يۈرىكىمدە باشقا ئوت بار (2-بۆلۈمى)

shoruq

	يۈرىكىمدە باشقا ئوت بار (2-بۆلۈمى)   مۇقەددىمە   مارىيە ئۈچ يىللىق توختامنى ئاخىرلاشتۇرۇپ، خوجايىننىڭ ‹يەنە ئىشلەپ قېلىڭ، مائاشىڭىزنى سىز رازى بولغىدەك دەرىجىدە ئۆستۈرۈپ بېرەي› دەپ يالۋۇرۇشلىرىغىمۇ پىسەنت قىلماي ‹يۇرتۇم› بىلەن خوشلاشماقچى بولدى.ئۇ ئۈچ يىلدىن بىرى قۇدۇق ئىچىدىكى پاقىدەك، پۈتۈن جاھان مۇشۇ ‹يۇرتۇم› دېگەندەكلا ياشىغان ئىدى، ئۇ ئۈچ يىلدىن بىرى خوجايىننىڭ پۇت-قۇلى بولۇپ، تىز تاماقخانىنىڭ مالىيە ئىشلىرىنى بىر قوللۇق ئىشلەشتىن باشقا يەنە، خۇجايىن ئۈچۈن بىر نەچچە تايانچ مالىيە خادىمى يېتىشتۈرۈپ بەرگەن ئىدى. مارىيە بۇنىڭ بىلەنلا توختاپ قالماي، دەم ئېلىش ۋاقىتلىرىدىن پايدىلىنىپ ئاشپەز ئۇستاملارنىڭ كەينىدە يۈرۈپ، 20 خىلغا يېقىن ئىسىىق-سوغۇق سەي، پىچىنە-پىرەنىك پىشۇرۇشتەك نۇرغۇنلىغان ھۈنەرلەرنى ئۈگىنىپ ئۆزلەشتۈرۈۋالغان بولۇپ، ئۇ  بۇ تىرىشچانلىقلىرىنىڭ ئۆزى ئۈچۈن بىر چىقىش يولى تېپىپ بېرىدىغانلىقىغا تاغدەك ئىشىنەتتى . مانا ئەمدى ئۈچ يىلدىن بىرى ھەممە جەھەتتىن پىشىپ يېتىلىپ ئۇچۇرما بولۇش ئالدىدا تۇرغان بۇ ناتىۋان قىز ‹يۇرتۇم›نىڭ ئالىي دەرىجىلىك ياتىقىدا ئاخىرقى كىچىنى خىيال بىلەن يالغۇز ئۆتكۈزمەكتە ئىدى. نىمىشىقكىن تاڭ، ئۈچ يىلدىن بىرى ئۇنىڭ خىيال ئىكرانىدا پەقەت كۆرەشلا بار ئىدى، ئۇنىڭ بىر كۆزى ئۈرۈمچىدە بولسا، يەنە بىر كۆزى جەنۇپتا-كۆرەشنىڭ يېنىدا ئىدى، ئۇنىڭ بىر قۇلىقى ‹يۇرتۇم› ئۈچۈن ئىشلىسە، يەنە بىر قۇلىقى كۆرەشنىڭ ئىگىلىك تىكلەش جەريانىدىكى جاپا- مۇشەققەتلىرى،شۇنداقلا ئائىلە-نىكاھ ئىشلىرىنى  تىڭتىڭلاش بىلەن ئۆتكەن ئىدى. ‹‹ كۆرەش ھەقىقتەتەن ئىسىل يىگىت، ئۈرۈمچىدىن ئايرىلىش ئالدىدا مەندەك بەخىتسىز قىزنىڭ يەنە كوچىدا قېلىشىدىن ئەنسىرەپ، توختام ۋاقتى توشقىچە  مېنى ئىشتىن بوشىتىۋەتمەسلىك،  بۇ ئالىي ياتاقنى مەندىن تارتىۋالماسلىق ھەققىدە خۇجايىندىن ۋەدە ئالدى.›› ‹‹ ئۆز ۋاقتىدا مەرداننىڭ كەينىگە كىرىۋالمىغان بولساممۇ بوپتىكەن، ھەممىسى مېنىڭ ھاماقەتلىكىم، شۇ چاغدا ئەجەپمۇ دۆت ئىكەنمەن، مەردانسىزمۇ گۈلدەك ياشىغىلى بولدىكەنغۇ مانا، ئۆز كۈچىگە تايىنىپ ياشاش نېمە دېگەن راھەت-ھە؟›› ‹‹ ھەي، مېھرىگۈل، ھەي مېھرىگۈل! ئەگەر بالام چۈشۈپ كەتمىگەن بولسا، بۇ چاغقىچە تىلىمۇ چىقىپ بولاتتى، ئۇ‹ ئاپا، ئاپا› دەپ مېنى چاقىرسا، بۇنچە يالغۇزلۇق تارتماس بولغىيتىم، بىچارە بالامنىڭ بۇنچىلىك قەدرىنىڭ ئۆتۈلىدىغانلىقىنى بىلگەن بولسام كاشكى!›› ‹‹ كۆرەش، نەدىسەن، سېنىڭ مەرزىيە بىلەن ئاجرىشىپ كېتىشىڭ مېنىڭ ئۇزۇندىن بىرى توختام سۇدەك تىنچ تۇرغان كۆڭلۈمنىڭ ئارامىنى بۇزدى، يېرىم يىلدىن بۇيان تولا ئويلىنىپ ئاخىرى يەنە بىر قېتىم تەلەي سىناپ بېقىش قارارىغا كەلدىم، ئاللا خالىسا ئەتىلا سېنىڭ يېنىڭغا قاراپ ئۇچىمەن، سەن بۇ كۈنلەردە دوستلىرىڭ بىلەن قوشۇلۇپ كاتتا ئادەم بولۇپ كەتتىڭ، مېنى قارشى ئالارسەنمۇ؟ مەرزىيە ساڭا بېرەلمىگەن بەخىتنى مەن بېرەلەرمەنمۇ؟ ھەي،تازا ئىشەنچىم يوق...››   مارىيە مۇشۇنداق باش-ئاخىرى يوق خىياللار بىلەن ئۇخلاپ قالدى. داۋامى بار. مەنبە: ئۆزۈم (روزىمۇھەممەت ئىرپان) ئەسكەرتىش:بۇ تېمىنىڭ داۋامى ئىنكاس شەكلىدە بولغانلىقى ئۈچۈن ،ئاپتۇرنىڭ مۇشۇ تېما  ھەم ئالدىنقى قېتىمقى بۆلۈمىنىڭ ئايرىم ئۇلىنىش بېتى چىقىرىپ قويۇلدى.قولايلىق بولۇشى ئۈچۈن تېمىنى باشتىن -ئاياق كۆرمەكچى بولغان دوستلارنىڭ تۆۋەندە قالدۇرۇپ قويغان ئۇلىنىش بويىنچە كىرسە، ئاپتۇرنىڭ يۇقۇرقى تېمىسىنىڭ پۈتۈن مەزمۇنىنى بىۋاستە كۆرەلەيدۇ. شورۇق:‹‹يۈرىكىمدە باشقا ئوت بار››1-بۆلۈم شورۇق:‹‹يۈرۈكىمدە باشقا ئوت بار››2-بۆلۈم -باشقۇرغۇچىدىن

shoruq

	<يۈرىكىمدە باشقا ئوت بار> 1- بۆلۈم  ئۇلىنىش ئادرىسى:

مارشال

	مۇنبەرداشلارغا دەيدىغىنىم،بۇ تېما ئىلگىرى مۇنبەر ئەزاسى نىم جاپا يوللىغان‹‹يۈزسىزلىك قىلاي دېسە بىردەمچىلىككەن››دېگەن تېمىدەك ياخشى تېما. ئاپتۇر بۇ تېمىنىڭ بىرىنجى بۆلىمىنى تاماملاپ بوپتۇ.ئەمدى 2-بۆلۈمى ئۇزۇن بىر باسقۇچنى باشتىن كەچۈرىشى مۇمكىن،بۇ تېما ھەقىقىي يۈز بەرگەن ئىشلار بولۇشى مۇمكىن دەپ ئويلىدىم ئالدىنقى 1-بۆلۈمنى ئوقۇپ. ئاپتۇر 1-قەۋەتتىكى ئىنكاسىغا تېمىنىڭ باش بۆلىكىنىڭ ئۇلىنىش ئادىرسىنى يوللاپ قويۇپتۇ.مۇمكىن بولسا،بۇ تېمىنى ھەممەيلەننىڭ بىر قېتىم ئوقۇپ بېقىشىنى ئۈمىد قىلىمەن. مېنىڭ قىسقىچە تەسىراتىم كىشىلىك ھايات،ئالىي مەكتەپتىكى ھەقىقىي رېئاللىق،ئىجتىماھىي تۇرمۇشتىكى كىشىلەرنىڭ روھىيەت قايناملىرى چىن تەسۋىرلەنگەن.رومان شەكلىگە كىرىش باسقۇچىدا تۇرۇۋاتقان،ئاپتۇر يەنە بىر قېتىم پىشىقلاپ ئىشلەپ چىقسا ئېسىل روماندىن بىرسى بوپ چىقىدىغان بۇ ئەسەرنى ئوقۇپ،ھەرخىل پىكىر-تەكلىپ چۈشسە، ئاپتۇرنىڭ مەزكۇر يازمىسىنى تېخىمۇ پىشىقلاپ،ياخشى روماندىن بىرنى پۈتتۈرۈشكە تىلەكداشمەن. ئاپتۇرنىڭ ئاخىرقى ئىجادىيىتىگە ئۇتۇق تىلەيمەن.مۇمكىن بولسا تېمىنىڭ ئايىقى بەكلا سۈرۈلۈپ كەتمىسە دېگەن ئۈمىدتىمەن.

shoruq

	(1) مارىيە ئەتىگەن سائەت سەككىزنىڭ ئايرۇپىلانى بىلەن جەنۇپقا قاراپ ئۇچۇپ كەتتى، بۇ ئۇنىڭ تۇنجى قېتىم ئۈرۈمچىدىن ئايرىلىشى ھەم تۇنجى قېتىم ئايرۇپىلانغا چىقىشى بولغاچقا سەل ھاياجانلىنىۋاتاتتى، ئۇنىڭ ئۈستىگە ئۇ نەچچە سائەتتىن كېيىن ئۈچ يىلدىن بىرى كۆرۈشنى ئارزۇ قىلىپ كېلىۋاتقان كۆرەش بىلەن ئۇچرىشىدۇ، مەردان، ئەنۋەر، ئابلىكىملەر نەچچە ۋاقىتتىن بىرى ئۈرۈمچىگە تالاي قېتىم كېلىپ كەتتى، بۇ جەرياندا  جەنۇپنىڭ نازۇ-نىممەت، مىۋە-چىۋىلىرىدىن ئالغاچ كېلىپ، مارىيەنى يوقلىغاچ ئۆتۈشتى، بىراق كۆرەش ئۈرۈمچىگە دەسسەپمۇ قويمىدى، ئەنۋەرلەرنىڭ دېيىشىچە، ئۇ بەك ئالدىراشمىش، شىركەتتىن، رېستۇران بىلەن تىز تاماقخانىدىن ئايرىلالماسمىش، كۆرەش بولمىسا... ھەممىسى قۇرۇق گەپ، ھەممىسى باھانە. كۆرەشنىڭ خىيالىدا مارىيە يوق، بولمىسا ئۈرۈمچىگە كېلىپ كېتىش كۆرەشتەك كاتتا خوجايىنلار ئۈچۈن قانچىلىك ئىش دەيسىز. ئايرۇپىلان بۇلۇت بىلەن يول تالىشىپ ئاستا-ئاستا پەسلەشكە باشلىغانسىرى مارىيە جىددىيلىشىپ، ئۆزىنىڭ كېيىنكى تەقدىرىدىن ئەنسىرەشكە باشلىدى، ئۇئۆز ۋاقتىدا مەرداننىڭ كەينىگە كىرىۋالغاننىڭ دەردىنى ئاز تارتتىمۇ، مانا ئەمدى كۆرەشنىڭ كەينىدىن پايپاسلاپ مېڭىپ نىمە كۈنلەرنى كۆرەر؟ ئۇ ئۈرۈمچىدىن ئايرىلغىچە ئۆزىنىڭ تاللىغان يولىنى توغرا دەپ بىلىپ كەلگەن ئىدى، ئىش بۇ دەرىجىگە يەتكەندە سەل قورقۇۋاتاتتى، ھەي، كۆڭۈل دېگەن ھەقىقەتەن ئادەمنى ھەر كويلارغا سالىدۇ، جۇمۇ. مارىيە ئۆزىگە ئۆزى پىچىرلىدى: ‹‹ نېمە كۆرسەم كۆرەرمەن، كۆرەش ماڭا قارىمىسا قارىماس، ئىشقىلىپ ئۇنىڭ ئەتراپىدا چۆگلىگەچ بىر ئىشلارنى قىلغاچ پۇرسەت كۈتمەيمەنمۇ، قازاندا نېمە بولسا، چۈمۈچكە شۇ چىقىدۇ،دېگەندەك،تەقدىرىمدە نېمە بولسا، كەچۈرمىشىم شۇ بۇلا.›› ئاق يىشىل سىردا سىرلانغان تاكسى ‹مەرىپەت› ئۇنۋىرسال بىناسىنىڭ ئالدىدا توختىدى. ـ خانىم، سىز دېگەن يەرگە كەلدۇق. -بۇ يەرلەر بەك ئاۋات تۇرىدىغۇ، بۇ بىنانى شەھەرنىڭ سەل چېتىدە دەپ ئاڭلىغان ئىدىم. - ئىلگىرى بۇ يەرلەر ھەقىقەتەن شەھەرنىڭ چېتىدىكى تاشلاندۇق يەرلەر ئىدى، ئىككى-ئۈچ يىلدىن بۇيان بۇ يەرگە سودا-ساراي، ئولتۇراق رايۇن ۋە ھۆكۈمەتنىڭ بىنالىرى ئارقا-ئارقىدىن سېلىنىپ ئاۋاتلىشىپ كەتتى. -ھە، شۇنداقمۇ،كىرا پۇلى نەچچە ؟ - 15يۈەن -بەك قىممەتقۇ، مەن بۇ شەھەردە تاكسىلارنى بەك ئەرزان، شەھەر ئىچىدە نەگىلا بارسا بەش يۈەن دەپ ئاڭلىغان ئىدىم. -ھە، بوپتۇ، 10يۈەن بېرىڭ. مارىيە ‹ ئىككى كىلومىتىر ماڭا-ماڭمايلا 15  يۈەن بەر دەيدا، نەگىلا بارسا، ئادەمنى قويىۋىتىمەن دەپلا تۇرغان...› دەپ غۇدىرىغاچ ماشىنىدىن چۈشتى. ئۇنىڭ ئالدىدا ئالتە قەۋەتلىك بىر كاتتا بىنا قەد كۆتۈرۈپ تۇراتتى، بىنانىڭ ئالدى كەڭ مەيدان، يەر ئاستى ۋە بىرىنچى قەۋەتلىرىگە چوڭ تىپتىكى تاللا بازار، تىز تاماقخانىدىن باشقا يەنە گۈل دۇككىنى، بانكا، پىچىنە-پىرەنىك دۇككىنى،لاتارىيە سېتىش ئورنى ... قاتارلىقلار جايلاشقان ئىدى. ئىككىنچى قەۋىتى رېستۇران بولسا كېرەك، تاملىرى ئەينەكتىن بولۇپ، رىستۇراننىڭ ھەشەمەتلىرى كۆرۈنۈپ تۇراتتى. -ۋاي، سىز مارىيەغۇ، سىزنى قانداق شامال ئۇچۇرۇپ كەلدى. - مېھرىگۈل! مارىيەنىڭ ئالدىدا تولغانسىرى تېخىمۇ ئۇماقلىشىپ، گۈزەللىشىپ كەتكەن، كىيىملەرنى ياراشتۇرۇپ كەيگەنلىكتىن تېخىمۇ نازاكەتلىك كۆرۈنىدىغان،  قاراقۇمچاق كەلگەن مېھرىگۈل تۇراتتى. مارىيە ئېتىلپ بېرىپ مېھرىگۈل بىلەن قۇچاقلىشىپ كۆرۈشتى، ئۇلار مەڭزىنى مەڭزىگە يېقىپ كۆرۈشۈشنى ئاخىرلاشتۇردى. -مارىيە سىزنى بۇ يەردە كۆرۈپ بەك خۇرسەن بولدۇم، سىزئۆزگەرمەي شۇ پېتى تۇرۇپسىز. -مەنمۇ سىزنى كۆرۈپ خۇرسەن بولدۇم، سىز بۇرۇنقىدىنمۇ بەكرەك گۈزەللىشىپ كېتىپسىز. -نەدىكىنى، جەنۇپنىڭ تۇپا-تۇمان ھاۋالىرىدا مۇشۇنچىلىك تۇردۇق، يۈرۈڭ، قورسىقىڭىزمۇ ئاچقاندۇ، ئۆيۈم بۇ يەردىن سەل يىراق، ئاۋۋال ماۋۇ ئاشخانىغا كىرىپ قورساقنى ئەستەرلەيلى، ئاندىن ئۆيگە بارارمىز، ھە راسىت، بۇ تىز تاماقخانىنى مەردان، ئەنۋەر، ئابلىكىم ۋە كۆرەشلەر شىرىكلىشىپ ئاچتى، تېخى ئىككىنچى قەۋەتتىكى رېستۇرانمۇ بار. مارىيەنىڭ بۇ ئىشلاردىن خەۋىرى بولسىمۇ چاندۇرماي سۇراپ قويدى: - تىز تاماقخانا، رېستۇران، مۇشۇ بىنانىڭمۇ ئىسمى ئوخشاشلا ‹مەرىپەت› ئىكەنغۇ - توغرا،توغرا مۇشۇ بىنانىمۇ ئۇلار شىرىكلىشىپ سالغان. -ئۇلار قىسقىغىنە ۋاقىت ئىچىدە شۇنچە كاتتا ئىشلارنى قىلىۋىتىپتۇ، ھەيران قېلىۋاتىمەن. -سىز بىلمەيسىز، ئەنۋەر بەك يامان بالىكەن، بۇ ئىشلاردا ئۇنىڭ تۆھپىسى بەك چوڭ. بىراق... -نېمە بىراق؟ - ئۇنىڭ تىجارەتتە تەلىيى كەلگەن بىلەن تۇرمۇشتا تەلىيى كەلمىدى؟ بولدى، ئاۋۋال تائام، ئاندىن كالام دېگەن گەپ بار، ئاۋۋال تاماق يەۋىلىڭ، قالغان گەپلەرنى ئالدىرىماي دېيىشىۋالىمىز. ئۇلار پاراڭلاشقاچ تىز تاماقخانا ئىچىگە كىرىشتى. زالنىڭ ئىچ-تېشىدىكى ئورۇندۇق-ئۈستەللەردە لىق ئادەم. بىر خىل كىيىم كېيىۋالغان كۈتكۈچىلەر ئۇ ياندىن بۇيانغا ئالدىراش يۈرۈشەتتى. بۇ تىز تاماقخانا ئۇيغۇر بىناكارلىقى ئۇسلۇبىدا كاتتا بىزەلگەن بولۇپ  بىزەكلىرى، لاھىيەلىرى‹يۇرتۇم›غا قارىغاندا نەچچە ھەسسە ئىسىل چىققان ئىدى. مارىيە ئىختىيارسىز، -پاھ، ئوردىغىلا ئوخشاپ قاپتۇغۇ، بۇ يەرگە تاماق يېيىش ئۈچۈنلا كەلسە زايە كەتكۈدەك جۇمۇ، دەۋەتتى. -... داۋامى بار

kuzum

	كۆزلىرىم  داۋامىدا

篮球美女

	قارىغاندا مەن بىرىنجى قىسىمنى كۆرۈپ بولۇپ ئاندىن بۇ قىسىمنى ئۇلاپ كۆرسەم بولغۇدەك.

57gulyar

	ئەمدى سۈيلەپ قالىمىزدە سىزنى،  سۈيلىمەيلى دىسەكمۇ ئامال يوق ، كىم سىزنى بۇنداق پەيزە ھېكايىنى يازسۇن دەپتۇ

nazina520

bedar

	كۈندە ئاخىرى چىقتىمىكىن دەپ مۇنبەرگە يۈگرەيدىغان تېمىدىن يەنە بىرسى چىقىپتىغۇ .بۇ ئەسەرنىڭ بىرىنچى بۆلمىنىمۇ شۇنداق تەقەززالىق بىلەن كۈتۈپ ئاران تۈگەتكەن،ئەمدى نۆۋەت ئىككىنچى بۆلمىگە كەپتۇ- دە.

xawki0998

	ئەسسالامۇ ئەلەيكۇم  بارلىق تورداشلار ۋە ئەسەر ئاپتورى سىلەر بىلەن مۇشۇ ئەسەر ئارقىلىق تىخىمۇ پىكىر ئالماشتۇرۇپ ۋە سىردىشىپ ئۆتىشىمىزنى ئۈمۈد قىلىمەن . مەن بۇ ئەسەرنىڭ بىشىنى تەقەززالىق بىلەن ئىز قوغلاپ ئوقۇغان. ناھايىتى ياخشى ئەسەر بۇ . شۇڭا مۇنبىرمىزدىكى بۇ ئەسەر بىلەن تونۇشمىغان مۇنبەرداشلىرىمنىڭ بۇ ئەسەرنىڭ بىشى ۋە ئاپتورنىڭ باشقا يازمىلىرنىمۇ ئوقۇپ بىقىشىنى كۈچلۈك تەۋسىيە قىلىمەن .   سالامەت بولۇڭ ! ئەسىرىڭىزنىڭ ئاخىرىنى بۇرۇنقىدەكلا تەقەززالىق بىلەن كۈتىمەن !