بىر سىتۇدېنت قىزنىڭ يىگىتىگە يازغان خېتى
بۇ خەتتە بىر سىتۇدېنت قىز سىتۇدېنتلارنىڭ ھەممىسى ئويلىنىشقا تېگىشلىك بولغان مەسىلىلەرنى دادىللىق بىلەن ئوتتۇرىغا قويغان. ئۆز تەقدىرىنى ئويلايدىغان نۇرغۇنلىغان قىزلارنىڭ بۇ خەتنى يازغۇچى بىلەن ھەمنەپەس بولۇشىنى ئۈمىد قىلىمەن. خەتنىڭ تولۇق تېكىستى تۆۋەندىكىچە:
<<ساۋاقداش ت، خېلى يىللاردىن بېرى ئۆزئارا ياخشى كۆرۈشۈپ كەلدۇق.مەن سىزنى چۈشىنىمەن ھەمدە قەدىرلەيمەن، سىزمۇ ھەم شۇنداق. بىراق، بىر ھېس - تۇيغۇ مېنى ئۇزۇندىن بېرى يوشۇرۇن ئازاپلاپ كەلدى. ئېيتىڭە، بىز پەقەت تەسەۋۇرىمىزدىكى مۇھەببەت ئۈچۈنلا،تەييارغا ئاشىق بولۇش ئۈچۈن يارالغانمۇ؟ ئىككىمىز باشقا ساۋاقداشلارغا ئوخشاش خۇشال ئۆتتۇق.بۇ خۇشاللىقىمىز ھەمىشە ئۇچرىشىپ تۇرغانلىقىمىزدىن،ھەركۈنى دېگۈدەك كىنوخانىلاردا،تاڭسىخانىلاردا ،خىلۋەت جايلاردا بىللە بولغانلىقىمىزدىن بولدى.خۇشاللىقىمىزنىڭ مەنبەسى ئاساسەن شۇلار بولدى.بىز بۇنداق <<ئىشق - پائالىيەت>>لىرىمىزگە نۇرغۇن ۋاقىتلىرىمىزنى سەرپ قىلدۇق.بۇ جەرياندا ئوقۇتقۇچىلىرىمىزنى،مەكتەپنى ،ئۆزىمىزنى ئالدىدۇق.بىزگە ھېچكىم دەخلى قىلالمىدى.بىز ئۈچۈن ئېيتقاندا بۇ مەكتەپتە ئاساسلىق ۋەزىپىمىز بىلىم ئىگىلەش ئىدى. ھازىرغىچە ئۆزىمىزنىڭ ۋاقىت ۋە ئەقلىي قۇۋۋىتىمىزنىڭ كۆپ قىسمى بىلىم ئېلىشقا سەرپ قىلىنمىدى.دەرسخانىدىن خۇددى قەپەزدىن ئايرىلغان قۇشلاردەك ئالدىراپ چىقىمىز - دە، بىر - بىرىمىزنى ئىزدەيمىز. بىرەر قېتىممۇ دەرسلەرنى قانائەتلىنەرلىك دەرىجىدە ئۆزلەشتۈرەلىگىنىمىز ئۈچۈن خۇشال بولۇپ باقمىدۇق. ۋۇجۇدىمىزدا نۇرغۇن يوشۇرۇن كۈچلەرنىڭ بارلىقىغا ئىشىنىمەن. بىراق بۇ يوشۇرۇن كۈچنى قېزىش ئۈچۈن بىز ھەركەتلىنىپمۇ باقمىدۇق. بۇ توغۇرلۇق ئاندا - مۇندا سۆزلەشكەن ۋاقىتلارمۇ بولمىدى. قىسقىسى بىزنىڭ خۇشاللىقىمىز ئويۇن - كۈلكە، بىكارچىلىقتىن كەلدى.شۇڭا بۇ خۇشاللىق ماڭا تولىمۇ بىچارە تۇيۇلىدۇ. ئۆزىمىزنىڭ پۈتكۈل ھاياتىنى ۋە ئەقىل - پاراسىتىنى مۇھەببەت ئۈچۈنلا ئاتىۋەتكەندەك ھېس قىلىۋاتىمەن.سىز بۇلارنى ئويلىدىڭىزمۇ؟
مەن كېلەچىكىمىزدىن ئەنسىرەۋاتىمەن. ئىمتىھانلاردىمۇ ئەپلەپ - سەپلەپ ئۆتۈپ كەلدۇق. دىپلوم ئېلىپ ، مەكتەپ پۈتتۈرەلەيدىغىنىمىزغا ئىشىنىمەن. بىراق ، ھازىر بىلگەنلىرىمىزگە ۋە دىپلومىمىزغا تايىنىپ داۋاملىق ياشىيالمايدىغاندەك قىلىمىز؛ كۆزۈمگە ھەممىلا جايدا غالىپلارغا مەنسۇپ، كۈچلۈكلەرگە مەنسۇپ دەپ يېزىلغان ۋىۋىسكىلار كۆرۈنىۋاتقاندەك بىلىنىۋاتىدۇ. مەندە سىز ياختۇرىدىغان چىراي، ئېسىل كىيىم - كېچەكلەر، سىزگە بولغان ئەقىدە بار. بۇ ئۈچ نەرسە بولغانلىقى ئۈچۈن سىز مېنى ياخشى كۆرۈپ كەلدىڭىز، ھېچقانداق ئىككىلەنمەيلا مېنى قەدىرلىدىڭىز، ماڭا ئارتۇقچە تەلەپ قويمىدىڭىز. لېكىن بۈگۈن ئويلىسام بىر قىز ئۈچۈن بۇ ئۈچ نەرسە كۇپايە قىلمايدىكەن. بىزمۇ باشقىلارغا ئوخشاش جاپاغا چىداپ ئۆگەنسەك، يۈكسەكلىككە ئىنتىلسەك، رىقابەتكە قاتناشساق، ئۆز ئەمەلىيىتىمىز ئارقىلىق ئەتراپىمىزدىكىلەرگە تەسىر كۆرسەتسەك بولىدىكەن. بىزنىڭ پۇت - قولىمىز ساق، ئەقلىمىز ئىمكانىيىتىمىزمۇ بار. شۇنداق تۇرۇقلۇق باشقا مىللەتلەردىن ھەمىشە كېيىن قالغىنىمىزغا ئۇيالمامدۇق؟ مەن ئىشىنىمەنكى، ئەقىل جەھەتتىكى، پەن - مەدەنىيەت رىقابىتى جەھەتتىكى پەرقنى پەقەت ئۆزىمىزلا ئازايتالايمىز. ئۇنى ھېچكىم چەكلىيەلمەيدۇ.
بىلىمەن، مۇھەببەت گۈزەل، ئۇنىڭسىز ھاياتلىق مەۋجۇت بولۇپ تۇرالمايدۇ. بىراق، مەكتىپىمىزدىكى بەزى ساۋاقداشلار ئۆزلىرىنى شۇنىڭغىلا بېغىشلىغاندەك كۆرىنىۋاتىدۇ. شۇڭا، بۇ مەسىلىلەرنى ئويلاپ كۆرسىڭىز. سىزنى قەدىرلىگەنلىكىم ئۈچۈنلا ئۆزۈمنىڭ ئويلىغانلىرىنى قالدۇرماي سۆزلىدىم. ئەگەر مېنى يەنىلا قەدىرلىمەكچى بولسىڭىز، مەكتىپىمىزدىكى مۇھەببەت مەستانىچىلىقىنى نەزەرگە ئېلىپ قويۇڭ. بۇ ھالەتكە ئېچىنىدىغانلارمۇ ئاز ئەمەس، بىرلىكتە كۈچ چىقارساق. بىز ئۆزىمىزنىڭ ئۆگىنىش ۋە باشقا ئىشلىرىمىزدا نەتىجە قازىنىشنى، خەلقىمىزنىڭ تەقدىرى ئۈچۈن جاپا چېكىشنى ئېسىمىزگە ئالايلى. بۇنىڭ بىلەن بىزنىڭ مۇھەببىتىمىز سۇسلىشىپ قالمايدۇ.
سىزگە ئۇتۇق تىلەپ : «A» دىن
< بىچارە كۈلكىلەر > دىن ئېلىندى