ئىسىت ! ئۈرۈمچىدە يەنە ياز كەلدى

بايقىماي يېيىش ئەقىلنىمۇ ، تەننىمۇ ، روھنىمۇ ، ئىماننىمۇ كاردىن چىقىرىدۇ ... ... غاپىللار ھېچنېمىدىن تەپ تارتمايدۇ ، چوڭلاردىنمۇ ، قائىدە – مۇراسىملاردىنمۇ ، دىندىنمۇ ، پەندىنمۇ ئەيمەنمەيدۇ . باشقىلار تېنىنى يۆگەش ، روھىيەتنى پاك تۇتۇش ئۈچۈن  كىينسە ، ئۇلار زىننەتلىرىنى كۆز–كۆز قىلىش ، ئاشكارىلاش ، باشقىلارنى قاراتقۇزۇش ئۈچۈن كىيىنىدۇ . باشقىلار قورسىقىنى تويغۇزۇش ئۈچۈن يەپ–ئىچسە ، ئۇلار ئىچ–پۇشۇقىنى چىقىرىش ، كەيپى–ساپا ئۈچۈن ئىچىدۇ ، چېكىدۇ .ئادەمدىن ئىمان كۆتۈرۈلسە مانا مۇشۇنداق ۋاستە مەقسەتكە ئايلىنىدۇ . كىشىلەر ئارا چىن مۇھەببەت ، ئادەمگەرچىلىك ئۆلىدۇ . ھەممەيلەن ئالدىرايدۇ ، يېتەلمەيدۇ . كوچىلار مىغ- مىغ ، ئەمما غېرىبلىق ئۈنسىز داۋاملىشىدۇ . مۇھەببەت پەلسەپىلىرى ئالەمنى بىر ئالىدۇ ، ئەمما ۋاپا – ھايا يوقاپ كېتىدۇ . ھايادىن ، ۋاپادىن مۇستەسنا مۇھەببەتنىڭ بولىشى ئەسلا مۇمكىن ئەمەس ، ئەلۋەتتە . ... ... يۇقارقىلىرى ھوسۇللۇق ، ياش يازغۇچىمىز نۇرمۇھەممەت ئۆمەر ئۇچقۇننىڭ « تەپەككۇر قاتلىرىنى ۋاراقلاپ » ناملىق كىتابىدىكى « قورقار چاغدا قورققۇلۇق » ناملىق ئەسىرىدىن پارچىلار . كىتابخانىغا بېرىپ كېلىش يولۇمدىكى كۆرگەن ، ئويلىغانلىرىمنى قايتقاندىن كېيىن خاتىرەمگە پۈتۈۋالغان ئىدىم . ئېھتىمال نۇرغۇنلارغا ئورۇنسىز قاقشاشتەك بىلىنىشى مۇمكىن . لېكىن كۆز يۇمالمايمىزكى ، بۇلار ھەقىقىي كۆرۈنۈش ۋە دىلدىكى ئۆرتۈنۈش ... ... توردىشىمىز زۇمرەت يوللىغان «شەيتان دىنى ۋە دېسكو» دېگەن تېمىنى ئوقۇغاندىن كېيىن بىزلەر كۆرۈۋاتقان ، بولۇۋاتقان ئىشلارنىمۇ خىيالىمدىن ئۆتكۈزدۈم . ئېھتىمال بۇ بەزىلەرگە قۇرۇق قاقشاش بولۇپ ھېسابلىنىشى مۇمكىن ، لېكىن بۇھەقىقەت . ئىللەتنى كۆرسەتمىسەك ، تۈزەتمىسەك ، بىزمۇ تۈزەلمەيمىز ... ... كېسەلنى يۇشۇرساق ، ئۆلۈم ئاشكارە ... ... ئىست ! ئۈرۈمچىدە يەنە ياز كەلدى شىۋىرغانلىق ، جۇدۇن كۈنلىرى ، كىيىشەتتى ھەممەيلەن ئۇزۇن ، ئىشتىن چۈشۈپ ، ئوپۇل – توپۇللا ، قايتىشاتتى ئۆيىگە بۇرۇن  . باشلىرىدا ئەرلەرنىڭ بەزەن ، پەيدا بولۇپ قالاتتى تۇماق ، قىز – ئاياللار روماللار ئارتىپ ، بوپ قالاتتى خېلىلا «ئوماق » . جۇت ، سوغۇقتىن زېرىككەچ جانلار ، ئىنتىلەتتى باھارغا ، يازغا ، (بىزار بولغان چۈنكى ھەممەيلەن ئىس ، تۇماندا قارايغان قارغا .) باھاردىنمۇ ئۇچۇرلار بەردى ، ئىللىق شامال سىيپاپ يۈزلەرنى ، مايسا كۆكلەپ ، چېچەك ئېچىلدى ، قاماشتۇردى ھەممە كۆزلەرنى . ئەمما ، خۇددى بۇلتۇرقىدەكلا ، ئاچچىق چايقالدى بوۋايلار بېشى ، قار ، مۇز ئېرىپ ، ئەگىز بىلەن تەڭ ئاقتى يەنە مومايلار يېشى . كوچىلاردا ماڭماق تەس بولدى ، ھەر قەدەمدە كۆزلەر قينىلىپ ، قىشتا ئۇزۇن تون – چاپان كەيگەن قىزلار ئەمدى قالغاچ ئېچىلىپ . بوياقلارنىڭ تېگىدىكى يۈز ، تەپ تارتىشنى بىلمەمدىكىن تاڭ ، بىرلىرىنىڭ كىندىكى ئوچۇق ، بىرىنىڭ ھەتتا مەيدىسىمۇ ھاڭ . تىزدىن ئاشماس قىسقا ، تار كىيىم ، قىزىل ، سېرىق بويالغان چاچلار ، رازى بولماي قوي كۆزلىرىگە ، قارا لايلار سۈرۈلگەن قاشلار . قايتماس بولدى كەچ بوپكەتسىمۇ ، ئۆيگە بۇرۇن قايتىپ كۆنگەنلەر ، « مۇساپىرمۇ ؟بىكارچىمۇ ؟ » دەپ سوراپ قالدى يولدىن ئۆتكەنلەر . يەرگە قاراپ ماڭىمىز يولدا ، باشنى قەستەن تۆۋەن قىلىشىپ ، نە ئامال بار كۆتۈرسەك ئەمما ، دىل ئاغرىسا ، كۆڭۈل ئېلىشىپ . نۇرغۇن خەقلەر دەپ بولغان گەپلەر ، قەلىمىمدە يەنە خەتلەندى ، ئەسكە ئالدىم ، دېدىم ھەم « ئىسىت ! ئۈرۈمچىدە يەنە ياز كەلدى .»

كۆرۈلۈشى:2598

قوشۇلغان ۋاقتى:2012/5/14 12:48:50

يوللىغۇچى ئەزا: