ھەر كۈنىلا زىياپەت دەپ كەچ كېلىسەن ،
ھاراق ئىچىپ بەدبۇي پۇراپ مەس كېلىسەن .
مايماق دەسسەپ مېڭىشلىرىڭ تەس كېلىسەن ،
ھېچ بىلمىدىم ئېرىم قاچان چوڭ بولىسەن ؟
تاشلىمىدىڭ تاماكىنى چەكتىڭ يەنە ،
باللىرىڭمۇ ئۆگىنىپتۇ قارا ئەنە .
ئۆتمىدى ھېچ ياخشى گەپ ۋە تاپا تەنە ،
ھېچ بىلمىدىم ،ئېرىم قاچان چوڭ بولىسەن ؟
ياخشىمىكەن تالادىكى سېرىق قۇچقاچ ،
كۈندە ھەرخىل ئادەملەرگە سايراپ تۇرغاچ .
سەت كۆردۈڭمۇ ئۆيدىكى گۈل بىرلا بولغاچ ،
ھېچ بىلمىدىم ، ئېرىم قاچان چوڭ بولىسەن ؟
كېلەلمەيسەن كېچە سائەت بىردىن بۇرۇن ،
تۈگىمەمدۇ شۇ چاغقىچە قانداق سورۇن .
شۇ كېچىدە سىنى كۈتكەن قايسى ئورۇن ؟
ھېچ بىلمىدىم ، ئېرىم قاچان چوڭ بولىسەن ؟
بۈگۈن يەنە چىقىپ كەتتىڭ كۆڭۈل ئىزدەپ ،
تېلفۇنۇڭغا ئۇچۇر كەلگەچ چىقمامسەن دەپ .
قالدىم يەنە ئۆز كۆڭلۈمنى ئۆزەم بەزلەپ ،
ھېچ بىلمىدىم ، ئېرىم قاچان چوڭ بولىسەن ؟
دەپ قويمايسەن ئۆيدە تاماق يىمەيمەن دەپ ،
شۇنچە قىممەت سەن ئۈچۈن شۇ بىر ئېغىز گەپ .
كۈتتۈم يەنە تەن تۈڭگىچە ئېغىر ئەسنەپ ،
ھېچ بىلمىدىم ئېرىم قاچان چوڭ بولىسەن ؟
ئۇمۇ ئادەم غېمىڭنى يەپ ساقلاپ تۇرغان ،
بالاڭ ئاۋۇ ، چوپ -چوڭلا بىر يىگىت بولغان .
قاراپ باقە ، كۆزىگە لىق سۇئال تولغان ،
ھېچ بىلمىدىم ئېرىم قاچان چوڭ بولىسەن ؟
تاتلىمايمەن ئۆتۈپ كەتكەن دىل يارىنى ،
سوراپ باققىن سەنمۇ ئۆينىڭ يوق بارىنى .
باللىرىڭمۇ پەرىق ئەتتى ئاق قارىنى ،
ھېچ بىلمىدىم ، ئېرىم قاچان چوڭ بولىسەن ؟
قىرىققىمۇ يېتىپ قالدى مانا يېشىڭ ،
سورۇندىلا بوپ قالمىسۇن سىنىڭ ئىشىڭ .
ئۆتىۋەرمە ھاراقنىلا دەپ سىردىشىڭ ،
ھېچ بىلمىدىم ئېرىم قاچان چوڭ بولىسەن ؟
ئەجدادىمىز روھى سەندىن خۇشال بولسۇن ،
ئەۋلادلارنىڭ كۆزلىرىگە ئىشەنچ تولسۇن .
ئېرسىيەتلىك كېسەل سەندىن قېپ قالمىسۇن ،
ئىشەنچىم بار ، بىر كۈن ھامان چوڭ بولىسەن .
