جەمئىيىتىمىزنىڭ 2014-يىللىق ھەيئەت رىياسەت يىغىنى ئېچىلدى [ئۇلانما كۆچۈرۈش]

  جەمئىيىتىمىزنىڭ 2013-يىلدا ئىشلىگەن خىزمەتلىرىنىڭ مۇھىم نۇقتىلىرى تۆۋەندىكىچە:

  بىرىنچى، تۈرلۈك ئەدەبىي پائالىيەتلەر ئاكتىپلىق بىلەن قانات يايدۇرۇلدى.

  يىلنىڭ بېشىدا جەمئىيىتىمىزنىڭ دائىمىي ھەيئەتلەر كېڭەيتىلگەن يىغىنى چاقىرىلىپ، جايلاردىكى يازغۇچىلار جەمئىيەتلىرى ۋە ژۇرنال تەھرىر بۆلۈملىرى بىلەن 2013-يىللىق خىزمەتلىرىمىز مۇزاكىرە قىلىنىپ ئورۇنلاشتۇرۇلدى.

  3-ئايدا ئاپتونوم رايونلۇق ئەدەبىيات - سەنئەتچىلەر بىرلەشمىسى پارتىگۇرۇپىسىنىڭ شۇجىسى خۇاڭ يوڭجۈن بىلەن مۇئاۋىن رەئىس دوڭ لىبو قاتارلىقلا خۇنەن يازغۇچىلار جەمئىيىتىدە خىزمەت زىيارىتىدە بولۇپ، ئىككى جەمئىيەتنىڭ بەش يىللىق ھەمكارلىق، ئەدەبىي ئالماشتۇرۇش تۈرىنى بېكىتتى.

  3-ئايدا ئاپتونوم رايونلۇق ئەدەبىيات - سەنئەتچىلەر بىرلەشمىسى، يازغۇچىلار جەمئىيىتىنىڭ رەئىسى ئازات سۇلتاننىڭ باشچىلىقىدا «شىنجاڭ يازغۇچىلىرىنىڭ تەيۋەن سەپىرى» زىيارەت پائالىيىتى ئۇيۇشتۇرۇلدى.

  4-ئايدا ئاپتونوم رايونلۇق ئەدەبىيات - سەنئەتچىلەر بىرلەشمىسى، يازغۇچىلار جەمئىيىتىنىڭ مۇئاۋىن رەئىسى دوڭ لىبو جۇڭگو يازغۇچىلار جەمئىيىتى تەشكىللىگەن «جۇڭگو يازغۇچىلىرىنىڭ ئامىرىكىنى زىيارەت قىلىش ئۆمىكى»گە ئومەك باشلىقى بولۇپ ئامىرىكىغا زىيارەتكە چىقتى.

5-8-ئايلاردا جۇڭگو يازغۇچىلار جەمئىيىتى ۋە خۇنەن ئۆلكىلىك يازغۇچىلار جەمئىيىتى بىلەن بىرلەشمە زىيارەت ئۆمىكى تەشكىللىنىپ،ئىلى، چۆچەك، ئالتاي، شىخەنزە، قاراماي، تۇرپان قاتارلىق جايلاردا تۇرمۇش ئۈگىنىش پائالىيەتلىرى ئېلىپ بېرىلدى.

6-ئايدا كۇچا ناھىيەلىك پارتىكوم تەشۋىقات بۆلۈمى، ئەدەبىيات - سەنئەتچىلەر بىرلەشمىسى بىلەن بىرلىشىپ «مىڭ يىللىق كۈسەن، يۈز يىللىق كۇچا ــ ئەدىبلەر نەزىرىدىكى كۇچا» تېمىسىدىكى مۇھاكىمە، زىيارەت پائالىيىتى تەشكىللەندى.

9-ئايدا ئاپتونۇم رايۇنىمىزدىن بەش نەپەر ياش يازغۇچىنى «مەملىكەتلىك ياش يازغۇچىلار ئىجادىيەت يىغىنى»غا قاتناشتۇرۇشقا ئەۋەتىلدى.

11-ئايدا <<شىنجاڭ يازغۇچى - سەنئەتكارلىرىنىڭ چاقىلىق سەپىرى>> زىيارەت، تۇرمۇش ئۈگىنىش پائالىيىتى ئۇيۇشتۇرۇلدى.

12-ئايدا شىنجاڭ ياش يازغۇچىلىرىنىڭ ئىجادىيەت مۇھاكىمە يىغىنى مۇۋەپپىقىيەتلىك ئېچىلىپ،127 نەپەر ھەر مىللەت ياش يازغۇچىلىرى بىر يەرگە جەم بولۇپ، ئىلمىي لېكسىيەلەرنى ئاڭلىدى،ئۆزئارا ئەدەبىي ئالماشتۇرۇشلارنى ئېلىپ باردى.

12-ئايدا شىنجاڭ ئاز سانلىق مىللەتلەرنىڭ «خانتەڭرى»، «دۇلدۇل»، «ئالتۇن ئۈزەڭگە» مۇكاپاتلىرىنى تارقىتىش مېخانىزىمى ئىسلاھ قىلىنىپ، 2013-يىللىق مۇكاپاتلاش پائالىيىتى ئېلىپ بېرىلدى.

  ئىككىنچى،«ئاز سانلىق مىللەتلەرنىڭ ئەسلى ئەسەر ۋە خەنزۇچە، ئاز سانلىق مىللەتلەر تىللىرى بويىچە تەرجىمە ئەسەر قۇرۇلۇشى» خىزمىتى چىڭ تۇتۇپ ئىشلەندى.

  بۇلتۇردىن بۇيان جەمئىيىتىمىز ھەر مىللەتتىن بولغان ئەدەبىي مۇھەررىر، ئەدەبىي تەرجىمان قاتارلىق مۇتەخەسىسلەرنى تەشكىللەپ،  «ئاز سانلىق مىللەتلەرنىڭ ئەسلى ئەسەر ۋە خەنزۇچە، ئاز سانلىق مىللەتلەر تىللىرى بويىچە تەرجىمە ئەسەر قۇرۇلۇشى»غا يوللانغان 44 مىليون 790مىڭ خەتلىك  ئەسەرگە نىسپەتەن دەسلەپكى باھالاش خىزمىتىنى ئورۇنداپ،ئاپتونوم رايۇنلۇق تەشۋىقات بۆلۈمىنىڭ ئاخىرقى بېكىتىشىگە يوللاپ بەردى. ئۇنىڭدىن 55پارچە ئەسەر  ھەرقايسى نەشرياتلار تەرىپىدىن نەشر قىلىنىپ تارقىتىلدى.ھازىرغىچە بۇ قۇرۇلۇش ئارقىلىق نەشردىن چىققان كىتاپلارنىڭ سانى 173 پارچىگە يەتتى،

2013-يىلى جەمئىيىتىمىز جۇڭگو يازغۇچىلار جەمئىيىتى تەرىپىدىن نەشر قىلىنىدىغان ئىسلاھات، ئېچىۋېتىش ئېلىپ بېرىلغان 30 يىلدىن بۇيانقى «جۇڭگو ئازسانلىق مىللەتلەر ئەدەبىياتى» مەجمۈئەسىنىڭ ئۇيغۇر ئەدەبىياتى قىسىمى،«يېڭى دەۋىردىكى ئۇيغۇر ئەدەبىياتى: ھېكايە-پوۋېستلار»،«يېڭى دەۋىردىكى ئۇيغۇر ئەدەبىياتى: شىئېرلار »،«يېڭى دەۋىردىكى ئۇيغۇر ئەدەبىياتى:نەسرلەر»،«تاجىك ئەدەبىياتى ئەسەرلىرىدىن تاللانما»،«2013-يىللىق جۇڭگو شىئېرىيىتى» قاتارلىق 28 كىتاپقا ئەسەر تاللاش، تەرجىمىگە ئۇيۇشتۇرۇش خىزمىتىنى ئىشلىدى.

ئۈچۈنچى،كۆپ خىل شەكىل ۋە كۆپ قاتلاملىق تەربىيەلەش سىنىپلىرى ۋە ئىلمىي مۇھاكىمە يىغىنلىرى ئېچىلدى.

جەمئىيىتىمىزنىڭ جەنۇبىي تاغدىكى ئىجادىيەت مەركىزىنىڭ رولىدىن تولۇق پايدىلىنىپ،بىر يىل ئىچىدە 12 قېتىم تەربىيەلەش  ۋە ئىلمىي مۇھاكىمە پائالىيىتى ئېلىپ بېرىلدى. قاتناشقان ئادەم سانى 450 نەپەرگە يەتتى.

1-ئايدا خەنزۇ يازغۇچىسى لى جەننىڭ «مورى دەرياسى» ناملىق رومانى ھەققىدە ئىلمىي مۇھاكىمە يىغىنى ئېچىلدى.4-ئايدا «تەڭرىتاغ»ژۇرنىلى تەھرىر بۆلۈمى بىلەن بىرلىكتە «80-يىللاردىن كېيىن تۇغۇلغان ئۇيغۇر ياش يازغۇچىلىرىنىڭ ئىجادىيەت سىمىنارىيەسى» ئۆتكۈزۈلدى. 4-ئايدا «ئاۋام يېزىقچىلىقى جەريانىدىكى ئەدەبىي ئىجادىيەت» تېمىسىدا ئىلمىي مۇھاكىمە يىغىنى ئېچىلدى. 4-ئايدا«شىخەنزە يازغۇچىلىرىنىڭ ئىجادىيەت كۇرسى» ئېچىلدى.8-ئايدا «شىنجاڭ ياشلىرى ژۇرنىلى» بىلەن بىرلىكتە «ژۇرنال يانفۇن يۇمشاق دېتال ھەمكارلىق تۈرى« ژۇرنال مەسئۇللىرىنىڭ سۆھبەت يىغىنى ئېچىلدى. 6-ئايدىن 10-ئايغىچە  مورى، قاراقاش، كورلا، ئاقتۇ، قۇمۇل يازغۇچىلىرىنىڭ ئىجادىيەت سىمىنارىيەلىرى ئۆتكۈزۈلدى.

5-ئايدا قازاق، قىرغىز، ئۆزبەك قاتارلىق مىللەتلەردىن تەشكىللەنگەن 12 نەپەر يازغۇچى شاڭخەيگە بىر ئايلىق بىلىم ئاشۇرۈشقا ئەۋەتىلدى.

6-7-ئايلاردا لۈشۈن ئەدەبىيات ئىنىستىتۇتىنىڭ شىنجاڭ ئاز سانلىق مىللەتلەر يازغۇچىلىرى تەربىيەلەش سىنىپى ئۈرۈمچىدە ئېچىلدى.

10-ئايدا خۇنەندە شىنجاڭ ئاز سانلىق مىللەتلەر يازغۇچىلىرىنىڭ ئىجادىيەت مۇھاكىمە سىنىپى ئېچىلدى.

ئىجادىيەت سىمىنارىيەلىرى ۋە كىتاپ ئوقۇش كۇرۇسلىرىنى ئۈرۈمچىدىلا ئۆتكۈزۈپ قالماي، جايلاردىكى يازغۇچىلار جەمئىيەتلىرى ۋە ژۇرنال تەھرىر بۆلۈملىرى بىلەن بىرلىشىپ، تۆۋەندە، ئاساسى قاتلاملاردا ئۆتكۈزۈش سىناق قىلىنىپ، ياخشى ئۈنۈم قولغا كەلتۈرۈلدى.ئاقسۇ، قۇمۇل، چۆچەك، غۇلجا قاتارلىق جايلاردا تەشكىللىگەن كۇرۇسلارغا قاتناشقان يازغۇچىلىرىمىزنىڭ سانى 200 دىن ئاشتى .

كۆپ خىل شەكىللەر ئارقىلىق، يېڭى ئىدىيە، يېڭى قاراش ۋە ئەدەبىيات بىلىملىرىنى تارقىتىش خىزمىتى چىڭ تۇتۇپ ئىشلەندى. بىر يىل جەريانىدا ئاپتونوم رايۇنلۇق كۇتۇپخانا بىرلىشىپ 12 قېتىم «يازغۇچىلار لېكسىيە»سى تەشكىللەندى. بۆرتالا، غۇلجا،گۇچۇڭ، بارىكۆل، چاقىلىق قاتارلىق جايلاردا ئۇيۇشتۇرۇلغان لېكسىيە پائالىيەتلىرىمىزگە قاتناشقان ئادەملەرنىڭ سانى 2000 دىن ئاشتى.

تۆتىنچى،يازغۇچىلىرىمىزنىڭ ئىجدىمائىي رولى زور دەرىجىدە جارى قىلدۇرۇلدى.

جەمئىيەتتە يۈز بېرىۋاتقان تېرورلۇق ۋە دىننىي ئاشقۇنلۇق قاتارلىق ۋەقە ھەم ھادىسىلەرگە قارىتا يازغۇچىلىرىمىز گېزىت - ژۇرنال، تېلۋىزىيە، تور قاتارلىق تاراتقۇلاردا ئۆز ئەسەرلىرى، نۇتۇق - سۆھبەتلىرى بىلەن مەردانىلىق بىلەن ئوتتۇرغا چىقىپ، ئۇلارنى ئەيىپلىدى. زامانىۋى مەدەنىيەتنى تەشەببۇس قىلىپ، مىللەتلەر ئىتتىپاقلىقى ۋە جەمئىيەت مۇقىملىقىنى تەشەببۇسكارلىق بىلەن قوغدىدى. «يازغۇچىلار لېكسىيەخانىسى» قاتارلىق سەھنىلەردىن پايدىلىنىپ، يېڭى ئىدىيە، يېڭى كۆزقاراشلارنى ئاۋامغا تەشۋىق قىلدى.

بەشىنچى، «يازغۇچىلار تورى»نىڭ رولى بارغانچە ياخشى جارى قىلدۇرۇلدى.

باشقۇرۇش ۋە تەھرىرلىك ئۆتكەللىرى چىڭ تۇتۇلۇپ، يازغۇچىلار ئارا ئالاقىلىشىش، ئۇچۇرلارنى چىقىرىش، ياش كۈچلەرنى تەربىيەلەش قاتارلىق جەھەتلەردىكى كۆزنەكلىك رولى بارغانچە مۇھىملاشتى. ھازىرغىچە ئەزا سانى 3000 دىن، يوللانغان تېما ۋە ئىنكاسلارنىڭ سانى 110 مىڭدىن ئېشىپ مۇقىم تەرەققىيات باسقۇچىغا كىردى.

ئالتىنچى، ئىلمىي مۇھاكىمە يىغىنلىرىنى ئېچىش، ژۇرناللاردا مەخسۇس سەھىپە تەسىس قىلىش قاتارلىق شەكىللەر بىلەن شىنجاڭ ئاز سانلىق مىللەت يازغۇچىلىرى ۋە ئۇلارنىڭ ئەسەرلىرىنى ئىچكىرى ئۆلكىلەرگە تونۇشتۇرۇش، كۆرسىتىش خىزمىتى زور كۈچ بىلەن قانات يايدۇرۇلدى. بىر يىل جەريانىدا بىز كۆرسەتكەن 78 پارچە ئەسەر ئىچكىردىكى نوپۇزلۇق ئەدەبىي ژۇرناللاردا ئېلان قىلىندى.ئاپتونوم رايونىمىزدىن بەش پارچە ئەسەر مەملىكەتلىك «تۇلپار مۇكاپاتى»غا ئېرىشتى. غەيرەت ئاسىمنىڭ «ۋاقىتنىڭ تىمتاس يۈزى» ناملىق رومانى «بۈگۈنكى دەۋىر» ژۇرنىلىدا ئېلان قىلىنغاندىن كېيىن ئېلىمىز ئەدەبىيات ساھىسىدە ياخشى تەسىر قوزغىدى ۋە ئايرىم كىتاپ بولۇپ نەشر قىلىنىپ، خۇنەن يازغۇچىلار جەمئىيىتى، خەلق ئەدەبىياتى نەشرياتى بىلەن خۇنەندە ئىلمىي مۇھاكىمە يىغىنى ئۆتكۈزۈلدى.

يەتتىنچى، ئاز سانلىق مىللەت توختاملىق يازغۇچىلىرى ۋە يازغۇچىلارنى مۇكاپاتلاش خىزمىتى تېخىمۇ مۇكەممەللەشتۈرۈلۈپ، يازغۇچىلىرىمىزنىڭ ئىجادىيەت قىزغىنلىقىغا ئىلھام بېرىلدى. ئالدىنقى يىلىدىن باشلاپ، ئانا تىلدا ئەسەر يازىدىغان شىنجاڭ ئاز سانلىق مىللەت يازغۇچىلىرىغا نىسپەتەن «توختاملىق يازغۇچى» تۈزۈمى يولغا قويۇلۇپ، 40 نەپەر يازغۇچى بىلەن توختام تۈزۈلدى ۋە يىل ئاخىرىدا تەلەپتىكىدەك ئېلان قىلىنغان ئەسەرلىرىگە خەت سانى ئۆلچىمى بويىچە 200 مىڭ يۈئەندىن ئارتۇق ئىجادىيەت قوشۇمچە ھەققى تارقىتىپ بېرىلدى. ئىچكىرىدىكى خەنزۇچە نوپۇزلۇق ئەدەبىي ژۇرناللاردا ئەسەرلىرى ئېلان قىلىنغان شىنجاڭ يازغۇچىلىرى ۋە ئەدەبىي تەرجىمانلىرىنىڭ ئەسەرلىرىگە بولسا مۇكاپاتلاش تۈزۈمى يولغا قويۇلۇپ، يىل ئاخىرىدا خەت سانى بويىچە 300 مىڭ يۈئەنگە يېقىن مۇكاپات سوممىسى تارقىتىپ بېرىلدى.

سەككىزىنچى، يازغۇچىلارنى ئىتتىپاقلاشتۇرۇپ، ئۇلارغا يار - يۆلەكتە بولۇپ، ئاكتىپ ۋە تەششەبۇسكارلىق ئالاقە-مۇلازىمەت خىزمەتلىرى ئىشلەندى. مېيىپ يازغۇچى لى جەنگە ئالاھىدە ئىجادىيەت مۇھاكىمە يىغىنى تەشكىللەپ بېرىلدى. بىر نەپەر توختاملىق يازغۇچىمىزنىڭ پەرزەنتىنىڭ ئوپىراتسىيە خىراجىتى ئۈچۈن جەمئىيىتىمىز ئورگىنىدىكى بارلىق خىزمەتچىلەر پۇل ئىئانە قىلىپ مېھرىبانلىق يەتكۈزدى ۋە تور، تېلىفۇن قاتارلىق ۋاستىلەردىن پايدىلىنىپ جايلاردىكى يازغۇچىلار جەمئىيەتلىرى، يازغۇچىلىرىمىزنى مېھىر - شەپقەت يەتكۈزۈشكە تەشكىللىدى. بىر نەپەر يازغۇچىمىز ئاق قان كېسىلىگە گىرىپدار بولغان بولۇپ، ئۇ بىزگە يوللىغان ئەسەر قولىمىزغا تېگىشى بىلەنلا جەمئىيىتىمىز رەھبەرلىرى قولىدىكى باشقا ئىشلارنى قايرىپ قويۇپ، ئۇنىڭ ئەسىرىنى ئەستائىدىللىق بىلەن كۆرۈپ پىكىرلىرىنى بەردى ۋە مۇناسىۋەتلىك نەشرياتلارغا كۆرسەتتى، قاتارلىقلار.

توققۇزىنچى، نەتىنجىلەرنى جارى قىلدۇرۇپ، يېتەرسىزلىكلىرىمىزنى تۈزۈتىپ، خىزمەتلىرىمىزنى تېخىمۇ ياخشى ئىشلەش ئۈچۈن داۋاملىق تىرىشىمىز.

     پارتىيەنىڭ ئاممىۋىي لۇشەن تەربىيەسى پائالىيىتى بىلەن بىرلەشتۈرۈپ ئۆزىمىزگە قارايدىغان بولساق، خىزمەتلىرىمىزدە يېتەرسىزلىكلەرنىڭمۇ خېلى ساقلانغانلىقىنى كۆرۈپ يېتىمىز. ئۇلار بولسىمۇ:1.ئەزالىرىمىز بىلەن ئالاقىلىشىش يېتەرلىك بولماسلىق، ئەزالار خىزمىتىنى ئەستائىدىل ئىشلىمەسلىك2.ئورگان خىزمىتىدىكى چېچىلاڭغۇلۇق، خىزمەتتە ئاكتىپ، تەشەببۇسكار بولماسلىق3.يازغۇچىلار جەمئىيىتى ئورگىنىدىكى خىزمەتچىلەرنىڭ ئۇنۋېرسال ساپاسىنىڭ نىسپەتەن تۆۋەن بولۇشى،خىزمەت ۋە ئەدەبىي پائالىيەتلەرنى مۇستەقىل پىلانلاپ، يولغا قويۇش ئىقتىدارىنىڭ يېتەرلىك بولماسلىقى4.خىزمەت ئىنتىزامىدىكى چۇۋالچاقلىق 5.خىزمەتلەردە تەشەببۇسكارلىق بىلەن يېڭىلىق يارىتىش روھىنىڭ كەمچىللىكى، ھازىرقى ھالەتتىن رازى بولۇش، شۇنىڭغا قانائەت قىلىش پىسخىكىسى قاتارلىقلار.

    يېڭى بىر يىلدا جەمئىيىتىمىزدىكى بارلىق خىزمەتچىلەر قىيىنچىلىقلارنى يېڭىپ، باشقۇرۇشنى كۈچەيتىپ، ئۆزىمىزگە قاتتىق تەلەپ قويۇپ، ھەيئەت رىياسەت ئورۇنلاشتۇرغان تۈرلۈك خىزمەت ۋەزىپىلىرىنى ياخشى ئورۇنداپ، ئاپتونوم رايۇنىمىزنىڭ كۆپ مىللەتلىك ئەدەبىيات ئىشلىرىنىڭ تەرەققىياتى ئۈچۈن داۋاملىق كۈچ چىقىرىشقا تىرىشىمىز .