جىمجىت خىيال _
سۈيى بالدۇر تـارتىلغان دەريا،
چىمەن قىرغاق سۇلاشقان قۇرۇپ.
قۇمدەك ھەسرەت باغرىدا ئاقار،
كۆكتە خۇنۈك يۇلتۇزى يۇرۇپ.
بېلىق چۈشى ئۇنتۇلغان قىسسە،
سۇغۇق تۈندە ئاچچىق ئاھ...ئۇرۇپ.

جىمجىت خىيال _
ئوقۇپ بولغان ئاھاڭسىز ناخشا،
چىقىپ كەتكەن ئۆگەيلەپ سازدىن.
مۇڭلۇق كۈيلەر تۇنجۇقۇپ قالغان،
كۈلپەت باسقان كېلىپ ئاز-ئازدىن...
ھىجران پەسلى بەرمىگەن ئارام،
سۆيگۈ ۋىسال تاپمىغان ئاخشام.
كۆيۈپ بولغان پىژىلداپ يۈرەك،
ئاشىق دەردى تۆكۈلگەن تارام...
ئوقۇپ بولغان ئاھاڭسىز ناخشا،
قالغان مەينەت تاملارغا ئۇيۇپ.
ئاشىق دەردى تۆكۈلگەن تارام،
بولماي قالدۇق غۇبارنى يۇيۇپ.

جىمجىت خىيال_
ئالدار كۇسا قالدۇرغان تارىخ،
قويغان شەيتان پەيلىدىن يېزىپ.
داۋام قىلغان كۆڭۈللۈك تەقرىز،
يازغان كىشى ئەقلىدىن ئېزىپ...
خەتلەر تىرىك كۆمۈلگەن جەسەت،
پېتىپ سالغان سۈرەنسىز قۇرغا.
كىمدۇ ئۇنى چىقارغان گۆردىن؟
تۇتۇپ رەڭسىز قاراڭغۇ نۇرغا...
دەۋرەپ كەلكەن ئۇنتۇلغان ھايات،
سەرسان روھلار چېچەكلەپ تاشتا.
مارجان قۇمغا ئايلىنىپ بولغان،
شورلۇق قىسمەت ئاقتۇرغان ياشتا...
چاقناپ قالغان ئاداققى سۆڭەك،
پاكىت سوراپ بۇزۇلغان گەۋدە.
يالغان قىسسە ئۆركەشلەپ ئاقار،
دەريا ياساپ قەسەمخور لەۋدە.
پاسىق قولدا تەۋرىگەن قەلەم،
ئاپەت تۇغقان تۇترۇقسىز ئەلدە.
سۇنۇپ كەتكەن ئىنسانىي غۇرۇر،
مەينەت تۇيغۇ قۇترىغان يەلدە.
داۋام قىلغان سەۋدايى چوقان،
ئويناپ يۈرگەن سەۋدايى كۈلۈپ.
جىمجىت خىيال ئاھاڭسىز ناخشا،
سەرسان روھى كەتمىگەن ئۆلۈپ...

مەنبە:ئىجادىيىتىم.

http://bbs.huanqiu.com/zongluntianxia/thread-137094-1-1.html

ئاجايىپ پاساھەتلىك چىقىپتۇ ،ھىسيات ئىپادلەشتىكى ماھارتىڭىزگە ئاپرىن!

بەكلا ياخشى يىزىلغان شېر ئىكەن .مەن نىمە دىيىشىمنىمۇ بىلمەي قالدىم ،
رەخمەت سىزگە.

ھەقىقەتەن قابىلىيىتىڭىز بار ئىكەن. تېخىمۇ نادىر ئەسەرلەرنى ياررىتىشىڭىزغا تىلەكداشمەن~~~~~!