مائۇسىڭىزنى قويۇپ تۇرۇڭ !

مائۇسىڭىزنى قويۇپ تۇرۇڭ ! كۆپىنچىمىز ئالىي مەكتەپ ئوقۇغۇچىسى ( ئېھتىمال ھەممىمىز بولىشىمىز مۇمكىن ) ، كۈندىلىك ئۆگىنىش ، تۇرمۇشىمىزدا،  ھەتتا بەزىلىرىمىزنىڭ خىزمىتىدەكومپىيوتېردىن ئىبارەت بۇ مۇھىم ئالاقە ، خىزمەت قورالىدىن ئايرىلالمايمىز . تاپشۇرۇق ئىشلەش ، سۈرەت - كۆرۈنۈش بىر تەرەپ قىلىش ، تورغا چىقىپ ماتېرىيال ئىزدەش ، ئېلخەت يېزىش قاتارلىق كومپىيوتېر مەشغۇلاتى بۈگۈنكى تۇرمۇشىمىزدا ئۈچ ۋاق تاماقتەكلا بىر ئىش بولۇپ قالدى . كومپىيوتېرنىڭ بۇ جەھەتتە بىزلەرگە ئېلىپ كەلگەن پايدىسىنى ، قولايلىقلىقىنى ھەقىقەتەنمۇ جەزملەشتۈرىمىز  . لېكىن شۇنى ئويلاپ باقتىڭىزمىكىن ، يۇقارقى مەشغۇلاتلارنى ھەركۈنى چوقۇم قىلىشىمىز ناتايىن . مەسىلەن تاپشۇرۇقنى كۆپ دېگەندە ھەپتىدە بىر رەت تاپشۇرىمىز (ناۋادا كومپىيوتېردا ئىشلەشكە توغرا كەلسە تېخى ) ، ئېلخەت يېزىشىش ، ماتېرىيال ئىزدەش قاتارلىقلارمۇ كۈندە سىزنىڭ بېشىڭىزنى ئاغرىتىدىغان ئىشلارمۇ ئەمەس (شەخسەن ئۆزەمنى ئېلىپ ئېيتسام شۇنداق ... ... )  ، لېكىن ھەممىمىزنىڭ شۇنداق بىر ئادىتى باركى ، ھەركۈنى كومپىيوتېرنىڭ ئالدىدا ئىككى سائەتتىن تۆت سائەتكىچە بولغان ۋاقتىمىزنى (بەزىلىرىمىزنىڭ 10 نەچچە سائەتتىن ئاشىدۇ تېخى ) يۇقارقى «خىزمەتلەر » نى باھانە قىلىپ ئۆتكۈزىمىز . كۆپىنچە چاغلاردا بۇ خىزمەتلەر توردا مەنىسىز پاراڭلارنى سېلىش ، مەنىسىز پاراڭلارغا كۆز يۈگۈرتۈش (مېنىڭ بۇيەردە تىلغا ئالغان « مەنىسىز پاراڭ » ىم ئەھمىيەتسىز ، قورۇق گەپلەرنى كۆرسىتىدۇ  ) ۋە ياكى باشقىلارنىڭ  بلوگى ، شەخسى تور بېتىنى زىيارەت قىلىش بىلەن ، ھەتتا بەزىلىرىمىزنىڭ ئويۇنى بىلەن ئىسخىما ئالماشتۇرىدۇ_دە ، نۇرغۇن ۋاقتىمىزنىڭ بىھۇدە ئىسراپ بولىشىنى كەلتۈرۈپ چىقىرىدۇ . ئالىي مەكتەپ ئوقۇغۇچىلىرىنىڭ (بىزنىڭ ) تەن ساپايىنىڭ كۈندىن – كۈنگە چۈشۈپ كېتىشى ، بارغانسېرى ھورۇن ، ئەبگا بولۇپ كېتىشىنىڭ سەۋەبىمۇ شۇ بولىشىنى نەزەردىن ساقىت قىلغىلى بولمايدۇ ئەلۋەتتە . مائۇسىڭىزنى قويۇپ تۇرۇڭ ! كومپىيوتېرىڭىزنى تاقىۋېتىپ ، مەكتەپ تەنتەربىيە مەيدانلىرىغا چىقىپ ئاز- تولا ھەرىكەت قىلىپ قويۇڭ ! زېھنىڭىز ئېچىلىدۇ ، روھىڭىز ئۇرغۇيدۇ ، تېنىڭىز ساغلام بولىدۇ . بوش ۋاقىتلىرىڭىزدا كىتاپ ئوقۇپ قويۇڭ ! كاللىڭىز ئېچىلىدۇ ، تاكاموللىشىسىز ، ئەڭ ئاددىيسى توردىكى بەزىبىر بىمەنە پاراڭلارنىڭ ئشتىراكچىسى بولۇپ قالمايسىز . ھەرھەپتىلىك كومپىيوتېر ئىشلىتىش ئېھتىياجىڭىزغا ئاساسەن جەدۋەل تۈزىۋېلىڭ . تورغا چىقىش ۋاقتىڭىزنى ، زىيارەت قىلىش مەزمۇن ، ئوبېكتىڭىزنى ئېنىق ئايدىڭلاشتۇرىۋېلىڭ ! خىزمەت ، ئۆگىنىش ئىشلىرىڭىز تېخىمۇ ئۆنۈملۈك بولىدۇ . چارچىمايسىز ،  ۋاقتىڭىزنى ئىسراپ قىلمايسىز . مانا، باھار كەلدى .ھاۋامۇ ئىللىپ قالدى .مەكتەپنىڭ كەڭرى كەتكەن ، كېچىسىمۇ كۈندۈزدەك يورۇق مەيدان ، مەيداندىكى چېنىقىش ئەسلىھەلىرى سىزنى ساقلاپ تۇرىدۇ . ھەرىكەت قىلىڭ دوستۇم ، ھاياتلىق ھەرىكەتتە !

كۆرۈلۈشى:3518

قوشۇلغان ۋاقتى:2012/5/11 13:24:40

يوللىغۇچى ئەزا: