ئۈندىداردىكى مۇھەببەت (ھىكايە)

madina520

	راخمانجان رۇسۇل سۇلتانى(تەرجىمە) ئەخلاق بىلەن دىيانەت ئۇچراشقاندا بىرىسىنىڭ ئوسال ئەھۋالغا دۇچ كېلىدىغانلىقىدىن ئىبارەت قانۇنىيەتنى توي قىلىپ خېلىدىن كېيىن چۈشىنىپ يەتكەن جەۋلان بەرنانىڭ تەرسا مىجەزىگە تەڭ كېلەلمەي «قېچىش» ئۇسۇلى ئارقىلىق يۈزلىنىش قارارىغا كەلدى. ئۇ، بۇ ئۇسۇلنىڭ بىر مەيدان باشقىچە «جەڭ» بىلەن ئاخىرلىشىدىغانلىقىنى تەسەۋۋۇر قىلمىغانىدى. ئۇ بەك ئازابلاندى، ئۇ «يالغۇز مەنلا ئازاپلاندىم» دەپ ئويلىدى. ئەمما بەرنانىڭمۇ تەڭ ئازاپلانغانلىقىنى ئويلىمىغانىدى. جەۋلاننىڭ ئۆيدىن چىقىپ كەتكىنىگە يىگىرمە كۈندىن ئاشتى، ئۇ ئازاپلانغان بولسىمۇ لېكىن قىلچە باش ئەككۇسى يوق ئىدى، بەرنانىڭ جەۋلانغا تېلېفون بەرگۈسى كەلدى، بىراق ئۇ غورورىنى دەپ تېلېفون ئۇرغۇسى كەلمىدى. بىر كۈنى بەرنا تىت-تىت بولغانلىقىدىن يانفونىنى ئويناپ ئولتۇراتتى، توساتتىن يانفون ئىكرانىدىن يېشل ئۈندىدار بەلگىسى «لاپ-لاپ» قىلغان بەلگە ئۇنىڭ دىققىتىنى تارتتى. «بۇ نېمىدۇ؟ بۇ ئۇچۇرمىدۇ-يا؟» ئۇ ھەيرانلىق ئىلكىدە ئۈندىدار چۈشەندۈرۈشىنى تېپىپ، ئۈندىدارنىڭ بىۋاستە سۆزلەشكىلى بولىدىغانلىقىنى، بۇنداق بولغاندا خەت يېزىش ئاۋارىچىلىقىنىڭ يوقلىقىنى ھېس قىلىپ، يانفوننى يەڭگىل تەۋرىتىۋىدى ئۈندىدار بىرلا ۋاقىتتا يانفونىنى تەۋرەتكەن ئادەم بىلەن ئۇچرۇشۇپ قالدى. ئۇنداق تاسادىپى ئۇچرۇشۇپ قالغانلار ئىچىدە تونۇشلارمۇ، پەقەت تونوشلىقى يوقلارمۇ بولاتتى، يانفونىنى تەۋرەتكۈچى مەلۇم پارول ئارقىلىق تونوشلىقىنى ئىسپاتلىغاندىن كېيىن، ئىككى تەرەپ بىمالال سۆزلىشەلەيتتى. قىزىقىش بەرنانىڭ ئىچ پۇشۇغىنى تۈگىتىپ، ئۈندىدارنىڭ تارتىش كۈچى بىلەن ئۆزىگە «پىغان» دېگەن ئىسىمنى قويۇپ، يانغونىنى ئارقا-ئارقىدىن بىر قانچە قېتىم تەۋرىتىۋىدى، قارشى تەرەپ ئۇنى قوشىۋالغانلىقىنى ئىپادىلىدى. -بىز دوست بولۇپ ئۆتسەك بولامدۇ؟-دېدى بەرنا قارشى تەرەپنى سىناپ بېقىش ئۈچۈن. دەل شۇ چاغدا قارشى تەرەپ ئۆزىنىڭ X شەھرىدىن ئىكەنلىگىنى، يېقىندا ئېرىدىن ئايرىلىپ قالغانلىقى توغرىسىدا دات ئېيىتقىلى تۇردى. ئۇنىڭ دەردىنى ئاڭلىغان بەرنا ئىچىدە «ئۇنىڭ دەردى مېنىڭ دەردىمگە ياماق بولمايدىكەن» دېگەنلەرنى ئويلاپ، ئۇنىڭغا تېخىمۇ قىزىقىپ قارشى تەرەپتىن سورىدى: - سىز دەردىڭىزنى يېقىن دوستىڭىزغا تۆكمەي نىمىشقا ھازىرلا تونوشقان ئادەمگە تۆكىسىز؟ -مەن دوستۇمنىڭ مەن بىلەن تەڭ ئازابلىنىشىنى خالىمايمەن!- دېدى قارشى تەرەپ قاتتىق بىرنى ئۇلۇق-كىچىك تىنغاندىن كېيىن،-يەنە بىر تەرەپتىن مەن «ئېلىپ» نى ئوقۇپ «بە» نى ئوقمىغانلاردىنمۇ ئەمەس...،- ئۇ ئۆزىنى تولىمۇ مەرت، سېخى قىلىپ كۆرسەتكەندىن كېيىن تولىمۇ ئازاپلانغان قىياپەتتە يەنە ئولۇق-كىچىك تىندى. قارشى تەرەپنىڭ زارى بەرنانىڭ مۇزلىغان قەلبىنى ئېرىتتى، «مەنمۇ ئۇنىڭدىن بەكرەك ئازاپلانغان تۇرۇقلۇق يەنە نىمىشقا ئۆز سىرىمنى يوشۇرىمەن؟» بەرنا ئۆزىنىڭ ئېرى بىلەن بولغان «جەڭ» ئازابىنى قارشى تەرەپكە بىراقلا تۆكۈپ، ئۆزىنى خېلى يەڭگىللەپ قالغاندەك ھېس قىلدى. بەرنا شۇ كۈندىن باشلاپ ئۈندىدار ئارقىلىق خىيالى دۇنياغا ئۆز دەردىنى تۆكۈشى ئۇنىڭ تۇرمۇشىدا كام بولسا بولمايدىغان «دەرس» ىگە ئايلاندى. بىر كۈنى ئۇ ئىشتىن چۈشكەندىن كېيىن قورسوغىنىمۇ ئۇنتۇپ، مەقسەتسىزلا تورغا چىقتى. ئۇ بىر قانچە تورنى «چارلاپ» بىر توردىن ئۆزىنى «مۇھەببەت ئىلاھى» دەپ ئاتىۋالغان بىرەيلەننىڭ مۇھەببەت توغرىسىدا مەسلىھەت بېرىۋاتقانلىقىنى كۆرۈپ «ئۈندىداردىمۇ مۇھەببەت ئىلاھى بارمىدۇ؟» دېگەنلەرنى خىيالىدىن ئۆتكۈزدى ۋە سىناپ بېقىش ئۈچۈن «مۇھەببەت ئىلاھى» دېگەن بىر قانچە خەتنى كىرگۈزۈپ «ئىزدەش» دېگەن خەتنى بېسىۋىدى، ئىكراندا بىر قانچە ئۈندىدار ئابونتىنىڭ «بەلگە» سى كۆرۈندى، ئۇ سىناپ بېقىش غەرىزىدە بىرنى قوشىۋېلىۋىدى، ئۇ جاۋاب قايتۇرماي، بەرنانى ئۈمىدسىزلەندۈرۈپ قويدى. بەرنا ئۆزىنىڭ ئەمەلگە ئاشمايدىغان قوروق خىيالىدىن كۈلگۈسى كەلدى، بىراق، بىر مىنوت ئۆتمەيلا يانفونىڭ «بەلگە» چىرىغى يېنىپ، ئارقىدىنلا ئۆزىنى «مۇھەببەت ئىلاھى» ئاتىۋالغان بىرەيلەننىڭ بەرنانى «ئەڭ يېقىن دوستى» قاتارىغا قوشىۋالىدىغانلىقىنى بىلدۈردى، بەرنا سىناپ بېقىش نەزىرى بىلەن «بەك ياخشى بولدى» دىۋىدى، ئىكراندا «مۇھەببەت ئىلاھى» نىڭ باش سۈرىتى يوقاپ، بىر ئايالنىڭ نازۇڭ ئاۋازى يانفوندا چورىدەك ياڭرىدى: -سىز قانداق ئاۋارىچىلىققا يولۇققان بولسىڭىز، يارىدىمىمنى ئايىمايمەن! -ئېرىم ئۆيدىن چىقىپ كەتكىلى بىر ئايغا يېقىن بولدى. مەن ئۇنى بەك ياخشى كۆرەتتىم!- دېدى بەرنا يىغلامسىرىغاندەك ھەسرەت چىكىپ. -ئەنسىرەپ كەتمەڭ،- دېدى قارشى تەرەپ ھېسداشلىقىنى بىلدۈرۈپ،- بىر ھەپتىگە قالماي ئېرىڭىز قايتىپ كېلىپ، سىزنى بۇرۇنقىدىنمۇ ياخشى كۆرىدىغان بولۇپ كېتىدۇ. ماڭا ئىشىنىڭ!- ئۇ ئاخىرقى سۆزىنى ناھايىتى ئورغولۇق ئېيىتتى. «مۇھەببەت ئىلاھى» نىڭ بۇ سۆزى بەرنانىڭ پۈتۈن بەدىنىنى سىماپتەك ئېرىتىپ، ئازاپلىرىنىڭ ھەممىنى ئونۇتقاندەك بىر خىل سىزىم ئىچىدە ئاغزىنى چاكىلداتقانلىقىنىمۇ سەزمەي قالدى. ئۇ خىل سىزىم تېخى يوقالماي تۇرىۋىدى، «مۇھەببەت ئىلاھ» نىڭ تېخىمۇ يېقىملىق ئاۋاز ئۇچۇرى ئاڭلاندى: -بۇ دېگەن ياخشىلىققا ياخشىلىق، يامانلىققا يامانلىق يانىدىغان دۇنيا، ئىلگىرى تاغ چۆكلىگەن بولسا، ھازىر دېگەن باغ چۆگىلەيدۇ. ئاياللار ئۆز ئەقلىنى ئىشلىتەلىگەندىلا، ئاندىن بەخىتلىك بولالايدۇ. ئۆزىنىڭ ئېرىنى قانداق باشقۇرۇش، ئۆزىگە قانداق رام قىلىش، سىزغان سىزىقىدىن چىقالمايدىغان قىلىۋېتىشكىمۇ ئەقىل كېرەك. بۇمۇ بىر خىل ئىلىم بولۇپ، بۇنى ياخشى ئۈگىنىشكە، ئەتراپلىق تەھلىل قىلىشقا توغرا كېلىدۇ...،- «مۇھەببەت ئىلاھى» ئۆزىنىڭ ئىسىمدىن تارتىپ ئېيتىپ بېرىپ، چوقۇم ئېرىنى قايتۇرۇپ ئېكىلىپ بەرگەننىڭ سىرتىدا «سىزغان سىزىقىدىن چىقماس» قىلىۋېتىش توغرىسىدا تالاي ۋەدىلەرنى بەردى. قايسى تەرەپنىڭ سەۋەنلىگى بولۇشتىن قەتئينەزەر بەخىتلىك ئائىلىنىڭ پارچىلىنىپ كېتىشىدىن ئەنسرەپ ئازاپ ئىچىدە قالغان بەرنا «مۇھەببەت ئىلاھى» نىڭ بىر قاتار شىرىن سۆزلىرىدىن خۇددى تەكلىماكان چۆللىگىدە ئېزىپ ھالىدىن كەتكەن ئىكىسپىدىتچى تۇيۇقسىز كومپاسقا ئىگە بولغاندەك خۇشال بولۇپ تولىمۇ ھاياجانلاندى ۋە ھاياجېنىنى باسالماي ئېسەدىگىنىچە دېدى: -مەن راستىنلا سىزنىڭ يارىدىمىڭىزگە مۇھتاج، بىراق ئېرىم بىلەن ھەر ئىككىمىز «چاقىرسا ئېتى بار، تۇتسا سېپى بار تۆتنىڭ بىرى»، خېلى يۇقىرى ئىمتىيازغا ئىگە كىشىلەر، مەخپىيەتلىكىنى ساقلىشىڭىزنى ئۆتىنىمەن، قىلچە ئاشكارىلىنىپ قالمىسۇن ھەم چېنىپ قالمىسۇن... -بۇنىڭدىن خاتىرجەم بولۇڭ، بىز تېخى ئىش پۈتكەندىن كېيىن يۈز تورانە كۆرىشىمىز،- دېدى «مۇھەببەت ئىلاھى» بەرنانىڭ سۆزىنى بۆلۈپ،- ھازىر مەنمۇ سىلەر توغرىسىدا ھېچقانداق ئۇچۇر تەلەپ قىلمايمەن، بىز پەقەت يانفون ئارقىلىقلا پىكىر ئالماشتۇرىمىز، ھېچقانداق خاتىرە قالدۇرۇلمايدۇ،- ئۇ بىر ئاز تۇرىۋېلىپ سۆزىنى تېخىمۇ ئىشەنچىلىك داۋاملاشتۇردى،- مېنىڭ توردىمۇ «مۇھەببەت ئىلاھى» مەسلىھەت سوراش سەھىپەم بار، ھازىرغىچە ۋەيران بولغان، ۋەيران بولاي دېگەن نۇرغۇن ئائىلىلەرنى غەمدىن خالاس قىلدىم... ئۇنىڭ سۆزلىرى بەرنانى يەنە بىر غەمدىن خالاس قىلدى، ئۇ خۇشاللىغىدىن ئۈن سېلىپ يىغلاپ كەتتى. «مۇھەببەت ئىلاھى» بىلەن ھېسيات ئالماشتۇرۇپ ئىككىنچى كۈنىلا بەرنا «مۇھەببەت ئىلاھى» نىڭ «دەز كەتكەن چىنىنى بىلنىشكۈسىز قاداشنىڭ مىڭ بىر تەدبىرى» دېگەن بىر «ھۆججەت» نى تاپشۇرۇپ ئېلىپ، ئوقۇپ كۆرگەندىن كېيىن تېگى-تېگىدىن قايىل بولدى ۋە «مۇھەببەت ئىلاھ» نىڭ كۆرسەتمىسىگە تايىنىپ، پارچىلىنىش ئالدىدا تۇرغان ئائىلىسىنى قۇتقۇزىۋېلىش قارارىغا كەلدى. ئۇ يېقىندىن بۇيان بۇنداق قانائەتلەنگەندەك جاۋاپقا ئېرىشەلمىگەنىدى، شۇڭا ئۇ «مۇھەببەت ئىلاھى» نىڭ پىكىرىنى ئالمايلا ئۈچ مىڭ يۈەن «يېتەكچىلىك قىلىش ھەققى» ئەۋەتىپ بەردى. X            X         X بەرنا ھازىرقى تۇرىۋاتقان مەرگىزى شەھەردىكى داڭلىق بىر خۇسۇسى كارخانچىنىڭ ئەتىۋارلىق قىزى بولۇپ، پۇل، مال-دۇنيادىن غەمسىز چوڭ بولغان. ئۇ ئىچكى ئۆلكىدىكى داڭلىق بىر تىببى ئونۋىرستېتىنىڭ ئاسپىرانتلىقىنى پۈتتۈرۈپ بۇ مەركىزى شەھەردىكى نوقتىلىق بىر دوختۇرخانا «ئالاھىدە تەمىنات» بىلەن تەكلىپ قىلغان، ئۇنىڭ ئونۋىرستېتا ئوقۇۋاتقان چېغىدىلا مەملىكەت ئىچىدىكى نوپۇزلۇق  ژورناللاردا بىر قانچە پارچە ئىلمى ماقالىسى ئىلان قىلىنىپ ناھايىتى چوڭ تەسىر قوزغىغان بولۇپ، ئۇ ماقالىنىڭ بىر پارچىسىنى ئامېرىكىدىكى بىر نوپۇزلۇق ژورنال، بىر پارچىسىنى گىرمانىيىدىكى بىر ژورنال كۆچۈرۈپ ئېلان قىلىپ، خەلقئارادىمۇ ياخشى باھاغا ئېرىشكەن. جەۋلانغا كەلسەك جەۋلان جەنۇپتىكى بىر نامرات ناھىيىدە خىزمەتچى ئائىلىسىدە توغۇلۇپ، ئۇمۇ بەرنا ئوقۇغان شەھەردىكى بىر داڭلىق ئونىۋىرستېتنىڭ قۇرۇلۇش كەسپىدە ئاسپىرانتلىقىنى پۈتتۈرىدىغان يىلى پاپتەخىتتە ئۆتكۈزۈلگەن بىر قېتىملىق مۇھاكىمە مۇنبىرىگە قاتنىشىش پۇرسىتىگە ئېرىشىپ، ئۇ مۇنبەرگە بەرنامۇ قاتناشقىنى ئۈچۈن تونۇشۇپ قېلىپ، مۇھەببەتلەشكەن، ئۇلارمۇ مۇھەببەت ئىزھار قىلىشقان چاغدا بەرنا جەۋلاندىن ئىككى ياش چوڭ بولسىمۇ، بىر-بىرىنىڭ «گۈل-گۈلىغا» كەلگەنلىگىنى ئۈچۈنلا ياشنى، ئائىلە شارائىتىنى، يورتىنى ئاساس قىلماي قورساقتىكى «ئوماچ» نى ئاساس قىلىپ توي قىلىشقا پۈتۈشكەن، بىراق ئۇلار قورسىقىدىكى «ئوماچ» غا بەك ئىشىنىپ، جەۋلان بۇ مەركىزى شەھەرگە كەلگەندە، ھېچقانداق بىرەر ئورۇن ئۇنى قوبول قىلماي يېرىم يىلدەك خىزمەت ئىزدەپ ماڭغان ئەگرى-توقاي يوللارمۇ بۇ بىر جۇپ ئوتتەك قىزغىن ياشنىڭ مۇھەببەتتىن لاۋۇلداپ يانغان ئوتىغا سوغوق سۇ سەپمەي، يەنىلا «گاچا بولسىمۇ پۇلى بارلار سۆزلىسۇن» دېگەندەك، بەرنانىڭ بۇ شەھەردىكى نوپۇزى، قولىدىكى پۇلغا تايىنىپ، مەركىزى شەھەردىكى مەلۇم بىر پەن-تەتقىقات ئورنىغا ئورۇنلاشقان ھەم يەنە ئاشۇ بەرنانىڭ يۈزى، نوپۇزى، پۇلى بىلەن چەتئەلگە چىقىپ دوكتورلۇق ئۇنىۋانىغا ئېرىشىپ قايتىپ كەلگەندىن كېيىن، بەرنا ئوتتۇز ياشقا، جەۋلان 28 يېشىدا توي قىلىپ ۋىسالىغا يېتىشكەن. «ئەرنى ئەر قىلغانمۇ خوتون، ئەرنى يەر قىلغانمۇ خوتون» دېگەن ئەقلىيە سۆزنى كىم قىلغان بولغىيىتتى؟ ئۇلار توي قىلىپ بىر يىلغىچە تولىمۇ بەخىتلىك ئۆتتى، ئۇلار بىر-بىرىنىڭ سۆزىنى ھەرگىز ئىلىۋەتمەيتتى، ئائىلە قۇرۇش، ئىلىم-مەرىپەت، تەتقىقات توغرىسىدىكى گەپلىرى تۈگمەيتتى، ئۇلار بىر-بىرىنى قوللاپ، بىر-بىرىگە ئىلھام بېرىپ تەڭ ئالغا باسقاچقا جەۋلان تەتقىقات ئورنىنىڭ يارىدەمچى تەتقىقاتچىسى، بەرنا ئاشۇنداق نوقتىلىق دوختۇرخانىنىڭ فىروپىسسورى بولدى، ھەر ئىككەيلەن ئالىي دەرىجىلىك پىكاپ سېتىۋالدى، ياخشى يەردىن داچا ئالدى، يۇقىرى مائاشتىن باشقا ھەر ئىككەيلەن بىر-ئىككىدىن تەتقىقات تېمىسى ئىشلەپ بىر قانچە يۈز مىڭ يۈەندىن قۇشۇمچە تەمىناتقا، ھېيىت-بايراملاردا يۇقىرى پاراۋانلىققا ئېرىشەتتى، شۇڭا ئۇلار پۈتۈن زېھنىنى خىزمەتكە، تەتقىقاتقا قارىتىپ، تېخىمۇ ئىگىزگە «يامىشىش» ئۈچۈن ئۆيگە خىزمەتچى ياللاپ، خۇددى «بەگ-غوجام» لاردەك ھاياتنىڭ پەيزىنى سۈردى... ئارازنى بىر قېتىملىق قۇربان ھېيىت كەلتۈرۈپ چىقاردى: ھېچقانداق ھېيىت-بايرامدا ئاۋال قايسى ئۆيدە بالدۇر ھېيىتلاشنى تالاش-تارتىش قىلىشمايتتى، بۇنىڭ سەۋەبى، بەرنانىڭ ئاغزىغا قارايدىغان جەۋلان بىر قېتىملىق قۇربان ھېيىتنى جەنۇپقا بېرىپ دەم ئالغاچ جەۋلاننىڭ يۇرتىدا ھېيىت ئۆتكۈزۈش مەسلىھەتىنى بەردى. لېكىن ئەزەلدىن ئۆزنىڭكىنى راست قىلىپ كەلگەن بەرنا بۇنىڭغا قۇشۇلمىدى. بۇنىڭ بىلەن جەۋلان قېيداپ بەرنانىڭ ئۆيىگە بارماي ئۆزى يالغۇز يورتىغا كەتتى ۋە قايتىپ كەلگەندىن كېيىن ئۆيدە جىدەل قۇرىمىدى، ھەر ئىككەيلەن ئۆزنىڭكىنى راست دەپ جاھىللىق قىلدى، ئۇلارنىڭ بىرى يارىدەمچى تەتقىقاتچىسى، بىرى داڭلىق فىروپىسسۇر. جەۋلاننىڭ ھازىرقى ئورۇنغا ئېرىشىشىدە بەرنا مېنىڭ ھەسسەم دەپ قارايتتى، ئەمما جەۋلان ئۇ ئىشقا ئۇنداق قارىماي ئۆزىنىڭ تىرىشچانلىقىدىن، تۆھپىسىدىن دەپ قارايتتى... ئەمەلىيەتتە بۇ ئىشتا بەرنانىڭ تۆھپىسى بارلىقى راست، لېكىن بىر ياستۇققا باش قويغان ئەر-خوتونلارغا نىسبەتەن بىر-بىرىگە يارىدەم قىلىش، بارنى تەڭ كۆرۈش، بىر-بىرىنى قوللاش، بىر-بىرىسىنىڭ ھالىغا يېتىش دېگەن مەيلى قايسى نوقتىدىن قارىمايلى «بەرھەق»... بەرنا ئەھۋالنىڭ بۇ دەرىجىگە بېرىپ قېلىشنى ئەسلا تەسەۋۋۇر قىلمىغانىدى. ھازىر بەرناغا مۇھەببەت تۈرلۈك سىناقلارنى ئالدىغا تاشلاۋاتقاندەك تۇيۇلدى، مۇھەببەت بۇرۇن ئۇنى كۈلدۈرگەنىدى، ئەمما ھازىر ئۇنى يىغلىتىۋاتىدۇ. كىشلەر مۇھەببەت ئۇلۇغ دەيدىكەن، بەرنامۇ بۇ گەپلەرگە ئىشەنگەنىدى، ھېچكىم ئويغاتمىغان ھۈجەيرىلىرىنى ئويغۇتۇپ سۆيگۈ قۇشىغا جەۋلاننىڭ روھىدىن جان تەمە قىلىپ، ناز-جىلۋىلىرى بىلەن ئورتاق بەھىر ئېلىشنى ئارزۇ قىلغانىدى. ئەممە قىممەت قارشى يۇقىرى بولغان كۆڭۈل مەنبەسى يوللىغان ئىنكاسىنىڭ جاۋاپسىز قېلىشى ئۇنى قېيناۋاتتى. ئۇ كۆڭۈلنى ماددى ئۆلچەم بىلەن ئۆلچىگەنلىكىگە پۇشايمان قىلغان بولسىمۇ، ئەمما ھەرگىز تەن ئالمايتتى. ئەينى چاغدا جەۋلاننىڭ كۆزىدىن تاراپ چىققان ئاجايىپ مىھىرلىك ئۇچقۇن تومورىدىكى قانغا تاراۋاتقاندەك ھېس قىلىپ، شەھلا كۆزى ئۇنىڭ سېھىرلىك كۆزىگە ئەل بولغانىدى، ئۇنىڭ قاراشلىرى يۈرىكىگە بىر تاتلىق سىزىمنى باشلاپ كىرىپ، ئۆز-ئارا تېگىشكەن ئوتلۇق نەپەسلەر، شۇ دەقىقە ئىچىدىكى سېھىرلىك تۇيغۇلار «سوررىدە» تۇزۇپ كېتىدىغاندەك نازۈك قەلبىنى ئۆز ئىسكەنجىسىگە ئالغانىدى، ئۇ «مۇھەببەت ئىلاھى» نىڭ گەپ-سۆزلىرىنى «مەلھەم» قىلىپ، ئېچىشقان «يارا» ئېغىزىغا سۈركەپ ئارام تاپقاندەك قىلسىمۇ يەنىلا تازا ئىشەنچ قىلالمايۋاتاتتى... بەرنانىڭ كۆڭلى خۇددى تېگى يوق دېڭىزغا غەرق بولۇپ، قەيەردىن چىقىشنى مۆلچەرلىيەلمەي ئازاپلانغاندەك ناگىلا بولىۋاتقاندا «مۇھەببەت ئىلاھى» نىڭ «مىڭ بىر تەدبىرى» ئۆز قۇدرىتىنى كۆرسىتىپ، جەۋلان ئۆيگە قايتىپ كەلدى. بەرنا بۇنىڭدىن تولىمۇ خۇشال بولدى ۋە دەرھال بۇ خۇشخەۋەرنى «مۇھەببەت ئىلاھى» غا يەتكۈزۈپ، رەھمىتىنى بىلدۈردى. -جەۋلان ئەسلىدىن ياخشى ئەر،- دېدى «مۇھەببەت ئىلاھى» بەرنانىڭ ئەۋەتكەن ئىككى مىڭ يۈەن «رەھمەت سوۋغىسى» نى تاپشۇرۇپ ئېلىپ،-مۇشۇ نوقتىدىن قارىغاندا جەۋلان بىر مەسئۇلىيەتچان ئەر، ئەمدى سىزمۇ بۇنى قەدىرلەڭ! بىراق «شىرىن چۈش» ئۇزاققا بارمايلا بەرنا «ئويغۇنۇپ» كەتتى، ئەسلىدە ئارازنى ئىككەيلەننىڭ قىممەت قارشى، تەرسا مىجەزى كەلتۈرۈپ چىقاردى. بەرنا «مۇھەببەت ئىلاھى» نىڭ كۆرسەتمىسى بويىچە بىر قانچە كۈن يول قويدى، بىراق «ئۈگەنگەن خۇي ئۈجمە پىشقىچە» دېگەندەك داۋاملىق يول قويالمىدى. بىر كۈنى جەۋلان كۆلىمى ناھايىتى چوڭ بىر ئىلمى تەتقىقات يېغىنىغا تەييارلايدىغان ئىلمى ماقالىسى ئۈچۈن ئىككى تۈننى تاڭغا ئۇلاشقا توغرا كەلدى، بىراق بەرنا بۇنى توغرا چۈشەنمەي، جەۋلاننى قەستەن شۇنداق قىلىۋاتىدۇ، دەپ قاراپ جىدەل قىلدى ۋە زور بەدەل تۆلەپ يازغان ئىلمى ماقالىسىنى يىرتىۋېتىپ، مۇھاكىمە يىغىنىدا جەۋلاننى ئوسال ئەھۋلغا چۈشۈرۈپ قويدى... بىر كۈنى جەۋلان ئۆيگە ئادەتتكىدىن بۇرۇن قايتىپ كەلگەندە بەرنا ئۆيدە يوق ئىدى، ئۇ خوشياقمىغاندەك تېلېۋىزورنى ئېچىپ تۇرۇشىغا بەرنانىڭ يانفونى سايرىدى، بەرنا يانفونىنى ياتاق ئۆيدە ئۇنتۇپ قالغانىدى، جەۋلان يانفوننى ئېلىۋىدى، ئىكراندا «مۇھەببەت ئىلاھى» دىققىتىنى تارتتى. ئىكراندا «مۇھەببەت ئىلاھى» نىڭ «مىڭ بىر ھىلىسى» كۆرۈندى. ئۇ تەپسىلى ئوقۇغاندىن كېيىن بەرنانىڭ ھەرگىز پۇشايمان قىلمىغانلىقىنى، جەۋلاننى ئوينىتىۋاتقانلىقىنى ھېس قىلىپ، كۆڭلى بىردىنلا سۇۋۇپ كەتتى. دەل شۇ چاغدا بەرنا قايتىپ كېلىپ جەۋلاننىڭ يانفونىنى تۇتۇپ چىرايى ئۆڭگەن ھالدا خىيال قىلىپ ئولتۇرغانلىقىنى كۆرۈپ ھەممىنى چۈشەندى. -بىز ئاجرىشىپ كېتەيلى!- دېدى جەۋلان پوسوققىدە. بۇ گەپنى ئاڭلىغان بەرنا چۈچۈپ كەتتى ۋە ئورنىدىن تۇرۇپلا ياتاق ئۆيگە كىرىپ ئىشىكنى ئىچىدىن تاقىۋالدى ۋە دەرھال يانفونىنى قولىغا ئېلىپ، «مۇھەببەت ئىلاھى» غا ئىلتىجا قىلدى: -ئىرىم ئاجرىشىشنى ئوتتۇرىغا قويدى، بۇ ئىشقا ئارىلىشىپ چوقۇم تۇسۇپ قېلىڭ!- دېدى بەرنا يىغلاپ تۇرۇپ،- ھەرگىز سالاھىتىڭىزنى ئاشكارىلىماڭ، ئۇنى چوقۇم نىيىتىدىن ياندۇرۇڭ...،- بەرنا «مۇھەببەت ئىلاھى» نىڭ تەلىپى بويىچە جەۋلاننىڭ QQ نۇمۇرىنى ئېيتىپ بەردى. «مۇھەببەت ئىلاھى» QQ دىن جەۋلاننىڭ كۈندىلىك خاتىرىسىنى كۆرۈپ ئۆزىنىڭ مۇمكىن بولمايدىغان بىر مۈشكۈل ئىشقا دۇچ كەلگەنلىگىنى ھېس قىلىپ بېشى قاتتى. جەۋلاننىڭ يېقىندىن بۇيانقى خاتىرىسىدىن تەھلىل قىلغاندا، ئۇلارنىڭ نىكاھى ياراشتۇرۇش باسقۇچىدىن ئۆتۈپ كەتكەن بولۇپ، ئاجرىشىش ئەڭ ياخشى تاللاش ئىدى. شۇ كۈندىن باشلاپ جەۋلان ھەر كۈنى «مۇھەببەت ئىلاھى» بىلەن توردا مۇڭدۇشىدىغان بولىۋالدى. دەسلىۋىدە «مۇھەببەت ئىلاھى» جەۋلانغا بەرناغا كەڭ قورساق بولۇش، ئەڭ ياخشىسى «تۈگمەس جەڭ» نى ئاخىرلاشتۇرۇپ قايتىدىن باشلاش توغرىسىدا نەسىھەت قىلدى. بىراق بۇنىڭغا جەۋلان قايىل بولماي «مۇھەببەت ئىلاھى» نىڭ تىرىشچانلىقى بىكار بولۇپ، جەۋلاننىڭ چىڭ تۇرىۋېلىشى بىلەن نىكاھتىن ئاجرىشىپ كەتتى. بەرنا جەۋلاننى ياخشى كۆرۈپ قالغىنى ئۈچۈن ئەمەس، بەلكى ياخشى كۆرگەن ئادىمىنىڭ ياخشى كۆرۈشكە ئەرزىمەيدىغان كىشى ئىكەنلىگىدىن ئازاپلاندى. ئۇ ئۆزىنىڭ سۆيۈشنىلا بىلىپ سۆيۈلۈشنى بىلمەسلىكىنىڭ ئازاپ ئىكەنلىگىنى، سۆيۈلۈپ سۆيۈشنى بىلمەسلىكىنىڭمۇ جىنايەت ئىكەنلىگىنى چوڭقۇر ھېس قىلدى. مۇھەببەت خۇددى ھاياتقا ئوخشاش بىر ۋاراق ئاق قەغەز ئىكەن. ئۇنىڭغا ئاچچىق ھەم تاتلىق ئەسلىمىلەر، يىغا ۋە كۈلكىلەر خاتىرلىنىدىكەن، بەرنا بىلەن جەۋلان ئۆزلىرىنىڭ مۇھەببەت ھاياتىنى ۋاراقلاپ، ئاچچىق-تاتلىق ئەسلىمىلەرنى يىغا ۋە كۈلكە خاتىرلەنگەن بەتلىرىنى كۆيدۈرۈشكە باشلىدى... X            X         X جەۋلان بىلەن بەرنا ئاجرىشىپ كەتكەندىن كېيىن جەۋلان ھەر كۈنى دېگىدەك توردا «مۇھەببەت ئىلاھى» بىلەن پاراڭلىشىپ ئۆز دەردىنى تۆكىدىغان بولىۋالدى. ئۇ ئۆزىنىڭ چۈشكۈنلىشىپ نېمە قىلارىنى بىلمەي قالغانلىقىدىن ھەسرەت چىكەتتى. بىر كۈنى «مۇھەببەت ئىلاھى» مۇ ئۆزىنىڭمۇ مۇھەببەتتە مەغلۇپ بولغۇچى ئىكەنلىگىنى ئاشكارىلاپ دەرت تۆكتى: -مەنمۇ بىر «نىكاھ مەغلۇبىيەتچىسى» دېدى ئۇ دەردىنى تۆكۈپ،- بىزمۇ سىلەرگە ئوخشاش «كۆيۈپ-پىشىپ» توي قىلغان، بىراق يېرىم يىلغا قالمايلا ئاجرىشىپ كەتكەن، بۇنىڭ سەۋەبى ئېرىم ئالا كۆڭۈللۈك قىلىپ، مۇھەببىتىمىزگە ئاسىيىلىق قىلدى...،- «مۇھەببەت ئىلاھى» يىغلاپ كەتتى. -ئوخشاش قىسمەتكە دۇچ كەپتىمىز-ئەمەسمۇ؟- دېدى جەۋلان چاخچاققا ئايلاندۇرۇپ،- ئەمما مەن ئۇنداق ئالاكۆڭۈل ئەرلەردىن ئەمەس، -ئۇنداقتا «قولى سۇنۇقنىڭ دەردىنى قولى سۇنۇق بىلىدۇ» دېگەندەك ئىككى دەرتمەن ئۆز-ئارا...،- «مۇھەببەت ئىلاھى» گېپىنىڭ ئاخىرىنى يۈتىۋەتتى. جەۋلان «مۇھەببەت ئىلاھى» نىڭ نېمە دىمەكچى بولغانلىقىنى چۈشىنىپ، ئۇلارنىڭ توردا، ئۈندىداردا كۆرۈشۈش قېتىم سانى، ۋاقتى بارغانسىرى كۆپەيدى ۋە چوڭقۇرلاشتى... -مەشۇغى يوق ئاشىقنىڭ ئاشىق-مەشۇقلار بايرىمىنى تەبرىكلەيمەن!- دېدى «مۇھەببەت ئىلاھى» ئۈندىدار ئارقىلىق جەۋلانغا چاخچاق قىلىپ،- مۇبارەك بولسۇن! -نېمە؟ بۈگۈن «ئاشىق-مەشۇقلار بايرىمى؟» -جەۋلاننىڭ راستىنلا ئېسىدە يوق ئىدى. بۈگۈن بىر تەتقىقات تېمىسىغا تۇتۇش قىلغان تۇنجى كۈنى بولغاچقا ئاشىق-مەشۇقلار بايرىمىغا تۈگۈل تاماقىنىمۇ ئۇنتۇپ قالغانىدى... «مۇھەببەت ئىلاھى» نىڭ قورسىقىغا «جىن» كىردى ۋە جەۋلاننىڭ ئادىرىسىنى ئېنىق سورىۋالغاندىن كېيىن گەپ-سۆز قىلمايلا تېلېفوننى قويىۋېتىپ ئوخشىتىپ پۇلۇ ئەتتى ۋە ماشنىسىنى ھەيدەپ ئۇدۇل جەۋلاننىڭ تەتقىقات ئورنىغا باردى. -مەن بۇنداق ئوخشىغان پۇلۇنى تۇنجى قېتىم يېيىشىم!- دېدى جەۋلان تەتقىقات ئورنىنىڭ گۈللۈككە قويۇلغان ئورۇندۇقتا ئولتۇرۇپ پۇلۇنى ئىشتىھا بىلەن يەپ،- ئۇنىڭ ئۈستىگە ئاجرىشىپ كەتكەن خوتۇنۇم پۇلۇغا تۈگۈل ئادەتتىكى تاماقنىمۇ ئېتەلمەيتتى... -خوتون كىشى تۇرۇپ تاماق ئېتەلمىسە قانداق بولىدۇ؟- «مۇھەببەت ئىلاھى» قەستەن جەۋلاننىڭ جاراھىتىگە تۇز سەپتى. -... -... ئۇلار شۇ كۈنى ئۇزاق پاراڭلاشتى ۋە جەۋلان تەتقىقات تېمىسىنى تاشلاپ قويۇپ بىرگە كىنوغا باردى. قورساق ئاچقاندا يېتىپ كەلگەن پۇلۇ، نىكاھتىن ئاجرىشىپ يۈرەككە دەز كەتكەن چاغدىكى كىنو ئۇ ئىككەيلەننى بىر يىپقا باغلاپ قويدى. «ئىككى دەرتمەن» نىڭ دەردى تۈگىمەيتتى، ۋاقىتنىڭ ئۆتىشىگە ئەگىشىپ ھەر ئىككەيلەن خىيالىدىكى «ئۇ» نى «ئەلۋىدا» دەپ يىگانە قەبىرىگە مەڭگۈلۈك دەپنە قىلىۋەتتى، ھەر ئىككەيلەننىڭ كۆزلىرىدىن سىرغىپ چىققان ئاجايىپ بىر مېھىرلىك ئۇچقۇن تومورلىرىدىكى قانغا بىرلا ۋاقىتتا تاراپ، كۆزلىرى بىر-بىرىنىڭ سېھىرلىك كۆزلىرىگە ئەل بولغاندەك يۈرەكلىرىگە بىر تاتلىق سىزىمنى باشلاپ كىرىپ، دەقىقە ئىچىدە تېگىشكەن ئوتلۇق لەۋلەر، دەقىقە ئىچىدىكى سېھىرلىك تۇيغۇلار، يەنە شۇ دەقىقە ئىچىدە تۇزۇپ كېتىدىغان شادلىق ئىككى قەلبنى ئۆز ئىلكىگە ئالدى... ئۇلارنىڭ مۇھەببىتى تەرەققى قىلىپ توي قىلىش دەرىجىسىگە يەتتى، بىر كۈنى «مۇھەببەت ئىلاھى» بەرناغا چۈشەندۈرۈپ قويۇشنى ئويلىدى-يۇ، ئارقىدىنلا ئۇنىڭ خاتا چۈشىنىپ قېلىشىدىن ئەنسرەپ ئۇ ئويىدىن يالتايدى، «بىزنىڭ ئالاقىمىز پۈتۈنلەي تور، ئۈندىدار ئارقىلىق بولغان، ئىككىمىز يۈز كۆرۈشۈپ باقمىغان...» دېگەنلەرنى ئويلاپ خېلى خاتىرجەم بولدى. بۇ جەرياندا بەرنا ھەر قانچە قىلىپمۇ «مۇھەببەت ئىلاھى» بىلەن ئالاقىلىشالمىدى، ئۇ ئۈندىدارغا چىققاندا «مۇھەببەت ئىلاھى» لېنىيىدە يوق ئىدى. ئۇ «مۇھەببەت ئىلاھى» نىڭ يانفونىغا ئورىۋىدى، يانفونىنى بېىسۋەتتى، بىر قانچە كۈندىن كېيىن قايتا ئورىۋىدى، ئۇ نومۇر توختىۋىتىلگەنىدى. ئارىدىن بىر ھەپتە ئۆتۈپ بەرنا ئىشەنچلىك بىر خەۋەرگە ئېرىشىپ ناھايىتى ھەيران قالدى: يەنى ئۇ جەۋلاننىڭ يېقىندا توي قىلىدىغانلىقىنى ئوقۇپ ئولتۇرالمايلا قالدى ۋە خېلى كۆپ بەدەل ئارقىلىق توي قىلماقچى بولغان قىزنىڭ يانفون ئۇچۇرىغا ئېرىشىپ تېلېفون ئورىۋىدى، قارشى تەرەپنىڭ ئاۋازىنىڭ تونۇش ئاۋاز ئىكەنلىگىنى ئۇقۇپ ھۇشىدىن كەتكىلى تاس-تاماس قالدى، پەرۋەردىگار، قارشى تەرەپ دەل ئاشۇ «مۇھەببەت ئىلاھى» ئىدى. «مۇھەببەت ئىلاھى» يانفونىنىڭ «ئۈزۈش» كونوپكىسىنى بېسىۋەتتى، ئەمما ھايال ئۆتمەيلا «قىسقا ئۇچۇر» خەۋىرى كېلىپ ئۇچۇر كەلگەنلىگىنى خەۋەر قىلدى. ئۇ قاراپلا تۆۋەندىكىلەرنى ئوقىدى: پەس مىكىجىن، ئىپلاس، سەن تېخى توردا ئېرىمنى ئازدۇردىڭمۇ؟ سەن ھەقىقەتەن بەك ئىپلاسكەنسەن...،- ئۇ ئارقا –ئارقىدىن ئېغىزغا ئالغۇسىز تىللار بىلەن ھاقارەتلەنگەن بىر قانچە ئۇچۇرنى تاپشۇرۇپ ئېلىپ، شۇ ھامان يانفون نومورىنى، چچى نومۇرىنى ۋە تور ئادىرىسىنى ئۆزگەرتىۋەتكەن بولسىمۇ ئەمما خاتىرجەم بولالمىدى. -بۇنىڭدىن ئەنسرەپ كەتمەڭ!- دېدى جەۋلان «مۇھەببەت ئىلاھى» نى بەزلەپ،- بىز ئاجراشقان ئەر-خوتون، ھېچكىم بىزنىڭ قايتا نىكاھلىنىش ئەركىنلىگىمىزنى توسۇپ قالالمايدۇ ۋە توسقۇنلۇق قىلالمايدۇ. -ئۇنداق بولسا بىز توي ۋاقتىنى ئىلگىرى سۈرەيلى،- دېدى «مۇھەببەت ئىلاھى» يەنىلا خاتىرجەم بولالماي،- بولغاندا توي موراسىمى ئۆتكۈزىدىغان رىستوراننىمۇ ئالماشتۇرساق... -ئۇنداق قىلغىلى بولمايدۇ!- دېدى جەۋلان ئىشەنچلىك ھالدا،- رىستورانغا ئالدىن رەنە پۇلى تۆلەپ بولغان...،- جەۋلان بىر ئىشنى ئويلانغاندەك بىر ئاز تۇرىۋالغاندىن كېيىن سۆزىنىڭ ئاخىرىنى داۋاملاشتۇردى،- خاتىرجەم بولۇڭ، بۇنچە چوڭ شەھەردە بىزنىڭ قاچان، قايسى رىستوراندا توي مۇراسىمى ئۆتكۈزىدىغانلىقىمىزنى ئۇقىۋېلىشى ناتايىن... -... ئۇلار خېلىغىچە تالاش-تارتىش قىلىشىپ توي كۈنىنى ئۈچ كۈن ئالدىغا سۈرۈپ باغاقنىڭ چىسلاسىنى ئۆزگەرتتى ۋە چاقىرىدىغانلار سانىنىمۇ ئازلاتتى. بەرنا خۇسۇسى رازۋىتچىك ياللاپ شۇنچە مەخپىي تۇتقان توي كۈنى ۋە رىستوراننى ئېنىق ئوقۇپ، بىر قاتار «تەييارلىق» لارنى پۇختا قىلدى ۋە بېشىغا شىلەپە كېيىپ، قاركۆز ئەينەك تاقاپ مۇددەتتىن بۇرۇن بېرىپ رىستوراننىڭ تازىلىق ئۆيىگە يوشۇرۇندى. مۇراسىم باشلاندى، لەززان موزىكا باشقىلارغا شاتلىق بېغىشلىغان بىلەن بەرنانىڭ يۈرىكىگە بېگىز تىققاندەك ئاڭلىناتتى. -خەپ! دەيتتى بەرنا ئۆز-ئۆزىگە،- توي موراسىمىڭنى ماتەم موراسىمىگە ئايلاندۇرىۋەتمەيدىغان بولسام!- ئۇ قوينىغا قولىنى سېلىپ قويدى. -قىز-يىگىت بىر-بىرىگە تازىم قىلغاي!- رىياسەتچىنىڭ سۆزى بەرناغا خۇددى جەڭ سىگىنالىدەك ئاڭلىنىپ دەرھال تازىلىق ئۆيىدىن چىقتى ۋە ھېچقانداق توسالغۇسىزلا بىر-بىرىگە تازىم قىلىش ئۈچۈن ئۇدۇل قارىشىپ تۇرغان قىز-يىگىتنىڭ ئالدىغا باردى. ھېچكىم بەرناغا دىققەت قىلمىغان بولۇپ، ھەممەيلەننىڭ كۆزى قىز-يىگىتتە ئىدى، بەرنا بارغانچە قوينىدىن بىر خەنجەرنى چىقىرىپ ئالدىن خۇددى توزدەك ئاپئاق توي كۆڭلىگى كەيگەن «مۇھەببەت ئىلاھى»غا كۈچەپ تىقتى، «مۇھەببەت ئىلاھى» «ۋايجان!» دەپ چىقراپلا يىقىلدى، بەرنا خەنجەرنى تارتىمايلا قوينىدىن يەنە بىر خەنجەرنى چىقىرىپ «مۇھەببەت ئىلاھى»نى يۆلەش ئۈچۈن ئېڭىشكەن جەۋلاننىڭ تاغىقىغا تىقتى، بۇ كۆرۈنۈش خۇددى كىنو-تېلېۋىزىيە فىلىملىرىدىكىدەك شۇنداق تاسادىپى، شۇنداق تېز يۈز بەردىكى مەخسۇس مەشىق قىلغان «ئالاھىدە خادىم» لارمۇ بۇنداق تېز، بۇنداق كۆزنى يۇمۇپ ئاچقىچە تاماملىيالمايتتى. زال ئىچىدە قىيا-چىيا كۆتۈرۈلدى، ھەممە ئادەم بىر قانچە سىكونت ئىچىدە يۈز بەرگەن پاجىئەگە ئىشەنگۈسى كەلمىگەندەك، بۇنىڭ بىر قاباھەتلىك چۈش بولۇپ چىقىشىنى ئارزۇ قىلغاندەك بۇنىڭ رېئاللىق ئىكەنلىكىگە ئىشەنمەي كۆزلىرىنى ئوۋىلايتتى... -خالايىق، ئاڭلاپ قويۇڭلار، مەن مورادىمغا يەتتىم...،- بەرنا خۇددى نىرۋىسىدىن ئاداشقان ئادەمدەك بىردە ياش تۆكۈپ يىغلىسا بىردە قاقاقلاپ كۈلەتتى. ساقچى ماشنىسىنىڭ ۋەھمىلىك سىگىنال ئاۋازى بەرنانىڭ سۆزىنى بۆلۈپ، بىر قانچە ساقچى كىرىپ كەلدى ۋە بەرنانىڭ قولىغا كويزا سالماقچى بولغاندا ئۇ قولىنى بەرگىلى ئۇنماي ۋارقىرىدى: -كويزىنى بۇ ئىككىگە سېلىڭلار!- بەرنا بىگىز قولى بىلەن يەردە ياتقان «مۇھەببەت ئىلاھى» بىلەن جەۋلاننى كۆرسەتتى، بىراق ساقچىلار بەرنانىڭ قارشلىق قىلغىنىغا ئۇنماي بىر ساقچى ماشنىسىدا ئېلىپ ماڭدى، بەرنا ماشنىغا ئېلىپ چىققۇچىمۇ، ئېلىپ چىققاندىن كېيىنمۇ ۋارقىراپ سۆزلەيتتى، قاقاقلاپ كۈلەتتى، «مۇھەببەت ئىلاھى» بىلەن جەۋلان دوختۇر ماشنىسى بىلەن دوختۇرخانىغا ئېلىپ كېتىلدى، توي موراسىمى راستىنلا ماتەم مۇراسىمىغا ئايلانغانىدى... خاتىمە «مۇھەببەت ئىلاھى» جايىدىلا جان ئۈزگەن بولۇپ، جەۋلاننىڭ ھاياتى ساقلاپ قېلىندى، بىراق ج خ ئورگانلىرى مۇنداق خۇلاسىغا كەلدى: نىكاھنىڭ قورغىنىنى مۇستەھكەملەش ئۈچۈن ھەر ئىككى تەرەپ ئۆزىنى سوراش لازىم، «ئۈندىدار» كەلتۈرۈپ چىقارغان پاجىئە بىزگە بىر نوقتىنى ئىسپاتلاپ بەردى. بىرىسى تەتقىقاتچى، بىرىسى فىروپىسسور، ئۇلاردا ھېچنەرسە كام ئەمەس، بىرلا ئىشەنچ كام. ئاشۇنداق ئالىي مەلۇماتلىق كىشلەر تۇرمۇشنىڭ سىناقلىرىغا بەرداشلىق بېرەلمەي ئاشۇنداق پاجىئەنى كەلتۈرۈپ چىقارسا ئاددى پۇقرالاردىن، ساۋاتىسىزلاردىن نېمە دەپ ئاغرىنغۇلۇق؟! بەرنا قاماقخانىدىمۇ تىنجىمىدى، ئۇنى نىرۋا كېسەللىكلەر دوختۇرخانىسىغا ئاپىرىپ تەكشۈرتىۋىدى، دوختۇرلار «بىر ئىش ئىددىيىسىگە قاتتىق تەسىر قىلىپ، نىرۋىسىنىڭ ئېغىر دەرىجىدە قالايمىقانلىشىشنى كەلتۈرۈپ چىقىرىپ پاجىئە يۈز بەرگەن، ۋاقتىدا داۋالانمىسا نىرۋىسىدىن ئادىشىپ قېلىشى مۇمكىن..» دېگەن يەكۈننى چىقىرىپ، بالنىستىغا ئالدى...

alzapar0302

	تولۇق ئوقۇپ چىققان بولساممۇ تازا دىگەندەك چۈشىنىپ كىتەلمىدىم .

SaBa_002

	ئۇف   ...         ئۈندىدار ، چ  چ  دىگەنلەر    بىزگە   نۇرغۇنلىغان   قولايلىقلارنى    ۋە  شۇنداقلا   يەنە نۇرغۇنلىغان     يۇقارقىدەك     پاجىئەلەرنى   ئىپ  كەلدى.  مۇشۇنداق  ياخشى  قوراللاردىن  ئەخلاقتىن  چەتنەپ  كەتمىگەن   ئاساستا    پايدىلىنالىغان   بولساق   قانچە   ياخشى   بولاتتى  ھە!     ئاشۇنداق ئالىي مەلۇماتلىق كىشلەر تۇرمۇشنىڭ سىناقلىرىغا بەرداشلىق بېرەلمەي ئاشۇنداق پاجىئەنى كەلتۈرۈپ چىقارسا ئاددى پۇقرالاردىن، ساۋاتىسىزلاردىن نېمە دەپ ئاغرىنغۇلۇق؟!      نىمىدىگەن    توغرا    ئېيتىلغان     گەپ  بۇ      تېما  ئىگىسىگە    ردھمەت     .  ھارمىغايسىز

Hammimiz~Yolda

	مەنغۇ  ئۇ  چ چ   ئۈن دىدار لارغا  ئانچە قىزىق مايمان يانىلا  مۇشۇ  ئۇيغۇرچە   تور بىكەتلىرمىز  مۇنبەرلىرمىز ياخشىكەن

سەنجەر

	ﺋﺎﻕ ﻛﻪﭘﺘﻪﺭﻣﯘ ﺋﯜﻧﻠﻪﻳﺪﯗ ، ﻛﯚﻙ ﻛﻪﭘﺘﻪﺭﻣﯘ ﺋﯚﺭﻟﻪﻳﺪﯗ . ( ﺑﯘﻗﯘ ، ﺑﯘﻗﯘ ، ﺑﯘﻗﯘﯕﻼﭖ ) مىسرانىمنىڭ ﻗﯩﺰﻻﺭﻯ ، ئۈندىدارﺩﯨﻦ ﻛﯜﻧﻠﻪﻳﺪﯗ . ( ﺩﯗﻗﯘ ، ﺩﻭﻗﯘ ، ﺩﻭﻗﯘﯕﻼﭖ ) ﺋﺎﻟﻤﺎ ﺋﺎﺗﺘﯩﻢ ﺩﻩﺭﻳﺎﻏﺎ ، ﻟﻪﻳﻠﯩﯟﯦﻠﯩﭗ ﭼﯚﻛﻤﻪﻳﺪﯗ . ( ﻟﻪﭘﯩﺮ ، ﻟﻪﭘﯩﺮ ، ﻟﻪﭘﻪﯕﻠﻪﭖ ) ئۈندىدارىمنىڭ ﺋﻮﺗﻼﺭﻯ ، ﻳﺎﻟﻘﯘﻧﻼﻳﺪﯗ ﺋﯚﭼﻤﻪﻳﺪﯗ . ( ﮔﯚﭘﯜﺭ ، ﮔﯚﭘﯜﺭ ، ﮔﯚﭘﯜﯕﻠﻪﭖ ) ﺧﻮﺗﻪﻥ ﻳﻪﺭﻟﯩﻚ ﻗﻮﺷﺎﻗﻠﯩﺮﯨﺪﯨﻦ ﺋﺎﺭﯨﻴﻪ ____

nurjahan0997

	ھەقىقەتەنمۇ ياخشى يېزىلغان ئەسەركەن بۇ،بىراق بەكمۇ پاجىئە؛لىك ئاخىرلىشىپتۇ،ئادەم ئۈسۈنىنى باشقۇرماي ئۈسكۈنە ئادەمنى باشقۇرىدىغان بولۇپ قالسا مانا مۇشۇنداق بولىدىغان گەپ بىزدە بىرگەپ بارغۇ:كۆيۈك يامانمۇ كۆنۈكمۇ دېسە،كۆنۈك يامان دەيدىغان

salkin11

	نۇرغۇن ئىشلار دەل دىگەندەكلا ... بەزى ئىشلارغا ھەقىقەتەن دىققەت قىلمىسا بولمايدۇ .

.BAHADIR.

	ياخشى تىمىكەن.

ORKAX123456

	بۇدىگەن بىر ھىكايە خالاس. ئۈندىدارنى ئەيىپلەشنىڭ ھاجىتى يوق. ھىكايە ياخشى يىزىلىپتۇ.

گۆزەل

	رۇھىي بۇشلۇققا سىڭىپ كىرگەن مىتە قۇرۇتلارغا  ئۇرۇن بەرسە مۇشۇنداق پاجىئە كىلىپ چىقىدۇ.