلدۇرۇش،ئەدەبىيات ھەۋەسكارلىرى ۋە تورداشلارنىڭ كۈنسىرى كۈچىيىۋاتقان مەنىۋىي تەلەپلىرىنى قاندۇرۇش،توردىن تېخىمۇ ئۈنۈملۈك پايدىلىنىش مەقسىدىدە  «ئىزگۈ تور ئەدەبىياتى مۇكاپاتى»نى تەسىس قىلىشنى قارار قىلدى. مەزكۇر مۇكاپاتنى شىنجاڭ يازغۇچىلار جەمئىيىتى، «شىنجاڭ يازغۇچىلار تورى» بىلەن «شىنجاڭ ئىزگۈ ئۇچۇر، پەن - تېخنىكا چەكلىك شىركىتى» بىرلىشىپ يولغا قويىدۇ.

　　مۇناسىۋەتلىك ئىشلارنى تۆۋەندىكىچە ئۇقتۇرىمىز:

　1.مەزكۇر مۇكاپاتلاش پائالىيىتى يىلدا بىر قېتىم ئېلىپ بېرىلىپ، ھەر يىلى 6-ئايدا مۇكاپات تارقىتىلىدۇ. بۇ يىل 2014-يىلى 1-ئاينىڭ 1-كۈنىدىن تاكى 2014-يىل 6-ئاينىڭ 1-كۈنىگىچە بولغان «شىنجاڭ يازغۇچىلار تورى»نىڭ «ئىزگۈ تور ئەدەبىياتى مۇكاپاتى»  مەخسۇس سەھىپىسى ۋە «تەڭرىتاغ» ژۇرنىلىدا تەسىس قىلىنىدىغان «تور ئەدەبىياتىدىن تەرمىلەر» سەھىپىسىدە ئېلان قىلىنغان ئەسەرلەر تاللاش ئوبېيىكتى بولىدۇ.

　2.مۇكاپاتقا قاتناشتۇرۇلىدىغان ئەسەرلەر  شېئىر، پىروزا(ھېكايە، پوۋېسىت، رومان)، ئەدەبىي ئوبزۇر، نەسىر، ئەدەبىي خاتىرە، ئەدەبىي تەرجىمە قاتارلىق ئالتە خىل ژانىردىكى ئەسەرلەر بىلەنلا چەكلىنىدۇ. تەرجىمە ماقالە - ئەسەرلىرىنىڭ ئەسلىي نۇسخىسى ياكى كۆپەيتىلمە نۇسخىسى بىرگە ئەۋەتىلىشى تەلەپ قىلىنىدۇ.

　3.مۇكاپاتقا قاتناشتۇرىلىدىغان ئەسەرلەرگە مەزمۇن ۋە بەدئىيلىك جەھەتتىن ئالاھىدە يۇقىرى ئۆلچەم قويۇلىدۇ. مۇكاپاتلىق پائالىيەتكە قاتناشتۇرىلىدىغان بارلىق ئەسەرلەر  بىر تۇتاش تورىمىزدا يېڭىدىن تەسىس قىلىنىدىغان «ئىزگۈ تور ئەدەبىيات مۇكاپاتى» مەخسۇس سەھىپىسىگە يوللىنىدۇ.
     مۇكاپاتقا ھەر بىر ئادەمنىڭ پەقەت بىرلا قېتىم ئەسەر قاتناشتۇرۇش ھوقۇقى بولىدۇ. ئەسەر يوللىغۇچى ئەسىرىنى  مەخسۇس سەھىپىگە يوللاشتىن سىرت، ئەسىرىنىڭ بېشىغا ھەقىقىي ئىسىم-فامىلىسىنى يېزىشى ، ئاخىرىغا «ئىزگۈ تور ئەدەبىيات مۇكاپاتى»پائالىيتىگە دەپ ئەسكەرتىپ قۇيۇشى لازىم .بۇنىڭدىن سىرت يەنە، ئەسەر يوللىغۇچى ئاپتور ئۆزى توردا بولغان بولىشى ۋە ئۆزىنىڭ ئەسىرىنى ئۆزىلا يوللىشى كېرەك. باشقىلارنىڭ ۋاكالەتەن يوللىغان ئەسەرلىرى بىردەك قوبۇل قىلىنمايدۇ.

      4.ئەسەر تەستىقلاش ئۆتكىلى ئالاھىدە چىڭ تۇتۇلۇش بىلەن بىرگە، باشقا سەھىپىلەرگە يوللانغان ئەسەرلەر باھالاش دائىرىسىگە كىرگۈزۈلمەيدۇ. تورىمىزنىڭ باشقۇرغۇچىلىرى مەزكۇر مۇكاپاتلىق پائالىيەتكە ئەسەر قاتناشتۇرسا بولىدۇ. ئەمما باھالاش جەريانىدىكى «نامزات ئەسەر كۆرسىتىش» باسقۇچىدا ئۆز ئەسەرلىرىنى نامزاتلىققا كۆرسىتىشكە بولمايدۇ.

　5.مۇكاپاتقا ئېرىشكەن ئەسەرلەرنى دەرىجىگە ئايرىغاندا، يۇقىرىدا ئەسكەرتىلگەن ئالتە ژانىرغا چەكلىمە قويۇلمايدۇ.ھەر قېتىملىق باھالاشتا، تورىمىزنىڭ تەرەققىياتىغا گەۋدىلىك تۆھپە قوشقان ئىككى نەپەر باشقۇرغۇچى سايلاپ چىقىلىپ،ئۇلارغا «مۇنەۋۋەر تور باشقۇرغۇچى» مۇكاپاتى بېرىلىدۇ. مۇكاپاتقا ئېرىشكەن ئەسەرلەر ئومۇمىي ئۈچ دەرىجىگە ئايرىپ باھالىنىدۇ.

بىرىنچى دەرىجىلىك مۇكاپات بىر پارچە بولۇپ، مۇكاپات سوممىسى  2000  يۈەن نەق پۇل بولىدۇ.
ئىككىنچى دەرىجىلىك مۇكاپات ئىككى پارچە بولۇپ، ھەر بىرى  1500  يۈەندىن مۇكاپاتلىنىدۇ.
ئۈچىنچى دەرىجىلىك مۇكاپات ئۈچ پارچە بولۇپ، ھەر بىرى  1000  يۈەندىن مۇكاپاتلىنىدۇ.

  6.مۇكاپاتقا قاتناشتۇرۇلىدىغان ئەسەرلەر  «شىنجاڭ يازغۇچىلار تورى»دىن باشقا ھەر قانداق تور بەتلەردە ئېلان قىلىنمىغان، يېڭىدىن ئىجات قىلىنغان،  پەقەت يازغۇچىلار تورى ۋە «تەڭرىتاغ» ژۇرنىلى «تور ئەدەبىياتىدىن تەرمىلەر»سەھىپىسىگىلا خاس ئەسەرلەردىن بولۇشى لازىم.مۇكاپاتلاش پائالىيىتىدىن كېيىن ئەسەرنى قايتا ئېلان قىلىش، ئىشلىتىش ھوقۇقى ئاپتۇردا بولىدۇ.

   7.مۇكاپاتقا قاتناشتۇرۇلىدىغان ئەسەرلەر يازغۇچىلار جەمئىيىتى مەخسۇس تەشكىللىگەن باھالاش ھەيئىتى تەرىپىدىن دەسلەپكى باھالاش ۋە ئاخىرقى باھالاش دەپ ئىككى باسقۇچىلۇق باھالاش شەكلى بىلەن باھالاپ چىقىلىدۇ. دەسلەپكى باھالاش باسقۇچىدا، تورداشلار توردا ئاشكارا «نامزات ئەسەر» كۆرسىتىش ۋە باھالاش ھەيئىتى «نامزات ئەسەر» كۆرسىتىش ئۇسۇلى قولىنىلىدۇ. ئەسەرلەر دەسلەپكى باھالاشتىن ئۆتۈپ، كېيىنكى قېتىملىق باھالاش نامزاتلىقىغا كىرگەندىن كېيىن، «شىنجاڭ يازغۇچىلار تورى»دا ئېلان قىلىنىپ، تورداشلارنىڭ نازارىتىگە سۇنىلىدۇ. ھەر قانداق بىر ئەسەرنىڭ بىزنىڭ بەلگۈلىمىمىزدىن باشقا مەتبۇئاتلاردا ئېلان قىلىنىپ بولغانلىقى پاش بولسا، تەكشۈرۈلگەندىن كېيىن، مۇكاپاتلىنىش سالاھىيىتى بىكار قىلىنىدۇ.

　8.مۇكاپاتقا ئېرىشكەن ئاپتۇرلارغا مۇكاپات پۇلىدىن باشقا يەنە، شىنجاڭ يازغۇچىلار جەمئىيىتى نامىدىن تامغا بېسىلغان مەخسۇس «گۇۋاھنامە» تارقىتىپ بېرىلىدۇ. شۇنداقلا مۇكاپاتقا ئېرىشكەن ئەسەرلەر بىر تۇتاش «شىنجاڭ يازغۇچىلار تورى» تەرىپىدىن نەشىرگە تەييارلىنىدىغان توپلامغا كىرگۈزىلىدۇ.
     ھەر قېتىملىق مۇكاپاتلاش قارارى ئاپتونۇم رايۇنىمىزدىكى نوپۇزلۇق ئەدەبىي ژۇرناللار، «يازغۇچىلار تورى» ۋە مۇناسىۋەتلىك تاراتقۇلاردا ئېلان قىلىنىدۇ.

　9.تۇنجى قېتىملىق مۇكاپاتلاش پائالىيىتى 2014-يىلى 6-ئايدا ئۈرۈمچىدە ئېلىپ بېرىلىدۇ.

     ئالاھىدە ئۇقتۇرۇش چىقىرىلدى.


       شىنجاڭ يازغۇچىلار جەمئىيىتى
       شىنجاڭ ئىزگۈ ئۇچۇر، پەن - تېخنىكا چەكلىك شىركىتى

           2014 -يىل 1-ئاي

  بۇمۇ ناھايىتى ياخشى بىر باشلىنىش بوپتۇ. جەمئىيەتنىڭ بۇنچە ئەھمىيەت بەرگىنىگە يارىشا كەڭ تورداش-مۇنبەرداشلارنىڭ بۇ ئەھمىيەتلىك پائالىيەتكە دۇرۇس ئادىمىيلىكىمىز بىلەن بار ئىقتىدارىمىزنى ئىشقا سېلىپ ئاكتىپ قاتناشمىقىمىز ئەۋزەلدۇر! قېنى دوستلار، قول تۇتۇشۇپ بىرلىكتە ئالغا!!!

مۇنبەر  ئەمدى  ھەقىقىي   سەرخىللار  سەيناسىغا   ئايلانغۇدەك……

بەكلا ئالقشلىغۇدەك ئىش بوپتۇ.يازغۇچىلار مۇنبىرىدە بۇنداق پائالىيەتلەرنىڭ توختاپ قالماسلىقىنى ئۈمىد قىلىمەن.

بۇمۇ خۇشخەۋەركەنغۇ.... يېڭى يىل كىرىشى بىلەنلا، يېڭى-يېڭى خۇشخەۋەرلەر يازغۇچىلار مۇنبىرىدىن تاراۋاتىدۇ... بۇ خىل كەيپىيات يىل بويى داۋاملاشقاي....

بۇ بەل باغلاپ كىرمىسەك بولمايدىغان سەينا بوپتۇ. بۇنداق سەيناغا چۈشمەي تۇرالمايمىز

    بۇ پائالىيەتنىڭ  قەلەمكەشلەر ئىجادىيىتى ئۈچۈن يەنە بىر قېتىملىق مۇۋەپپەقىيەتلىك بۇرۇلۇش نۇقتىسى بولۇپ قېلىشىغا تىلەكداشمەن.
   ئەدەبىياتىمىزنى كۆڭلىگە پۈككەن شىنجاڭ ئىزگۈ ئۇچۇر، پەن - تېخنىكا چەكلىك شىركىتىگە ئاپىرىن.

ئەدەبىيات ئۈچۈن تۆھپە قۇشقانلارغا ئاپىرىن!

بەك ياخشى ھەم ئەھمىيەتلىك ئىش بوپتۇ. مۇكاپات سوممىسى خېلى مولكەن.

مانا بۇ يېڭى يىلدىكى يېڭى باشلىنىش، بەك ياخشى بولۇپتۇ.

مېنىڭ بىر پارچە ئەسىرىم بار ئىدى،ئىككى بابى مۇشۇ مۇنبەردە بار.ئەگەر مەن بۇ ئەسەنى تولۇقى بىلەن بۇ مۇكاپات سەھىپىسىگە يوللىسام ،ئىلان قىلىنىپ بولغان ئەسەر دەپ قارىلامدۇ يوقمۇ؟

ھەقىقەتەن ئالقىشلىغۇدەك ياخشى ئىش بوپتۇ.مۇنبەر ئەمدى ياخشى ئەسەرلەرگە ئورۇن ھازىرلىغۇدەك.

    «ئېزگۈ» شىركىتىنىڭ ئاقىلانىلىكىگە ئاپىرىن! بۇ ھەم ئەدەبىياتىمىزنى قوللاش، ھەم شىركەت ئوبرازىنى جۇلالاندۇرۇشتا قوش بىسلىق، ئىجابىي رولغا ئىگە دانا تەدبىر بولۇپ قالغۇسى!

ياخشى باشلىنىش!...
ئەمدى سەرخىل ئەسەرلەر ۋە توردىن تېزىپ كەتكەن بىرقىسىم شائىر-يازغۇچىلارنى كۆرەلىگىدەكمىز......