-
2010-10-19
قەشقەردىكى يەر شارى(1) - [ئادىل تۇنىياز شېئىرلىرى]
قەشقەردىكى يەر شارى (1)
ئادىل تۇنىياز
سالام ئۇيغۇر دېگەندە قۇياش،
سالام ئۇيغۇر دېگەندە تارىخ،
قەشقەر شەھىرى ئوخشار قەسىر گە.
يۇلتۇزلار پەرۋاز قىلار تاڭ سەھەردە،
پەسىللەر پەرۋاز قىلار دەرەخلەردە،
بۇ شەھەر پەرۋاز قىلار چۆچەكلەردە.
بۇ يەردىكى ئادەملەر
پەرۋاز قىلار يۈرەكلىرىدە.
ئات قوشۇلغان
قىزىل سايىۋەنلىك مەپە
تاڭ سەھەردە ئۆتتى يېنىمدىن،
جىرىڭلىتىپ قوڭغىرىقىنى.
سېۋىتىنى قويۇپ بېشىغا
گىردە سېتىپ يۆرگەن بىر بالا
تاڭ سەھەردە ئۆتتى يېنىمدىن.
قۇشلار،
ھارۋا،
سۇمبۇل چاچلىق ئايال،
يەنە بىر ئايال،
كۆز،
ئەتلەس كۆڭلەك،
ساقال
تاڭ سەھەردە ئۆتتى يېنىمدىن.
مەن
كىشىلەر چاي ئىچىۋاتقان،
مۇڭدىشىۋاتقان،
يۆتەلگەن،
چەينەك چوغىسىنى
پىيالىگە تەككۆزۆپ
چاي قۇيغان،
چاي شامىسىنى پۆۋلەۋاتقان،
كىشىلەر
بىر - بىرىگە بېقىپ
گەپلەشكەن،
سەنلەشكەن
قايناق بىر چايخانا ئالدىدىن ئۆتكەچ،
كىملىكىنى بىلىندۆرمەستىن
كۆيۆۋاتقان مەخپىي ئاشىقتەك
ئوغرىلىقچە كۆيۆپ يۆرىمەن.
كوچىدىكى ھەممە نەرسىگە
قاراپ - قاراپ يەنىلا تويماي
نۇردەك ئۆنسىز سۆيۆپ يۆرىمەن.
سۆيىمەن
ئاي نۇرىدا تۇرغان ئاق تېرەكلەرنى،
جىمجىت تۇرغان كۆلەڭگىسىنى،
ئېرىپ كەتكەن كۆلەڭگىسىنى.
سۆيىمەن سىنتەبىردە ياغقان يامغۇرنى،
ماي يولدا جىم ياتقان يامغۇرنى،
ئۆنسىز يىغلاۋاتقان يامغۇرنى.
ئەينەكلەرنىڭ سۇنۇقلىرىغا
نۇر مارجىنى چاچقان يامغۇرنى.
سۆيىمەن مەسچىتتىن قايتار ۋاقىتتا
خۇدانىڭ قوللىرىدىن ئاققان يامغۇرنى.
سۆيىمەن
ئۇندىكى قارنى، شامالنى.
چىملىقلاردا، ئېرىق بويىدا
سازاڭ تېرىپ يۆرگەن باھارنى.
12-ئاينى، 12 ئاينى،
چوڭ كوچىنى، خالتا كوچىنى،
تىلەمچىنى، پالچى ئايالنى،
تەشتەكلىك، تەشتەكسىز دېرىزىلەرنى،
سېنى ھەم ئۇنى.
سۆيىمەن
مىلادىدىن بۇرۇنقى
ۋە كېيىنكى تارىخنى،
سۆيىمەن تارىخنىڭ كەلگۆسىنىمۇ.
历史上的今天：
قەشقەردىكى يەر شارى(6) 2010-10-19قەشقەردىكى يەر شارى(5) 2010-10-19قەشقەردىكى يەر شارى(4) 2010-10-19قەشقەردىكى يەر شارى(3) 2010-10-19قەشقەردىكى يەر شارى(2) 2010-10-19
收藏到：Del.icio.us