يـۈرىـكـىـم يـىغـلايـدۇ

يـۈرىـكـىـم يـىغـلايـد ۇ (ئۇيغۇرىيە )                                  يىغلىما يۈرىكىم ، سېنى بەزلىگىلى  نەچچە ئەسىردەك بولدى ،ئەمما ھېچ گەپ ئاڭلىمىدىڭ ، بەدەنلىرىم سۇسىزلىنىپ ، لەۋلىرىم يېرىلىپ كەتتى . ئەمدى سېنى بەزلىگۈدەك مەندە نە مادار بولسۇن ! پەقەتلا ھالسىرىغان جىسمىمنى ، مۇزلىغان يۈرىكىمنى ئانا زىمىنىم باغرىغا  چىڭ يېقىپ تۇرۇپ ، ئۈمۈتسىزلىكتىن ئۆچەيلا دەپ قالغان جىن چىراقتەك پىلدىرلاۋاتقان كۆزلىرىمنى كىملەرگىدۇر تىكىپ ، كىملەردىندۇر مېھىر -مۇھەببەت تىلەپ ساڭا داۋا ئىزلەۋاتىمەن . شۇڭا قوتۇرماچتەك قېتىپ قالغان قەلبخانەمگە شەبنەمچىلىك  سۇ بېرەي دىسەڭ سەۋرى قىلغىن ! سەن سورايسەن ، خەلقىم ئۈچۈن كۆكرەك كېرىپ جەڭگە كىرگەن ئوغلانلار قېنى دەپ ؟! سەن سورايسەن ،خەلقىم ئۈچۈن قولىغا ساتارىنى ئالغان ئاماننىسا كەبى قىزلار قېنى دەپ ؟! ئاڭلا يۈرىكىم ، ئۇلار بار . لېكىن شاۋقۇن -سۆرەنلىك بۇ رەڭگە-رەڭ دۇنيا ئۇلارنىڭ ئاۋازىنى بېسىپ چۈشكەچكە سەن ئۇلارنىڭ توۋلىغان مۇقاملىرىنى  ، ئۇلارنىڭ مەرت -مەردانە چەبدەس قەدەم تېۋىشلىرىنى ئاڭلىيالمىغان  بولىشىڭ مۇمكىن . ئەمما ئۇلار ھامان ھايات !     گەرچە ئوغلانلىرىمىز قانداقتۇر تەتۈر شاماللارنىڭ تەسىرىدە يىلتىزلىرى بوشۇشۇپ ،‹مەسئۇليەت› تىن ئىبارەت بۇ ئاتالغۇ ئۇلارغا سەل ناتۇنۇشتەك بىلىنسىمۇ ئەمما ۋەتەن ئۈچۈن ،خەلقىم ئۈچۈن شۇنداقلا ئائىلە ئۈچۈن ئۆز مەسئۇليىتىنى ئۈن -تىنسىز ئادا قىلىۋاتقان ئوغلانلار يەنىلا مەۋجۇت . ئاز ساندىكى بېلى بوشلار ئەجداتلىرىمىزنىڭ ماڭغان يولىدىن چەتنەپ كېتىپ ، ئەجداتلىرىمىزنىڭ روھىنى قورۇندۇرماقتا . جەمىيەتنىڭ داشقىلىغا ئايلىنىپ ئۆز پۇتىغا ئۆزلىرى پالتا چاپماقتا ! بۇنىڭلىق بىلەن ئانىلار يىغلىماقتا ، پەرزەنتلەر دادا مېھرىگە قانماي تۇرۇپلا بىر قانىتىدىن ئايرىلغان بىچارە قۇشتەك ،  پەرۋاز قىلىپ ئۇچالماي ئۈمۈتسىزلەنمەكتە !!! شۇڭا ئۇلارغا مۇنۇ سۆزلىرىمنى دەپ ئۆتۈشۈمگە رۇخسەت قىلغىن : ئاكىلار ،دادا ، ئۇكا ۋە يىگىتلەر !!! سىلەرسىز بىزگە تەرەققىيات ، سىلەر ئاچمىغان بوز يەرسىز گۈلىستان نەدە تۇرۇپتۇ ؟ سىلەرسىز تاتلىق ۋە گۈللەنگەن دۇنيا ، ئەقىللىق پەرزەنت نېمە قىلىدۇ ؟ سىلەرسىز ئانىلىق بۈيۈكلۈك ۋە ئالىجانابلىق ، مەۋجۇدىيەت ، باش كۆتۈرۈش ، قۇدرەت تېپىشلار نېمە قىلىدۇ ؟شۇڭا بېلىڭلارنى تېخىمۇ چىڭ باغلاڭلار ، سىلەرنىڭ ئەجىر تۆھپەڭلەر تارىخ بېتىدىن تېخىمۇ كۆپرەك قۇرۇق ۋاراقلارغا رەڭ بېرىپ ئورۇن ئالغۇسى ! شۇندىلا مۇنۇ يىغلاڭغۇ يۈرەكلەرمۇ يىغىغا خاتىمە بېرىپ كۈلۈپ ياشارغۇسى !!! يىغلاڭغۇ يۈرىكىم قاراپ باقسام يەنىلا يىغلاۋاتىسەن ، مەقسىدىڭنى چۈشەنگەندەك بولدۇم ، ئاياللارغا قاراپ يىغلاۋاتىسەن شۇنداقمۇ ؟ يىغلىما ! سەن ئارزۇ قىلغاندەك خانىم -قىزلىرىمىزمۇ خىزمەت ، ئائىلە ۋە جەمىيەتتە ئۆز مەسئۇليىتىنى ئادا قىلماقتا ! گەرچە بەزى بىر ئايرىم خانىم -قىزلىرىمىز مىللىتىم شەنىگە داغ كەلتۈرۋاتقاندەك قىلسىمۇ ،لېكىن ئۇلارنى قۇتقۇزدىغان ئوغلانلىرىمىز مەۋجۇت ! چۈنكى ئاياللارنىڭ ياقۇت، گۆھەر ،قاشتېشى  ئالماسنىڭ ئورنىدا تەرىپلىنىشى ۋە ياكى تاش بۇلۇپ چۆللەرگە تاشلىنىشىنىڭ ھەممىسى ئەرلەرگە باغلىق دەپ قارايمەن . ئايال دېمەك ،سەنئەت دېمەك . ئاياللار بولغانلىقى ئۈچۈن سەنئەت بولغان ، ئېستېتىكا بولغان ، پىكاسو بولغان، ئاياللارسىز مۇزىكا ، ئەرلەرنىڭ كۈلكىسى نىمە قىلسۇن ؟! بارلىق تىل -يېزىق ، ئەدەبىيات ، پۇل -پۈچەك دىگەنلەرنىڭ ھەننىۋاسى ئاشۇ بىز ئاياللارنىڭ تۈرتكىسىدە ، ئۇنىڭغا بولغان تەرجىمىسىز ئىنتىلىش ، چېگرىسىز سۆيگۈدىن كەلگەن . بىز تۇغما پاكلىق ، يېتىلىشتىكى مۇكەممەللىك بىلەن پەرىشتە بولالىساق ، ئوسال ، پۇتالغان ئەپتىمىز بىلەن شەيتاننىڭ ، پاھىشىنىڭ ، مۇناپىقنىڭ سۈرىتىگە كىرەلەيمىز . بۇنىڭغا ئەڭ چوڭ تەسىر قىلىدىغان نەرسە نېمە ؟ ئەركەك .نېمىشقا شۇنداق بۇلىدۇ ؟ دەپ سوراۋاتىسەن يۈرىكىم ، بۇ سۇئالغا <ئىنسانسەن> دىگەندىن باشقا قايىل قىلارلىق جاۋاپ يوق يۈرىكىم ! ئىرا ئالماشقان تەقدىردىمۇ ،ماكان ئالماشقان تەقدىردىمۇ ئىككى خىل ئادەم قالىدۇ . گۈزەللىكنىڭمۇ ، رەزىللىكنىڭمۇ سەۋەپچىسى يەنىلا بىز ئاياللار بولۇپ قېلىۋېرىمىز . ھېچكىمنىڭمۇ قىيامەتنى كۆرگۈسى ، ئۇياتسىز ھالەتلەردە يۈرگۈسى يوق ئەركەكلىرىم ! شۇڭا راھەت كۆرگۈڭلار بولسا ، ئاياللارنى تەربىيەلەڭلار ! مۇھەببەتكە چىلىشىپ ياشىغۇڭلار بولسا ، ئاياللارنى تەربىيەلەڭلار . سىلەرنىڭ مېھرى -مۇھەببەتلىك كەڭ قوللىقىڭلاردا يېرىم يالىڭاچ بەدەنلەر پۈتۈن كىيىم بىلەن شەرمى ھايانى تېپىۋالسۇن ! سىلەرنىڭ ئاتىلارچە ئاچقان مېھرىبان كەڭ قۇچىقىڭلاردا ئۇلارمۇ تەشۋىشسىز ، غەم -قايغۇسىز قېنىپ بىر ئۇخلىۋالسۇن ! مۇنۇ يىغلاۋاتقان يۈرەكلەر  تاتلىق بىر كۈلىۋالسۇن ! شۇڭا بارلىق خانىم قىزلارغا دەيدىغىنىم : بىز ئىنسانىيەتنىڭ كۆزى ! بىز چاقنىغاندىلا زىمىندا نۇر ، ئاسماندا يۇلتۇز ،بۆشۈكتە بوۋاق بولىدۇ .قەدىر -قىممەت ، قۇربان بېرىش ، سۆيۈش ۋە ئارام تېپىش سەپىرى بولىدۇ . روھ بۇلىدۇ ، غۇرور بۇلىدۇ . شۇڭا قەدىر -قىممىتىمىزنى ساقلاپ ئەرلىرىمىزنىڭ ئابرويىنى كۈتۈرەيلى ! ئۇف يۈرۈكىم ، ئەمدىغۇ بولغاندۇ ؟ سېنىڭ دىمەكچى بولغانلىرىڭنى مەن تەرجىمە قىلىپ بەردىم . ئەمدىغۇ يىغىدىن توختارسەن ؟ ! لېكىن ئۇ يەنىلا يىغلىماقتا ... ئاپتورى: رىيىمجان    مەنبە : ئىز باسار تورى

كۆرۈلۈشى:1441

قوشۇلغان ۋاقتى:2011/7/21 12:07:54

يوللىغۇچى ئەزا: