پاتىگۈل نىياز 1972-يىلى 1- ئايدا كۇچا ناھىيە ياقا يېزا قاراڭغۇ 1- كەنتتە ئوقۇمۇشلۇق دېھقان ئائىلىسىدە تۇغۇلغان. 1990-يىلى ئاقسۇ دارىلمۇئەللىمىن كۇچا شۆبىسىنى پۈتتۈرۈپ، ئۆز يېزىسىدا ئوقۇتقۇچى بولغان. 2002-يىلى شىنجاڭ مائارىپ ئىنىستىتوتى تىل-ئەدەبىيات كەسپىدە بىلىم ئاشۇرۇپ، تولۇق كۇرس ئوقۇش تارىخىغا ئېرىشكەن. ھازىر ياقا بازارلىق ئوتتۇرا مەكتەپتە تىل–ئەدەبىيات ئوقۇتقۇچىسى بولۇپ ئىشلەۋاتىدۇ. ئۇنىڭ ئىجادىيەت ھاياتى 2003-يىلى «مائارىپ ژورنىلى»دا ئېلان قىلىنغان «ساپا ۋە ساپا مائارىپى»دېگەن ئىلىمىي ماقالىسى بىلەن باشلانغان. شۇندىن بۇيان «تۇپراق ھىدى ۋە مۇھىت ئېڭى»، «راستچىللىق ۋە ساپا» قاتارلىق ئىلمىي ماقالىلىرى؛ باشقىلار بىلەن بىرلىشىپ يازغان «بۈگۈنكى ياپونىيە، ئۈرۈمچى ۋە كۇچا»، «مۇھەببەت چەكسىزلىكىدىكى ئاياللار ئۆزلۈكى»، «ئۆزلۈك بۇلۇڭىدىكى بالىلار ۋە مائارىپ» قاتارلىق ئىجتىمائىي تېمىدىكى ماقالىلىرى؛ «‹قايسىمىز مەست›تىن تۇغۇلغان ئويلار»، «‹ھەسرەتلىك تىنىقلار›دىكى ئورتاق نەپەسلەر»،«‹سەرسان روھ›تىكى ئىزگۈ تىلەك» قاتارلىق ئوبزورلىرى؛ «يامغۇرلۇق كېچە»...قاتارلىق ھېكايە ۋە بىر قىسىم نەسىرلىرى ھەرقايسى مەتبۇئاتلاردا ئېلان قىلىنغان. پاتىگۈل نىياز شىنجاڭ يازغۇچىلار جەمئىيىتىنىڭ ئەزاسى، ئاقسۇ ۋىلايەتلىك يازغۇچىلار جەمئىيىتىنىڭ ئەزاسى، كۇچا ناھىيىلىك ئەدەبىيات-سەنئەتچىلەر بىرلەشمىسى ۋە كۇچا ناھىيىلىك يازغۇچىلار جەمئىيىتىنىڭ ئەزاسى. ھازىر «كۈسەن مەدەنىيىتى» ژورنىلى تەھرىر بۆلۈمىدە تەكلىپلىك مۇھەررىر بولۇپ ئىشلىمەكتە.
|
يوللىغان ۋاقتى 2012-3-19 00:24:15
