 |
 |
 |
 |
ئىزچىلار
مەشھۇر مائارىپچى، تالانتلىق شائىر ۋە كومپۇزىتور مەمتىلى ئەپەندىگە ئەگەشكەن، مائارىپىمىز ئۈچۈن جان كۆيدۈرگەن، ئۆزىنى بېغىشلىغان ئىزچىلارنى چوڭقۇر ھۆرمەت بىلەن ئەسلەيمەن.
( ئىبراھىم ئالىپ تېكىن )
بىز ئىزچىلار بىز قوللىرىمىز گاڭ،
كۆزىمىز نۇرلۇق قەلبىمىز ساغلام.
خەلق يولىدا ئالغا باسىمىز،
رەقىپكە قارشى ساقلاپ ئىنتىقام.
ئۆگەن تىرىش، ياش ئىزچى بالىلار،
ۋەتەن غېمىدە قاينار ۋىجدانلار.
بۇ ئىزچىلار ناخشىسى، جاھالەت ۋە قارۇڭغۇلۇق يىللاردىكى گۈزەل سىمفۇنىيە ئۇلۇغ چاقىرىق، بۇ بىر بۈيۈك ناخشا، مۇقەددەس ئوت، بۇ مەڭگۈ توختىماس دەريا، زىمىنگە چېچىلغان قۇت.
بۇ بالدۇر ئويغانغان ئادەملەرنىڭ ناخشىسى، بۇ كۆرەشچان بىر نەۋقىرانلارنىڭ يۈرەك ساداسى. بۇ ئەل – ۋەتەننىڭ غېمىدە پۇچۇلانغان، كۆيگەن، يىغلىغان ئارىسلانلارنىڭ مۇڭلۇق كۈيى. بۇ تەكلىماكان ئاسمىنىدىكى سان – ساناقسىز يۇلتۇزلارنىڭ يارقىن مىلۇدىيىسى. بۇ زىمىندە شانلىق سەھىپە ئاچقان كۈچلۈك ئادەملەردۇر. ھەق سۆز ۋە ھەقىقەت مارشىللىرى بىلەن نادانلىق ۋە جاھالەتتىكى شۇ كىشىلەرگە خوش خەۋەر ئېلىپ كەلگەنلەردۇر.
ئۇلارنىڭ ناخشىسى بۇزىمىنگە نۇر بولۇپ يېيىلدى. ئۇلارنىڭ ناخشىسى بۇ زىمىنگە گۈل بولۇپ تېرىلدى. بۇ ناخشا بىلەن بۇ يۇرت بۇ خەلق قاراڭغۇلۇقتىن قۇتۇلدى. خارلىق ۋە قۇللۇقتىن، نادانلىق ۋە جاھالەتتىن تەبرىقچىلىق ۋە قاباھەتتىن ئىتتىپاقسىزلىق ۋە ئاداۋەتنىڭ ئىسكەنجىللىرىدىن ئازاد بولدى.
بۇ بىر مائارپ ناخشىسى، بۇ بىر مەرىپەت مارشى، بۇ ھەقىقەت يولىدا يول ئېچىپ ئىلگىرلەپ ماڭغان ھەم بۇ يولدا بارلىقىنى بېغىشلىغان شۇ ئۇلۇغ جەڭچىلەرنىڭ، ئاقارىتقۇچىلارنىڭ، قورىقماس، ئۆلمەس ناخشىسى.
ئۇلار پۈتكۈل ھاياتىنى ئەل ئۈچۈن قۇربان قىلدى. ئۇلار ۋۇجۇدىدىكى مېھرى – شەپقەت بىلەن بۇ زىمىنگە شەپقەت قىلدى. بۇ يەرنىڭ كېلەچىكى ھەققىدە ئىجتىھات قىلدى.
ئۇلار قىلغان ياخشىلىقلىرىغا مىننەت قىلىدىغان كىشىلەرگە ئوخشىمايدۇ. ئۇلار نام – شۆھرەت چىقىرىش ئۈچۈن ياشايدىغان ئادەملەرنىڭ خىلى ئەمەس.
ئۇلار جەسۇر كىشىلەردۇر، ئۇلار غالىپ ئادەملەردۇر. ئۇلار ئۆزىدە بار ھەممە نەرسىنى، سۆيگۈسىنى، مۇھەببىتىنى كىشىلەرگە بەردى. ئۇلار ئىنسانلار مۇھەببىتىنى ھۆرمەت قىلدى. ئۇلار بۇ ۋەتەننى بۇ ئەلنى ۋۇجۇدى بىلەن سۆيگەنلىكى ئۈچۈن ئۇلارنىڭ غەزىنىسى مەڭگۈ نۇر چېچىپ تۇردى. ئۇلارنىڭ مۇھەببىتى خۇددى تاغ جىلغىسىدىكى گۈل – گىياھلارنىڭ ئۆزلىرىنىڭ خۇشپۇراقلىرىنى ھاۋاغا تەقدىم قىلىۋەتكىنىگە ئوخشىشىدۇ. ئۇلارنىڭ سۆيگۈسى خۇددى باھار يامغۇرلىرىدەك قاغجىراپ كەتكەن زىمىنگە خۇشاللىق ئاتا قىلغىنىغا ئوخشايدۇ.
ئۇلارنىڭ تەبەسسۇمى خۇددى مەيىن ياز شامىلىنىڭ ئېتىزلىقتا كۆيۈپ ئىشلەۋاتقان شۇ كىشىلەرگە راھەت بېغىشلىغىنىغا ئوخشايدۇ.
ئى دوسلىرىم، مەسلەكداشلىرىم بىز ئەشۇ جەڭگىۋارلارنى ھەقىقى ياد ئەتكەندە ئۇلارنىڭ مىسلىسىز تۆھپىللىرى ھەققىدە ئويلانماي تۇرالمايمىز. بىز ئۇلارنىڭ شۇيىللاردىكى كۆرسەتكەن خىزمەتلىرىنى ئەسلىگىنىمىزدە ئۇلارغا ئېھتىرام بىلدۈرمەي تۇرالمايمىز.
ئۇلار ئىتقادى ۋە ئىمانى بىلەن بۇ تۇپراققا يۈز كېلىپ ياشىدى. جاسارەت ۋە غەيرىتى بىلەن داۋان ئاشتى.
ئۇلار ئۆزلىرى يىپ ئىگىرىپ ئۆزلىرى رەخت توقىدى. بۇ رەختلەربىلەن باشقىلارغا كىيىم تىكىپ بەردى.ئەمگەك قىلىپ نان يىدى. باغ بىنا قىلىپ مىۋە يىدى. قۇدۇق قېزىپ سۇ ئىچتى، ئۆستەڭ چېپىپ ئېكىنزار بەرپا قىلدى.
ئۇلار ياماندىن قورىقمىدى، ياۋۇزغا باش ئەگمىدى، مەغرۇرلۇق بىلەن ھېچنىمىنى كۆزگە ئىلمايدىغان شۇ جاھالەت پىرلىرى بىلەن كەسكىن ئېلىشتى. ئىبلىستىن بىلىم ئېلىپ دۇنيادا تەكەببۇرلۇق بىلەن خالىغاننى قىلىدىغان شۇ ئاتالمىش بويسۇندۇرغۇچىلارنىڭ سۈيقەسىتلىرىنى بىتچىت قىلدى.
رىئاللىق دائىم ئىنسانلارنىڭ ئارزۇ- ئۈمۈدلىرىگە ئاچچىق مۇئامىلە قىلىدۇ.
ئەمما شۇ يول ئاچقۇچىلار رىئاللىقنى چوقان – سۈرەنلىرى بىلەن بويسۇندۇردى.
رىئاللىقنىڭ ھاياتقان قويغان ئىسىملىرىنى ئۆچۈردى.
روھنىڭ ئاجىزلىقى تۈپەيلىدىن قاراڭغۇلۇقتا قېلىپ ياش تۆكۈۋاتقان ئادەملەر گۈزەل تاڭنىڭ يولىغا يۈزلەندى.
ھاياتتىن ئۈمۈد ئۈزگۈچىلەر، ياشاشنىڭ ئەھمىيتى يوق دىگۈچىلەر ئۇيقۇسىنى ئاچتى.
نەچچە ئەسىرلەردىن بېرى ئېرىمىگەن – قار – مۇزلار ئېرىشكە باشلىدى.
نەچچە يىللاردىن بېرى ئاق قالغان ئېتىزلار، قىرلار يېشىللىق لىباسىنى كەيدى.
ئۇلارنىڭ قان – تەرلىرى پىشانىلىرىدىن شارقىراپ چۈشۈپ سان- ساناقسىز كۆلچەكلەرنى ھاسىل قىلدى. تالاي ھاياتلىق بۇ كۆلچەكلەردىن سۇ ئىچتى. مانا بۇ گۈزەل ھايات تەشنا يۈرەكلەرنىڭ خەزىنىسىنى تولدۇردى.
ئۇلار ۋەتەنگە قۇللۇق بىلدۈردى. ئۇلار ئۆزلىرىدىكى خۇشپۇراق ئەتىر – ئەنبەرلەرنى خەلقنىڭ ئاياغلىرىغا چاچتى.
ئۇلار مەرىپەتنىڭ ئادىراسىمان ۋە ئارچا ياغاچلىرىدىن ئىسرىق سېلىپ بۇ ۋەتەننىڭ ھاۋاسىنى تەڭشىدى.
ئۇلار تۈن كېچىلەرگە ئىتائەت قىلىۋاتقانلارنى، خۇراپاتلىق ۋە بىتئەتكە ئەگەشگۈچىلەرنى، قۇللۇققا سەۋىر – تاقەت قىلغۇچىلارنى، تەقدىرگە بويسۇنۇش كارۋانلىرىدا ئۇخلاۋاتقانلارنى يېڭى ھاياتقا چاقىردى.
ئۇلار بۈيۈك ئاۋازى بىلەن ئاتا- بوۋىلىرىنىڭ ئاۋازىنى ئۆزگەرىتتى. ناچار ئۆرپ – ئادەتكە مەھكۇم بولۇپ كەتكەن چىرىك روھلارغا نۇر بەردى. ئاجىز ۋە مەزلۇملارنىڭ تىللىرىنى ھەرىكەتكە كەلتۈردى. بالىلارغا يول بەلگىسى كۆرسىتىپ بەردى.
ئۇلار بۇتۇپراققا ئۇرۇق چاچتى. بۇ ئۇرۇقلار ئايلىنىپ مىليونلىغان ئائىلىلەرنىڭ داستىخىنىدىكى ئېسىل نېمەتكە ئايلاندى.
ئۇلار قەلب دەرۋازىسىنى كەڭ ئاچتى. مىليونلىغان دەرۋازىلار ئارقا – ئارقىدىن ئېچىلدى.
ئۇلار مانا مۇشۇنداق تىنىمسىز بەدەللەر ئىچىدە ھاياتىنى قۇربان قىلدى. مانا بۇ ھاياتنى سۆيۈشتۇر.
ئىزچىلار ناخشىسى ياڭرىماقتا:
ئۆسكەن يۇرتىمىز تاغلىق، شېغىل تاش،
ۋەتەن غېمىدە پىدادۇر بۇ باش.
ماڭغان يولىمىز نىجاتلىق يولى،
قايىتما بۇ يولدىن ئىزچى قېرىنداش.
ئۆگەن تىرىشىپ ياش ئىزچى بالىلار،
ۋەتەن غېمىدە قاينار ۋىجدانلار.
بۇ بىر ھەقىقەت مارشى ئىدى.
ئانا زىمىن ئادەملەرگە مۇراجەت قىلىپ شۇنداق دېدى:
« ھەقىقەت سىلەرنى چاقىرۋاتىدۇ، گەرچە مۇساپە ئۇزۇن ۋە مۈشكۈل بولسىمۇ سىلەر ھەقىقەتكە ئەگىشىڭلار. ئۇ تاش يۈرەك ھەم رەھىمسىز بولغىنى بىلەن سىلەر ئۇنىڭ بىلەن نىجاتلىق تاپالايسىلەر. ھەقىقەتنىڭ قاناتلىرى سىلەرنى ئورىغاندىن گەرچە پەيلەر ئارىسىدىكى يوشۇرۇن شەمشەرلەرنىڭ سىلەرنى يارىدار قىلىشى كۆرۈنۈپ تۇرغان بولسىمۇ ئۇنىڭغا تەسلىم بولۇڭلار. مانا بۇ سىلەر ئۈچۈن ئەڭ ياخشى تاللاشتۇر ھەقىقەت قوپال ئاۋازى بىلەن سىلەرنى چاقىرغاندا ئۇنىڭ ئاۋازىغا قۇلاق سېلىڭلار. بۇنىڭ بىلەن سىلەر ئۆزۈڭلەرگە زىيان كەلتۈرىۋاتقان تەتۈر قىسمەتلەردىن قۇتۇلىسىلەر. ئازاب – ئوقۇبەتتىن خالاس بولىسىلەر چۈشكۈنلۈك ۋە زەئىپلىك لىباسىنى تەرىك ئېتىسىلەر.
بۇ بىر ھەقىقەت ناخشىسى، ئەشۇ مەغرۇر ئىزچىلارنىڭ، ئوت يۈرەكلەرنىڭ ھەقىقەت ناخشىسى، بۇ ناخشا بۈگۈننىڭ پارلاق يوللىرىدا قۇلاق تۈۋىمىزدە ياڭراپ تۇرماقتا.
ئۆگەن تىرىشىپ ياش ئىزچى بالىلار،
ۋەتەن غېمىدە قاينار ۋىجدانلار.
2013- يىلى 12- ئاينىڭ 15 – كۈنى (ئاتۇش)
|
 |
 |
 |
 |
|
يوللىغان ۋاقتى 2013-12-16 08:25:45 PM
