بەخىت قوينىدا (ئۆزخان)

ئۆزخان

بەخىت قوينىدا

(ھېكايە)

  ئىشتىن چۈشۈپ ئۆيگە قايتىۋاتقان چېغىمدا تىلفۇنۇم يەنە سايراپ قالدى. تىلفۇنۇمغا قارىمساممۇ بىلىمەن. بۇ يەنىلا شۇ ... نىمە دىسەم بولار؟ بۇ يەنىلا ئىككى كۈندىن بىرى مېنى ئاۋارە قىلىۋاتقان تىلفۇن. تىلفۇننى ئېلىپ قارىدىم . ئويلىغىنىم راست ئىكەن. مەن ئېغىر ئۇھ تارتىۋىتىپ تىلفۇننى يانچۇققا سېلىۋىتىپ يولۇمغا ماڭدىم. تىلفۇن يەنە سايرىدى. ئالمىۋىدىم يەنە سايرىدى. ھېلىمۇ ئەتتىگەندىن بىرى ئاچمىغاندىم. نىمە بالاغا قالغاندىمەن بۇ... تىلفۇن قىلغۇچىنى نىمىشقىدۇر تىللىغۇم كەلمەيتى...

ھاۋا ئوچۇق بولسىمۇ لىكىن سوغۇق ئىدى. نىمشقىدۇر كەيپىياتىممۇ ھاۋاغا ئوخشاشلا سوغۇق. ئاۋۋال يول بويىدىكى دۇكاندىن  ئايالىمغا ئازراق  ئۇششاق-چۈشەك يەيدىغان نەرسىلەرنى ئېلىۋېلىپ ئاندىن ئۆيگە ماڭدىم. ئۆيۈمگە تەخمىنەن ئون مىنۇتتا بارالايتىم.ئىشىك ئالدىغا كەلگەندە توختاپ بەش مىنۇت تۇردۇم . چوڭ -چوڭ نەپەس ئېلىپ كەيپىياتىمنى تەڭشىۋالدىم. چۈنكى سوغۇق چىرايىم بىلەن ئۆيگە كىرگۈم يوق. ئايالىم تولىمۇ رايىش ھەم يېقىملىق ئايال. ئۇ چىرايىمغا بىر قاراپلا ھەممىنى بىلىۋالىدۇ. ئاندىن كەيپىياتىمنى كۆتۈرۈش ئۈچۈن قىلمىغىنى قالمايدۇ. مانا شۇ چاغدا ئۆزۈمنى نىمشقىدۇر ئۇنىڭ ئالدىدا گۇناھكاردەك ھېس قىلاتتىم.

تىلفۇن يەنە سايرىدى.

-نىمە دەيسەن؟-دىدىم تىلفۇننى ئېلىپلا زەردە بىلەن،-نىمشقا تىلفۇن قىلىۋىرىسەن، باشقا ئىشىڭ يوقمۇ؟

-يەنىلا شۇنداق قوپالكەنسەن،-دىدى ئاينۇر چاندۇرماي،- ئايالىڭ بۇ خۇيۇڭغا قانداقمۇ كۆنگەندۇ؟

-ئۇنىڭغا باش قاتۇرمىساڭمۇ بولىدۇ،-دىدىم. بۇ دۇنيادا مەندەك ئەسكىنىڭ خۇيىنى كۆتۈرىدىغان كىشى يەنىلا باركەن.

-كۆرۈشەيلى،-دىدى ئاينۇر،-ساڭا دەيدىغان گەپلىرىم بار.

-ساراڭ بوپسەن،-مەن كۈلۈپ كەتتىم،- كۆرۈشەيلى دىسەڭلا كۆرىشىدىغان مەن سېنىڭ مۇھەببىتىڭمىدىم.  

-مۇھەببىتىم بولساڭمۇ يامنى يوققۇ؟-ئۇ خۇددى بۇ گەپلەر تەسىر قىلمىغاندەكلا سۆزلەۋاتاتتى.

-ماڭا قارا، مېنىڭ ئىشىم بار. تىلفۇننى قويىۋەتتىم جۇمۇ.

-توختا،-دىدى ئۇ،- سەن بىلەن بىر قېتىم كۆرۈشمىسەم زادىلا بولمايدۇ.

-ھېلىمۇ نىمە ئشىڭ بار دەيمەن؟- ئاۋازىم سەل قاتتىق چىقىپ كەتتىمۇ قانداق يولدا كېتىۋاتقان تونۇش بىر ئايال ماڭا لەپپىدە قاراپ قويدى.

-ئىشىمنى كۆرۈشكەندە دەيمەن. پەقەت بىرلا قېتىم. ...

-ئەگەر ياق دىسەمچۇ؟-دىدىم.

-ئۇنداقتا مەندىن رەنجىمە، بېشىڭغا سەن ھېچقاچان ئويلىمغان ئاۋارچىلىقلارنى سالىمەن.

-پوق يەپسەن،-دىدىم،- قولۇڭدىن بىرەر ئىش كەلسىچۇ كاشكى.

-سەن بىلەن پەقەت بىرلا قېتىم كۆرۈشەي دەۋاتىمەن. ئىلگىرىكى ئەر-ئاياللىقىمىزنىڭ يۈزىنى قىلىپ بولسىمۇ ماقۇل دىگىن،-ئاينۇر ئەمدى يېلىشنشقا باشلىدى.،-پەقەت بىرلا قېتىم كۆرۈشسەك بولدى.

مەن بىردىنلا يۇمشاپ قالدىم. بىردەم ئويلانغاندىن كىيىن ماقۇل بولدۇم. بىز ‹‹ شاھ تائاملىرى›› دا كۆرىشىدىغان بولدۇق.

مەن قولۇمدىكى نەرسىلەرنى ئىشك ئالدىغا قويۇپ قويدۇم. ئۆيگە ئەككىرىپ ئايالىمغا بېرىشنى ئويلىغان بولساممۇ ئۆيدىن يەنە نىمە دەپ چىقىشىمنى بىلمەي قالغاندىم.

  ئاينۇر مېنىڭ ئىلگىرىكى ئايالىم ئىدى. بىز ھېساپتا توپتوغرا بىر يىل ئۆي تۇتقان ئىدۇق. كىيىن مېجەز -خۇلقىمىز زادىلا كېلىشمەي ئاجرىشىپ كەتكەن. ھەمدە يىرىم يىل ئىلگىرى ئۆز ئارا بەسلەشكەندەكلا ئارقا-ئارقىدىن توي قىلغاندۇق. توغرا ئۇ مەندىن بىر ئاي بۇرۇن توي قىلغاندى. ئەمما ئاڭلىسام ھازىر ئاجرىشىپ بوپتۇ.

ئۇ تولىمۇ چىرايلىق ئىدى. مەن دائىم ئۇنىڭغا ‹‹ ئىگىمىز ساڭا ئىككى كىشىلىك كۆز بېرىپتىكەن ›› دەيتىم. قلىقلىرىمۇ شۇنچىلىك ئوماق ئىدىكى مەن ئۇنىڭغا قاراپ -قاراپ تويمايتىم. ئەمما ئۇنىڭغا بولغان زىيادە ئامراقلىقىم ئۇنى شۇنچىلىك ھاكاۋۇر، ھالى ئۈستۈن قىلىۋەتتىكى ئاخىرى ئۆزۈم ئۇنىڭ ئېغىرلىرىنى زادىلا كۆتۈرۈپ بولالماي قالغاندىم. ئۇ بولسا مېنى ئۆزگىرىپ كەتتى. ماڭا بۇرۇنقىدەك كۆيمەيدۇ دەپ ئويلىدى. بىز خۇددى كۆز تەككەندەكلا ئاجرىشىپ كەتكەندۇق. راستىمنى دىسەم مەن ئۇنىڭ سۈرەتلىرىنى ھازىرمۇ كىتاپ ئىشكاۋىمنىڭ بىر يېرىدە مەخپى ساقلاۋاتاتتىم. مەن شۇ چاغدىمۇ شۇنچىلىك تارتىشقاندىم.

  ئۇ ئاللىقاچان كېلىپ بوپتۇ. مەن خېلى يىراقتىنلا ئۇنىڭ مامۇق ياقىلىق ئاق چاپان، تىزىدىن سەل ئاشىدىغان قىزىل يوپكا، تىزىغا كېلىدىغان ئۆتۈك كىيىۋالغانلىقىنى كۆردۈم. بېشىغا كىيۋالغان ئاق پوسىمىسى ئۇنى شۇنچىلك جەزبىدا كۆرسىتپ تۇراتتى.

مەن ئۇنىڭ قىلغان سالامىنى ئىلىكمۇ ئالماستىن  ئۇدۇل مېڭىپ بىر ئايرىم خانىغا كىردىم ئۇمۇ ئارقامدىن كىردى.

-نىمە تاماق يىسەك بولار؟-دىدى ئۇ چاپىنىنى سېلىپ ئىلغۇچقا ئىلىۋىتىپ،- مەن ئۇنىڭغا ئىختىيارسىز قاراپ سالدىم ئارقىدىن باشقا ياققا قارىۋالدىم.

-مېنى تاماق يىيىش ئۈچۈن چاقىردىڭمۇ؟-دىدىم چىرايىمنىمۇ ئاچماستىن.

-بولدى ئۇنچىلىك ئەستايىل بولۇپ كەتمە،- دىدى ئۇ كۈلۈپ تۇرۇپ،- يەنىلا شۇنچىلىك قوپالكەنسەن.

-ئۆزلىرىدەك سىلىق -سىپايە بولالمىدۇق.

-قانداق تاماق يەيسىلەر؟-دىدى چىرايلىق مۇلازىم قىز  كۈلۈمسىرەپ تۇرۇپ،

-بىر پۈتۈن، بىر يېرىم لەڭمەن بولسۇن،-دىدى ئاينۇر مېنىڭ بىر نەرسە دىيىشىمنى كۈتمەيلا،

كۈتكۈچى ماڭا قارىدى. مەن بېشىمنى لىڭشىتتىم. مەن ئەسلىدىمۇ لەڭمەنگە ئامراق ئىدىم. پەمىمچە ئاينۇر بۇ ئارقىلىق ماڭا ئۆزىنىڭ ھېلىھەممۇ شۇنچىلىك يېقىن ئىكەنلىكىنى ئىسپاتلىماقچى ئىدى. مۇلازىم قىز چىقىپ كەتتى.

-نىمە گېپىڭ بار،-دىدىم مەن ئۇنىڭ كۆزلىرىگە مىختەك قادىلىپ،- مەن ئالدىرايمەن. شۇ تاپتا ئايالىم مېنى ساقلاپ ئولتۇرىدۇ.

-بىز يارىشىپ قالايلى،-ئۇ شۇنداق دىيشىگىلا مەن ئاغزىمغا ئېلىپ بولغان چاينى پۈركۈۋەتتىم:

-قارىغاندا ئۆزۈڭگە بەك ئىشىنىدىغان ئوخشىمامسەن؟ ياكى مەن ئىلگىرى بايقاپ بولالمىغان بىرەر ئالاھىدە تەرىپىڭ بارمۇ؟

-ياق ئۇنداق ئەمەس،-دىدى ئاينۇر،- مەن يەنىلا مەن. مەن ئۆزۈمگە ئۇنچە ئىشەنمەيمەن، ئەمما ساڭا ئىشىنىمەن. شوڭا...

-ئەسسالامۇ ئەلەيكۇم ھۆرمەتلىك خانىش،-دىدىم مەن كىنايە قىلىپ،- قاچاندىن بىرى ئۆزلىرىگە قارىغاندا ماڭا بەكرەك ئىشىندىغان بولۇپ قالدىلا؟

-دۇنيادا ئازمايدىغان ئىنسان يوق، -ئاينۇرنىڭ كۆزلىرى ياشاڭغىرىدى.،-بىز ھەممىمىز خام سۈت ئەمگەن بەندىكەنمز...

-ماڭا قاراڭ خېنىم،-دىدىم ئۇنىڭ گېپىنى تارتىۋېلىپ،- مەن خېلى كۆپ كىتاپلارنى ئوقۇپ باقتىم. بۇ دۇنيادا ھېچ قانداق بىر مىللەت ياكى ئادەم ياكى ئۇچار قۇش سۈتنى باللىرىغا پۇشۇرۇپ بەرمەيدىكەن، سۈت ئانىنىڭ كۆكسىدە قايناپ، پىشىپ تەييار بولۇپ چىقىدۇ دەيدىغۇ؟

-نىمانداق قىلىسەن؟-دىدى ئاينۇر ئىسەدەپ تۇرۇپ، شۇ چاغدا بىز بۇيۇرۇتقان تاماقلار كەلدى. مەن تاماقنى ئالدىمغا تارتىپ يىگىلى تۇردۇم. ئۇ بولسا تېخىچە مىشىلداپ تۇراتتى. مۇلازىم يىگىت بىزگە چۈشىنىكسىز قاراپ قويۇپ چىقىپ كەتتى.

-ماڭا قارا بىز گۇناھ قىلىپ ئارقىدىن توۋا قىلساق خۇدايىم كەچۈرىدىغۇ؟

-ھە . شۇنداقمۇ-يا؟ لىكىن مەن خۇدايىم ئەمەس-تە. مەن دىگەن بىر ئىنسان. سېنىڭ نەزىرىڭدە تارتىشىدىغان ھېچقانداق يېرى يوق. مەڭگۈ نامرات پېتى ياشايدىغان بىر كىتاپ خالتىسى.

-بولدى قىل. ماڭا قارا . ھازىر مەن ئايالى بار ئادەم. ئۇنىڭ ئۈستىگە تۇرمۇشۇم شۈنچە خاتىرجەم. ئىلگىر دائىم ئالدىمغا ھەر كۈنى تۇرمۇشنىڭ نۇرغۇن چىگىچلىرى كەلسە مەن بىر-بىرلەپ ھەل قىلسام دەپ ئويلايتىم. ئەمدىچۇ؟ مەن چىگىچلەردىن مەسلىلەردىن قورقىدىغان ، قاچىدىغان بولۇپ قاپتىمەن. قېرىغان ئوخشايمەن. ئەمدى تۇرمۇش ئىشىم توغرلىق خىيال سۈرۈپ ۋاقىتىنى ئىسراپ قىلغۇم يوق. بولدى قىل،-دىدىم،- مېنىڭ خاتىرجەم ھەم جىمجىت ياشىغۇم بار.

-سەن ئۇنى ياخشى كۆرمەيسەن،-دىدى ئاينۇر،-نىمىشقا ئۆزۈڭنى مەجبۇرلايسەن؟

-كىم شۇنداق دەيدۇ؟-دىدىم قاشلىرىمنى يىمىرىپ تۇرۇپ،-ئۇنى قانچىلىك ياخشى كۆرىدىغانلىقىمنى ساڭا دەپ يۈرەمدىم.

-بولدى ئۆزۈڭنى ئالدىما،-دىدى ئاينۇر،- ئۇ سېنىڭ كۆڭلۈڭدىكىدەك قىز ئەمەس. ئۇنىڭدىن ئاجرىشپ كەت.

-بۇنداق دىيشتىكى ئاساسىڭ نىمە؟-دىدىم ئۇنىڭ ئىچىمدىكىنى بىلىۋالغانلىقىغا ھەيران بولۇپ.

-چۈنكى سەن تاشتىن-تاشقا ئۇرۇلۇپ ئاقىدىغان بۇلاق سۈيىگە ئامراق كۆلدىكى توختام سۇغا ئەمەس.

-دىمەك سەن تاشتىن-تاشقا ئۇرۇلۇپ ئاقىدىغان بولاق سۈيىكەنسەن-دە.

-شۇنداق،-قېشىنى ئېتىپ تۇرۇپ.

-تۈفى،-دىدىم ئۇنىڭغا قاراپ ،-سەن ھازىر مېنىڭ نەزىدرىمدە،- بىردەم توختىۋالدىم.

-ھە ؟-دىدى ئۇ ،-نەزىرىڭدە مەن ھازىر نىمە؟

-پايپاق يۇيۇپ يۇندا چېلىكىگە تۆكۈپ قويغان سۇ، ئەڭ ياخشىسى بۇنى بىلىۋال.

ئۇنىڭ بولىشىغا گىرىم قىلىۋالغان ئاپئاق چىرايى بۇ سۆزۈم بىلەن تەڭ سارغىيىپ كەتتى.

-دىمەك ئارقاڭغا يانمايسەن شۇنداقمۇ؟

-بۇ سۆزلىرىڭنى ماڭا تەھدىت سالغىنىڭ دەپ چۈشۈنەيمۇ؟- ددىم كۈلۈپ تۇرۇپ.

-ياق . ساڭا بەكلا ئىچىم ئاغىرىپ قالدى. جاھاندا ئۆزى ياخشى كۆرمەيدىغان ئادەم بىلەن بىللە ياشاشتىمۇ ئارتۇق ئازاپ بولمىسا كېرەك،-دىدى ئۇ،- نىمە دىگەن جاپالىق.

-سەن ئۈچۈن بىرسىگە ئىرىشىش ۋە بىرسىدىن كېچىش بەك ئوڭاي ئەمما مەن ئۇنداق ئەمەس. قولۇمدا بار چاغدا قەدرىنى قىلىمەن. قولۇمدىن كەتكەندە ئەپسۇسلانمايمەن ئۇختۇڭمۇ؟ توغرا مەن بەلكىم نەزىرىڭدە بىچارە بولۇشۇم مۆمكىن ئەمما ئاخشاملىققا تىزىنى قۇچاقلاپ ياتىدىغان ئادەم ھەرگىزمۇ مەن ئەمەس،- مەن قالغان لەغمەننى ئالدىراپ يىيىشكە باشلىدىم. ئىچىمدە بولسا ئىرادەمگە خىلاپ سۆزلىگەنلىكىم ئۈچۈن سەل بىئارام بولدۇم. ئەمەلىيەتتە مەن ئۇنى زادىلا ئۇنتۇپ كەتكىنىم يوق. ئەمما ھازىر بۇنى تەن ئالسام زادىلا بولمايتى. مەن تاماقنى يەپ بولۇپ چىنىنى ئۈستەلگە قويۇپ قول ئېتىدىغان قەغەزدىن بىر تال ئېلىپ ئاغزى-بۇرنۇمنى سۈرۇتتۈم.

-ئەمدىغۇ كەتسەم بولار؟

-بولىدۇ. قالتىسكەنسەن،-دىدى ئۇ ئامالسزلىقىنى ئىسپاتلاپ،- ئەمما مەن ھەرگىزمۇ ۋاز كەچمەيمەن.

-ھە راست. بىر گەپنى دىيشنى ئۇنتۇپ قاپتىمەن،-دىدىم ئۇنىڭغا،-ساڭا دەپ قوياي. تۇرمۇشتا بەزىدە مۇھەببەتتىنمۇ ئۈستۈن تۇرىدىغان نەرسىلەر بەر. ئۇنى مەن ئۆز ئارا ھۆرمەتلەش دەپ ئاتىدىم. قەيەردە ئۆز ئارا ھۆرمەتلەش بولىدىكەن. شۇ يەردە ئېھتىمال مۇھەببەتمۇ بولار. ماقۇل تاماق پۇلىنى مەن تۆلىۋەتتىم. خوش،- مەن ئۇنىڭ بىر نەرسە دىيشىنىمۇ كۈتمەستىن ئاشخانىدىن يېنىپ چىقتىم.

بىردىنلا يەڭگىللەپ قالغاندەك بولغاندىم. ئۇنىڭغا بولغان سېغىنىشلىرىممۇ قاياقلارغىدۇر غايىپ بولغان بىر خىل غالىپلىق تۇيغۇسى ۋۇجۇدۇمدا ئوت بولۇپ ياناتتى. ئەمدى ئۇنىڭ سۈرەتلىرىنى كۆيدۈرۋەتسەم بولىغىدەك....

ئۆيگە كىرىۋدىم. ئايالىم چاچتەك تارتىلغان لەڭمەننى سۈزىۋىتىپتۇ.

-ئەمدى كەلدىڭىزمۇ، بۈگۈن كەچ قالدىڭىزغۇ؟ دىدى ئۇ مۇلايىملىق بىلەن.

-ھە. بىر دوستۇم بىلەن كۆرۈشكلى بارغاندىم . شوڭا سەل كەچ قالدىم،-دىدىم يالغان سۆزلەپ.

-قورسىقىڭىز قانداق، تاماق يەمسىز؟-دىدى ئۇ بەك ئوخشىدى.

-ئەلۋەتتە يەيمەن،-دىدىم،-نىمە دىسەم بولار خوتۇن سېنىڭ لەڭمىنىڭدەك يىيىشلىك لەڭمەننى بۇ دۇنيادا سەندىن باشقا ھېچكىم ئېتەلمەيدۇ جۇمۇ، ئىككى چىنە ئەككىلە.

  مەن راستىنلا ئىككى چىنە لەڭمەن يەپ بولدۇم. ئاندىن بىر تەرەپتىن تىلۋۇزۇر كۆرگەچ بىر تەرەپتىن ئايالىمنىڭ قاچا-قۇچا يۇيۇش ، ئۆي يىغىشتۇرۇشلىرىدىن ھوزۇر ئالدىم.راستىنى دىسەم ئۇ ئاينۇردەك چىرايلىق ئەمەس. قامىتى ئاينۇردەك زىلۋامۇ ئەمەس. ئەمما ئۇنىڭ يۈرىكىدە مىڭ ئاينۇرنىڭ ھارارىتى بار ئىدى. مېنىڭچە بەخىتنىڭ بۇنىڭدىن ئارتۇقى باشقىلارغا قانداق بىلمەيمەن. ئەمما ماڭا ئارتۇق ئىدى.

- مەن سىزنى ياخشى كۆرىمەن ئەلى،-دىدى ئايالىم ئىشلىرىنى تۈگىتىپ بولۇپ يېنىمغا كېلىپ ئولتۇرۇپ.

- بىلىمەن،- دىدىم. ئۇنىڭ ئىڭىكىدىن ئەركلىتىپ تۇرۇپ،- سېنىڭ ماڭا بولغان مۇھەببىتڭ قانچە. مېنىڭ ساڭا بولغان مىھرىم شۇنچە.

-ياق ،-دىدى ئايالىم. بىز توي قىلغىلى تەخمىنەن يېرىم يىل بوپتۇ. مەن تېخى سىزنى تولۇق چۈشىنىپ بولدۇم دەپ ئويلاپتىكەنمەن. لىكىن بۈگۈن ھەممىنى چۈشەندىم. سىز بىر ياخشى ئەر، ئەگەر ماڭا يۈز قېتىم تاللاش پۈرسىتى كەلسە مەن يەنىلا سىزنى تاللايمەن.

-بۇ نىمە دىگىنىڭ ، مېنى  ھەيران قالدۇردۇڭغۇ؟- بىر ئىشنى چۈشەنگەندەك بولۇپ.

-سىز ئاينۇر بىلەن كۆرۈشكەندە مەن يېنىڭلاردىكى خانىدە بار ئىدىم . ھەممە گەپنى ئاڭلاپ تۇردۇم.

-ھە؟ ياق...،-دىدىم ھەيران بولۇپ،- سەن قانداقسىگە؟...

-توغرا سىز ئىشىك ئالدىدا بىرسى بىلەن تىلفۇندا پاراڭلاشقاندا مەن ھويلىدا ئىدىم. سىز كىرمىدىڭىز. چىقىپ قارىسام مەن ياخشى كۆرىدىغان نەرسىلەر ئىشىك ئالدىدا تۇرۇپتۇ. سىز بولسىڭىز خېلى يىراققا كېتىپ بوپسىز. ئارقىڭىزدىن ئەگەشكەن ئىدىم.

-سېنى خاتا قىپسەن دىمەيمەن. خوتۇن . لىكن بۇ قىلغىنىڭ....

-كەچۈرۈڭ. مەنمۇ خاتا قىلغانلىقىمنى بىلىمەن. ئەمما ئۆزۈمنى زادىلا تۇتالمىدىم. چۈنكى مەنمۇ سىزدىن ئايرىلىپ قېلىشتىن قورقىمەن،-ئۇ مۈرەمگە بېشىنى قويدى،-ماڭا سىزنى خۇدايىم ئۇچراشتۇرغان.

-مەنمۇ ساڭا بۇ ئىشلارنى ھامان دەيتىم. بۇمۇ بولغىنى،-دىدىم ئۇنىڭ چاچلىرىنى سىلاپ تۇرۇپ،- ئۆز كۆزۈڭ بىلەن كۆرۈپ سەنمۇ خاتىرجەم بولغانسەن ئەمدى...

- مەن بۇرۇندىنلا سىزدىن خاتىرجەم ئىدىم. ئەمما سىزنى مېنى بەك ياخشى كۆرمىسىمۇ ئۆزىنى زورلاپ يۈرەمدىغاندۇ دەپلا ئويلايتىم. ئەمدى چۈشەندىم ئۇنداق ئەمەسكەن. بولۇپمۇ ئاخىرقى سۆزىڭىز مېنى بەكلا خۇش قىلدى.

-قايسى سۆزۈم،-دىدىم چاقچاق قىلىپ،- لەڭمەننىڭ پۇلىنى تۆلىۋەتتىم دىگەن سۆزۈممۇ؟

-ياق،-دىدى ئايالىم تېلىقىپ كۈلۈپ كېتىپ،-  قەيەردە ئۆز ئارا ھۆرمەتلەش بولىدىكەن شۇ يەردە مۇھەببەتمۇ بولار دىگەن سۆزىڭىز. زادى كىتاپنى كۆپ ئوقۇغان كىشى گەپنىمۇ نوچى قىلىدىكەن.

- ھە راست. بۈگۈن قايسى كىتاپنى ئوقۇپ بېرەي،-دىدىم ئۇنىڭ ئەزەلدىن مېنىڭ ئوقۇغان كىتاۋىمنى ئاڭلاشقا ئامراق ئىدى.

-ئەمدى بالىلار ھېكايلىرىنى ئوقۇپ بېرىڭ،-دىدى ئۇ كۈلۈپ تۇرۇپ،- ئۇمۇ ئاڭلىسۇن. ئاڭلاپ سىزگە ئوخشاش كىتاپخۇمار ئادەم بولسۇن.

-نىمە ... سىز ئېغىر ئاياق بولدىڭىزما؟

-ھەئە، دوختۇرلار 48 كۈنلۈك بوپتۇ دەيدۇ،- ئۇ قورسىقىنى بوشقىنە سىلاپ قويدى.

-ساڭا مۇبارەك بولسۇن خوتۇن دىدىم ئۇنىڭ پىشانىسىگە سۆيۈپ مېنى دادا بولۇش شەرىپىگە ئىرىشتۈرىدىغان بولدۇڭ،-دىدىم. ئەمدى ئۆيىمىزدە يەنە بىر كىتاپ خالىتسى كۆپىيىدىغان بولدى-دە.- ئۇ مېنى قۇچاقلىۋالدى.

مەن ‹‹ چىن تۆمۈر باتۇر›› ھېكايسىنى باشلىدىم.

بۇرۇنقى زاماندا ....

  دوستلىرىم ئەپۇ قىلساڭلار . دۇكاندا ئولتۇرۇپ يازغاندىم بۇ تىمىنى. ھاۋا سوغۇق سەل توڭلاپ كېتىپ تۈزىتىشكە ئالدىراپ قالدىم.

چېچەك

   ئ‍ەسىرىڭىزنىڭ  بىرىنچى ئ‍وقۇرمىنى بولغانلىقىمدىن خوشالمەن .
ھېكاينىڭ  تىلى يېنىك  ، جۈملىلىرى يېقىشلىق   ،  تەسۋىرلەر  چۈشنىشلىك  باشلىنىشدىن ئ‍ۆتكۈر قەلەم ئ‍ىگىسنىڭ ئ‍ىزنالىرنى كۆرگەندەك بولدۇم    ،   گەرچە  تۇقۇلما  بولسىمۇ  راستەكلا  تۇيغۇ  بېردىكەن  ،   ئ‍ايالنىڭ  ئ‍اخىردىكى   سۆزلىردىن تەسرلەندىم  .
لىكىن  دەسلەپتە ئ‍وقۇغاندا  كاللامدا     ياندىكى  ئ‍ايرىمخانىدا  ھەممە  گەپلەرنى ئ‍اڭلاپ  تۇرغان ئ‍ايال  قانداقسىگە  ئ‍ېردىن ئ‍اۋۋال كىلىپ  تاماق پۇشۇرۇپ  بۇلدۇ دىگەن سۇئ‍ال پەيدا بولغان   ،   قايتا   ئ‍وقۇپ   بۇ دىگەن  تۇقۇلما ئ‍اساس  ئ‍ورۇندا تۇردىغان ھىكايىغۇ  دەپ  بۇ  سۇئالغا  جاۋاپ  تاپتىم  .   ئ‍ەمما    يەنمۇ تۇرمۇشقا يېقىن  قىلىپ داۋاملاشتۇرشىڭىزنى ئ‍ۈمۈد قىلمەن .
  داۋامىغا  قىزىقۋاتمەن ، بەك  ساقلىتۋەتمەسسىز ،
ئ‍ىزچىللىق يار بولسۇن  ...   

ئۆزخان

چېچەك يوللىغان ۋاقتى  2016-1-17 12:17
ئ‍ەسىرىڭىزنىڭ  بىرىنچى ئ‍وقۇرمىنى بولغانلىقىمدىن خو ...

سىز تىمىنى ئەستايىدىل ئوقۇپسىز. مەن ئەسلىدە پەقەت ئىككى ئېغىز دىئالوگ ئارقىلىقلا سىز ئويلىغان شۇ مەسلىنى تولۇق ھەل قىلالايتىم . ئەمما ئوقۇرمەنلەرگىمۇ سەل بوشلۇق قالدۇرۇپ قويدۇم. ئۇنىڭ ئۈستىگە چىن يۈرىكىدىن قىلاي دىسە قىلغىلى بولمايدىغان نىمە ئىش بار. ھەم بۇ يەردە ‹‹ مەن ›› ئايالىنىڭ تولىمۇ چىۋەر ئايال ئىكەنلىكى ئايان بولغىدەكمۇ قىلىدۇ.

چېچەك

ئۆزخان يوللىغان ۋاقتى  2016-1-17 12:22
سىز تىمىنى ئەستايىدىل ئوقۇپسىز. مەن ئەسلىدە پەقەت ئىك ...

ئ‍ەرنىڭ   ئ‍اخىرقى   سۆزلىرى   دىمەكچى  ئ‍ىدىم  ئ‍ايالنىڭ  دەپ  كىتىپتىمەن .
ئ‍ىشقىلىپ  ھىكايىڭىزغا   قىزىقىتىم  داۋامنى  كۈتمەن .

ئاتىكەم

جاھاندا  مۇشۇنداق  ئەرلەرنىڭ بەكمۇ كۆپ بولۇشىنى ئۈمۈت قىلىمەن  .
نىمىشقىدۇر  ماڭا ئەرلەر  ۋىجدانسىزدەك  ، ھەمىشە بەز ماراپ يۈرۈيدىغاندەك تۇيۇلىدۇ  ، بەزىدە يولدۇشۇمدىن گۇمان قىلىپ  تىلىفۇنىنى  ،  مۇڭداشقۇسىنى ، ئۈندىدارىنى ئاختۇرۇپ كىتىمەن  ....
بىرنەرسىنى ئىزلەيمەنۇ لىكىن ھىچنەرسىنىڭ بولماسلىقىنى ئۈمۈت قىلىمەن .
قارىغاندا  تالاغا قاراپ قالغان ئەرلەر توغرسىدا بەك كۆپ بەرسىلەرنى ئوقۇپ  كەتكەن  بولسام زىيادە سىزىمچانلىقىم ئىشىپ كەتتىمىكى  .
ئەسىرىڭىزنى بەك ياقتۇرۇپ ئوقۇدۇم ، ئەسەرنىڭ ئىچىگە كىرىپلا كىتىپتىمەن .
ئىجادىيىتىڭىزگە  ئۇتۇق ، بەرىكەتلەر تىلەيمەن !

ئاي بەرگى

بەلكىم مۇشۇنداق ئەرمۇ باردۇ..
لېكىن كۆڭلىدە باشقا بىرسىنى ئويلاپ يۈرۈپ ئۆيدىكى بىلەن تالاي مەجبۇرىيەت ،مەسئۇلىيەت يۈزىسىدىن ئۆي تۇتىۋاتقانلارمۇ يوق ئەمەس.نىكاھنىڭ مېھىر ئىسسىق ،ھەممەيلەنگە ئاسانلىق بولسۇن

ئۆزخان

مەن ئايالىمنىڭ قورسىقىنى تىڭشاپ باقتىم.
-ئوھوي . شۇنداقمۇ،-دىدىم ئاندىن ئۇنىڭ قورسىقىغا ئاغزىمنى يېقىن ئەكەلدىم،-
-نىمە قىلىۋاتىسىز،-دىدى ئۇ يېقىملىق كۈلۈپ،-يەنە تۆت ئايدىن كىيىن ئاندىن تېپىدىغان بولىدۇ.
-يەنە تۆت ئاي، دىمەك يەنە 120 كۈن ساقلايدىكەنمەن-دە.
-بولدى قىلىڭە، تېخى بۇنىڭدىن كىيىن ‹‹ نىمانداق يىغلىتىۋىرىسەن، قۇلاق مېڭەمنى يەپ؟›› دەپ توۋلايدىغان چاغلارمۇ كېلىدۇ،-دىدى ئايالىم. مېنىڭ ئاچىققلاپ گەپ قىلغان ھالىتمنى دوراپ.
-ھەي خوتۇن سەن ئۆزنىڭ چېچىكىدىن بىزار بولغان دەرەخنى كۆرۈپ باققانمۇ؟ ياكى سۈيىدىن بىزار بولغان بۇلاقنى كۆرۈپ باققانمۇ؟ ياكى ھەر كۈنى ئۈچ ۋاق تاماق يىيىشتىن زىرىككەن كىشىنى كۆرۈپ باققانمۇ؟-دىدىم بىر مۇنچە قائىدە سۆزلەپ.
-سىز ئۇنى تاماققا ئوخشىتىۋاتامسىز؟-دىدى ئايالىم ھەيران بولغاندەك كۆزلىرىمنىڭ ئىچىگە قاراپ.
- ياق ئۇنداق ئەمەس، ساڭا دىسەم بىر ئاقىل‹‹ ئائىلە ئەرلەرنىڭ بارلىقى، ئاياللارنىڭ ھەممە نىمىسى ›› دىگەن ئىكەن. لىكىن مەن دەيمەن. سىلەر ئىككڭلار مېنىڭ بارلىقىم. سىلەردىن بىزار بولسام مەن بىر ساراڭ بولمايمەنمۇ؟-دىدىم.
ئايالىم كۈلۈپ كەتتى.
-سىز ماڭا قايسى كىتاپنى يادلاپ بېرىۋاتىسىز؟
-ئەلۋەتتە يۈرىكىمدىن چىقىرىپ دەۋادتىمەن-دە. ماڭا سىلەر بولساڭلارلا مەن ھەممىدىن كېچىشكە رازى،-ئايالىم مۈرەمگە بېشىنى قويدى.
-سىزنىڭ ياخشى كۆرىشىڭىزمۇ باشىقىچى-دە.
ئاينۇر خۇددى ئۆزى دىگەندەكلا بولدى قىلمىغاندى. تىلفۇنۇم توختىماستىن سايرايتى. قىسقا ئۇچۇرلا ئۈزۈلمەي كېلىپ تۇراتتى. مەن ئۇنى بەخىتلىق تۇرمۇشۇمدىكى بىر ئۆسمە دەپ ئاتىدىم. ئۇ ئاشۇ تەلىۋىلەرچە ھەركىتى بىلەن مېنى سەل ئەنسىرىتىپ قويدى. ئاخىرى ئامال بولماي كارتىنى ئالماشتۇرۋەتتىم.  
بىر كۈنى خىيالى مېڭىپ ئىشقا كېتىۋاتسام ئۇ تۇيۇقسىزلا ئالدىمدا پەيدا بولدى.
-ياخشى تۇردۇڭمۇ؟-مەن بىلەن ياندىشىپ ماڭغاچ.
-كۆزۈڭدە مەسىلە بولمىسا ئويلىغىنىڭدىنمۇ ياخشى تۇرغانلىقىمنى كۆرگەن بولاتتىڭ،-دىدىم ئۇنىڭغا قاراپمۇ قويماي.
-ئەتتىگەندە ئىشقا ماڭغان ئوخشىمامسەن؟-ئۇنىڭ كۆزى مەندىن زادىلا ئۈزۈلمەيتى.
-نەگە مېڭىشىمنى سورايدىغان سەن بىر ساقچىممىدىڭ؟
-كۈندە بىر خىل ياشاپ زىرىكمىدىڭمۇ؟
-ماڭا قارا،-دىدىم تۇتۇقسىزلا توختاپ ئۇنىڭغا مىختەك قادىلىپ،- ماۋۇ چوڭ يول، بىللە ماڭغىنىمىزنى تونۇشلار كۆرسە ياخشى بولمايدۇ. يولۇڭغا ماڭ، مېنى ئارامىممغا قوي.
-بۇ يول سېنىڭمىدى،-دىدى ئۇ چىرايىنى ئۆزگەرتمەستىن،- يول دىگەن خەلىقنىڭ.
-ئۇنداقتا مەن توختاپ تۇراي، سەن خەلىقنىڭ يولىدا كەڭرى مېڭىۋالغىن.
-مەن پەقەت...
-ئادەمنى تولا بىزار قىلما ئۇختۇڭمۇ. مەن ئاشۇ يارىماس ئەلى شۇ ، ھېچيېرىم ئۆزگىرىپ قالغىنى يوق. چۈشەندىڭمۇ مەندىن نېرى تۇر.،-مەن غەزەپ بىلەن ئۇنىڭ گېپىنى سىلكىدىم. ئاندىن تىز-تىز مېڭىپ ئۇنىڭدىن ئۇزاپ كەتتىم. ئەمما بىلمەپتىمەن. بۇ تېخى ئىشنىڭ باشلىنىشى ئىكەن.
ئىشخانىغا كىرىسەم ئۈستىلىمدە بىر پارچە خەت تۇرۇپتۇ. كونۋىرىت ئۈستدە ھېچقانداق ئىسىم ياكى ئادىرىس يوق ئىدى. خەت پەقەت بىرلا جۈملە ئىدى.
‹‹ ئەلى ھەر نىمە قىلساڭمۇ سەندىن ۋاز كەچمەيمەن››
كاللامدىن تۈتۈن چىقىپ كەتتى. لاسسىدە بولۇپ قالدىم. مەن ئۇنىڭدىن زادىلا ئەنسىرىمەيمەن. ئەمما جەمئىيەتتە سۆز-چۆچەك بولۇپ قېلىشتىنلا قورقۇۋاتاتتىم. مېنىڭ ئايالىم تىرناقتا توختايدىغان گۈزەللەردىن ئەمەس. ئەمما ئۇنىڭ ھەربىر ئېغىز سۆزلىرىدىن ۋە ھەر بىر ھەركىتىدىن مىھىر -مۇھەببەت تۆكۈلۈپ تۇرىدۇ. پات ئارىدا دۇنياغا كۆز ئېچىش ئالدىدا تۇرغان پەرزەنتىم. بار. بۇلار مېنىڭ بۇ سۆيۈملۈك ئائىلىنى بۇزماسلىقىمغا تولۇق سەۋەپ بولاتتى. مەن ئايالىمغا تېخىمۇ ياخشى ياخشى مۇئامىلە قىلشقا باشلىدىم. مەن ئۇنىڭ چىرايىغا قاراپ ئۇزۇندىن-ئۇزۇن خىيال سۈرەتتىم.
-تولىمۇ بىئارام بولىۋاتقانلىقڭىزنى سىزىپ تۇرىۋاتىمەن . كۆڭلىڭىزگە كەلگەن بىرەر ئىش بولسا ماڭا دىسىڭىز بەلكىم سىزگە ياردىمىم تېگىپ قېلىشى مۆمكىن،-دىدى ئايالىم بىر كۈنى كەچتە كۆزلىرىمگە تىكىلىپ تۇرۇپ،
-ياق . ھېچ ئىش يوق. شۇ يېقىندىن بىر ئىدارىدىكى ئىشلار سەل ئالدىراش بولۇپ قالدى. شۇنىڭغا سەل كەيپىم ياخشى ئەمەس،-دىدىم چۈشەندۈرۈپ،-سەن ئەنسىرىمىگىن.
مەن خىيالىمچە بولغاندا ئاينۇردىن كۈچۈمنىڭ يېتىشىچە قېچىۋاتاتتىم. ئۇنىڭدىن يىرگىنىۋاتاتتىم. ئەمما ئۇ بولسا زادىلا توختىمىدى. تىلفۇن نۇمۇرۇمنى قەيەردىن تاپتىكىن. يەنە تىلفۇن قىلغىلى تۇردى. مەن ئاخىرى تىلفۇن تۇتماس بولدۇم. ئەمما ئۇ خۇددى مېنى دائىملا پايلاپ يۈرگەندەك قىلاتتى. مەن قايسى دوقمۇشتا، قايسى كوچىدا قايسى خىلۋەتتە ئۇنىڭغا ئۇچراپ قالىدىغانلىقىمنىلا ئويلايتىم. مەن ۋە ئۇ توغرىلىق سۆز-چۆچەكلەر پەيدا بولۇپ قالغاندى. مەن چارچاشقا باشلىدىم. كۆز ئالدىمدا بىر خىل قارا تۇمان لەيلەپ تۇراتتى.
-ئاغىنە، ئەھۋالىڭ قانداقراق؟-دىدى خېلى يېقىن ئۆتىدىغان بىر ئاغىنەم بىر كۈنى چاقچاق قىلىپ،-ئاياغقا كالتە چەم قويۇشنى ئويلاۋاتامسەن؟
- بۇ نىمە دىگىنىڭ؟-دىدىم ئۇنىڭ گېپنى دەماللىققا چۈشىنەلمەي،
-تولا خۇپسەنلىك قىلما،-دىدى ئۇ مۈرەمگە ئۇرۇپ قويۇپ،- ئاينۇر بىلەن يارىشىپ قالماقچىمۇ سەن؟
-كىم دەيدۇ؟- مەن قاتتىق چۆچۈپ كەتتىم،- بۇ گەپنى نەدىن تاپتىڭ ئەمدى؟
-قارا بۇنى،-دىدى ئۇ ئەتراپىمنى بىر ئايلىنىپ،- قارىغاندا راست گەپنى دەپ سالغان ئوخشىمامدىم. نىمانداق چۆچۈپ كېتىسەن؟
-پوق يەپسەن،-دىدىم چىچاڭشىپ،-مېنىڭ ئاغىنەم بولساڭ ئەمدى بۇنداق گەپنى قىلغۇچى بولما ئۇختۇڭمۇ؟
-شۇنى دەيمەن،- دىدى ئۇ ئاۋازىنى ئۇرغۇلۇق چىقىرىپ،- بىر چىرايلىق ئايالىڭ، ئۇنىڭ قورسىقىدا ئوغلۇڭ تۇرسا، ئاجرىشىپ كەتسەڭ تازىمۇ يارىماسلىق بولىدۇ-دە. خوش ئاغىنە ئالدىرايتىم. ماڭغاچ تۇراي ئەمسە.
راستىمنى دىسەم ئۇ ئىچىمگە بىر ئوتنى سېلىۋىتىپ خاتىرجەم كېتىپ قالدى. مەن ئۇنىڭدىنمۇ بىزار بولدۇم. ئۇ يېغىرىمنى تاتلىغاچقا بىزار بولدۇممۇ ياكى راست گەپنى دەپ قويغىنى ئۈچۈنمۇ بۇنى بىلمەيتىم. توۋا دەپ قالدىم ئۆزۈمچە. شۇ ھامان كۆز ئالدىمغا ئايالىم كەلدى. شۇ ئۆيۈمدە لەڭمەن پىشىۋاتاتتى. ئايالىم ئىشىككە تەلمۈرۈپ ئولتۇراتتى. ئۇ مېنى ياخشى كۆرەتتى. يېقىندىلا سېتىۋالغان تىلفۇنۇم تىلفۇنۇم يەنە سايراشقا باشلىدى. مەن قارىمىساممۇ بىلىمەن. بۇ يەنىلا ئاينۇر. ئۆزى چىرايلىق ئەمما مېنى بىردەم ئوتقا ، بىردەم سۇغا سالالايدىغان ئاشۇ ئاينۇر.
مەن ئەمدى زادىلا تىلفۇن قىسماسلىق قارارىغا كەلدىم. يېنىمدىكى تىلفۇننى ئېلىپ يىراقلارغا چۆرۈدۈم.
  مەن ئاينۇرنىڭ سۈرەتلىرىنى كۆيدۈرۈپ تۈگەتتىم. ئۇنىڭ قولى تەگكەن ئائىلە سايمانلىرىنىڭ ئالماشتۇرۇشقا بولىدىغانلىرىنىڭ ھەممىسىن ئالماشتۇرۋەتتىم. ئۇنى ئويلىماسلىققا ئۇنىڭ بىلەن ئۆتكەن كۈنلەرنى ئەسلىمەسلىككە تىرىشتىم. ئەمما بىلىپ تۇرىۋاتىمەنكى مېنىڭ ئىرادەم ئاستا-ئاستا يىمىرىلىشكە باشلىغاندى.
-مەن سەندىن خۇش بولاي، مېنى قويىۋەتكىن ،-ددىم بىر كۈنى ئۇنىڭ بىلەن كۆرۈشۈپ.
-قارا بۇ ھالىتڭگە، سەن مېنى جان ئالغۇچى ئەزرائىل چاغلاۋاتامسەن نىمە؟- دىدى ئۇ كۈلۈپ كېتىپ،- مەندىن شۇنچىلىك بىزارمۇ سەن؟
-ياق مەن ساڭا ئامراق. خۇش بولاي . مەندىن يىراق تۇرغىن . ئايالىم بىلەن ئۆيۈمنى تۇتاي،-مەن يىغلىغۇدەك بولۇپ كەتتىم.
-سېنىڭ بۇ ھالىتىڭ بەك ئوماق جۇمۇ،-دىدى ئاينۇر قاشلىرىنى ئېتىپ تۇرۇپ، ئۆزۈڭنى نىمانچە قىينايسەن، رىئاللىقنى قۇبۇل قىلىش سەن ئۈچۈن شۈنچە تەسمۇ؟
-قايسى رىئاللىقىنى،- دىدىم كۆزلىرىمنى چەكچەيتىپ تۇرۇپ،- سەن بىلمەمسەن ، مېنىڭ ئايالىم بار. ئۇنىڭ قورىسقىدا مېنىڭ بالام بار. ئۇلارغا ئىچىڭ ئاغرىسۇن.
- ساڭا دىسەم ئەلى. يېقىندا بىر كىنو كۆردۈم. ئۇ كىنودىكى مۇنداق بىر جۈملە سۆز ماڭا ياقتى.
-قايسى گەپ؟
- ئۇرۇش ۋە مۇھەببەتتە ئادىلسىزلىق دىگەن نەرسە مەۋجۇت ئەمەس.
-راست ياخشى گەپكەن،-ددىم مەن. بۇ گەپنى ھۆسنىخەتچىلەپ يازدۇرۇپ ياستۇقۇڭنىڭ بېشىغا قويىۋالغىن ئەمما مەندىن يىراق تۇر.
-لىكىن مېنىڭ ساڭا تېخىمۇ يېقىن تۇرغۇم بار ئىدى،- ئۇ شۇنداق دەپلا ئېتلىپ كېلىپ مېنى چىڭ قۇچاقلىدى. مەن ئۇنى ئىتتىرىۋىتىشكە شۇنچىلىك تىرىشقان بولساممۇ ئەمما پۇت-قوللىرىم خۇددى سىزىمىنى يوقاتقاندەك قېتىپ قالغاندى. ئاسماندا ئېسىلىپ تۇرغان قوياش بۇلۇت كەينىگە مۈكتى. قۇشلار سايراشتىن توختىدى. شاماللارمۇ جايىدا قېتىپ قالدى.
  مۇشۇ كۈنلەردە خۇددى ‹‹ ئوغىرى گۇمانخور ، جالاپ خۇدۇكچى ›› دىگەندەك. ھەممە نەرسىدىن ئۈركۈيدىغان. ھېچنىمىدىن ھېچنىمە يوقلا خۇدۇكسىرەيدىغان بولۇپ قالغاندىم. بىرەر تونۇش-بىلىش بىلەن ئۇچرىشىپ قالساممۇ ئۇلار خۇددى ھەممە ئىشىمنى بىلىۋالىدىغاندەكلا ئويلايتىم. ئايالىمنىڭ بۇ ئىشلارنى بىلىپ قېلىشىدىن ئەنسىرەيتىم. ھەمدە ئۇنىڭ ماڭا بولغان پوزىتىسىيىسىدە قانداق ئۆزگىرىشلەر بولىۋاتىدىكىن دەپ ئۇنى يوشۇرۇنچە كۆزىتىدىغان بولدۇم.
-بۇنداق قىلمىساق بولاتتى،-دىدىم بىر كۈنى ئاينۇرغا،- ھامان بىر كۈنى سىرىمىز كىشىلەر ئالدىدا پاش بولۇپ قالىدۇ. بىز كۈلكىگە قالىمىز.
-سەن ئەسلىدە ئايالىم بىلىپ قالىدۇ، دىسەڭ توغرا بولاتتى،-دىدى ئاينۇر،-دىمەك پەرىزىم توغرا ئىكەن. سەن ئۇنى ياخشى كۆرمەيسەن، پەقەت مەسئۇلىيەت تۈپەيلىدىنلا ئۇنىڭغا كۆيۇنىۋاتىسەن توغرىمۇ؟
-خاتا،-دىدىم مەن ،-بۇندىن كىيىن يەنە ئايالىم توغرىسىدا بىر دىگۈچى بولساڭ مەندىن رەنجىمە.
-كەچۈرگىن. ئەمدى دىھقەت قىلاي،- دىدى ئۇ،- كېلە سېنى سېغىنىپ ئۆلەي دىدىم.
مەن ئەسلىمىگە چۆكتۈم. ئاجرىشىپ ئۇزۇن ئۆتمەي پۇشايمان قىلغاندىم. مەن ئاينۇرغا يالۋۇردۇم. يېلىندىم. تىلفۇن قىلدىم. قىسقا ئۇچۇرلارنى يازدىم. ئەمما ئۇ رەت قىلغاندى. مېنىڭ شۇ چاغدىكى ھالىتىم دەل ئۇنىڭ ھازىرقى ھالىتىگە ئوخشاش بولغاندى. ھەممە ياق تىمتاس ، ئاي تولغان بىر ئاخشامدا مەن ئۇنىڭ مەھەللىسىگە بارغاندىم. مەن ئۇنىڭ دىرىزىسى تۈۋىدە تۇرۇپ مۇشۇنىڭغا ئوخشاش گەپلەرنى باشقا بىرىگە دەۋاتقانلىقىنى ئۆز قۇلىقىم بىلەن ئاڭلىغاندىم. بۇ گەپ ھازىر مېنىڭ مېنىڭ قۇلاق تۈۋىمدە ياڭراۋاتاتتى.
-نىمە بولدۇڭ؟-دىدى ئۇ چاچلىرىمنى سىلاپ تۇرۇپ، خۇددى ھەيكەلدەك قېتىپ قالدىڭغۇ؟
-سەن ھەممە ئەرلەرگە مۇشۇنداق دەمسەن؟
-بۇ نىمە دىگىنىڭ يەنە كىمگە شۇنداق دەپتىمەن،- ئۇ بىردىنلا جىددىيلەشتى.
-بولدى قىل. سەن بەكلا قورقۇنۇچلۇق ئىكەنسەن.
-نىمە بولدى،-دىدى ئۇ يۈزلىرىمنى سىلاپ،-شۇنداق ياخشى كېتىپ بارىمىزغۇ؟
-ياخشى كېتپ بارامدۇق. بۇنىچۇ، ئۇيغۇر تىلىدا بۇزۇقچىلىق قىلىش دەيدۇ.
- ئۇنداق دىمىسەڭچۇ؟-دىدى ئاينۇر يىغلىغىدەك بولۇپ،- بىز ئۆز-ئارا ياخشى كۆرىشىمىز. ھامان بىر كۈنى ....،-ئۇ سۆزنى توختىتىۋالدى.
- يارىشىمىز دىمەكچىمۇ؟- دىدىم ئۇنى ئىتتىرىپ تۇرۇپ،- ئەمدى ئۇنداق خام خىيال قىلما. بۇنداق بولىشى مۆمكىن ئەمەس.
-بولدى. خاپا بولما،-دىدى ئاينۇر. ماقۇل ئۇنداق گەپ قىلماي بىز پەقەت پات-پاتلا كۆرۈشۈپ تۇرايلى . مەن سەندىن باشقىنى تەلەپ قىلمايمەن. بولامدۇ؟- ئۇنىڭ قوي كۆزلىرىدىن ئىككى تامچە ياش سىرغىپ چۈشتى.
- بولىدۇ ،-دىدىم. ئەمسە خوشلىشايلى. كەچ كىرىپ قالدى. ئۆيگە قايىتمىسام بولمايدۇ.
مەن قايتىپ كەلدىم. ئارقامغا قاراپمۇ قويمىدىم. ئىچىمدە بىر خىل غالىپلىق يەنە پۇشايمانلىق تۇيغۇلىرى ئارلىشىپ كەتكەندى.

ئاتىكەم

ئۇ ئىككىسى قەيەرلەردە يالغۇز ئۇچرۇشۇپ قالغاندۇ  ؟  مىنىڭچە ئەسلى بىرىنىڭ  مۇشۇنداق نىيىتى بولمىسا ، شۇ يالغۇز ئۇچرۇشۇشتىن ئىھتىيات قىلسا  ھەممە ئىش ياخشى بولاتتى . بىر ئەر بىلەن بىر ئايال يالغۇز ئۇچراشسا  ئەلۋەتتە  ھەر ئىش بولماي قالمايدۇ .
قارىغاندا  ئاينۇر  قورسىقىغا بىرنى ئۈندۈرۈۋىلىپلا  قىلىدىغىنىنى قىلىدىغان ئوخشايدۇ  .
ھەي ، ئەلى ئازمىسا بولاتتى ، ئايال كىشى دىگەنغۇ بىر شەيتان ، بىر ئىزىتقۇ  . ئاڭىسام ئايال كىشى بوسوغا ئاتلاپ سىرىتقا چىقسا شەيتانمۇ بىللە چىقىدىكەن .
ئەسىرىڭىز بەك ياخشى داۋاملىشىۋاتىدۇ  ،  داۋامىنى كۈتىمەن .

ئۆزخان

مېنىڭ جەمئىيەت مۇشۇنداق بۇزۇلدى دىگۈم يوق. باشقىلارنى بىلمەيمەن. ئەمما مەن بۇزۇلغان ئىدىم. باشتا بۇ ئىشلارنى خەق بىلىپ قالسا قانداق قىلارمەن دەپ ئويلىغان بولساممۇ ئاخىرىدا ‹‹ خەق بىلەن نىمە كارىم›› دىدىم. ئارقىدىن‹‹ بۇنداق قىلىۋاتقان دۇنيا بويىچە پەقەت مەنلىمىدىم››دىدىم. ئىشقىلىپ ھەر قانچە يامان ئىش قىلغان ئادەملەرنىڭمۇ ئۆزىنى ئاقلايدىغان بىر قاتار سەۋەپلىرى بولغىنىدەك مېنىڭمۇ شۇنداق سەۋەپلىرىم ئۆزۈمگە يوللۇق تۇيۇلدى.
-سەندىن تۇنجى قېتىم نۇمۇس قىلىۋاتىمەن،-دىدى ئانام بىر كۈنى مەن بىلەن يالغۇز پاراڭلىشىپ،- سەن مېنىڭ ئاقكۆڭۈل ئوغلۇم ئەلى شۇمۇ؟
-ئانا مەن...،-دىدىم كېچكەچلەپ،
-بولدى گەپ قىلما، ھەممە ئىشلىرىڭنى بىلدىم. سېنى بۇنچىلىك دەرىجىدە كۆڭلى قارا دەپ زادىلا ئويلىمغاندىم،-دىدى ئانام چوڭقۇر ئۇھ تارتىپ،- سەن ئۇنىڭ بىر يىل بۇرۇن سېنى نى سەۋدالارغا سالغىنىنى شۇنچە تىزلا ئۇنتۇپ قالدىڭمۇ؟
-ياق ئانا، مەن ھېچنەرسىنى ئۇنتۇپ قالمىدىم. ئەمما...
-نىمە ئەمما ، ئەل—جامائەتتىن نۇمۇس قىلمىساڭ ئۇنىڭغا مەيلى ئەمما مەريەمنىڭ قورىسىقىدىكى ئۆز پۇشتۇڭنى بولسىمۇ ئويلاپ قويساڭ بولمامدۇ؟،-مەن ئۈندىمىدىم. ئانام توختىماي سۆزلەيتى.
- ماڭا قارا، چوڭلار دەيدۇ. ‹‹ ئايال قىلسا ئەرگە، ئەر قىلسا بالىغا ›› دەپ. ئەڭ ياخشىسى بۇ يولۇڭدىن يانغىن.
-ئانا بىراق،- نىمە ئەمما، نىمە بىراق›-دىدى ئانام بىردىنلا غەزەپلىنىپ،- ئاڭلاپ تۇر . بىلگەن ئالىم ئەمەس، بىلگىنىگە ئەمەل قىلغان ئالىم. زادى بولمىسا شۇنچە يىللاردىن بىرى يىغقان كىتاپلىرىڭغا بىر تال سەرەڭگە بىلەن ئوت قويىۋىتىپ ئاندىن نىمە قىلساڭ قىل، سەن بىلىملىك ئىبلىس بولغاندىكىن،- ئانام كۆز ياشلىرىنى ياغلىقىنىڭ ئۇچىدا سۈرىتكىنىچە چىقىپ كەتتى.
مەن پۇشايمان قىلىشقا باشلىغاندىم. ماڭا نىمە كەم، تۇرمۇشۇمنى قايتىدىن باشلىۋالدىم. خىزمىتىم جايىدا، ئاينۇرمۇ ئاخىرى پۇشايمان قاچىسىنى كۆتۈرۈپ ئالدىمغا كەلدى. بىر يىل ئىلگىرى سۇنغان ئەرلىك غۇرۇرۇم ئەسلىگە كەلدى. ئەمدى مۇشۇ يەردە توختاپ قالسام بولامدۇ قانداق؟
ئەمما ئايالىمنىڭ كۆزۈمگە ئۇدۇل قارىيالماي كۆزلىرىنى مەندىن قاچۇرۈشلىرى خىياللىرىمنى تېخىمۇ قالايمىقان قىلىۋەتتى.
-چۈشۈپ كېتىدىغان ئوخشايدۇ،-دىدى ئۇ مىشىلداپ تۇرۇپ،
-نىمە چۈشۈپ كېتىدۇ؟-نىمىشقىمۇ بۇ سۇئالنى سورغانلىقىمنى ئۆزۈممۇ بىلمەيتىم. ئەمەلىيەتتە ئايالىمنىڭ نىمە دىمەكچى بولغانلىقنى بىلمەيدىغان دەرىجىدە كالۋا ئەمەسمەن. ئەمما مۇشۇ بىر ئېغىز گېپىم بىلەن ئۇنىڭ سەۋىر-قاچىسىنى توشقۇزىۋىتىشىمنى زادىلا ئويلىمغاندىم.
-مېنى بۇنچە ئۆگەيلىمەڭ، دىدى ئۇ چىڭمۇ ئەمەس، بوشمۇ بىر ئاڭاڭدا،
مەن نىمە دىيشىمنى زادىلا بىلمەي يەرگە قاراپ چوڭقۇر ئۇھ تارىتتىم. ئۇنىڭغا ھەرگىزمۇ سېنى قانداق قىلىپتىمەن دىيەلمەيتىم.
ئايالىمنى مېنىڭ ئشلىرىمنى بىلمەيدۇ دىگەن گۇماننى ئاللىقاچان كاللامدىن چىقىرىۋەتكەندىم. ئۇ گۈزەللەر قاتارىدا سانالمىسىمۇ ھەرگىزمۇ دۆت ئەمەس ئىدى. ئەمما ئۇنىڭ نىمشقا ھازىرغىچە سەۋىر قىلغىنى مەن ئۈچۈن بىر سىر، ئۇ ئانچە كۆپ ئوقۇغان ئايال ئەمەس، سەۋىيسى ئاران تولۇقسىز. لىكىن نىمىشقىدۇر كۆز قاراش جەھەتتە مېنى سەل تەمتىرىتىپ قوياتتى. قارىغاندا ئۇ ھازىرقى ۋاقىتتا ۋاراڭ-چۇرۇڭ قىلىپ جېدەل چىقارسا مەندىن راستىنلا ئايرىلىپ قالىدىغانلىقىنى بىلىۋالغانمىدۇ؟ بۇ ئىشتا زادى بىر گەپ بار.
  ئون كۈندىن كىيىن راستىنلا ئۇنىڭ بويىدىن ئاجراپ كەتتى. دوختۇرلاردىن ئاڭلىشىمچە ئايالىم ئېغىر بىر نەرسە كۆتۈرگەن ياكى يىقىلىپ چۈشكەن. ئەسلىدە ئۇلۇق ئىگەم ماڭا ئوغۇل پەرزەنىت ئاتا قىلماقچى بولغان ئىكەن. لىكىن... تۇيۇقسىزلا ئانامنىڭ ‹‹ ئەر قىلسا بالىغا›› دىگەن گەپلىرى يادىمغا كەلدى. ۋاي خۇدايىم نىمانچە تىز...
  بىر نەچچە كۈندىن كىيىن ئۇنىڭ قېينىئانامنىڭ ئۆيىگە كېتىشى  ئەندىشىلىرىمنى ئازراق يوق قىلغانمۇ بولدى. ئۇ كۈنى مەن ئۆزۈمچە كونا جاي دەپ ئاتىۋالغان يەردە ئاينۇر بىلەن ئىشقى-مۇھەببەت دەرياسىغا غەرىق بولۇپ ئولتۇرۇپ ئۆيگە يەنە كەچ قايىتقاندىم. ئۆيگە كىرىپ ھەر كۈندىكىگە ئوخشاش ئۆيدىن مىھىرلىك بىر ھېدنى يەنە ئوخشىغان لەغمەننىڭ پۇرىقىنى ئالالمىدىم. ئۇ ماڭا بىر پارچە خەت قالدۇرۇپ قويغاندى.
‹‹ مېنىڭ سىزدىن ھېچقانداق سۇئال سورىغۇم يوق، چۈنكى سۇئال سورىسام قانداق بولىشىدىن قەتئىنەزەر جاۋاپ بېرىسز. سىزدىن بۇندىن بۇرۇنمۇ سۇئال سورىمىغاندىم. بۇنىڭدىن كىيىنمۇ سورىمايمەن. چۈنكى مەن سىزنى ياخشى كۆرىمەن. سىز مېنىڭ قەدرىمگە يەتمىدىڭىز ئەمەس، بەلىكىم سىز بۇنىڭدىن كەڭرەك بىر بوشلۇققا توغرىسىنى دىگەندە ئەركىنلىكككە مۇھتاج. ئۆزۈم ياخشى كۆرگەن ئادىمىم ئۈچۈن شۇنچىلىكمۇ ئىش قىلىپ بېرەلمىسەم قانداقمۇ سىزنى ياخشى كۆرىمەن دىيەلەيمەن. مەن يامانلاپ كەتمىدىم. سىزنى ۋاختىنىچە يالغۇز قويۇشنى قارار قىلدىم. ئەگەر قاچانكى قېشىمغا كەلسىڭىز مەن يەنىلا سىزنىڭ ئادىمىڭىز. ئوغلىمىزنىڭ دۇنياغا كۆز ئاچماي تۇرۇپلا كېتپ قېلىشىغا مەن سەۋەپچى، چۈنكى توكتىن ئوڭلاشقا ئائىت ئىشلاردىن زادىلا خەۋىرىم يوق تۇرۇپ  توك ئوڭشىماسلىقىم كېرەك ئىدى››
بۇ قانداق گەپ؟ توغرا ئېسىمگە كەلدى. ئۇ بىر نەچچە قېتىم ۋىكلىيۇچاتىلىنى ئوڭشاپ بېرىشىمنى ئېيىتقان ئەمما ئالدىراشچىلىقتا ۋاقىت چىقىرالمىغاندىم. كىيىن ئوڭشىلىپ قالغىنىنى كۆرۈپ تىخى ئىنىم ئوڭشاپ قويغان چېغى دەپ يۈرۈپتىمەن. ئەسلىدە ئۇ ئوڭشاپتىكەن. نەچچە كۈن بۇرۇن ئۇنىڭ ئوڭ پۇتىنى ئاياپ مېئىۋاتقىنىنى كۆرۈپمۇ نىمە بولغىنىنى سورمىغاندىم. قارىغاندا ئۇنى توڭ سوقۇۋىتىپ يىقىلىپ چۈشۈپتىكەندە. ۋاي خۇدايىم. ..
  ئارىدىن خېلى ۋاقىت ئۆتكەن بولسىمۇ ئانامنىڭ گەپلىر زادىلا كاللامدىن چىقمىغاندى. ئۇ ‹‹ بىلگەن ئالىم ئەمەس، بىلگىنىگە ئەمەل قىلغان ئالىم›› دىگەندى. يەنە ئالدى بىلەن بۇ كىتاپلىرىڭنى كۆيدۈرىۋەت دىدى . ئۇ مېنى سېنىڭ نەرىڭ كىتاپ ئوقۇغان ئادەمگە ئوخشايدۇ دىمەكچى. ئاخىرىدا يەنە مېنى بىلىملىك ئبلىس دىگەندى. توغرا شەيتانمۇ ھەممىنى بىلەتتى . شۇ بىلىمى بىلەن بارلىق پەرىشتىلەرگە دەرىس بېرەتتى. ئەمما ئۇ ئاخىرىدا ئۆزنىڭ نادانلىقىدىن بارچە يامانلىقنىڭ بايراقدارى بولدى. قارىغاندا ئانام مېنى تىللىماپتۇ. بەلكى يۈرىكىمگە بىر خەنجەر ساپتۇ. بۇ ھەقىقەت خەنجىرى ئىكەن.
ئانام شۇ قېتىم ئۆيۈمدىن چىقىپ كەتكەنچە قايتا كىرمىدى. بىر نەچچە قېتىم سالامغا كىرگەن بولساممۇ ئارقىسىنى قىلىۋېلىپ چىرايىمغا قارىماي قويدى. قارىغاندا مەندىن تولۇق ئۆمىدىنى ئۈزگەن ئوخشايدۇ. ئۇرۇق-تۇققانلىرىممۇ ماڭا يات نەزەردە قارايتى. قارىغاندا ئاينۇر بىلەن بولغان ئىشلارنى ئاخىرلاشتۇردىغان چاغ بولغان ئوخشايدۇ.

ئاتىكەم

يەنىلا بىرىنجى بولۇپ مەن ئوقۇۋاپتىمەن .
سۈرئەت خىلى تىز بولۇۋاتىدۇ  ،  داۋاملىق ھۇررا  ..........