ئۇيغۇر ياشلار شېئىرىيتى

 

يالغۇزلۇقۇم ئىسە قىلغاندا

 

 

يۇلتۇزلارنى ئەۋەتكىن دىلبەر ،

چاقناپ تۇرسۇن مەن ئۈچۈن پەقەت .

دەرەخلەرنى ئەۋەتكىن دىلبەر ،

قۇچاقلىسۇن بەرسۇن مۇھەببەت .

ھىدلىرىڭنى ئېپ كەلگەن شامال

كېزىپ چىقسۇن باغرىمنى تامام .

كۆيدۈرمىسۇن ئاتەش نەپەسلەر ،

تەڭلىگىن سۇ ، سۇنغىن قەدە ، جام .

 

كۆزلەر سۆزلەر ، ئىشقى ئازابى

ئاھ ، نىمىدىن بېرىدۇ دېرەك ؟

سۆزلىرىڭدىن ئۆرتەنسە باغرىم ،

كۆزلىرىڭدىن سۇ ئىچەر يۈرەك .

ئاقتا بولغان بابا مەشرەپتەك ،

كەلدىم يىراق چۆللەرنى تاشلاپ

يوللىرىمغا قالغىن يىقىلىپ ،

يىراق ئېلىپ كېتەي ھاپاشلاپ ...

 

مەن ھىچكىمگە قىلمىدىم قۇللۇق ،

بولدۇم پەقەت ئىشىقنىڭ قۇلى .

دەرەل دەرەخلەر ئۇخلار خىرامان ،

ئۇخلىمايدۇ ئاشىق بۇلبۇلى .

يۇلتۇزلارغا قولۇم سۇنارمەن ،

ئېقىپ كېرەر باغرىمغا بىر نۇر .

سەن توغرۇلۇق ئايدىڭ كېچىدە

شاماللاردىن ئىزدىدىم ئۇچۇر .

 

مەن ياشىغان خلۋەت شەھەرنىڭ ،

ئاسمىنىدا ئاي ، يۇلتۇزى يوق .

قاراڭغۇدا سوزدۇم قولۇمنى

ۋۇجۇدۇمغا بەرگىن يورۇقلۇق .

مەن ياشىغان خىلۋەت شەھەردە

گۈل چېچەكلەر ، دەل - دەرەخلەر يوق ،

باساي جېنىم باغرىمغا مەھكەم ،

ئېلىپ كەلگىن ھەممىنى تولۇق .

 

يالغۇزلۇقۇم ئازابلىغاندا

نامىڭنى ياد ئەتتىم خۇدادەك .

بۇ ئادەمسىز تەنھا شەھەردە

بىر جۈپ گۈل بوپ ئېچىلسۇن يۈرەك .

 

---- شىنجاڭ ئىقتىساد گېزىتى 1999.8.10

ئاسىمجان ئوبۇلقاسىم