قۇشلار سۆھبىتى
(مەسەل)
مەلە چېتى- ئورماندا،
قۇشلار يىغىلىپ.
مۇشائىرە قىلىپتۇ،
رەتلىك تىزىلىپ.
مۇشائىرە شەرتىكەن:
بولۇش سەمىمى.
ئارتۇقچىلىق-كەمچىلىك،
سۆزلەش ھەممىنى.
گەپ باشلاپتۇ ئەڭ ئاۋۋال
تۆمۈر تۇمشۇق.
گەپ قىلماپتۇ ھىچكىممۇ،
سۈكۈتتە ئوشۇق.
دەپتۇ:مېنى باشقىلار،
دەيدۇ شىپاگەر.
ھەممىڭلارنى كۆرىمەن،
ئوخشاش- باراۋەر.
تازىلايمەن دەرەختىن،
قۇرت-ھاشاراتنى.
داۋالايمەن باغرىدىن
داغ- جاراھەتنى.
ئۆسەر دەرەخ بەك تېمەن،
ياپيېشىل- بولۇق.
شۇڭا مېنىڭ تۆھپەممۇ،
شۇنچىلىك ئۇلۇغ...
كۆرەلمەيدۇ ۋەلېكىن،
مېنى بەزىلەر.
"كۈندە قورساق غېمىدە،
دەرەخنى تېشەر"
غەيۋەتلەردىن مېنىڭكى،
پەرۋايىم پەلەك.
يوق دىلىمدا كەسپىمگە،
ئىخلاستىن بۆلەك!
ئىككىنچى بوپ سۆز ئاپتۇ،
دالا تورغىيى:
مەن دالانىڭ كۈيچىسى،
تالماس جاۋغىيى.
سۈبھى پەيتى ساماغا ،
ئۆرلەيمەن ئېگىز.
چۇ-چۇ.. لايمەن-قورقمايمەن،
جاپادىن ھەرگىز!
يېڭى تاڭدىن بىشارەت،
بېرىپ دالاغا.
شۇڭا كۈنۈم مەنىلىك،
ئۆتمەس بىكارغا...
جەزىرىدە بۇزىمەن،
سۈكۈتنى داۋام.
چۈشىنەر دەپ ئويلايمەن،
بۇنى ئەل-ئاۋام...
گەپ باشلاپتۇ ھۆپۈپمۇ،
قالماي قاتاردىن:
ئىزدىگەنلەر تاپىدۇ،
مېنى باھاردىن.
ئالا- چىپار تون ماڭا،
ئەجەپ ياراشقان.
زوقمەن بولۇپ بەستىمگە،
ھەممە قاراشقان.
قۇرت- ھاشارات كۈشەندەم،
داۋام چوقۇيمەن.
رىسىق تىلەپ تەڭرىدىن،
دۇرۇت ئوقۇيمەن.
دەيمىش مېنى بەزىلەر
قارغىش ئاپتىكەن.
ئىلىمىدىن ھىچكىمگە
نەپ يۇقماپتىكەن.
دەلىلىم بار مېنىڭمۇ،
شۇنداق دىگەنگە.
بىكار ئىلىم نەدىكەن،
يېتىپ يىگەنگە.
ئىلىم- بايلىق،ئىلىم- پۇل،
بىلسىڭىز ئەگەر.
پايدا بەرمەس ئىلىم-ئۇ
ئېپكېلەر خەتەر!
دەپتۇ قاغا ئالدىراپ:
نۆۋەت مېنىڭكى.
مەندەك ھەيۋەت بەستى بار،
قېنى كىمنىڭكى؟
ناخشا ئېيتسام قاقىلداپ،
دەرەخ شېخىدا.
قايىللىقى ھەركىمنىڭ
يۈرەك قېتىدا.
ئامراق مېۋەم مېنىڭكى
ياڭاقتۇر- ياڭاق.
بۇ دۇنيادا ياشايمەن،
شۇڭا بەك ئۇزاق...
ھەسەتخورلار گەپ تاپار،
ئاۋازى سەت دەپ.
ئاڭلانغاندا ئاۋازى،
يىراققا كەت دەپ...
قارلىغاچمۇ ۋىچىرلاپ،
قوشۇپتۇ ئاۋاز:
شوخلۇق بىلەن سايرىسام،
ئاۋازىم بەك ساز.
ئادەملەرگە ئامراقمەن،
بىللە ياشايمەن.
پىشايۋاننىڭ ئاستىغا،
ئۇۋا ياسايمەن...
دەيدۇ مېنى ئادەملەر،
«باھار ئەلچىسى.
ئۇۋا سالسا ئۆيۈمگە،
كۈلگەي كەلگۈسى...»
ھوقۇش چاچراپ قوپۇپتۇ:
قارىشە ماڭا!
پىسەنت قىلىپ قويمايمەن،
ساڭا ۋە ساڭا...!
جىمجىت تۇرسام ئەجەپمۇ،
قايناپ كېتىشتىڭ.
ئۆز- ئۆزۈڭنى ماختىشىپ،
يايراپ كېتىشتىڭ!
ھەممىڭ تۈندىن قورقىسەن،
مۆكۈنىشىسەن.
مەن تۈن شاھى، ئالدىمدا –
يۈكۈنىشىسەن!
زۇلمەت ماڭا بەرىبىر،
ھەريان ئۇچىمەن.
ئېتىزلاردىن- دالادىن،
چاشقان تۇتىمەن.
مۇڭلۇق ئۈندە سايرىسام،
جىملىقنى بۇزۇپ.
ئۇيقۇ- چۈشلەر كېتىدۇ،
نەلىگە توزۇپ...
لايىق دېسەڭ مەن لايىق،
شۇڭا ھۆرمەتكە.
تىزىلىسەن ھەرقايسىڭ،
ئاخىرقى رەتكە!
.........
قوپاللىقى ھوقۇشنىڭ،
تېگىپ جېنىغا.
بارچە قۇشلار قورشاپتۇ،
ئېلىپ قېتىغا.
"بىر چىرايلىق سورۇننىڭ،
بۇزدى كەيپىنى.
ئۇنى قوغلاپ – سۈرەيلى،
كېلىڭلار قېنى..."
شۇ گەپ بىلەن ھوقۇشنى،
قوغلاپتۇ يىراق.
كۆڭۈلسىزلا تارقاپتۇ،
قۇشلارمۇ بىۋاق...
مەنبە: ئىجادىيىتىم.
بۇ يازمىنى ئاخىرىدا م.توختى سەببەت تەھرىرلىگەن. ۋاقتى 2013-8-1 20:40
يوللىغان ۋاقتى 2013-8-1 20:39:03
