ئاتۇش خەلق قوشاقلىرى
ئاتۇش ئۆزى كىچىك يەر ،
ئەتراپىدا ساي تولا .
قاراپ باقسام ئاتۇشقا ،
يېڭى چىققان باي تولا .
يېڭى چىققان باي تولا ،
مىنىلمىگەن تاي تولا .
باغلىرىدا ھۆسنىگە ،
تولغان چىۋەر ئاي تولا .
ئاتۇشۇمدا تاش تولا ،
تاشلىقتا بەك ئاش تولا .
پۇل تاپىمەن دەپ يۈرۇپ ،
ئۆيلەنمىگەن ياش تولا .
ئەنجۈر تولا ئازغاندا ،
مەشەت بىلەن تىجەندە .
ھوزۇرىنى جەننەتنىڭ ،
كۆرىسەن ئۇنى يىگەندە .
شاخ مانتوسى ئەمەسمۇ ،
ئەنجۈر دىگەن ئەسلىدە .
قۇۋۋەت بولار تۈگىمەس ،
يېسە ئادەم نەسلىگە .
يېسە ئەنجۈر سىڭىشلىك ،
تەمى ئوبدان يېيىشلىك .
ئەنجۈر بىلەن ئاتۇشنىڭ ،
نامى ئەلگە بىلىشلىك .
ئەنجۈر پۇرايدۇ ،
ئاتۇش ھاۋاسى .
سالقىن ھاۋاسى ،
تەننىڭ داۋاسى .
ئوغۇل - قىزىنىڭ ،
ئىشچانلىقى بار .
ئەمگەكتە - ئىشتا ،
پىشقانلىقى بار.
ئاتۇش بېغىدا ،
سايرار تۇمۇچۇق .
كىلىڭ نىگارىم ،
سىز شوخ مەن ئوچۇق .
ئوينايلى دوستلار ،
كۈلەيلى دوستلار .
ئەركىن ئازادە ،
يۈرەيلى دوستلار.
مەنبە: «ئاتۇش خەلق قوشاقلىرى» ناملىق توپلامدىن مەڭگۈتاش تەييارلىدى.
ئاتۇش خەلق قوشاقلىرى
