ئەزىمەتلىرىمىز شىنجاڭدا

bugaltir

	ئەزىمەتلىرىمىز شىنجاڭدا    ھەممىمىزگە مەلۇم، بىر تۈركۈم ئۇيغۇر پۇتبولچىلىرىمىز دۆلەت پۇتبول كوماندىسىدا، دۆلەت ئولىمپىك كوماندىسىدا، جۇڭگو دەرىجىدىن تاشقىرى پۇتبول بىرلەشمە مۇسابىقىسىدە ھەمدە جۇڭگو B ،A دەرىجىلىكلەر پۇتبول بىرلەشمە مۇسابىقىلىرىدە ئۆز كارامىتىنى نامايەن قىلىپ، ھەممىنىڭ دىققەت-ئېتىبارىنى قوزغىدى. ھەتتا مەركىزىي تېلېۋىزىيە ئىستانسىسىنىڭ داڭلىق رىياسەتچىلىرىمۇ بۇ ئەزىمەتلەرگە يۇقىرى باھالارنى بەردى. يېقىندا، بۇ ئەزىمەتلىرىمىز پۇتبول مۇسابىقىلىرى توختىغان پۇرسەتتىن پايدىلىنىپ، شىنجاڭغا قايتىپ، ئۇلارغا ئۇزۇندىن بۇيان تەقەززا بولۇپ تۇرغان پۇتبول مەستانىلىرى بىلەن دىدارلاشتى، پائالىيەتلەرگە قاتناشتى. «ئۈرۈمچى كەچلىك گېزىتى» نىڭ مۇخبىرلىرى ئەنۋەر ئەزىز، ئېلزات ئىلھاملار «پۇتبول چولپانلىرىمىز ئۈرۈمچىگە جەم بولدى» ماۋزۇلۇق تەپسىلىي خەۋىرىدە بۇ پۇتبولچىلىرىمىزنىڭ ھاياتىنى تونۇشتۇرۇپ ئۆتۈپتۇ. تۆۋەندە بۇ ئەزىمەتلىرىمىز بىلەن تونۇشۇپ چىقايلى: * بارى مۇھەممەتئېلى بارى مۇھەممەتئېلى 1989-يىلى 10-ئاينىڭ 27-كۈنى تۇغۇلغان. 2003-يىلى شىنجاڭ «سۇڭ چىڭلىڭ» پۇتبول تەربىيەلەش مەكتىپىدە مەشىقنى باشلىغان. 2005-يىلى شىنجاڭ كوماندىسىنىڭ ئەزاسى سۈپىتىدە مەملىكەتلىك تەنھەرىكەت مۇسابىقىسىگە قاتنىشىپ، شۇ نۆۋەتلىك مۇسابىقىدىكى «ئەڭ چاقنىغان يۇلتۇز» بولۇپ باھالانغان. 2007-يىلى «شىنجاڭ تەنتەربىيە لاتارىيەسى» پۇتبول كوماندىسىغا تاللانغان ھەمدە غوللۇق ئەزاسى سۈپىتىدە 2007-، 2008-يىللىق مۇسابىقە پەسلىدە، جۇڭگو B دەرىجىلىكلەر پۇتبول بىرلەشمە مۇسابىقىسىگە قاتناشقان. 2009-يىلى خاڭجۇ «لۈچىڭ» كوماندىسىغا تاللىنىپ، 2010-، 2011- يىللىق مۇسابىقە پەسىللىرىدە جۇڭگو دەرىجىدىن تاشقىرى پۇتبول بىرلەشمە مۇسابىقىسىدە ھەمدە ئاسىيا چېمپىيونلۇق لوڭقىسى مۇسابىقىلىرىدە ماھارىتىنى كۆرسىتىپ، ھەممەيلەننىڭ ئېتىراپ قىلىشىغا ئېرىشكەن. 2010-يىلى 21 ياشلىقلار دۆلەت كوماندىسىغا تاللانغان. * ئەكرەم ئەخمەت ئەكرەم ئەخمەت 1981-يىلى 9-ئاينىڭ 22-كۈنى تۇغۇلغان. 1999-يىلىدىن باشلاپ قەشقەر پېداگوگىكا ئۇنىۋېرسىتېتىدا توپ ئوينىغان. 2003-يىلى ئالىي مەكتەپنى تاماملاپ، شىنجاڭ تېلېۋىزىيە ئىستانسىسىغا خىزمەتكە ئورۇنلاشقان. 2006-يىلى شىنجاڭ تەنتەربىيە لاتارىيەسى پۇتبول كوماندىسىغا تاللانغان ھەمدە غوللۇق ئەزاسى سۈپىتىدە 2006-، 2007-، 2008-يىللىق مۇسابىقە پەسلىدە جۇڭگو B دەرىجىلىكلەر پۇتبول بىرلەشمە مۇسابىقىسىگە قاتناشقان. 2006-يىلى «شىنجاڭ پۇتبول ئەپەندىسى» شەرىپىگە ئېرىشكەن. 2007-يىللىق جۇڭگو B دەرىجىلىكلەر پۇتبول بىرلەشمە مۇسابىقىسىدە «ئەڭ مۇنەۋۋەر ھۇجۇمچى» بولۇپ باھالانغان. 2008-يىلى جۇڭگو B دەرىجىكلەر پۇتبول بىرلەشمىسىدىكى گۇاڭدۇڭ «تيەندى 1-نومۇر» كوماندىسىغا تاللانغان ھەمدە كوماندىنىڭ شۇ مۇسابىقە پەسلىدە چېمپىيونلۇققا ئېرىشىپ، A دەرىجىلىكلەر پۇتبول بىرلەشمىسىگە كۆتۈرۈلۈشىگە مۇھىم تۆھپە قوشقان. 2009-يىلى خۇنەن «شياڭتاۋ» پۇتبول كوماندىسىغا ۋاكالىتەن مۇسابىقىگە قاتناشقان، شۇنداقلا «ئەڭ مۇنەۋۋەر ھۇجۇمچى» بولۇپ باھالانغان. 2011-يىلى بۇ كۇلۇب ئەكرەم ئەخمەتنى يەنە بىر يىل تەكلىپ قىلغان. * دىلمۇرات باتۇر دىلمۇرات باتۇر 1989-يىلى 7-ئاينىڭ 6-كۈنى تۇغۇلغان. 2003-يىلى شىنجاڭ «سۇڭ چىڭلىڭ» پۇتبول تەربىيەلەش مەكتىپىدە مەشىقنى باشلىغان. 2006-يىلى شىنجاڭ تەنتەربىيە لاتارىيەسى پۇتبول كوماندىسىغا تاللانغان ھەمدە غوللۇق ئەزاسى سۈپىتىدە 2006-، 2007-، 2008-يىللىق مۇسابىقە پەسلىدە جۇڭگو B دەرىجىلىكلەر پۇتبول بىرلەشمىسىگە قاتناشقان. 2009-يىلى شىنجاڭ كوماندىسىنىڭ ئەزاسى سۈپىتىدە مەملىكەتلىك تەنھەرىكەت مۇسابىقىسىگە قاتناشقان. 2011-يىلى شىنجىن «قىزىل ئالماس» كوماندىسىغا تاللىنىپ، جۇڭگو دەرىجىدىن تاشقىرى پۇتبول بىرلەشمە مۇسابىقىسىگە قاتناشقان. * يەھيا ئابلىكىم يەھيا ئابلىكىم 1989-يىلى 1-ئاينىڭ 3-كۈنى تۇغۇلغان. 2003-يىلى شىنجاڭ «سۇڭ چىڭلىڭ» پۇتبول تەربىيەلەش مەكتىپىدە مەشىقنى باشلىغان. 2006-يىلى شىنجاڭ تەنتەربىيە لاتارىيەسى پۇتبول كوماندىسىغا تاللانغان ھەمدە غوللۇق ئەزاسى سۈپىتىدە 2006-، 2007-، 2008-يىللىق مۇسابىقە پەسلىدە جۇڭگو B دەرىجىلىكلەر پۇتبول بىرلەشمە مۇسابىقىسىگە قاتناشقان. 2009-يىلى شىنجاڭ كوماندىسىنىڭ ئەزاسى سۈپىتىدە مەملىكەتلىك تەنھەرىكەت مۇسابىقىسىگە قاتناشقان. 2010-يىلى لياۋنىڭ «شەرقىي شىمال يولۋىسى» پۇتبول كوماندىسىغا تاللىنىپ، جۇڭگو B دەرىجىلىكلەر پۇتبول بىرلەشمىسىگە قاتناشقان. 2011-يىلى شىنجىن «قىزىل ئالماس» پۇتبول كوماندىسىغا تاللىنىپ، جۇڭگو دەرىجىدىن تاشقىرى پۇتبول بىرلەشمە مۇسابىقىسىگە قاتناشقان. * ئابدۇۋېلى ئابلەت ئابدۇۋېلى ئابلەت 1987-يىلى 4-ئاينىڭ 14-كۈنى تۇغۇلغان. 2003-يىلى شىنجاڭ «سۇڭ چىڭلىڭ» پۇتبول تەربىيەلەش مەكتىپىدە مەشىقنى باشلىغان. 2006-يىلى شىنجاڭ تەنتەربىيە لاتارىيەسى پۇتبول كوماندىسىغا تاللانغان ھەمدە غوللۇق ماھىر سۈپىتىدە 2006-، 2007-، 2008-يىللىق مۇسابىقە پەسلىدە، جۇڭگو B　دەرىجىلىكلەر پۇتبول بىرلەشمە مۇسابىقىسىگە قاتناشقان. 2009-يىلى شىنجاڭ كوماندىسىنىڭ ئەزاسى سۈپىتىدە مەملىكەتلىك تەنھەرىكەت مۇسابىقىسىگە قاتناشقان. 2010-يىلى مەملىكەتلىك ئالىي مەكتەپ ئوقۇغۇچىلىرى پۇتبول مۇسابىقىسىدە، غەربىي مۇسابىقە رايونى بويىچە 1-بولۇپ ھەل قىلغۇچ مۇسابىقىگە كىرگەن ھەمدە ھەل قىلغۇچ مۇسابىقىدە ھالقىلىق بىر توپنى كىرگۈزۈپ، كوماندىنى چېمپىيونلۇققا ئېرىشتۈرگەن. 2010-يىلى لياۋنىڭ «شەرقىي شىمال يولۋىسى» كوماندىسىغا تاللىنىپ، جۇڭگو B دەرىجىلىكلەر پۇتبول بىرلەشمە مۇسابىقىسىگە قاتناشقان. 2011-يىلى 3-ئايدا شىنجىن «قىزىل ئالماس» پۇتبول كوماندىسىغا تاللىنىپ، جۇڭگو دەرىجىدىن تاشقىرى پۇتبول بىرلەشمە مۇسابىقىسىگە قاتناشقان. * ئارافات مىجىت ئارافات مىجىت 1991-يىلى 9-ئاينىڭ 8-كۈنى تۇغۇلغان. 2003-يىلى شىنجاڭ «سۇڭ چىڭلىڭ» پۇتبول تەربىيەلەش مەكتىپىدە مەشىقنى باشلىغان. بۇ جەرياندا مەملىكەتلىك «نەيك» لوڭقىسى پۇتبول مۇسابىقىسىدە 3-لىككە ئېرىشكەن. مەملىكەتلىك «ئادىداس» لوڭقىسى پۇتبول مۇسابىقىسىدە 2-لىككە ئېرىشكەن. مەملىكەتلىك «غالىبلار» لوڭقىسى پۇتبول مۇسابىقىسىدە 2-لىككە ئېرىشكەن. 2007-يىلى شىنجاڭ تەنتەربىيە لاتارىيەسى كوماندىسىغا تاللانغان ھەمدە غوللۇق ئەزاسى سۈپىتىدە 2007-، 2008-يىللىق مۇسابىقە پەسلىدە، جۇڭگو B دەرىجىلىكلەر پۇتبول بىرلەشمە مۇسابىقىسىدە توپ ئوينىغان. 2009-يىلى شىنجاڭ كوماندىسىنىڭ ئەزاسى سۈپىتىدە مەملىكەتلىك تەنھەرىكەت مۇسابىقىسىگە قاتنىشىپ، شۇ نۆۋەتلىك مۇسابىقىدىكى يېشى ئەڭ كىچىك پۇتبولچى بولغان. 2011-يىلى 6-ئايدا جۇڭگو دەرىجىدىن تاشقىرى پۇتبول بىرلەشمىسىدىكى چېڭدۇ «شېفىلىيەن» كوماندىسىغا تاللانغان. * ئېلشات ئۆمەرجان ئېلشات ئۆمەرجان 1992-يىلى 3-ئاينىڭ 3-كۈنى تۇغۇلغان. 2002-يىلى 9-ئايدىن 2011-يىلى 1- ئايغىچە شەندۇڭ «لۇنىڭ» پۇتبول مەكتىپىدە تەربىيەلەنگەن. بۇ جەرياندا 2006-يىلى دۆلەتلىك ئۆسمۈرلەر پۇتبول كوماندىسىغا تاللانغان. 2009-يىلى «ۋېيفاڭ» لوڭقىسى خەلقئارا ياشلار پۇتبول تەكلىپ مۇسابىقىسىدە چېمپىيون بولغان. 2009-يىلللىق مەملىكەتلىك 19 ياشلىقلار «غالىبلار» لوڭقىسى پۇتبول مۇسابىقىسىدە چېمپىيون بولغان. 2010-يىلى مەملىكەتلىك تەييارلىق كوماندىلار بىرلەشمە پۇتبول مۇسابىقىسىدە چېمپىيون بولغان. 2011-يىلى 6-ئايدا جۇڭگو دەرىجىدىن تاشقىرى پۇتبول بىرلەشمىسىدىكى چېڭدۇ «شېفىلىيەن» پۇتبول كوماندىسىغا تاللانغان.         مەنبەسى  :  جۇڭگو  ئۇيغۇرچە  رادىيو  تورى   http://www.uycnr.com/ty/201111/t20111129_166395_1.html

haci

	بۇ ئەزىمەتلەر يىقىندا قارىمايدا بىر قاتار پائالىيەتلەرگە قاتناشتى.    ئاستىدىكى ئۇلانمىدىن ئۇلىنىش تورىنىڭ ئۇلار بىلەن ئىلىپ بارغان مەخسۇس سۆھبىتىنى كۆرۈڭلار. سۆھبەت مەزمۇنى قىسقا فىلىم

qoglan01

	ۋىجدانى بارلار مۇنۇ يەرنى چىكىڭ

ilim-maripat

	تېما  مەزمۇنى  بىلەن  1  -  قەۋەتتىكى  فىلىم  بىرلىشىپ  ،  تېمىنى  گۈل ئۈستىگە  گۈل كەلتۈرۈپتۇ    . تېما  ۋە  ئىنكاسلار  ئارقىلىق  بۇ  ئەزىمەتلىرىمىزنى  تېخىمۇ  چوڭقۇر  چۈشەندىم   .

خوراز

	بايا ئاغىنىلەر بىلەن مەلىدىكى ھايات كافىخانىسىغا كىرگەن ، بارى، ئەكرەملەر قىز ئوغۇل دوسلىرى بىلەن يىغىلىش قىلغان ئوخشايدۇ، ماڭىدىغان چاغدا بارى ئوزى بىر قوللۇق ھىساۋاتنى تولىۋەتتى.......شۇنىڭغا قارىغاندا بارى پۇل تاپقاندا ئاغىنىلىرىنى ئۇنتۇپ قالمىغان ئوخشايدۇ......

ilim-maripat

	ئۇيغۇرلارنىڭ پۇتبول تارىخى ئۇيغۇرلاردا ئۆزىگە خاس مىللىي ئالاھىدىلىككە ئىگە ھەر خىل تەنتەربىيە تۈرلىرى بار. بۇنىڭ ئىچىدە پۇتبول ئالاھىدە ئورۇندا تۇرىدۇ. بەزى تارىخىي مەلۇماتلاردا ئوتتۇرا ئاسىيادىكى تۈركىي قوۋملەرنىڭ قوزىنى تۇلۇمچىلاپ سويۇپ ئىچىگە يەل (ھاۋا) تولدۇرۇپ ئىشلەنگەن توپنى تېپىش ئۇسۇلى بىلەن قارىمۇ قارشى قەلئەلەرنىڭ ئىچىگە كىرگۈزىدىغان «تەپۇك» تېپىش ناملىق بىر ئويۇنى بار ئىدى، دېيىلگەن («تۈرك قامۇسى»، 29– توم، 384–بەت) يەنە «تۈرك مىللىي مەدەنىيىتى» دېگەن كىتابنىڭ 276– بېتىدە پۇتبول، چەۋگەن ئويۇنلىرى ھون دەۋرىدىن بۇيان «تۈركىي قوۋملەر ئارىسىدا ئوينالغان» دېگەن ئىبارىلەر بار. تارىخىي پاكىتلاردىن قارىغاندا، پۇتبول ياكى توپ تۈركىي قوۋملەر تەرىپىدىن ئىجاد قىلىنغان. دەرۋەقە، ئۇ چاغلاردىكى توپ ھازىرقى زاماندىكى توپقا ئوخشاشماستىن «تۈركىي تىللار دىۋانى»دا كۆرسىتىلگەندەك، تۇلۇمچە سويۇلغان قوزا تېرىسىگە يەل قاچىلاپ تېپىش، يىپ توپ تېپىش، يۇمشاق نەرسىلەردىن ياسالغان تڭپنى تېپىش شەكلىدە بولغان. ئۇيغۇرلار ئارىسىدىمۇ پۇتبول ئويناش ئۇزاق تارىختىن بۇيان ئادەت بولغان. ئۇيغۇر بالىلىرى ئورما ۋاقتىدا بۇغداي ئېڭىزى، كۈزدە قوناق ئېڭىزى ۋە خامانلاردا ئېشەك مىنىپ ئوغلاق (تۇلۇمچە سويۇلغان قوزا تېرىسىگە سامان تىقىپ ياكى يەل بېرىپ، )چەۋگەن، ۋاللەي ئويناشتىن تاشقىرى، يىپتىن ياسالغان ياكى ئىككى كونا تۇماق ئىچىگە يۇڭ ياكى پاختا تىقىپ توپ قلىپ، چاپاندىن قاپقا (قەلئە) ياساپ پۇتبول ئوينايدۇ. ⅩⅨ ئەسىرنىڭ 70– يىللىرى مەشھۇر سودىگەر، مەرىپەتچى زات باۋۇدۇن مۇسابايوۋ شىنجاڭدىكى دىنىي مەكتەپلەردە پەننىي دەرس قوشۇپ ئوقۇشنى يولغا قويىدۇ. 1883– يىلى ئاتۇش ئىكىساقتا دەسلەپ ئۈچ سىنىپلىق مەخسۇس پەننى مەكتەپ، 1885– يىلىغا كەلگەندە زامانىۋى سەككىز سىنىپلىق پەننىي مەكتەپ سېلىپ، ئالتە مو يەردە تەنتەربىيە مەيدانى ياسايدۇ. ئوقۇغۇچىلار بۇ مەيداندا يۈگۈرۈش، سەكرەش، مېڭىش، تۇرۇش قاتارلىق ئاددىي تەنتەربىيە مەشغۇلاتلىرىنى ئېلىپ بېرىشتىن سىرت، چامباش، پۇتبول، تارتىشماق (ئارقان ۋە كالتەك)، «ئەسىر ئېلىش»، «تاش كەلدى – تاش كەتتى» قاتارلىق تەنتەربىيە پائالىيەتلىرى بىلەن مەشغۇل بولغان. 1902– يىلى باۋۇدۇنبار ئۆز خىراجىتى بىلەن روسىيە، تۈركىيىگە ئوقۇغۇچى چىقىرىدۇ. ئۇلار ئوقۇش پۈتتۈرۈپ قايتقاندىن كېيىن باشقا تەنتەربىيە تۈرلىرى قاتارىدا پۇتبولمۇ زامانىۋىلىشىدۇ، تەتىجىدە ئۇيغۇر تۇنجى زامانىۋى پۇتبول كوماندىسى قۇرۇلىدۇ. ئۇزاق ئۆتمەي پۇتبول پۈتۈن شىنجاڭغا تارقىلىدۇ. 1927– يىلى 7– ئايدا، ئاتۇش ئىكساققتا قۇرۇلۇغان ئۇيغۇر پۇتبولچىلار كوماندىسى ئەنگىلىيىنىڭ قەشقەردە تۇرۇشلۇق كونسۇلىنىڭ پۇتبول كوماندىسى بىلەن مۇسابىقىلىشىپ، ئۇلارنى بىرگە قارشى ئىككى نەتىجە بىلەن، شىۋىتسارىيىنىڭ ئىشتىن سىرتقى پۇتبول كوماندىسىنى نۆلگە قارشى يەتتە نەتىجە بىلەن يېڭىدۇ. يېڭى جۇڭگو قۇرۇلغاندىن كېيىن ئەينى ۋاقىتتا ئىكساقتا قۇرۇلغان پۇتبول كوماندىسىنىڭ ئەزالىرى گەرچە يېشى يەتمىشتى ئاشقان بولسىمۇ، يېڭى زامان پۇتبول مەيدانىدىن ئورۇن ئالىدۇ. كېيىن (1951-يىلى) ياشانغان دېھقانلاردىن تەركىب تاپقان بۇ ئۇيغۇر پۇتبول كوماندىسى غەربىي شىمال رايونى بويىچە چېمپيۇن بولىدۇ. بۇ ئەھۋاللار بىزگە پۇتبول ئۇيغۇرلارنڭ ئەنئەنىۋى مىللىي تەنتەربىيە تۈرلىرىدىن بىرى ئىكەنلىكىنى، ئۇنىڭ خەلقىمىز ئارىسىدا خېلى بۇرۇنلا كەڭ ئومۇملاشقانلىقىنى كۆرسىتىدۇ.

سەۋېر

	پۇتبول دېگەنگە ئەجەپ ئامراقمەن دېسە.... رەھمەت ، ياشاپ كېتېڭلار.....

babureya

	ئۇلارغا ئامەت يار بولسۇن .

1alwasti

	ئۇيغۇر پۇتبۇلچىلىرىمىز داۋاملىق تىرىشىپ مىللىتىمىزگە زور شان شەرەپلەرنى ئېلىپ كىلىشىڭلارغا تىلەكداشمىز. تېخىمۇ تىرىشىڭلار ئەزمەتلەر

TATLIHIM

	ئەزىمەتلىرىمىز بىلەن ئۇلىنىش تورى ئېلىپ بارغان بۇ سۆھبەتنى كۈرۈپ ھەقىقەتەن ھاياجانلاندىم ! بۇ سۆھبەتنى ئۇلىنىش تورى ناھايىتى ئەھمىيەتلىك ئېلىپ بېرىپتۇ ! مەن ھەقىقەتەن ئۇلىنىش تورىدىن سۆيۈندۈم ! مۇشۇ سۆھبەت ئارقىلىق پۇتبول ھەۋەسكارلىرى ۋە شۇنداقلا ئىچكىرىي ئۆلكىلەرگە چىقىپ توپ تەپمەكچى بولغان پوتبول چولپانلىرىنى بىر قاتار ئۆگىنىشكە تېگىشلىك تەجرىبە ساۋاق ئالماشتۇرۇش ئېلىپ بېرىلىپتۇ ! بولسا مۇشۇنداق ئالماشتۇرۇشلارنى كۆپرەك ئېلىپ بارسىكەن دىگەن ئۈمىدتىمەن ! شۇ مۇناسىۋەت بىلەن بارلىق بوتبولچىلارنىڭ ئىشلىرىنىڭ ئوڭۇشلۇق ،تېنىنىڭ سالامەت بۇلۇشىنى ئۇلۇغ ئاللاھدىن تىلەيمەن ! ئىشىنىمەنكى شىنجاڭنىڭ پوتبولچىلىقى مۇشۇنداقلا ماڭسا دۇنياغا تۇنۇلغۇسى !