كۈندە كۆرىۋەرمەس بىر چۈشنى ئادەم [ئۇلانما كۆچۈرۈش]

«خانتەڭرى ئەدەبىيات مۇكاپاتى» غا ئېرىشكەن ئەسەر:



كۈندە كۆرىۋەرمەس بىر چۈشنى ئادەم



ئابلىز ھوشۇر



تالاي ئاياغ باستىم خەنجەر ئۇستىگە،

تالاي دەرمانىمدىن كەتتىم - يىقىلدىم.

تالاي قۇۋۋەت ئالدىم جانۇ- جىسمىمگە ،

پۇشايماندىن سوڭ تاپقان ئەقىلدىن .



تالاي مۇساپىنى قالدۇردۇم ئارتتا،

گاھى خەنجەرلەرنىڭ بىسىن قايرىدىم .

گاھى قوڭغۇراقلار ئاستىم ساماغا ،

گاھى مۇڭلاندىم ۋە گاھى يايرىدىم .



ھايات شۇنداق ئىكەن ، ئۆمۇر شۇنداقكەن ،

كۈندە كۆرىۋەرمەس بىر چۈشنى ئادەم .

پەقەت بۇ دۇنيادا نىيەتلا پاككەن ،

سەندىن نىمە غەم ۋە مەندىن نىمە غەم .



____________



بۇ شېئىر 3- نۆۋەتلىك ‹‹خانتەڭرى ئەدەبىيات مۇكاپاتى››غا ئېرىشكەن.





غەزەللەر



ئابلىز ھوشۇر



1

تاڭدا تەمبۇر ئۈنلىشىدىن باغدا بۇلبۇل بولدى لال ،

كۆكتە ئوتقاش كۈلكىسىدىن بولغىنىدەك ئاي ئوسال .



قازدى كۈيلەر كانىنى بارماقلىرىڭنىڭ ئوينىشى ،

ناخۇنىڭ چەككەندە تارغا ئاقتى مۇڭ كەلكۈن مىسال .



بارچە ئەقلۇ- ھوشىمىزنى ساڭا بەردۇق بىر يولى ،

ھەر كۆڭۇلنىڭ قاتلىرىدا بىر ئاجايىپ ئىزگۈ ھال .



نەدىن ئالدىڭ شۇنچە ماھىرلىقنى، دوستۇم ، ئېيتقىنا ،

بولدى ئىچكەندەك ھاياتلىق كەۋسىرى سەكسەندە چال .



سەن مۇقاملار ئەۋجىگە چۆككەندە بوزلاپ ھەر قېتىم ،

تاڭدا بۇلبۇل ئارزۇسىدەك باغدا گۈل ئاچقاي جامال .



ئەي ھوشۇرى ، سەن نەزىم گۈلزارىغا قويدۇڭ ئىشىق،

ياكى ئەل قەلبىدە ئاي بول ياكى يار مەڭزىدە خال .



2

تاڭ ساباسى چاپقىلاپ ئۆتتى چىمەنلەر ئۈستىدىن ،

گۈل-چېچەك قەددى ئېگىلدى ، لەۋلىرى چاك كۈلكىدىن .



تاشلىدىم كۆككە نەزەر ، ئۆچتى كۆزۈمدىن زەررىلەر ،

جىسمى كۆك زەركارىنىڭ ئاپتۇ ئورۇن پۈركەنجىدىن .



كەتتى باغلاردىن ئاۋاتلىق ، بەرگىلەردىن سىن، گويا-

زەر جۇلاسىنى جۇدا قىلدى سىماپ زەر كۆركىدىن .



ئۆتتى زۈمرەت تامچىلار باغۇ- باراڭلارنى يۇيۇپ،

ياغدى گويا ئابى زەمزەم يەرگە جەننەت كۆكسىدىن .



ئۆزگىچە تۈس ئالدى ئەتراپتا چىمەنلەر جانلىنىپ ،

بەرگىلەر كۆكسىدە زىننەت دانە - دانە ئۈنچىدىن .



سالدى ئۆز يولىغا يەل ئەۋجىدە كۆك كارۋانلىرىن ،

زەرپۇرۇش زەر تۆكتى ئالەمگە  چىقىپ چۈمپەردىدىن.



قايتتى ياشلىق پەيتىگە گويا تەبىئەت بىر يولى ،

جان سۆيۈندى تالى مەجنۇن ، لالە - ئەنبەر كۆركىدىن .



ئەۋجىگە چىقتى مانا بۇلبۇل ناۋاسى باشقىچە ،

قۇچتى ئەتراپنى ئەتىر ھىدى ئۇچۇپ گۈل بەرگىدىن .



ئەي ھوشۇرى ، بۇ تەبىئەتتە كارامەت ئۆزگىچە ،

نە چىمەنلەردە جۇلا ئايرىلسا ناگاھ ئەركىدىن !؟



3

باھار لىباسى بەستىڭگە شۇنچە يارىشىپتۇ ،

مىسالى  گۈلزارغا گۈل ۋە غۇنچە يارىشىپتۇ .



ئۈزەلمەي ئۇز جامالىڭدىن كۆزلىرىنى ،

جاھان رەنالىرى بولۇپ ھەيران قارىشىپتۇ .



كۆرۇپ نۇر ئىلكىدە باغرىڭنى يۇلتۇزلار ئاخشام ،

بۇ نە كارامەت ، دەپ يىراق كۆكتىن مارىشىپتۇ .





ئەنە چىمەنلەر بەرگىدە زۈمرەت تامچە- تامچە ،

كىمەرسە كۆزىگە چۈشتى ئۈنچە سانىشىپتۇ .



ئىكەن شاھىت زىمىستانغا ئاپئاق چوققىلار ،

لېكىن ئېتەكلىرى بېھىش ھۆسنىگە پارلىشىپتۇ .



تېخى كاككۇك چىللار بوستانلارغا ئاشىقىنى ،

ئاڭا ھەمدەم جىمى نەغمىكەشلەر سايرىشىپتۇ .



چىقىپ تاڭ سەيلىسىگە خۇشبۇي ئەتىر سۈمۈرگەچ،

بۇ باھار پەيزىدىن كۆڭۇللەر يايرىشىپتۇ .



دېمە  ھوشۇرى، شۇندا ھەم بۇ بەرنانى غەمسىز ،

گاھى شېرىن رىزقىغا قىرتاق ئارلىشىپتۇ .



4



كۆڭۇلنى ھەر خىياللار ئىلكىگە بەنت قىلدى ھېجرانىڭ ،

سەمەندەر ئەيلىدى گويا جانۇ- جىسمىمنى ئارمانىڭ .



ۋاپا ئاستانىسىدە بىر ئۆزۈم شاھمەن ، ئۆزۈم پۇقرا ،

بارارغا بولمىدى بىر يول ۋە يا كەلمەككە ئىمكانىڭ .



كۆزۇم قارچۇقىدا ۋەسلىڭ مىسالى سېھرى سۈرەتتۇر،

دىلىم قامۇسىدا زەر خەت سېنىڭ خۇش نامۇ- نىشانىڭ .



شاماللار يەلپۇسە ھەرتاڭ سېنىڭ ھىدىڭنى ھىدلايمەن ،

بىلەلمەي دەردىھالمەن شام- سەھەرلەر ھالۇ- ئەھۋالىڭ .



سېنىڭسىز بۇ تىرىكلىك مەۋسۇمىدە نىمە لەززەت  بار!؟

سۇنۇق كۆڭلۇمنى كۆكلەرگە ئېلىپ چىققۇسى جەۋلانىڭ .



ھوشۇرى دەشتى ئاتەشتە مىسالى چاڭقىغان تۇپراق ،

تىلەيمەن، بەختىگە شەرۋەت سۇنار، دەپ ، سۆيگۈ سۇلتانىڭ .



5

قاچان چۈشتى كۆڭلۇمگە ۋەسلىڭ ئىشتىياقى ،

ئالدى بار ئەقلىمنى ئىشقىڭ بىرۋاراقى .



سۆيگۈم دەپتىرىدە سەندىن ئۆزگە ئىسىم يوق ،

ۋىسالىڭ ئىنتىزارى كۆزۇم قاراقى.





چېچىڭ كۆرگەچ خىجىلمىشكەن تاغدا سۇمبۇل ،

دىماغىڭدىن خىجىلكەن گۈل- لالە پۇراقى.



جۇنۇن دەشتىدە تەنھا بىر ئاھۇ ئىدىم ،

ئەسىر قىلدى قېشىڭ - كۆزۇڭ ئىتتىپاقى.



پەزىلەت ئۇزلىقىدا بىر ئۆزۇڭ يەكتا ،

جامالىڭ شولىسى _ پاك قەلبىم چىراغى.



خىيالىڭ تەرك ئەتتى ئۇيقۇمنى كۆزدىن ،

تېنىمدە جاننى ئۆرتەپ ھېجرىڭ پىراقى .



جاھاندىن بىمۇراد گەر كەتسە ھوشۇرى ،

بۇ ھايات بوستانىدا يوقمۇ سوراقى ؟!





______________

بۇ غەزەللەر 17- نۆۋەتلىك «خانتەڭرى ئەدەبىيات مۇكاپاتى» غا ئېرىشكەن .