ئوچۇق دېرىزە(ھېكايە)

erkinaz

	ئوچۇق دېرىزە (رازۋېتكا ھېكايىسى) ئالىي مەكتەپكە كەلگىنىمگىمۇ ھەش_ پەش دېگۈچە بىر ئاي بولۇپ قالدى.  گەرچە تۇرمۇشتىكى بەزى ئىشلاردا قىينالساممۇ، ھەرھالدا ئالىي مەكتەپ تۇرمۇشىغا خېلى كۆنۈپ قالدىم. ياتاقتا ئالتەيلەن بىرگە ياتىمىز. ئاخشاملىرى پاراڭ سېلىپ ئۇخلىمايمىز، ئەتتىگەندە ئۇيقۇمىزنى ئاران ئېچىپ، يۈز–كۆزىمىزنى چالا–پۇلا يۇيۇپ، ئەتتىگەنلىك ناشتىنى يېمەيلا كىتابنى قولتۇقلاپ، سېنىپقا چاپىمىز. چۈش بولغۇچە قورساق ئېچىپ تارتىشىپ كېتىدۇ. دەرستىن چۈشۈپلا ئاچ قالغان بۆرىدەك، مەكتەپ تاماقخانىسىغا چاپىمىز. باس–باسچىلىقتا مىڭ تەسلىكتە تاماق ئېلىپ يېگۈچە قورساق ئېچىپ ئۆتۈپ كېتىپ، تاماقنى يەپ بولالماي ئاشۇرۇپ قويىمىز. چۈشتىن كېيىن خېلى ياخشى ئۆتىدۇ. ئىككى سائەتلىك دەرستىن كېيىن، كەچلىك مۇزاكىرىگىچە خېلى بىكار بولۇپ قالىمىز. بۇ چاغدا ھەممىمىز ئىختىيارى پائالىيەت قىلىمىز. بەزىلەر توپ ئوينايدۇ،  بەزىلەر بازارغا بارىدۇ، يەنە بەزىلەر زىرىكمەي دەرس ئۆگېنىدۇ.  تۇرمۇش مۇشۇنداق بىرخىل رېتىمدا ئۆتىدۇ. مەن بىناكارلىق كەسپىگە قوبۇل قىلىنىپ كەلگەن ئىدىم. بىرىنچى يىلى قائىدە بويىچە بىز بىريىل خەنزۇتىلى ئوقۇشىمىز كېرەك ئىدى. شۇڭا دەرسلەر ئانچە ئېغىر ئەمەس ئىدى. مەكتەپتە دەرستىن سىرتقى كورسلارغا قاتنىشىش مودا بولغان ئىدى. مەن بىلەن بىر ياتاقتىكىلەرنىڭ ھەممىسى شەنبە_يەكشەنبىلىك  تىل تەربىيلەش كورسلىرىغا قاتناشقان ئىدى. ھەپتە ئاخىرىدا ياتاقتا ئۆزۈم يالغۇز قالاتتىم. بۇنىڭغا قاراپ: « ۋاقىتنى بىكار ئۆتكۈزىۋېتىپ بارغان مەنلا ئىكەنمەن.» دېگەن تونۇشقا كېلىپ قالاتتىم. مەكتەپ ھويلىسىدا ۋە ئالدىدىكى يوللاردا ھەرخىل تەربىيلەش كورسلىرىنىڭ تەشۋىق ۋەرەقىلىرى تارقىتىلاتتى. ئۇنىڭ كۆپلىكىدىن كىشى قايسىسىغا قاتنىشىشنى بىلەلمەي بېشى قاياتتى. ماڭا بىرسىنىڭ ئىشلىتىدىغان دەرسلىكى يارىمىسا، بىرسىنىڭ ئورنى يىراق كېلەتتى. ئاشۇنداق قايسىسىغا قاتنىشىشنى بىلەلمەي، بېشىم قېيىپ تۇرغاندا، رەنادىن تېلفون كەلدى. ئۇ مۇشۇ شەھەردىكى باشقا بىر ئالىي مەكتەپكە ئۆتكەن ئىدى. ئۇ ئۆزىنىڭ ئارزۇسى بويىچە فىلولوگىيە ئىنىستۇتىغا كىرگەن ئىدى. بىز پات_پات ئالاقىلىشىپ تۇرۇۋاتاتتۇق. _ سىز بىرەر كورسقا قاتناشتىڭىزمۇ؟_ دېدى ئۇ تېلفوندا ئەھۋال سورىشىپ بولغاندىن كېيىن. _ ياق تېخى،_ دېدىم مەن،_ ماڭا ھىچقايسىسى يارىمايۋاتىدۇ. بولمىسا قاتناشماي ئۆزۈم ئۆگىنەيمىكىن. _ مەن بىرسىنى تاپتىم، ئىسمى «ئۆرلە تىل تەربىيلەش مەركىزى»، ئوقۇتقۇچىلىرى داڭلىق، ئورنىمۇ ھەرئىككىمىزنىڭ مەكتىپىگە يېقىن،_ دېدى ئۇ،_ قانداق قاتنىشامسىز؟ _ ئەگەر سىز ياخشى دەپ قارىغان بولسىڭىز قاتناشسام قاتنىشاي، ئوقۇش پۇلى قانچىكەن؟_ دېدىم مەن. _ پۇلىنى سورىماي تۇرۇڭ، ئاۋۋال بېرىپ دەرسىنى ئاڭلاپ بېقىپ، ئاندىن قاتنىشىش_ قاتناشماسلىقنى بىرنېمە دەيلى ،_ دېدى ئۇ . _ ماقۇل، قاچان بارىمىز؟_ دەپ سورىدىم. _ جۈمە كۈنى كەچتە بارايلى، ئۇ كۈنى كەچلىك مۇزاكىرە يوق،_ دېدى ئۇ. _ ئۇ كەچلىك كورسمىكەن؟_ دەپ سورىدىم مەن،_ ئەمىسە بولمىغۇدەك. _ شەنبە،يەكشەنبىلىك سىنىپلىرىمۇ بار،_ دېدى ئۇ چۈشەندۈرۈپ،_ شەنبە،يەكشەنبىدە ئادەم كۆپ بولۇپ كېتىدۇ. شۇڭا جۈمە كۈنى بارايلى دەۋاتىمەن. _ ماقۇل شۇنداق قىلايلى. قانداق كۆرۈشىمىز ؟_ دەپ سورىدىم مەن. _ كىتابخانىنىڭ ئالدىدا كۆرىشەيلى، ئاندىن كورسنىڭ ئورنىغا مېڭىپ بارىمىز،_ دېدى ئۇ. _ ماقۇل، خوش ئەمىسە _خوش. تېلېفوننى قويۇپ تۇرۇشىمغا ئابدۇقەييۇم ياتىقىمغا كىرىپ كەلدى. ئۇ فىزىكا كەسپىگە قوبۇل قىلىنغان ئىدى. ياتىقىمىز بىر بىنادا ئىدى. ئۇنىڭ چىرايىدىن بىر غەشلىك چىقىپ تۇراتتى. ئۇ گەپ قىلماي بېرىپ مېنىڭ كارىۋىتىمدا ئولتۇردى. _ نېمە بولدى؟_ دېدىم مەن ئۇنىڭ چىرايىغا قاراپ ھەيران بولۇپ. _ سەن ئاۋۋال تېلېفونىڭنى بېرىۋالە، ئاندىن مەن گەپ قىلاي،_ دېدى ئۇ. _ سۆزلىشىپ بولدۇم. دېگىنە نېمە بولدى؟_ مەن ئۇنىڭ ئۇدۇلىغا بىر ئورۇندۇقنى قويۇپ ئولتۇردۇم. _ بىر كورسقا قاتناشقان ئىدىم. شۇنىڭ ئوقۇش پۇلى تالۇنىنى تاپالمايۋاتىمەن،_ دېدى ئۇ،_ شەنبە كۈنى شۇ تالۇننى تەكشۈرۈپ، دەرس ئاڭلاش كېنىشكىسى تارقىتىپ بەرمەكچى بولغان ئىدى. _ ئەمىسە يۈتتۈرىۋەتكىنىڭنى دېسەڭلا بولىدىكەنغۇ، ئۇلاردا تالۇننىڭ كۆتىكى باردۇ؟_ دېدىم مەن. _ تازا ساددا جۇمۇ سەن، يۈتۈپ كەتتى دېسەم ئۇلار تالوننىڭ كۆتىكى يوقكەن دېسە قانداق قىلىمەن. مەندە پۇل تۆلىگەنلىكنىڭ ئىسپاتى يوقتە،_ دېدى ئۇ. _ شۇنداقمۇ قىلارمۇ؟ _ ھازىر ئادەملەر پۇلنىلا تونۇيدىغان بولۇپ كەتتى. مەن كۈلۈپ كەتتىم. ئۇنىڭ بۇ گېپىنىڭمۇ ئاساسى بار ئىدى. ھازىر ئاتا-بالا ئىلىم-بېرىم قىلىشقاندا ھۆججەتلىشىۋاتقان يەردە، ئۇلارنىڭ تېنىۋىلىش مۇمكىنچىلىكنى يوق دېگىلى بولمايتتى. _ ئۇنى نەگە قويغىنىڭ پەقەت ئېسىڭدە يوقمۇ؟ _ دەپ سورىدىم مەن. _ تالۇننى كاسسىرنىڭ قولىدىن ئالغانلىقىم ئېسىمدە، شۇ چاغدا قېشىمدا زۇلپىيەمۇ بار ئىدى. ئۇنىڭ بىلەن پاراڭلىشىش بىلەن بولۇپ كېتىپ، تالوننى قەيەرگە سالغانلىقىم پەقەت يادىمدا يوق،_ دېدى ئۇ ئويلىنىپ تۇرۇپ،_ كاللامدا ئازراقمۇ ئىزناسى يوق. _ مۇنداق دە، زۇلپىيەمۇ شۇ كورستىكەندە،_ دېدىم مەن،_ ئىككىڭلار خېلى يامان ئەمەس ئۆتۈۋاتقانسىلەر؟ _ ھەرھالدا بولىدۇ، بۇ گەپنى قويۇپ تالوننى ئىزدىشىپ بەرگىن،_ دېدى ئۇ. _ مەن قانداق ئىزدىشىپ بېرىمەن؟_ دېدىم مەن _ سەن بۇنداق ئىشلارغا ئۇستىغۇ؟ تەھلىل قىلىپ تېپىشقا دەيمەن، _ دېدى ئۇ،_ مېنىڭچە بۇ ساڭا تەس كەلمەيدۇ. _ يىپ ئۇچى شۇنداق ئاز تۇرسا؟_ دېدىم مەن،_ بوپتۇ، قېنى ئۇرۇنۇپ باقاي. ئۇ كۈنى قايسى كېيىمىڭنى كېيگەن ؟ قايسى كىتابلارنى ئاپارغان ئىدىڭ؟ _ ئاۋارە بولما ، مەن ھەممە يانچۇقۇمنى ھەم كىتابلىرىمنىڭ ۋاراقلىرىنىڭ ئارىلىقىنى قويماي ئاختۇردۇم،_ دېدى ئۇ. _ ئەمىسە ئۇنى سىرتتا چۈشۈرۈپ قويۇپسەن،_ دېدىم مەن،_ بۇنداق بولغاندا، ئۇنى تېپىشقا ئامال يوق. ئۇ ئۈمىدسىزلىنىپ قېشىنى ئۇچۇرۇپ قويدى. _ تېخى سېنى تاپالايدۇ دەپتىمەن،_ دېدى ئۇ. مەن كۈلۈپ قويدۇم. ئۇنىڭ ماڭا بولغان ئىخلاسىنىڭ بۇنچىلىك يۇقىرى ئىكەنلىكىنى ئويلاپ باقمىغان ئىدىم. _ قايسى كورسقا قاتناشقان ئىدىڭ؟_ دەپ سورىدىم مەن. _ «ئۆرلە» گە. ئۇ ھازىرقى كورسلارنىڭ ئىچىدە ئەڭ ياخشىسى،_ دېدى ئۇ. _ قىززىق ئىش، بايا رەنامۇ شۇ كورسقا قاتنىشايلى دەپ تېلېفون بېرىپتۇ،_ دېدىم مەن. _ رەنا دېگەندىن كېيىن چوقۇم قاتنىشىسەنغۇ دەيمەن،_ دېدى ئۇ. _ ئاۋۋال دەرسىنى ئاڭلاپ كۆرۈپ باقىدىغان بولدۇق. جۈمە كۈنى سەنمۇ بىللە بارغىن. بىز بىللە سېنىڭ تالۇنىڭنىڭ ئىشىنى ئۇلارغا ئېيتىپ باقايلى. ئۇلار تېنىۋىلىپمۇ يۈرمەس،_ دېدىم مەن. _ ماقۇل ،_ دېدى ئۇ ئورنىدىن تۇرۇپ،_ مەن ياتاققا قايتاي، خوش ئەمىسە. _ خوش. **************** جۈمە كۈنى چۈشتىن كېيىن دەرستىن يېنىپ، دېيىشىپ قويغىنىمىز بويىچە، ئابدۇقەييۇم بىلەن بىللە كىتابخانا ئالدىغا باردۇق. ئۇ يەردە بىر ئۇزۇن ساقلىغاندىن كېيىن، رەنا بىلەن زۇلپىيە كەلدى. ئۇلار يەنىلا بۇرۇنقىدەك يېقىن دوست ئىدى. مېنىڭ ئەزەلدىن ئادەم ساقلاش بىلەن خوشۇم يوق ئىدى. ئۇلار كەلگەندە ئاللىقاچان تاقىتىم تۈگەپ،  چېچىلىشقا ئاران قالغان ئىدىم. _ ئۇزۇن ساقلاپ كەتتىڭلارمۇ؟_ دېدى رەنا بىزگە قاراپ كېلىۋېتىپ. _ ياق، ئەمدى كەلدۇق،_ دېدى ئابدۇقەييۇم كۈلۈپ. ئۇلارنىڭ بىزنى بىر سائەتتىن ئارتۇق ساقلاتقىنىغا تازا بىر چېچىلاي دەپ تۇراتتىم، ئابدۇقەييۇمنىڭ گېپى بىلەن توختاپ قالدىم. ئەلىمىمنى ئىچىمگە يۇتۇپ، ئابدۇقەييۇمغا گۆلىيىپ قاراپ قويدۇم.  چىرايىم ئۆچۈپ كەتكەن ئىدى. رەنا بۇنى سەل سېزىپ قېلىپ ئوڭايسىزلىنىپ قالدى. _ خاپا بولماڭلار، ئازراق ئىش چىقىپ قېلىپ كېچىكىپ قالدۇق،_ دېدى ئۇ چۈشەندۈرۈپ. _ بۇنىڭغا مەن سەۋەبچى،_ دېدى زۇلپىيەمۇ،_ مەن رەنانىڭ مەكتىپىگە ۋاقتىدا كېلىپ بولالماي، سىلەرنى ساقلىتىپ قويدۇق. _ كېرەك يوق،_ دېدى ئابدۇقەييۇم خۇشخۇيلۇق بىلەن،_ بىز كەلگىلىمۇ تېخى بەش مىنۇت بولدى. مەن كىچىككىنە ئىشقا خاپا بولغىنىمغا خېجىل بولۇپ قالدىم. مېنىڭ مۇشۇ چۇس مىجەزىمنىزە...  بىز ياندىشىپ ماڭدۇق. بىز گەپ قىلماي بىردەم ماڭدۇق. بۇنداق جىمجىتلىققا ئابدۇقەييۇم ئەزەلدىن چىدىمايتتى. _ يەنە ئوتتۇرا مەكتەپتە بىر سىنىپتا ئوقۇغان تۆتىمىز بىر يەرگە كەپتىمىز،_ دېدى ئابدۇقەييۇم،_ بۇنىڭغا قاراپ تولۇق ئوتتۇرا ئېسىمگە كېلىپ قېلىۋاتىدۇ. _ شۇنداق،_ دېدى رەنامۇ،_ بۇندىن كېيىنمۇ مۇشۇنداق يېقىن ئۆتەيلى. _ ئەلۋەتتە شۇنداق بولىدۇ-دە،_ دېدى ئابدۇقەييۇم،_ ئىنگىلىزتىلى كورسىنى تۈگىتىپ تېخى كومپىيۇتېر كورسىغا قاتنىشىمىز. چاغدا يەنە بىر كورستا ئوقۇيلى. مەن بايىقى خىجىللىقىمدىن نېمە دەپ سۆز قوشۇشنى بىلەلمەي تۇراتتىم. رەنا ماڭا: _ سىز يەنە بۇرۇنقىدەك رازۋېتچىكلىققا ئائىت رومانلارنى ئوقۇۋاتامسىز؟_ دەپ سورىدى. ئۇ گەرچە بىلىپ تۇرسىمۇ، مېنىڭ ئوڭايسىزلىقىمنى تۈگىتىش ئۈچۈن قەستەن سورىغان ئىدى. _ شۇنداق، مەكتەپنىڭ كۇتۇپخانىسىدا كىتابلار كۆپ ئىكەن،_ دېدىم مەن،_ ئانچە-مۇنچە ئارىيەت ئېلىپ ئوقۇپ تۇرىۋاتىمەن. بۇ گەپتىن كېيىن سەل يەڭگىللەپ قالدىم. شۇنىڭ بىلەن ئارىمىزدىكى قاتمالچىلىق تۈگەپ، خۇشال كەيپىياتتا پاراڭلىشىپ كورسنىڭ ئورنىغا يېتىپ كەلدۇق. شۇ چاغدا مەن ئۆزۈمدە ئېغىر- بېسىقلىقنىڭ كەمچىللىكىنى ھېس قىلدىم. كەيپىياتىمنى كونترول قىلىشنى ئۆگىنىشىمنىڭ لازىملىقىنى تونۇپ يەتتىم. كورسنىڭ دەرسخانىسى ئادەتتىكى بىر ئالتە قەۋەتلىك ئولتۇراق ئۆي بىناسى ئىكەن. ئۇلار بىرىنجى پايلىنىڭ 2- قەۋەتتىن 6- قەۋەتكىچە ھەممە ئۆينى دەرسخانا قىلغان ئىكەن. پايلىنىڭ ئىشىكى ئالدىدا تۇرغان تەكشۈرگۈچى بىزگە پۇل تۆلىگەنلىك تالونىنى كۆرسىتىپ ئاندىن كىرىشنى ئېيتتى. بىز بۈگۈن دەرسنى ئاڭلاپ باقماقچى ئىكەنلىكىمىزنى ئېيتىۋىدۇق، ئۇ كىرگۈزىۋەتتى. كورسنىڭ سىنىپلىرى 2- قەۋەتتىن باشلىناتتى. بىز ئاۋۋال 2- قەۋەتتىكى كورس ئىشخانىسىغا كىردۇق. قارىسام، بۇ سىنىپ قىلىشقا تازا مۇۋاپىق ئۆيلەر ئىكەن. ئۆينىڭ شەكلى ئۇزۇنچاق شەكىلدە بولۇپ، ئوتتۇرىدىكى ئېلىۋەتكىلى بولىدىغان تاملار ئېلىۋىتىلىپ، كەڭرى بىر سىنىپ قىپتۇ. ئىچىگە 30 ئەتراپىدا تاق كىشلىك ئورۇندۇق تىزىلىپتۇ، دوسكا ئۆينىڭ بالكونىغا قارشى تەرەپتىكى تامغا قويۇلۇپتۇ. كېلىپ بولغان ئوقۇغۇچىلار دەرس تەكرارلىغاچ، دەرسنىڭ باشلىنىشىنى كۈتۈپ ئولتۇرۇشۇپتۇ. كورسنىڭ ئىشخانىسى 2- قەۋەتنىڭ بالكونىغا جايلاشقان ئىكەن. بالكون گەرچە تارراق بولسىمۇ، ئۇزۇنچاق شەكىلدە بولۇپ، ئىشخانا قىلىشقا ياراپتۇ. بالكوننىڭ ئىشىكتىن كىرىشكىلا بىر ئاددى 4 كىشلىك كرىسلو ، ئۇنىڭ ئوڭ تەرىپىگە، بىر تەرىپىنى دېرىزىگە تاقاپ ، بىر تار خىزمەت شىرەسى قويۇلغان بولۇپ، بۇ خىزمەت شىرەسى  بالكوننى ئىككىگە ئايرىپ تۇراتتى. خىزمەت شىرەسى يېنىدا بىر ئادەم ئاران ئۆتەلىگىدەك يول قالغان ئىدى. شىرەنىڭ ئۇ تەرىپىدە بولسا ئىشكاپ قويۇلغان. بۇ ئىشخانا كىچىك بولغاننىڭ ئۈستىگە بەك كۆپ نەرسىلەر قويۇلغان ئىدى. ئىشخانىدا بىر نەچچە ئوقۇغۇچى پۇل تاپشۇرىۋاتاتتى. كاسسىر شىرەنىڭ بۇ تەرىپىدە، كورسنىڭ باشلىقى شىرەنىڭ ئۇ تەرىپىدە ئولتۇرغان ئىدى. پۇل تاپشۇرىدىغانلار ئىشىنى تۈگىتىپ چىقىپ كەتتى. كاسسىر پۇلنى ساناشقا باشلىدى. كورس باشلىقى بىزنى كۆرۈپ: _ نېمە ئىشىڭلار بار ئىدى؟_ دەپ سورىدى. _ بىز كورسقا قاتناشماقچى ئىدۇق. شۇڭا ئاۋۋال دەرسنى بىر ئاڭلاپ باقماقچى بولۇپ كەلدۇق،_ دېدى رەنا. _ قايسى سىنىپقا قاتناشماقچىتىڭلار؟ _ ئەڭ بېشىدىن باشلايدىغان سىنىپقا،_ دېدى رەنا. _ سىناپ ئاڭلاپ باقساڭلار بولىدۇ. ئەڭ بېشىدىن باشلايدىغان سىنىپمۇ ھازىر 4-دەرسكە كېلىپ بولدى. شۇنداقتىمۇ ئاڭلاپ بېقىڭلار، قاتنىشىپ قالساڭلار، ئۆتۈپ كەتكەن دەرسلەرنى تولۇقلاپ بېرىشكە ئورۇنلاشتۇرساق بولىدۇ،_ دېدى ئۇ سەل ئويلىنىۋىلىپ،_ 6- قەۋەتتىكى سىنىپقا چىقىڭلار. _ ماۋۇ پۇلنى ،_ دېدى كاسسىر بىر باغلام پۇلنى كورس باشلىقىغا تەڭلەپ،_ ئون بىر  ئادەمنىڭ پۇلى ، جەمئىي ئون ئىككى مىڭ بىر يۈز كوي. باشلىق پۇلنى ئېلىپ ئالدىدىكى تارتمىنى ئېچىپ سېلىپ قويدى. « دىمەك، ئوقۇش پۇلى بىرمىڭ بىر يۈز كوي ئىكەندە» دەپ ئويلىدىم ئىچىمدە. ئابدۇقەييۇم ئالدىغىراق چىقىپ: _ مەن كورسنىڭ ئوقۇش پۇلىنى تاپشۇرۇپ بولغان ئىدىم. تالوننى يۈتتۈرۈپ قويۇپتىمەن،_ دېدى ئۇ. _ زەينۇر، تىزىملىككە قاراپ بېقىڭ،_ دېدى باشلىق. _ ئىسمىڭىز نېمە؟_ دەپ سورىدى كاسسىر خاتىرىسىنى ئاچقاچ. _ ئابدۇقەييۇم. _ كىملىكىڭىز يېنىڭىزدا بارمۇ؟_ دېدى كاسسىر. ئابدۇقەييۇم كىملىكىنى چىقىرىپ ئۇنىڭغا بەردى. خاتىرە دەپتەردە ھەربىر ئوقۇغۇچىنىڭ ئىسمى، كىملىك نۇمۇرىمۇ بارئىكەن. ئۇ بىردەم ئاختۇرۇپ، ئاخىرى تاپتى. ئاندىن خاتىرىگە ئاساسەن، تالون كۆتىكىنى تېپىپ، قايتا بىر تالون يېزىپ بەردى. بىز قايتىپ چىقتۇق. _ دېمىدىممۇ؟_ دېدىم مەن ئابدۇقەييۇمغا،_ ئىشەنچلىك ئادەملەر تېخى تۈگەپ كەتكىنى يوق. _ شۇنداقكەن، ھەممە ئادەم مۇشۇنداق بولسا ياخشى بولاتتى،_ دېدى ئابدۇقەييۇم. بىز 6- قەۋەتكە  چىقتۇق. بۇ سىنىپمۇ 2-قەۋەتتىكى سىنىپتىن كۆپ پەرقلىنىپ كەتمەيتتى. بىز ئارقا تەرەپتىن ئورۇن تېپىپ ئولتۇردۇق. سائەتكە قارىسام 6 گە ئىككى مېنۇت قاپتۇ. _دەرسنى ھازىرلا باشلايدۇ،_ دېدى رەنا مېنىڭ سائەتكە قارىغىنىمنى كۆرۈپ. سول تەرىپىمىزدىكى ئىشىك ئېچىلىپ بىر ياش يىگىت چىقىپ دوسكىنىڭ ئالدىغا باردى. ئىشىك ئېچىلغاندا قارىسام، كىچىككىنە بىر ياتاق ئۆي ئىكەن. ئۇ كەلگەنلەرنى بىر يوقلىما قىلىۋىتىپ، دەرسىنى باشلاپ كەتتى. ئۇنىڭ ئىسمى ئابلىز بولۇپ، دەرسنى ئوبدان ئۆتىدىكەن. قىزىقىپ ئاڭلاپ ئولتۇرۇپ، بىر سائەت ۋاقىتنىڭ قانداق توشۇپ كەتكەنلىكىنى تۇيماي قاپتىمەن. سائەت 7 گە 10 مېنۇت قالغاندا، تەنەپپۇس بولدى. _ 10 مېنۇت ئارام ئېلىڭلار،_ دېدى ئابلىز ۋە ئارىمىزدىن ئۆتۈپ، ئارقىمىزدىكى بالكونغا كىرىپ كەتتى. 2- قەۋەتتە بۇ بالكوننى ئىشخانا قىلغان ئىدى. مەن بۇمۇ ئىشخانىمىدۇ دەپ قىزىقىپ ئارقىدىن كىردىم. بالكوندا كۆپ نەرسە يوق بولۇپ، بۇلۇڭدا بىرنەچچە يېشىك كىتاب ۋە باشقا ئۇششاق-چۈششەك نەرسىلەر تۇراتتى. بالكوننىڭ تورۇسنىڭ ئىككى تەرىپىگە تۆمۈر جازا بىكىتىلگەن بولۇپ،ئابلىز بىر كىچىك ئورۇندۇقنىڭ ئۈستىگە چىقىپ كىر يايىدىغان تانىنى چىگىۋاتقان ئىكەن. ئۇ مېنى كۆرۈپ ئىشىنى توختىتىپ، ئورۇندۇقتىن پەسكە چۈشتى. _ بايا كىر يۇيغان ئىدىم، بىر يېيىۋېتەي،_ دېدى ئۇ ۋە يېنىمدىن ئۆتۈپ ، بايا ئۆزى چىققان ياتاق ئۆيىنىڭ قېشىدىكى ھاجەتخانىغا كىرىپ كەتتى. بالكوننىڭ بىر بۇلۇڭىدا چىنىقىشقا ئىشلىتىلىدىغان پۇرژىنا ۋە بىرنەچچە ئېغىرلىق ئۆلچىمىدىكى  قول شىتانكىسى(哑铃) تۇراتتى. دېرىزىدىن سىرتقا قارىدىم. گۇگۇم چۈشكەن بولۇپ، ئۇدۇلدىكى بىنادىكى بەزى ئۆيلەردە چىراقلار يېقىلغان، بەزى ئۆيلەردە كىشىلەر تېلېۋىزور كۆرۈۋاتاتتى. ئابلىز  بىر داستا يۇيۇپ بولغان كىيملىرىنى ئەپچىقتى. _ سىز مۇشۇ يەردە تۇرامسىز؟_ دېدىم مەن. _ ھەئە، كورسنى قۇرغان بالا مېنىڭ ئاغىنەم بولىدۇ. شۇڭا ئۇ بۇ يەرنى ماڭا ھەقسىز تۇرۇشۇمغا ياتاق قىلىپ بەردى،_ دېدى ئۇ كىيىمنى يەنە بىر قېتىم سىقىۋىتىپ. _ ھە، _ دېدىم مەن،_ سىز چىنىقىپ تۇرىدىكەنسىز ھە؟ _ دېدىم مەن ۋە بىر قول شىتانكىسىنى ئېلىپ كۆتۈرۈپ باقتىم. خېلى ئېغىر ئىكەن. _ ھەئە،_ دېدى ئۇ ۋە ئورۇندۇققا چىقىپ كىيىمنى يايدى،_ ئالىي مەكتەپتىن تارتىپلا چىنىقىشنى داۋاملاشتۇرۇپ كېلىۋاتىمەن. _ شۇنداقمۇ،_ دېدىم مەن،_ بىر ئىشنى بۇنداق ئىزچىل داۋاملاشتۇرۇش تەس جۇمۇ. ئۇ ماڭا قاراپ كۈلۈپ قويدى. _ سىز يېڭى كەلدىڭىزمۇ؟_ دەپ سورىدى ئۇ يەنە بىر كېيىمنى ئېلىپ سىققاچ،_ بۇرۇن سىزنى كۆرمەپتىكەنمەن. _ مەن بۈگۈن سىناق دەرس ئاڭلاپ باققىلى كەلگەن،_ دېدىم مەن. _ ھە، قانداق دەرسىم يارىدىمۇ؟_ دېدى ئۇ ئىشىنى قىلغاچ. _ يارىدى، ئەتە كېلىپ تىزىملاتماقچى بولۇۋاتىمەن،_ دېدىم مەن. _ ياخشى بوپتۇ،_دېدى ئۇ ،_ تىل دېگەننى ياش چېغىدا ئۈگەنسە ياخشى بولىدۇ. مەن بىردەم ئۇنىڭ بىلەن پاراڭلىشىۋېتىپ، بالكوندىن قايتىپ كىردىم. تەنەپپۇس ۋاقتىمۇ توشۇپ قالغان ئىدى.  قارىسام، سىنىپتىكى ۋە ئۇياق-بۇياققا چىقىپ كەتكەنلەرنىڭ ھەممىسى ئۆز جايىغا كېلىپ ئولتۇرۇپ بولۇپتۇ. مەنمۇ جايىمغا كېلىپ ئولتۇردۇم. خېلى ئۇزاقتىن كېيىن، ئابلىز بالكوندىن قايتىپ كىردى. ئۇ دوسكا ئالدىغا كېلىپ ئوقۇغۇچىلارنى تىنچلاندۇردى. _ مېنىڭ پەسكە چۈشىدىغان ئازراق ئىشىم چىقىپ قالدى، سىلەر بىردەم كىتاپ كۆرۈپ تۇرۇڭلار. ئون مېنۇتقا قالماي قايتىپ كېلىمەن،_ دېدى ئۇ. ئۇ چىقىپ كەتتى. بىزدە كىتاپ بولمىغاچ، پاراڭلىشىپ ئولتۇردۇق. _ قانداق؟_ دېدى رەنا ماڭا،_ بۇ كورس بولامدىكەن؟ _ بولىدىكەن،_ دېدىم مەن. _ قاتنىشامدۇق؟_ دېدى رەنا. _ قاتنىشايلى. لېكىن پۇلى بەك قىممەتمۇ قانداق؟_ دېدىم مەن. _ بىز ئايلىق كورسلىرىغا قاتناشساق بولىدۇ،_ دېدى ئۇ ،_ شۇنداق قىلساق ئەرزان توختايدۇ. _ شۇنداق قىلايلى،_ دېدىم مەن. باشقا سىنىپلارنىڭ تېكىست ئوقۇغان ئاۋازلىرى ئاڭلىنىپ تۇراتتى. ئالاھەزەل 10 مېنۇتتىن كېيىن، ئابلىز قايتىپ كىردى. پەشتاقتىن يۈگۈرەپ چىققان بولسا كېرەك، ھاسىراپ تۇراتتى. ئۇ دەرسىنى باشلاپ كەتتى. بۈگۈن بىر كۈن مەكتەپتە دەرس ئاڭلىغانلىق سەۋەبىدىن بولسا كېرەك، بەك چارچاپ كەتكەن ئىدىم. بۇ سائەتلىك دەرس ماڭا خوشياقمىدى. شۇڭا ۋاقىت تېزراق توشسىكەن دەپ سائەتكە تولا قارايتتىم. ئابلىزنىڭمۇ دەرس سۆزلىگىچە سائىتىگە بىرنەچچە قېتىم قارىغانلىقىنى كۆردۈم. «ئۇنىڭغىمۇ بۇ سائەتلىك دەرسنى ئۆتۈش خوشياقمايۋېتىپتۇ-دە.» دەپ ئويلىدىم ئىچىمدە. بىردەمدىن كېيىن، سائەتكە قارىسام، دەرستىن چۈشۈشكە 10 مېنۇت قاپتۇ. مېنىڭ تاقىتىم تاق بولغان ئىدى. شۇ ئارىدا ئابلىزنىڭ يانفونى سايرىدى. _ كەچۈرۈڭلار،_ دېدى ئۇ يانفوننى ئېلىپ قاراپ،_ باشلىقتىن كەپتۇ، ئالمىسام بولمايدۇ. _ ۋەي،_ ئۇ تېلفوننى قۇلىقىغا تەڭلەپ بالكونغا ماڭدى،_ توختا،_ دېدى ئۇ ۋە بالكونغا چىقىپ ئىشىكنى ياپقاندىن كېيىن ،_ ھە، ئەمدى گەپ قىلە. بالكوننىڭ ئىشىكى ئېچىلغاندا سىرتقا قارىسام ، ئاللىقاچان قاراڭغۇ چۈشۈپ بولغان ئىكەن. ئوقۇغۇچىلار ۋاراڭ-چۇرۇڭ قىلىشقا باشلىدى. مەن بۇ تېلېفوننىڭ كەلگىنىدىن خوش بولدۇم. «ئۇ سۆزلىشىپ بولغۇچە ۋاقىتمۇ توشىدۇ، شۇنىڭ بىلەن قايتىمىز. قورساقمۇ ئېچىپ كەتتى، نېمە تاماق يېسەم بولار؟ كەچ بولغاندىن كېيىن ، سۇيۇق_ سەلەڭرەك بىر نەرسە ئىچسەم بولاتتى. » دەپ ئويلايتتىم ئىچىمدە. _ ۋەي! ۋەي!_ ئابلىزنىڭ توۋلىغان ئاۋازى ئاڭلاندى،_ نېمە بولدى؟ گەپ قىلە! ۋەي! بىردەمدىن كېيىن، ئۇ بالكوندىن قايتىپ كىردى، قېشىمىزدىن ئۆتكۈچە ئۇنىڭ بىرنېمىلەرنى دەپ غودۇڭشىغىنىنى ئاڭلىدىم. ئۇ دوسكىنىڭ قېشىغا بېرىپ دەرسىنى داۋاملاشتۇردى. بىردەمدىن كېيىن ۋاقىت توشتى. ھەممىمىز ئورنىمىزدىن تۇرۇپ قايتايلى دەۋاتساق، بىنانىڭ كارىدورىدا بىر پاتىپاراقچىلىق، ۋاراڭ-چۇرۇڭ كۆتۈرۈلۈپ كەتتى. _ نېمە بولغاندۇ؟_ دېدى ئابدۇقەييۇم. _ چۈشۈپ قاراپ باقايلى،_ دېدىم مەن. بىز پەشتاقتىن چۈشۈپ، 3-قەۋەتكە كەلگەندە ، ئۆتەلمەي توسۇلۇپ قالدۇق. پەشتاقتائادەم تىقما-تىقماق بولۇپ كەتكەن ئىدى. _ نېمە بوپتۇ؟_ دەپ سورىدى ئابدۇقەييۇم ئالدىدىكى بىر بالىدىن. _ بىرسىنى ئۆلدى دەيدۇ،_ دېدى ئۇ،_ مەنمۇ ئېنىق بىلمىدىم. ئابدۇقەييۇم ئىتتىك ماڭا قارىدى. مەن بۇنى ئاڭلاپ چۆچۈپ كەتتىم. كۈچەپ ئالدىغا ئىتتىرىپ، قىسىلىپ ئالدىغا ئۆتمەكچى بولدۇم. لېكىن مۇمكىن بولمىدى. ھەممە ئادەم تەڭ گەپ قىلاتتى. لىكىن ھىچكىمنىڭ گېپىنى ئېنىق ئاڭلىغىلى بولمايتتى. كارىدۇر ئادەمنىڭ كۆپلىكىدىن تىنجىق بولۇپ كەتكەن ئىدى. بىر ئوقۇتقۇچى چىقىپ كۆپچىلىكنى تەشكىللىدى. _ ھەممىڭلار ئۆزۈڭلارنىڭ سىنىپىغا كىرىپ، ئورنۇڭلاردا جىم ئولتۇرۇڭلار. ھازىر ساقچىلار كېلىدۇ. ھەممىمىز سىنىپلىرىمىزغا قايتىپ كىردۇق. رەنا بىلەن زۇلپىيە ھېچنىمىنى ئۇقالمىغان ئىدى. _ نېمە بوپتۇ؟_  دېدى رەنا. _ بىرسى ئۆلگەن ئوخشايدۇ،_ دېدىم مەن. _ ۋاي خۇدايىم،_ دېدى رەنا،_ كىم ئۆلۈپتۇ؟ _ بىلمىدىم،_ دېدىم مەن،_ ئۇلارنىڭ ئېيتىشىچە، ساقچىلار ھازىر كېلىدىكەن. _ سەن بۇ ئىشقا قاراپ تۇرماسسەن ؟_ دېدى ئابدۇقەييۇم. _ ساقچىلار كەلسە مېنى بۇ ئىشقا قول تىققىلى قويمايدۇ،_ دېدى مەن دولامنى قىسىپ قويۇپ،_ قاراپ تۇرماي باشقا ئامال يوق. بىز ئورنىمىزغا كېلىپ ئولتۇردۇق.  سىنىپنىڭ ئىچىدە غۇلغۇلا باشلىنىپ كەتكەن ئىدى. بىردەمدىن كېيىن بىر ساقچى سىنىپقا كىردى. ئۇنى كۆرۈپ ھەممەيلەن جىم بولۇشتى. ئۇ ئوتتۇرىغا چىقىپ: _ مەن يوقلىمىدىن ئىسمىڭلارنى چاقىرىمەن، ئىسمى چىققانلار قايتسا بولىدۇ،_ دېدى. يوقلىمىدىن مەن بىلەن رەنادىن باشقا ھەممىسىنىڭ ئىسمى چىقتى. ئىسمى چىققانلار بىر-بىرلەپ سىنىپتىن چىقىپ كەتتى. ئابدۇقەييۇم بىلەن زۇلپىيە بىزگە قاراپ قويۇپ چىقىپ كەتتى. ھېلىقى ساقچى رەنا ئىككىمىزنىڭ قېشىغا كېلىپ: _ سىلەرنىڭ ئىسمىڭلار نېمىشقا بۇ سىنىپنىڭ يوقلىمىسىدا يوق؟_ دەپ سورىدى. _ بىز بۈگۈن بۇ كورسنىڭ دەرسىنى ئاڭلاپ باققىلى كەلگەن،_ دېدىم مەن چۈشەندۈرۈپ. _ ھە، شۇنداقتىمۇ ھازىرچە قايتساڭلار بولمايدۇ،_ دېدى ئۇ،_ مەن بىلەن مېڭىڭلار. كارىدۇردا ئابدۇقەييۇم ساقلاپ تۇرغان ئىكەن. ئۇ مېنى كۆرۈپ: _ بىز بىنانىڭ ئالدىدا ساقلاپ تۇرايلى،_ دېدى ۋە پەسكە چۈشۈپ كەتتى. رەنا بىلەن مەن ھېلىقى ساقچىنىڭ كەينىدىن 2- قەۋەتتىكى سىنىپقا چۈشتۇق. ئۇ يەردە بارلىق ئوقۇتقۇچىلار ۋە ئونچە بالا تۇراتتى. پۈتۈن كورستىن مۇشۇ ئون نەچچە بالىلا ئېلىپ قىلىنغان ئىدى. ئۇلار بىزنى سىنىپتىكى ئورۇندۇقلاردا ئولتۇرغۇزۇپ قويدى. ئاندىن ھېلىقى ساقچى پۇقراچە كىيىم كېيگەن، بىزگە ئارقىسىنى قىلىپ تۇرغان بىر كىشىنىڭ ئالدىغا بېرىپ: _ ئۈستىدىكى قەۋەتلەردىكى دەرسكە قاتناشقان بارلىق ئوقۇغۇچىلار قايتۇرىۋىتىلدى،_ دەپ دوكلات قىلدى. ئۇ كىشى بېشىنى لىڭشىتىپ قويدى. ئۇ باشلىق بولسا كېرەك. ئەھۋالدىن قارىغاندا، قاتىللىق بالكوندا يەنى كورسنىڭ ئىشخانىسىدا يۈز بەرگەندەك قىلاتتى. بالكوننىڭ ئىشىكىنىڭ ئەتراپىدا ساقچىلار رەسىمگە تارتىش ۋە بارماق ئىزى چۈشۈرۈش بىلەن ئالدىراش يۈرىشەتتى. ھېلىقى باشلىق بىز تەرەپكە ئۆرۈلۈپ قارىۋىدى، ئۇنى تونۇدۇم. ئۇ بۇرۇن مەن دېلو پاش قىلغاندا، شۇ دېلوغا مەسئۇل بولغان ساقچى باشلىقى ئىلھام ئىدى. ئۇمۇ مېنى كۆرۈپ تونۇدى. ئۇ ۋاقىتتا بىز خېلى چىقىشىپ قالغان ئىدۇق. _ ۋوي!_ دېدى ئۇ ھەيرانلىقتا،_ بۇ بىزنىڭ كىچىك رازۋېتچىكىمىز ئەمەسمۇ؟ سەن بۇ يەردە نېمە قىلىپ يۈرىسەن؟ _ مەن بۇ كورسنىڭ دەرسىنى ئاڭلاپ باققىلى كەلگەن ئىدىم،_ دېدىم مەن جاۋابەن. _ مەن سېنى بۇ شەھەردە نېمە قىلىسەن دېمەكچى،_ دېدى ئۇ. _ مەن بۇيىل ئالىي مەكتەپكە ئوقۇشقا كەلدىم ،_ دېدىم مەن،_ سىزمۇ بۇ شەھەردە تۇرىسىزغۇ؟ _ مەن بۇ شەھەرگە يۆتكىلىپ كەلگىلى يېرىم يىل بولاي دېدى،_ دېدى ئۇ ،_ ھېلىقى دېلودىن كېيىنلا يۆتكىلىپ كەلگەن. _ ياخشى بوپتۇ،_ دېدىم مەن،_ بۇ يەردە نېمە ۋەقە يۈز بېرىپتۇ؟ _ بۇياققا كەلگىن ،_ دەپ مېنى بىر چەتكە تارتتى ئۇ،_ سېنىڭ بولغىنىڭمۇ ياخشى بولدى، بۇ دېلوغا قانداق قارايسەن؟ _ مەن بۇ دېلودىن تامامەن بىخەۋەرمەن،_ دېدىم مەن،_ نەق مەيداننى كۆرۈپ باقسام بولامدۇ؟ ئۇ بىردەم ئويلىنىۋالغاندىن كېيىن: _ بولىدۇ، لېكىن ھېچنىمىگە چېقىلما،_ دەپ مېنى باشلاپ بالكونغا چىقتى. خىزمەت ئۈستىلىنىڭ بۇ تەرىپىدە كورس باشلىقى گەجگىسى تامغا يۆلەنگەن ھالدا ياتاتتى. ئۇنىڭ پىشانىسى قاڭشىرى بىلەن قوشۇلۇپ ماكچىيىپلا كەتكەن، يۈزى قانغا بويىلىپ كەتكەن ئىدى. ئۇنىڭ يېنىدىكى يەرگە يانفونى چۈشۈپ قالغان ئىدى. ئىشخانىدىكى باشقا نەرسىلەر ئۆز پېتى تۇراتتى. ئۇ يىقىلغان جاينىڭ ئۇدۇلىدىكى دېرىزىنىڭ قانىتى ئوچۇق تۇراتتى. مەن بالكوندىن قايتىپ چىقتىم. _ قاچان يۈز بېرىپتۇ؟_ دەپ سورىدىم مەن ساقچى باشلىقىدىن. _ سائەت7 دىن 40 مېنۇتلار ئۆتكەندە،_ دېدى ئۇ،_ ئۇ چاغدا كورس باشلىقى ئەلى تېلېفوندا ئابلىز مۇئەللىم بىلەن سۆزلىشىۋاتقان ئىكەن. ئۇنىڭ ئېيتىشىچە، تېلېفوندا سۆزلىشىۋاتقاندا، بىر گۈلۈپپىدە قىلغان ئاۋاز ئاڭلىنىپ، پاراڭ ئۈزۈلۈپ قاپتۇ. شۇنىڭدىن كېيىن، ئابلىز قانچە تولىسىمۇ، جاۋاپ كەلمەپتۇ. تېلېفوننى قويۇۋېتىپ قايتا ئۇرسا ئېلىنماپتۇ. شۇنىڭ بىلەن ئۇ قايتىپ دەرسىنى ئۆتۈۋېرىپتۇ. _ تېلېفوننى باشتا كىم ئۇرۇپتۇ؟ _ ئۆلگۈچى ئۇرۇپتۇ. _ ئۇ نېمىشقا ئىشخانىنىڭ مۇقىم تېلېفونىنى ئىشلەتمىگەندۇ؟ _ تېلېفون بۈگۈن بۇزۇلۇپ قالغان ئىكەن. _ باشقا بىرەر يىپ ئۇچى بارمۇ؟_ دەپ سورىدىم مەن يەنە ساقچى باشلىقىدىن،_ بىرەر نەرسە بايقالدىمۇ؟ _ كىرىسلونىڭ قېشىدىن ماۋۇ تالوننى تېپىۋالدۇق،_ دېدى ئۇ بىر سۇلياۋ خالتا ئىچىگە سېلىنغان تالوننى ماڭا كۆرسىتىپ،_ لېكىن بۇنىڭ دېلو بىلەن ئالاقىسى بولماسلىقى مۇمكىن. مەن ئۇنى قولۇمغا ئېلىپ قارىسام، بۇ  ئابدۇقەييۇمنىڭ ھېلىقى يۈتتۈرۈپ قويغان تالونى ئىكەن. « قىززىق ئىش بولدى-دە بۇ » دەپ ئويلىدىم مەن ئىچىمدە. _ ئۇندىن باشقا كاسسىرنىڭ ئېيتىشىچە، بۈگۈن ئۇ ئون ئىككى مىڭ بىر يۈز يۈەن پۇلنى ئۆلگۈچىگە تاپشۇرغان. ئۆلگۈچى ئۇنى تارتمىسىغا سېلىپ قويغان. لېكىن  ئۇ پۇل ھازىر يوقاپ كەتكەن. _ دېمەك ، بۇ بىر پۇل ئۈچۈن قىلىنغان قاتىللىق ئىكەندە؟_ دېدىم مەن. _ شۇنداق. بۇنى بۇ پۇلنى بىلىدىغان بىرسى قىلغان. بولمىسا پۇل بارلىقىنى قانداق بىلىدۇ؟_ دېدى ساقچى باشلىقى. _ ئۇ ئۆلۈشتىن بۇرۇن، ئۇنىڭ قېىشىغا كىرگەنلەر بارمىكەن؟_ دەپ سورىدىم مەن. _ ئاۋۇ ئېلىپ قىلىنغان ئوقۇغۇچىلار مۇشۇ بالكونغا يېقىن ئولتۇرغان ئوقۇغۇچىلار،_ دېدى ئۇ،_ بايا ئۇلاردىن سورىدۇق. ھېچكىم بالكونغا يىقىن يولىماپتۇ. دېلو يۈز بەرگەندە، ئۇلار ئۈنلۈك ئاۋازدە تېكىست ئوقۇۋاتقان بولغاچقا، بالكوندىن چىققان ئاۋازنىمۇ ئاڭلىماپتۇ. دەرستىن چۈشكەندىن كېيىن، تۇرسۇن مۇئەللىم ئىشخانىغا كىرگەندىلا،  ئاندىن جەسەتنى بايقاپتۇ. _ ئۇنى ئوبدان سوراق قىلدىڭلارمۇ؟_ دەپ سورىدىم مەن. _ سوراق قىلدۇق. ئۇ كىرىپ قارىسا ئۆلگۈچى يەردە ياتقان، ئۇ ئۇنى چاقىرىپ، تۈرتۈپ باققان. ئۆلگەنلىكىنى بىلگەندىن كېيىن ساقچىغا مەلۇم قىلغان،_ دېدى ئۇ. _ سىز قانداق ئويلاۋاتىسىز؟_ دەپ سورىدىم مەن ساقچى باشلىقىدىن. _ مېنىڭچە قاتىل دېرىزىدىن كىرگەن بولۇشى مۇمكىن، چۈنكى بىرىنجى قەۋەتنىڭ بالكونىنىڭ دېرىزىلىرىغا رىشاتكا بىكىتىلگەن، شۇڭا 2-قەۋەتكە چىقىش ئاسان.  ئىگەللىشىمىزچە بالكوننىڭ ماۋۇ ئوچۇق تۇرغان دېرىزىسى كۆپ ھاللاردا ئوچۇق تۇرىدىكەن. قاتىل ئۆلگۈچى تېلېفون سۆزلىشىۋاتقاندا، رىشاتكىدىن يامىشىپ، 2- قەۋەتنىڭ دېرىزىسىگە چىققان، بۇ چاغدا ئۆلگۈچى شەپىنى سىزىپ دېرىزىدىن سىرتقا قارىغان. دەل شۇ چاغدا قاتىل قاتىللىق قورالى بىلەن ئۇنىڭ بېشىغا قاتتىق ئۇرغان. ئۆلگۈچى يىقىلغاندىن كېيىن، بالكونغا كىرىپ، تارتمىدىكى پۇلنى ئېلىپ كەتكەن.  شۇڭا قاتىل بۇ كورسنى ئوبدان بىلىدىغان، ئىچكى قىسىمدىكى ئادەم. بۈگۈن كورسقا كەلمىگەن قاسىم مۇئەللىم ئەڭ گۇمانلىق، مەن ئۇنى تۇتۇپ كېلىشكە ئۇنىڭ ئۆيىگە ئادەم ئەۋەتتىم،_ دېدى ساقچى باشلىقى. _ قاتىللىق قورالى نېمە ئىكەن؟_ دەپ سورىدىم مەن. _قاتىللىق قورالىنى تېخى تاپالمىدۇق. قاتىل چوقۇم ئۇنى ئۆزى بىللە ئېلىپ كەتكەن،_ دېدى ئۇ ،_ لېكىن ئۆلگۈچىنىڭ يارىسىدىن قارىغاندا، ئۇ ئېغىر ھەم قاتتىق بىر نەرسە. شۇڭا بىز ئۇنى بولقا بولۇشى مۇمكىن دەپ ئويلاۋاتىمىز. _ ئەمما بولقا بىلەن دېرىزىگە ياماشقىلى بولارمۇ؟_ دېدىم مەن،_ يەنە دېرىزە سىرتىدا بىر قولى بىلەن ئېسىلىپ تۇرۇپ، يەنە بىر قولىدا بولقا بىلەن ھۇجۇم قىلىش مۇمكىن بولارمۇ؟ _ بۇنى ھازىرلا سىناپ باقساق بولىدۇ،_ دېدى ئۇ،_ ئەكبەر! بىر ساقچى ئۇنىڭ يېنىغا يۈگۈرۈپ كەلدى. داۋامى بار.......

sazguri

	يەنە شۇ  داۋامى بار ....

erkinaz

	ئاپتور جاۋابىنى بويلاپ 1قەۋەت  sazguri كە 2011-12-25 06:35 PMئەۋەتىلدى  : يەنە شۇ  داۋامى بار ....    داۋامىنى كۆرگۈڭىز يوقمىتى؟؟  كۆرگۈڭلار بولمىسا  داۋامىنى يوللىماي بولدى...

MUHAPIZATQI

	ئاخىرى يوللاپسىزدە

kaqmixlar

	ئاپتور جاۋابىنى بويلاپ 2قەۋەت  erkinaz كە 2011-12-25 06:50 PMئەۋەتىلدى  : داۋامىنى كۆرگۈڭىز يوقمىتى؟؟  كۆرگۈڭلار بولمىسا  داۋامىنى يوللىماي بولدى...   ئاخىرنى قاچان يوللايسىز؟

كارۋان

	مەن مۇشۇنداق ھىكايىلەرگە بەك قىزىقىمەن بىراق تۈركىيىنىڭ كىنولىرىدەك داۋامى بار.ياكى گېزىت-ژورناللاردىكىدەك داۋامى كىلەر ساندا دىيىلسە بېشىم ئاغرىيدۇ.رەخمەت.

روھزاد

	ھەقىقەتەن ياخشى چىقىپتۇ، بۇرۇن مۇشۇ تۈردىكى ئامېرىكىلىق مەلۇم يزغۇچىنىڭ چاتما رازۋېتكا ھېكايىلىرىنى خېلى ئوقۇپ قوياتتىم.  ۋەقەلىكنى ناھايىتى ئۇستىلىق بىلەن ئورۇنلاشتۇرۇپسىز.     بۇنى ئابدۇقەييۇمنىڭ يانچۇقىنى سوقىۋەتكەن يانچۇقچىغا باغلاپ، ئۇنىڭ مېڭىپ ئۆتكەن يول بويىدىكى تېلېكامىراغا چۈشكەن يانچۇقچى.....كىچىك رازۋېتكىچىغا بولغان تەھدىت....ئۇستىلىق بىلەن ئۆزىنى چەتكە ئېلىش...توپ ئىچىدە دۈشمەننىڭ ئادىمى بار،  قاتىل رەنانىڭ تونۇشى ...كۇرسنىڭ تاقىلىشى...ئەسلىي ھەممىنى ئابلىز پىلانلىغان دېگەندەك تەرەققىي قىلىشى مۇمكىن. پەقەتلا پەرەز جۇمۇ، ئەگەر داۋامىنى يازمىغان بولسىڭىز بۇنىڭ مەلۇم پايدىسى بوپ قېلىشى مۇمكىن.

YELAN

	مۇشۇنداق داۋامى بار ئەسەرلەردىن ئالامەت زېرىكتىغۇ كىشى.

salkindax

	قاتىل دەرىس ئۆتكەن ئوقۇتقۇچى ئابلىىز بولۇشى مومكىن !!

Pinhangul

	چاققان يوللاڭچۇ،بەك قىزىقىپ قالدىم...