چاقچاق قىلما ئەي ، دۇنيا

abaytarim

	چاقچاق قىلما ! ئەي دۇنيا...     مەن ناھايىتى كۆپ چاقچاقلارنىڭ ئاسىتىدا قالغانىدىم . چاقچاقلار ھېچ ئۈزۈلەي دېمەيتتى . ماڭا دوست بورادەرلىرىم ، ياكى سۆز ئۇستىلىرى ئەمەس ، دۇنيا چاقچاق قىلىۋاتاتتى . دۇنيانىڭ چاقچاقلىرىنى تەرىپلەشكە ھەقىقەتەن تىلىم ، قەلىمىم ئاجىزلىق قىلىدۇ . ماڭا دۇنيانىڭ قىلغان چاقچاقلىرىدىن باشقىلار قىلغان چاقچاقلار پەقەتلا يارىمايتتى . قايسى بىر يىلى شۇنداقلا چاقچاق قىلغاندەكلا بىر يول كۆرسىتىپ قويۇۋېدى ، مەن ئۇ يولدا شۇنداق ئۇزاق مېڭىپتىمەن . ئاخىرى تۇيۇق يولدا شۇنداق ئۇزاق ماڭغىنىمدىن ئۆكۈنۈپ ئەتراپىمغا قارىسام يالغۇز مەنلا بۇ يولدا ماڭماپتىمەن ، ماڭغانلار ناھايىتى كۆپ بولغاچقا دۇنيانىڭ ماڭا قىلغان چاقچىقىدىن سۆيۈنۈپ كۈلۈمسىرىگىنىم قىزىق . شۇنداق مەن يالغۇز ماڭمىساملا ئەگىشىپ مېڭىشقا ناھايىتى ماھىر ئىدىم . دېمەك ماڭا دۇنيا ناھايىتى ئورۇنلۇق چاقچاق قىپتۇ ، ئەمەسمۇ ...    مەن يەنىلا ئۆزۈمنىڭ نىشانىغا ئەمەس ، دۇنيا كۆرسىتىپ بەرگەن نىشاندا كېتىۋاتاتتىم . دۇنيا ماڭا يەنە چاقچاق قىلشقا باشلىدى . سەن مېنىڭ ئارقامدىن مېڭىپ نەگە بارماقچىدىڭ ؟  مەن بۇ سۇئالدىن مەڭدەپ قالدىم .  - ئۆزەڭمۇ بىرەر نىشانىڭغا مېڭىپ سىناپ باقمامسەن؟ سەندىن راستىنلا زېرىكتىم . دەپلا ئۇچقاندەك كېتىپ قالدى . مەن يېگانە قالدىم . چۈنكى باشقىلار ئاللىقاچان نىشانلىغان مەنزىللىرىگە ئاتلىنىپ بولغانىدى . قاياققا مېڭىشىمنى بىلەلمەي بېشىم تازا قېيىپ تۇرغاندا بىر ساراڭ ھېجىيىپ ئالدىمغا كېلىپ ، - سەنمۇ مەندەك بولاي دەپسەندە ، يۈرە مېنىڭ ئارقامدىن ، ھامىنى تاشلىناتتىڭ ...   مەن نەچچە كۈنگىچە خارامۇش يۈردۈم . دۇنيانىڭ مېنى بۇنداقلا تاشلاپ كېتىشىگە چىن پۈتەلمەيۋاتاتتىم . ئۇنىڭ مېنى ئىزدەپ كېلىدىغانلىقىغا ئىشىنەتتىم . چۈنكى ئۇ ماڭا ئەتراپىمدىكى ھېچكىمگە ئىشەنمەي ئۆزىگىلا ئىشىنىپ ياشىشىمنىڭ ، ھاياتلىقىمنىڭ ، مەۋجۇتلۇقىمنىڭ ، ئىنسانلىقىمنىڭ كاپالىتى ئىكەنلىكىنى ھەقدادىغا يەتكۈزۈپ بىلدۈرۈپ بولغان ، ھەتتا ھۈجەيرىلىرىمنىمۇ ئاللىقاچان كونتىرول قىلىپ بولغانىدى ئەمەسمۇ . ئەنە بىرى چاقىرغاندەك قىلىۋاتىدۇ ، نېمە ئاۋاز يوق دەمسەن ؟ بار ، ئۇنى مەن قۇلىقىمدا ئەمەس يەتتىنچى سەزگۈمدىلا بىلىپ بولدۇم ...    مەن يەنىلا شۇنداق بەختىيار . چۈنكى دۇنيا مەن بىلەن بىللە . ئۇ تېخىمۇ يېقىملىق چاقچاقلىرى بىلەن مېنى ئەركىلەتمەكتە . تېخى كەچۈرۈم سورىغىنىچۇ . مەنمۇ ئۇنىڭغا تەشەككۈر ئېيتىپ كەتتىم . ئۇنىڭ مېنى  تاشلىۋەتكىنى مۇنداقلا بىر چاقچىقىمىش . مەندە ئەمدى ئۇنداق چاقچاققا ئۇچراپ قېلىش ۋەھىمىسى پۈتۈنلەي يوقىدى . دۇنيا ماڭا ئۆزىنىڭ مېھرىبانلىقىلىرىنى سۆزلەپ كەتتى . سەندەكتىن نۇرغۇن - نۇرغۇن ئىنسانلارنى ئۆزۈم كۆزلىگەن نىشانغا يەتكۈزگەنمەن . سېنىمۇ يەتكۈزىمەن . ئەجدادلىرىڭنىمۇ يەتكۈزگەنمەن ...     كۈنلىرىم شۇنچىلىك ئاسايىشلىقتا دۇنيا بىلەن بىللە ئۆتمەكتە . دۇنيانىڭ يېقىملىق چاقچاقلىرىنى ئاڭلاپ شۇنچە يىللارنىڭ ئۆتۈپ كەتكىنىنى سەزمەيلا قاپتىمەن . ئۇ ئاللىقاچان مەندىن ئايرىلىپ ئەۋلادلىرىمنى نىشانىغا يەتكۈزۈشكە ئاتلىنىپتۇ ، ئەمەسمۇ . مەن يەنە ئۇنىڭغا ئەگىشىۋالدىم .  ئۇ ماڭا چاقچاق قالدى .  - سەن تۇختاپ قال ، ئەمدى سېنى يېتەكلەش ھاجەتسىز . ئۇنىڭ ئۈستىگە سەندىن ماغدۇر كەتكەن ، دېدى . شۇندىلا ئازراق ماڭغىنىمغا ھاسىراپ ، بېشىم قايغاندەك بولۇپ جايىمدىلا ئولتۇرۇپ قالغانلىقىمنى بىلدىم . دۇنيا ماڭا چاقچاق قىلىپ قويۇپ ئۇچقاندەك ئۆتۈپ كەتتى .  " - ئەمدى ماڭىمەن دەپ ئارتۇقچە ئاۋارە بولما ، سېنى توغرا چۈشىنىمەن . مەن ئۇنىڭغا ، " چاقچاق قىلما ! ئەي دۇنيا "...دىيەلىدىم ، ئارانلا .     مەنبە : ئۆزۈم .  2013 - يىل 1 - 22 -كۈنى . ئەبەي تارىم .   شەھىرى شىخو .

faeza.akef

	ھې ھې ھې،،،،،،   يەتتىنچى سەزگۇم دەپ قۇيۇڭ،،،،،،

غەييۇر

	ھې ھې ھې،،،،،،

mahatjan

	مانا بۇ ئاجايىپ دۇنيا،ھېلى كومىدىيە،ھېلى تىراگىدىيە،مانا مۇشۇنداق كومىدىيە-تىراگىدىيەلەردە رول ئالىدىغانلار يەنە شۇ ئادەملەر،ياكى مەن ياكى سىز، ئەمما مەنمۇ سىزگە ئوخشاش دۇنيانىڭ بۇ چاقچاقلىرغا رەھمەت دەيمەن.

zarapxan

	ئاجايىپ ئوخشۇتۇش بوپتۇ بۇ  تەشەككۈر  شۇنداق كومىدىيلىك ھەم چۈشۈنۈشلۈك      ينە بىر قىتىم رەھمەت   ، ئەمىليەتتە نۇرغۇنلىرىمىز  دۇنيا بىزنى يىتەكلەۋاتامدۇ ياكى بىز دۇنيانى يىتەكلەۋاتىمىزمۇ ،  دۇنيا نەگە بارىدۇ  ، بىز نەگە بارىمىز دىگەننى ئويلىشىپمۇ قويماستىن كىتۋاتىمىز

kokbora520

	ياخشى يېزىپسىز

22iltija

	aaaa

ئىپارە

	توغرابۇ دۇنيابىزگە  چاقچاق قىلىۋاتىدۇ؟ بىزگە شۇنداق قاتتىق چاقچاق قىلغىدەك بىز نىمە قىلدۇق؟ بۇنۇڭغا نۇرغۇنلىرىمىز جاۋاپ بېرەلمەيتتى؟ھەمىمىز ئۆز يولىمىزدا، لېكىن ئۆز يولىمىزدىمۇ ماڭالماي تىڭىرقىماقتىمىز؟!قايسى يولىمىز خاتا بولدى؟ دەپ سوئال قويماقتىمىز. بىز توغرا يولنى تاپقان، شۇ يولدا كىتىۋاتاتتۇق، تۇيۇقسىز دۇنيا بىزگە بۇ يول خاتا بۇ يولدا ماڭالمايسەن! دىدى، بىز شۇئان توختاپ   دۇنياغا پۈتۈن ئالەمگە بىزنىڭ توغرا يولىمىز زادى قايسى؟ دەپ ئىككى قولىمىزنى ئېگىز كۆتۈرۈپ دۇنياغاجاكارلىدۇق !لېكىن دۇنيا بىزگە جاۋاپ بەرمەيۋاتاتتى.

يولتۇز

	دۇنيا بىزگە چاقچاق قىلىۋاتىدۇ ئەمما بىز ھەرگىز ئۆز تەقدىرىمىزگە چاقچاق قىلمايلى .

ap~qilam

	لېكىن  مەن بەزىدە دۇنياغا چاقچاق قىلىشقا ئامراق /thread-85900-1-1.html