مۇئەللىم

ongmas

	مۇئەللىم مەخمۇت ئاۋۇت ئۆڭمەس مىننەتسىزلىك،كەمتەرلىك  ئۈلگىسىدۇر مۇئەللىم، غەم-قايغۇنىڭ شىپاسى - كۈلكىسىدۇر مۇئەللىم؛ كۈچ-جاسارەت بۇلىقى، ئىلىم-ئىرپان  چىرىقى، باھادىرى  يېڭىلمەس،  سەركىسىدۇر مۇئەللىم. شۇم نىيەتلىك، پەسكەشلىك قامچىسىدۇر مۇئەللىم، چاڭققاق  دىلغا  ئۇ زەم-زەم تامچىسىدۇر مۇئەللىم؛ ئاتار ئەلگە مېھرىنى، خورىسىمۇ شام تېنى ، خۇنۈكلۇققا  نۇر-زىبا  باغچىسىدۇر مۇئەللىم. ئىتتىپاقلىق، ئۆملۈكنىڭ كۈيچىسىدۇر مۇئەللىم، مۈشكۈلاتنىڭ، قىسمەتنىڭ يەلكىسىدۇر مۇئەللىم؛ ئۆڭمىگەچ ۋىجدان-غۇرۇر، تاپار ئۇندىن ئەل ھوزۇر، مەنزىلىنىڭ ساداقەت رولچىسىدۇر مۇئەللىم. خامۇشلۇقنىڭ، غەپلەتنىڭ خەنجىرىدۇر مۇئەللىم، ئىناقلىقنىڭ، بىرلىكنىڭ زەنجىرىدۇر مۇئەللىم؛ پۈككەچ ئەلنى چىن دىلغا،تەرىپى داستان تىلغا، ئەلنى سۆيۈش، گۈللەشنىڭ دىلبىرىدۇر  مۇئەللىم. مۇڭ-پىغاننىڭ، كۈلپەتنىڭ شادلىقىدۇر مۇئەللىم، مەجرۇھ تەننىڭ ئوزۇقى- ئاشلىقىدۇر مۇئەللىم؛ ئوتقاش تۈندە يورىغان ، قوياش تاڭدا پارلىغان، دىلغا بەخت تېڭىشنىڭ ئاشىقىدۇر  مۇئەللىم. گۈل چىمەننىڭ، باغلارنىڭ بۇلبۇلىدۇر مۇئەللىم، رىقابەتنىڭ، جەڭگاھنىڭ  دۇلدۇلىدۇر  مۇئەللىم؛ قەلبى سۈتتەك بىغۇبار، قەددى مەزمۇت گاڭ- چىنار، ئەل-جاھانغا پاسىبان، گۈل-گۈلىدۇر مۇئەللىم. بىپايان ئۇز زېمىننىڭ گىياھىسىدۇر مۇئەللىم، پارلىغان تاڭ-قۇياشنىڭ جۇلاسىدۇر مۇئەللىم؛ بولار بىت-چىت قاباھەت، تاپقاچ شىپا جاراھەت، چىن ھاياتنىڭ جاكاسى، نىداسىدۇر  مۇئەللىم. ئادىمىيلىك، خىسلەتنىڭ ئىنژىنېرى مۇئەللىم، ھۆنەر، ئىلىم-ھېكمەتنىڭ ئۇستاز-پىرى مۇئەللىم؛ مەرىپەتنىڭ مەشئىلى، يۈكسىلىشنىڭ كۈچ، ئۇلى، ئىدراك-ئەقىل، ھۆرمەتنىڭ چولپان نۇرى مۇئەللىم. مەنبە: ئۆز ئىجادىيىتىم.

گۈلۈم0997

	سىزنىڭ شىئېرىلىرىڭىزنى بۇ يەردىمۇ كۆرگىنىمدىن بەك خۇشال بولدۇم . ياخشى يېزىپسىز.

axek13999649893

	ئادىمىيلىك، خىسلەتنىڭ ئىنژىنېرى مۇئەللىم،

ئەرتۇرا

	            مۇئەللىم ئورنى پەس. 1 «ساراڭ» دەر سۆزلىسەم  مەن ساراڭ ئەمەس، سۆزلىدىم ئوقۇتۇش بولغاچقا بىر خەس. ئانا تىل يەكلىنىپ باستى يەنە  نەس، ئۇستازنى نەس باسسا ئەل خاراپ پەۋەس. مۇئەللىم ئورنى پەس، ئەلنىڭ بەختى تەس. 2 باشلىقلار تۇرىدۇ خۇددى داھىدەك، كۆرمەيدۇ پۇخرانى كەشى لايىدەك. يالۋىرىپ  چاپىمىز ئىشقا يايىدەك، بىز ماتا ئۇلاردۇر ئەتلەس شايىدەك. مۇئەللىم ئورنى پەس ئەلنىڭ بەختى تەس. 3 شۇ تۈزۈم سەۋەپلىك باردۇر داۋامسىز، سۆھبەتتە يىغمىساق بىزلەر  يارامسىز. تەنقىدلەر بىزنىلا كىرىپ سالامسىز، قورقۇتۇپ تىللايدۇ «سىلەر بولامسىز!»، مۇئەللىم ئورنى پەس ئەلنىڭ  بەختى تەس. 4 دىن چەكلىگەچ ئەخلاق ئۆزلىشىپ چالا، كۆپەيمەكتە مەكتەپتە داۋامسىز بالا . شۇڭلاشقا بىلىملەر ئۆزلىشىپ چالا ، رىزاسىز بۇرچىمىز ئايلىنار دالا. مۇئەللىم ئورنى پەس ئەلنىڭ بەختى تەس. 5 ئوقۇغۇچى قىرىقتىن كۆپ سىنىپتا ، كۈنلۈك بىردىن تاپشۇرۇق بار قېلىپتا. ئامال يوق بۇنىڭغا بىزدەك غېرىپتا. چارچايمىز تۈزۈمنى ساناپ ئېيىپتا ، مۇئەللىم ئورنى پەس ئەلنىڭ بەختى تەس. 6 بالىنى ئازىلاپ ئۇستازنى خارلاپ، ماڭغان مائارىپ تۈگىشىدۇ زارلاپ. ھەم ياراملىق ئەۋلات چىقمايدۇ پارلاپ ، قارايلى تارىخقا ئىبرەتلىك چارلاپ، مۇئەللىم ئورنى پەس، ئەلنىڭ بەختى تەس. (7 ئىلىمگە خىيانەت، ئەلگە قىيامەت ، بىراق بىزدە كۆپتۇر بۇنداق قىياپەت. بولسىمۇ ئۇستازغا ياخشى سىياسەت. لىكىن بىزدە يوقتۇر ئۇنداق دىيانەت.، مۇئەللىم ئورنى پەس، ئەلنىڭ بەختى تەس. 8 باشقىلار ئۇستازنى   ئۇلۇغ بىلىدۇ ، شۇڭا  ئۇلار باي  بەخىتلىك كىلىدۇ، بىزدە غاجاپ تىللاپ ئەخمەق قىلىدۇ، ھالىمىز شۇڭلاشقا يۈرەك تىلىدۇ. مۇئەللىم ئورنى پەس، ئەلنىڭ  بەختى تەس. 9 ئۇ ئايدىن بۇئايغا مائاش يەتمەيدۇ، مال باھا ئۆسۈشتىن نېرى كەتمەيدۇ، توي تۆكۈن مائاشنى تازا  ئەپلەيدۇ. شۇڭلاشقا نامراتلىق بىزنى خەپلەيدۇ، مۇئەللىم ئورنى پەس ، ئەلنىڭ  بەختى تەس. 10 ھەربىر  خەت پىلاندا بولمىساق زىرەك، ئايلىنىپ قالارمىز كىرەكسىز تىزەك. شۇڭا بەك ئىشلەيمىز خىزمەتنى دىمەك. ئىشلەشتە يوق بىزگە بىرەرمۇ تىرەك، مۇئەللىم ئورنى پەس ، ئەلنىڭ بەختى تەس. 11 ھاجەت راۋا بولماي تۇرىدۇ سەپ-سەپ، باشقىغا بىزلەردىن تەگمىگەچكە نەپ، قاچاركەن ھەممىسى«نەپ تەگمىدى» دەپ، شۇڭلاشقا غەم باسار بولۇپ بىر سەلەپ، مۇئەللىم ئورنى پەس ، ئەلنىڭ بەختى تەس. 12 ئوقۇتۇشنى دىمەس  «جاپالىق ئەمگەك»، بار تېخى «ھەممىدىن ئاسان »دەپ كەتمەك. يوقتۇر ھەقىقەتنى  ئىزدىمەك يەتمەك، شۇڭا بارساختىلىق يوقنى بار ئەتمەك، مۇئەللىم ئورنى پەس، ئەلنىڭ  بەختى تەس. 13 چېقىمچى چاقىدۇ باشلىققا داتلاپ، غەيۋەتخور غاجايدۇ قارىنى چاپلاپ، دۈشمىنىڭ يۈرۈيدۇ ئەتراپنى قاپلاپ، ياراتماي دوستلۇرۇڭ كىتىدۇ ياتلاپ. مۇئەللىم ئورنى پەس، ئەلنىڭ بەختى تەس. 14 تىلىمىز ئىدى بەك ئۇلۇغ ھىكمەتتە، " ئەڭ گۈزەل تىل يېزىقكەن " دەپ زىننەتتە. خەلقارادا يۈرەر  ئەنە  ئىززەتتە بىراق بىزدە  سانالدى بەك ئىللەتتە، مۇئەللىم ئورنى پەس، ئەلنىڭ بەختى تەس. 15 قوشتىل ، شۇ «قوشتىل»دەك ئادىل ئاقمايدۇ، تەلەپ پىكىر  ھەق گەپ  پەقەت ياقمايدۇ، ھەرىمۇ بىر-بىرنى بىزدەك چاقمايدۇ، ئۇستازىغا  بىزدەك  كۆزدە باقمايدۇ. مۇئەللىم ئورنى پەس، ئەلنىڭ بەختى تەس. 16 جاپالىق ئىشلىسەڭ ئەجرىڭ چىقار كەم، ھەقىقەت بولمىغاچ خۇلاسىدە  ھەم ، ئەقىللىق بولساڭمۇ ئىشلەتسەڭمۇ پەم، ئازاپلار ھەممىسى يوقتۇر تاتلىق تەم، مۇئەللىم ئورنى پەس، ئەلنىڭ بەختى تەس. 17 مائارىپتا خورىتىش بولغاچ  بەك  تولا، مۇئەللىم ئىشى كۆپ تەگمەيدۇ چولا ، ئىشلار كۆپ  ھەم ئېغىر، يېغىردۇر دولا. جاپا بولسا ئىنسانغا شۇنچىلىك بولا، مۇئەللىم ئورنى پەس، ئەلنىڭ بەختى تەس. 18 ئوقۇتۇشتىن مۇھىم ئۇقتۇرۇش دائىم ، بۇيرۇقنى ئاڭلىشىڭ كىرەك بەك لازىم. ئوقۇتۇش بىر چەتتە قالار يەپ ۋايىم ، (قاچانمۇ كىلەر؟) دەپ مىنىڭ باھارىم. مۇئەللىم ئورنى پەس ئەلنىڭ بەختى تەس. 19 ئەمىليەتتىن  ئىزدىمەي ھەقىقەتنى ، يەكلەيدۇ دائىملا ھەق پەزىلەتنى. مۇئەللىم تاپالماس ھەق ھەرىكەتنى. قىينىلىپ ئىزدەيدۇ پاك تەبىئەتنى. مۇئەللىم ئورنى پەس ئەلنىڭ بەختى تەس. 20 مۇشەققەت دەستىدىن ئاقارغان بۇ چاچ، بولغاچقا خىزمەتلەر ئەگرى گادىرماچ. بەختىمىز ھەردائىم تۇرسىمۇ قاچ-قاچ، ئۈمۈدۋار بىز لىكىن ھەقىقەت بولغاچ، مۇئەللىم ئورنى پەس ئەلنىڭ  بەختى تەس. 2013-8 

mahatjan

	مۇئەللىم؛-مۇقەددەس قوياشتۇر.كائىناتقا تەركىپ ئايرىماي،ھەق تەلەپ قىلماي ھەم ئىسسىقلىق ھەم يورۇقلۇق تارقىتىدىغان.

dillani

	راس دەيدۇ .مۇئەللىمنى مەكتەپتە رەھپەر ،ئوقۇغۇچى ، يېزىدا دېھقان -چارۋىچى ، شەھەردە ھەتتا بىكارچى - تىلەمچى ،جەمئيەتتە ساھا -ساھەچى  كۆزگە .........،بىر قېرىندىشىمىزنىڭ بىر شئىر بۇلىدىغان دەپ ئاڭلىغان لىكىن ئوقۇپ باقمىغان  تىمىسى مۇندامىكىن مۇئەللىم يۈرەكتىن يۇم -يۇم يىغلايدۇ .

uyol

	شېئىرنى ياخشى يېزىپسىز! تىرىشىڭ !! باشقۇرغۇچىلار تەھرىرلىۋىتىپ بىر تەستىقلىغان بولساڭلار!

مارشال

	ئەيساجان تۇردى ئاچچىقنىڭ ‹‹شىنجاڭ مائارىپى››جۇرنىلىغا مۇئەللىم توغۇرلۇق بىر ماقالىسى چىقىپتىكەن،شۇ ماقالىسى بەك يارىغان ئىدى ماڭا...

qaraxani

	ئۇستازلار شەنىگە يېغىپتۇ ھەق گەپ، ئۇلارنى چۈشەندۇق بۈگۈن ھەسسىلەپ.

wahxi

	ھازىر كىشىلەرنىڭ ئاڭ سەۋىيىسىنىڭ يۇقىرىلىشىغا ئەگىشىپ، مۇئەللىمنى ھۆرمەتلەيدىغانلار كۆپىيىپ قالدى. كىشىلەرنىڭ مۇئەللىمگە بولغان ھۆرمىتى بۇرۇنقىغا قارىغاندا خېلى ياخشى. ئەمما يېزىلاردا  مۇئەللىمنىڭ جەمئىيەتتىكى ئورنى يەنىلاكۆڭۈلدىكىدەك ئەمەس.ھۆرمىتى ئۆسمىگەن بىلەنمۇ ئەمما مائاشى خېلى ئۆسىۋاتىدۇ بولمىسا. بولسا مائاشى توختىماي ئۆسسۇن، پۇلى جىق بولسا ھۆرمىتىمۇ شۇ چاغدا تېخىمۇ ئۆسۈپ قالار.