شىنخۇا ئاگېنتلىقىنىڭ 7-ئاينىڭ 8-كۈنىدىكى خەۋىرى، ئەنگلىيەدىكى بىر داڭلىق ئالىم ئالدىنقى كۈنى مۇنۇلارنى ئېلان قىلغان:«ئىنسانىيەتنىڭ ئۆمرى كەلگۈسىدە شىددەت بىلەن ئۇزىرايدۇ. يەنە 20 يىلدىن كېيىن 1000 يىل ئۆمۈر كۆرەلەيدىغان كىشىلەر دۇنياغا كېلىدۇ».
بۇلارنى يۈرەكلىك ھالدا ئالدىن پەرەز قىلغان ئابۇري رېد گراي (Aubrey Reed Gray) دوكتۇر بولسا ئەنگلىيەدىكى بىر داڭلىق جانلىقلار بىئولوگىيىسى تېببىي ئالىمى ۋە گېرىئاترىكا ئالىمى ئىكەن. ئۇزۇن مەزگىل ئىنسانىيەتنىڭ ئۇزۇن ئۆمۈر كۆرۈشىنى تەتقىق قىلىش جەريانىدا، ئۇ كېسەللىكنى تەن ئىچىدىكى بارلىق ئېلېمېنت ۋە ھۈجەيرىلەرنىڭ يارىلىنىپ، جۇغلىنىپ قېلىشىغا يەكۈنلەپ، ئۆمۈرنى ئۇزارتىشتىكى مۇھىم ھالقا تەن ئىچىدىكى ئېلېمېنت ۋە ھۈجەيرىلەر يارىلىنىپ، كېسەل پەيدا قىلىدىغان دەرىجىگە يېتىشتىن بۇرۇن، ئۇنى ئەسلىگە كەلتۈرۈشتىن ئىبارەت، دەپ كۆرسەتكەن. ئۇ ئادەمنىڭ قىرىشىنى كەلتۈرۈپ چىقىرىدىغان يارىلىنىشنى چوڭ يەتتە تۈرگە ئايرىپ چىققان.
نۇرغۇنلىغان ياشانغان كىشىلەرنىڭ يۈرەك كېسىلىگە نىسبەتەن ئېلىپ ئېيتقاندا، ئۇنىڭ قارىشىچە، ئادەم بەدىنىدىكى مېتابولىزم جەريانىدا قوشۇمچە مەھسۇلات «ئېلېمېنت ئەخلەتلىرى» نىڭ توختاۋسىز توپلىنىشىدىن يۈرەك كېسىلى كېلىپ چىقىدىكەن. بۇ خىل ئەخلەتلەرنى تەن ئىچىدە پارچىلىغىلى بولمايدىغان بولۇپ، ئۇلار كۆپەيگەنسېرى ھۈجەيرىلەرنىڭ نورمال خىزمىتىگە تەسىر يەتكۈزىدىكەن.
ئۇ كەلگۈسى 25 يىل ئىچىدە، قىرىشنى داۋالايدىغان قورالنى مەيدانغا كەلتۈرۈشكە ئىشىنىدىكەن. ئۇ گېنلىق داۋالاش، غول ھۈجەيرىلىك داۋالاش، ئىممۇنىتېت قوزغىتىش ۋە باشقا داۋالاش تېخنىكىلىرىنى زىچ بىرلەشتۈرىدىكەن. كىشىلەر ۋاقتى-ۋاقتىدا بەدەندىكى ئەخلەتلەرنى تازىلاش ۋە يارىلانغان ئېلېمېنت ۋە ھۈجەيرىلەرنى ئەسلىگە كەلتۈرۈش ئارقىلىق ئاندىن ئۇزۇن ئۆمۈر كۆرۈش مەقسىتىگە يېتەلەيدىكەن.
نۆۋەتتە، دۇنيا بويىچە ئەڭ ئۇزۇن ئۆمۈر كۆرگەن كىشىنىڭ يېشى 122 ياش ئىكەن. ئەمما ئۇ ھازىر 150 ياش ئۆمۈر كۆرەلەيدىغان كىشى تۇغۇلۇپ بولدى، يەنە 20 يىلدىن كېيىن 1000 ياش ئۆمۈر كۆرىدىغان كىشى تۇغۇلىدۇ، دەپ قارىغان. ئەمما ئۇ ئۆزىنىڭ مەزكۇر قىياسلىرىغا قارىتا تەپسىلىي چۈشەنچە بەرمىگەن. ئەمما كەسپىي ساھەدىكى نۇرغۇن مۇتەخەسسىسلەر تېببىي ئېلىمدىن پايدىلىنىپ، ئادەم تېنىدىكى ھۈجەيرىلەرنىڭ ئۆمرىنى ئۇزارتىش تەلىماتىنى پۈتۈنلەي «ساختا پەن» دەپ قارىغان.