خەلق تورىنىڭ باڭگوك 7-ئاينىڭ 13-كۈنىدىكى خەۋىرى، پاكىستاننىڭ «مىللەت گېزىتى» نىڭ خەۋىرىگە ئاساسلانغاندا، ئامېرىكىنىڭ ئادەمسىز ئايروپىلانى مۇشۇ ئاينىڭ 12-كۈنى پاكىستاننىڭ غەربىي شىمالىيغا يېقىن ئافغانىستان چېگرىسىدىكى قەبىلە رايونىدىكى شىمالىي ۋازىرىستان رايونىدا ھاۋا ھۇجۇمى قوزغاپ، 20 ئادەمنى ئۆلتۈرۈۋەتكەن.
پېشاۋارنىڭ بىر يۇقىرى دەرىجىلىك ئەمەلدارىنىڭ بىلدۈرۈشىچە، شۇ كۈنى چۈشتىن بۇرۇن، ئامېرىكىنىڭ بىر ئادەمسىز ئايروپىلانى شىمالىي ۋازىرىستان رايونىدىكى ئاساسىي بازار مىلانشاھنىڭ 45 كىلومېتىر غەربىگە جايلاشقان جايغا تۆت دانە باشقۇرۇلىدىغان سنارەد قويۇپ بەرگەن. بۇنىڭ ئىچىدىكى ئىككىسى بىر ئۆيگە تەگكەن، قالغان ئىككىسى بىر توختىتىپ قويۇلغان ماشىنىغا تەگكەن. نەتىجىدە 20 ئادەم قازا قىلغان. مىلانشاھتىكى بىر خەۋپسىزلىك يۇقىرى دەرىجىلىك خادىمى شۇنىڭدىن كېيىنلا، بۇ قېتىمقى ۋەقەدە قازا قىلغانلارنىڭ سانىنى مۇقىملاشتۇرغان. ئىككى نەپەر يۇقىرى دەرىجىلىك ئەمەلدارىنىڭ بىلدۈرۈشىچە، باشقۇرۇلىدىغان سنارەد تەگكەن جايلار تەلتۆكۈس ۋەيران قىلىنغان بولۇپ، ئۆلگۈچىلەرنىڭ سانىدا ئېشىش كۆرۈلۈشى مۇمكىن ئىكەن. پاكىستان دۆلەت ئەمەلدارى مۇنداق دېدى:«ئۆلگۈچىلەرنىڭ ھەممىسى يەرلىك قوراللىق ئۇنسۇرلاردۇر».
خەۋەردە مۇنداق دېيىلدى:«ئامېرىكا ئارمىيىسى بۇ 5-ئاينىڭ 2-كۈنى پاكىستاننىڭ شىمالىيدىكى شەھەر ئاببوتتابادتىكى بىر قۇرۇلۇش ئىچىدە ‹بازا› تەشكىلاتىنىڭ كاتتىۋېشى ئوساما بىن لادېننى ئېتىپ ئۆلتۈرگەندىن بۇيان، ئامېرىكىنىڭ ئادەمسىز ئايروپىلانى پاكىستان چېگرىسى ئىچىدىكى قەبىلە رايونلىرىدا جەمئىي 20 قېتىم ھاۋا ھۇجۇمى ئېلىپ بارغان. ئامېرىكا پاكىستاننىڭ يېرىم ئاپتونومىيىلىك رايونى-غەربىي شىمالدىكى قەبىلە رايونلىرىنى ‹يەرشارىدىكى ئەڭ خەتەرلىك بەلۋاغ› دەپ قارىغان ھەمدە مەزكۇر رايوننى ‹بازا› تەشكىلاتىنىڭ پۈتۈن يەرشارىدىكى باش شتابى جايلاشقان رايونى دەپ بېكىتكەن».