توقسۇن توي بېيىتلىرى

aybanum

	توي بېيىتى ئېيتىشش توقسۇن ، تۇرپاندىكى ئۇيغۇرلار ئارىسىدا كەڭ ئومۇملاشقان . مەن تۆۋەندە ئاڭلىغانلىرىمنى تورداشلارنىڭ ھوزۇرىغا سۇندۇم . دوپپا كەيسەم بېشىمغا شۇنداق ياراشتى، ئوسما قويسام قېشىمغا ھەجەپ ياراشتى. چاچ تەڭگە ئاسسام چېچىمغا ھەممە ئادەم قاراشتى، 2 قۇدا تويلۇشۇپ بىر- بىرىگە ياراشتى . قىز تەرەپ ئالتۇن بەردۇق ئالسىلا، گۆھەر بەردۇق ئالسىلا . قولىڭىزدىكى جاھان ئەينىكىنى ، يۈرىكىڭىزگە ياقسىلا . قىزىمىز بالىلىق بۇلۇپ قالسا، ئەللەي بالام ئەللەي دەپ، ۋارىسىم دەپ باقسىلا . يىگىت ئاپىسى قىزىم كۆينەك كىيىۋاپتۇ، گۈلى چوڭ- چوڭ تاۋاردا. كۆز تەككىدەك بۇپقاپسىز قىزىم، تۇرۇپ قالماڭ تالادا . گۈلى غۇنچىدىن چىقتى ، كۈن شەرقتىن چىقتى ، بۇ توينى قىلىۋېلىپ، ئەمدى ھاردۇقۇم چىقتى . ئوتتۇرىدىكى بېيىت ئېيتقۇچى ھەممە ئۆيدە بىردىن جۈمەك ، سۇلىرى سۈزۈك ، قۇدىڭىز سىزگە يادىكار قىلدى ، جىڭ ئالتۇندىن ئۈزۈك. ئوڭ قولىڭىزغا سالسىڭىزمۇ يارىشىدۇ بۇ ئۈزۈك، سول قولىڭىزغا سالسىڭىزمۇ يارىشىدۇ بۇ ئۈزۈك. ماڭا سەپ قويسىمۇ يارىشىدۇ بۇ ئۈزۈك . ئوغۇل تەرەپ ئالتۇن بەردىلە بىزگە،گۆھەر بەردىلە بىزگە ، تولۇن ئايدەك بىر قىزنى يادىكار قىلدىلا بىزگە. چىن قەلبىمىزدىن رەھمەت ئېيتىمىز سىزگە. مىھمانلار ئېيتىدۇ سۇمبۇلغا ئوخشاش چاچلىرى، گۈلگە ئوخشاش بويلىرى . نىمانداق قىزىپ كەتتى ، ئىككى ياشنىڭ تويلىرى . يىگىت ئانىسى ئالتۇن دوپپام بېشىمدا ، باغ ئوسمىسى قېشىمدا. تولۇن ئايدەك كېلىنىم، ئەمدى مىنىڭ قېشىمدا . مېنىڭ ئوغلۇم مۇلايىم، كېلىن قىزىم تولۇن ئايىم. كېچە – كۈندۈز تىلىۋىدۇق، ئەمدى بەردى خۇدايىم . چىشىنى ئۈنچە دەرمەن، بويىنى غۇنچە دەرمەن. سەھەرلەردە سالامغا كىرسە، بىھىشنىڭ گۈلى دەرمەن . مىھمانلار ئېيتىدۇ بازار ئالدى چوڭ كۆۋرۈك ، ئىشىك ئالدى دۆڭ كۆۋرۈك . بۇ دۇنيادا بارمىدۇ ، كېلىن قىزدەك ئايتۆرۈك . قىز تەرەپ ئېيتىدۇ ھاۋادا ئۇچۇپ يۈرگەن لاچىن بالاسى، ئۆزلىرىنى خالاپ چۈشتى كۆزۈم قاراسى. ئوڭ قولىدا ئالما قىلسۇن جېنىم ئاپاسى، سەھەر قوپۇپ دۇئا قىلسۇن ئاخۇن ئاتاسى . ئەتە –ئاخشام قاراپ قويسۇن خولۇم – خوشناسى. قىز ئېيتىدۇ بىدە كۆكى ، بىدە كۆكى بىدە يەمدىلا، بىزنىڭ ئۆيلەر سۇ ياقىسى ، ئۆتەلەمدىلا. ئاتام كۆڭلى ئىگىز دالان چىقالامدىلا ، ئاپام كۆڭلى ئالتۇن غۇلۇپ ئاچالامدىلا. مېنىڭ كۆڭلۈم مىڭ سەر ئالتۇن ئالالامدىلا. يىگىت ئېيتىدۇ بىدە كۆكى ، بىدە كۆكى ، بىدەنى يەرمىز، ئۆيلىرىڭىز سۇ ياقىسى ، كۆۋرۈك سالۇرمىز. ئاتا كۆڭلى ئىگىز دالان ، تاتما قويارمىز ، ئاپا كۆڭلى ئالتۇن غۇلۇپ ، كىلىت سالۇرمىز. سىزدەك قىزنى جاننى قويۇپ بىر كۈن ئالارمىز. ئوغۇل تەرەپ ئېيتىدۇ بىغىمدىكى ئالما شاخى ، بىرى ئىگىز ، بىرى پەس . ئىككى قۇدا توي قىلدۇق، بىرى سۈننەت ، بىرى پەرز. بىزنىڭ ئۆيلەر دالدىدا ، ئاقتاغ مەكتەپنىڭ ئالدىدا. خۇدا بىزنى تۇغقان قىۋاتتى ، نىكاھ ، تەقدىرلەر ئالدىدا . چاڭگال سېلىپ ئۈزۈۋالدۇق لاچىندەككىنە، قولىمىزغا قوندۇرۇۋالدۇق قۇرغۇيدەككىنە . چىكىمىزگە قىسىۋالدۇق گۈلدەككىنە ، شاخىمىزغا قوندۇرۇۋالدۇق بۇلبۇلدەككىنە . قىز تەرەپ ئېيتىدۇ ئەل يىغىلسا باغ بۇلۇر ، قۇم يىغىلسا تاغ بۇلۇر ، قىزىمىز بارغان ھامان ، ئۆيلىرىڭىز گۈل بۇلۇر . توقسۇن ، تۇرپان بىر – بىرى بىلەن تويلاشقاندا ئېيتىدىغان بېيتلار قارغۇجا ئاستىن سۇلىرى ، باغ ئارىلاپ ئاقىدۇ ، ئوغۇل قىزلىرىنى كىشمىش ، بىجاقى بىلەن باقىدۇ. كىشمىش يىگەن باللىرى بىر- بىرىدىن ئاڭلىق ، تۇرپان ، توقسۇن ئۈزۈملىرى دۇنياغا داڭلىق گەپ – سۆزلىرى ئۆزلىرىلەپ ئۈزۈمدەك تاتلىق . يىگىت ئانىسى: كۆز تەگمىسۇن جېنىم قىزىم ، ئېسىپ قوياي تىلتۇمار . چىراق بۇلۇپ يانسىڭىز قىزىم ، پىلىك بۇلۇپ كۆيەي قىزىم . چىچەك بۇلۇپ ئېچىلسىڭىز قىزىم ، بۇلبۇل بۇلۇپ قوناي قىزىم . ئېيتىپ بەرگۈچى : توقسۇن ناھىيە يىلانلىق يېزا ئاقتاغ ئوتتۇرا مەكتەپتىن پىنسىيىگە چىققان ئوقۇتقۇچى رەشىدىخان رايدىن

hvsniya

	ساقلىۋالدىم، سىڭلىمنىڭ تويى بولماقچى ئىدى، چوقۇم ئەسقاتىدۇ، قۇدىلار ئالدىدا چېنىپ قالمايلى دەيمەن

zapar

	مانى ئاڭلىماپتىكەنمەن، ياخشى ئۆرىپ- ئادەتكەن، توينى راسا قىزىتقۇدەك.

XERHAN

	ھە ھە .......مانا مۇنداقمۇ قوشاق توقامدا سىلە تەرەپتە؟ .....

arkin~kux

	ۋاي ۋاي ۋاي ۋاي ۋاي ........ نىمانداق كىلىشكەن قوشاق ئۇ؟ مەن راسلا كۈرۈپ باقماپتىكەنمەن. ئەجرىڭىزگە بارىكاللا.

yalkun085

	قىزىم كۆينەك كىيىۋاپتۇ،    گۈلى چوڭ- چوڭ تاۋاردا. كۆز تەككىدەك بۇپقاپسىز قىزىم، تۇرۇپ قالماڭ تالادا . .

qaplin

	مەن باردىن پاقىلاققا مەيدەمنى ياقىلاققا توقسۇنلۇق تىگىۋاپتۇ تۇرپانلىق ساقاللىققا دادۇڭدىن يانتاق تەردىم نەچچە قۇچاق نەچچە قۇچاق توقسۇندىن خاتۇن ئالدىم ئاغزى مايماق ئاغزى مايماق

fatima

	ئەجەپ ياخشى ئۆرۈپ ئادەت باركىنا بۇ يۇرۇتلاردا !بۇ قۇشاقلار بىلەن تويمۇ راسا قىزىغۇدەك.

吾日古丽

	توقسۇن ، تۇرپان تويىنىڭ ئەڭ قىزىيدىغان يېرىدە بۇ بېيىت ئېيتىشىش.

aybanum

	تورداش دوستلارنىڭ مېنى ئىلھاملاندۇرغىنىغا رەخمەت ، بۇ قوشاقلارنىڭ يەنە داۋامى بار ، يەنە يوللايمەن .