يۇپۇرغا ھاكىمىنىڭ جاۋاب خېتى

bozqir

	جۇڭگودا تارقىتىش ۋاستىلىرى ئەزەلدىن ھاكىمىيەت يۈرگۈزىۋاتقان پارتىيە ۋە ھۆكۈمەتنىڭ كونتۇرۇللۇقىدا بولۇپ كەلگەچكە پەقەت كونتۇرۇل قىلغۇچى تەرەپنىڭلا  ئىرادىسىنى ئەكىس ئەتتۈرۈشتەك تاق يۆنىلىشلىك تەشۋىقات ھۆكۈم سۈرۈپ، ئاۋام-خەلق پەقەت قوبۇل قىلغۇچىلىق ئورنىدىلا تۇرۇپ قېلىپ ، ئۆز پىكىر -تەلەپلىرىنى ئىپادىلەشكە يېتەرلىك سەھنە تاپالماي كەلگەنىدى.ئېنتېرنېت تورى  بۇ ھالەتكە تۈپتىن خاتىمە بېرىپ كەڭ ئاۋام-خەلىققە يېتەرلىك پىكىر ئەركىنلىكى بوشلۇقى ھازىرلاپ بەردى.    ئېنتېرنېت تورىنىڭ بۇ خىل ئەۋزەللىكى ۋە  توسۇپ قالغىلى بولمايدىغان تەرەققىيات يۈزلىنىشىنى ئالدىن كۆرۈپ يەتكەن بىر قىسىم خەنزۇ رەھبەرلەر ئېنتېرنېتنىڭ ئىجابىي تەرەپلىرىنى مۇئەييەنلەشتۈرۈپ ، ئۇنىڭغا دادىل يۈزلەندى. شەخسىي بىلوگلارنى ئېچىپ، ئاممىنىڭ پىكىر-تەلەپلىرىنى ئاڭلىدى ۋە ئۇلار بىلەن پىكىر بىردەكلىكى ھاسىل قىلدى. مەركىزىي كومىتېت سېياسىي بىيروسى دائىمىي كومىتېتىنىڭ ئەزاسى ، مەركىزىي ئىنتىزام تەكشۈرۈش كومقتېتىنىڭ شۇجىسى ۋاڭ چىشەن ئېنتېرنېت تورىدىن پاش قىلىنغان چىرىك ئۇنسۇرلارغا يېقىندىن دىققەت قىلىدىغانلىقىنى بىلدۈرۈپ، ئىنتېرنېت تورىنىڭ ئىجابىي تەرەپلىرىنى مۇئەييەنلەشتۈردى.نەتىجىدە يېقىنقى بىر مەزگىل ئىچىدە زور بىر تۈركۈم پارىخور-چىرىك ئۇنسۇرلار ۋە قىلمىشلار ئېنتېرنېت تورىدا پاش قىلىنىپ، ئىنتېرنېت تورىنىڭ ئاممىۋى ئاساسى تېخىمۇ كۈچەيدى.مەركىزىي كومىتېت سېياسىي بىيروسىنىڭ ئەزاسى ، مۇئاۋېن زوڭلى ۋاڭ ياڭمۇ نەچچە يىل بۇرۇنلا رەھبىرى كادىرلاردىن ئېنتېرنېت تورىغا دۈشمەنلىك نەزىرى بىلەن قارىماسلىقنى، ئېنتېرنېتتىن قورىقماسلىقنى بەلكى ئۇنىڭغا دادىل يۈزلىنىشنى تەلەپ قىلدى.تاراتقۇلارنىڭ خەۋىرىدىن مەلۇم بولۇشىچە ، مەركىزىي كومىتېت سېياسىي بىيروسىنىڭ ئەزاسى ، ش ئۇ ر لۇق پارتكومنىڭ شۇجىسى يولداش جاڭ چۇنشىيەنمۇ خۇنەندە ئىشلىگەن مەزگىللىرىدىلا ئېنتېرنېتنىڭ ئىجابىي تەرەپلىرىنى مۇئەييەنلەشتۈرۈپ ، ئۇنىڭغا دادىل يۈزلەنگەن. شەخسىي بىلوگىنى ئېچىپ، ئاممىنىڭ پىكىر-تەلەپلىرىنى ئاڭلىغان ۋە ئۇلار بىلەن پىكىر بىردەكلىكى ھاسىل قىلغان. بۇمۇ ئۆز نۆۋىتىدە يپلداش جاڭ چۇنشىيەننىڭ خەلق ئىچىدىكى ئوبرازىنى ياخشىلاشتا موھىم رول ئوينىغان.يولداش جاڭ چۇنشىيەن  ش ئۇ ر غا يۆتكىلىپ كەلگەندىن كېيىنمۇ بۇ ئادىتىنى داۋاملاشتۇرۇپلا قالماي يەنە باشقا رەھبەرلەردىنمۇ شۇنداق قىلىشنى تەلەپ قىلغان بولسىمۇ ئەمما، كەڭ ئۇيغۇر ئاممىسى ئەشۇ رەھبەرلەر  بىلەن ئىنتېرنېتتا پىكىر بىردەكلىكى ھاسىل قىلالماي كەلگەنىدى. ئېنتېرنېت تورىنىڭ ئىختىرا قىلىنىشى پەن-تېخنىكىنىڭ يۈكسەك دەرىجىدىكى  تەرەققىياتىنىڭ مەھسۇلى سۈپىتىدە ئىنسانىيەت جەمئىيىتىگە غايەت زور تۆھپىلەرنى قوشۇپ ، پۈتكۈل دۇنيا جامائىتىگە  زور ماددىي ، مەنىۋى نېمەتلەرنى ئاتا قىلىۋاتقان بۈگۈنكى ئۇچۇر ئىنقىلابى  پار ماشىنىسىنىڭ كەشىپ قىلىنىشىدىن كېيىنكى قۇرۇقلۇقتىكى يىپەك يولى قاتنىشىنىڭ ئۈزىلىپ قېلىشى سەۋەبلىك دۇنيانىڭ ئېسىدىن كۆتۈرلۈپ كەتكەن تەكلىماكاندىكى  ئۇچۇر قەھەتچىلىكىنىڭ دەردىنى تارتىۋاتقان ئۇيغۇرلارغا يەنە بىر قېتىملىق ئىدىيىۋى جانلىنىش ئېلىپ كېلىۋاتقان شارائىتتا ئېنتېرنېت تورىنىڭ كۈچ-قۇدرىتىدىن ۋەھىمىگە چۈشۈپ ، ئۇنىڭغا چىش-تىرنىقىغىچە قارشى تۇرىۋاتقان جاھىل كۈچلەر ھېلىھەم ئۆز ھەيۋىسىدىن قالغىنى يوق . رېئاللىقىمىزدىكى تور ئابونىتلىرىنىڭ ئۆيىنى ئاختۇرۇپ كومپۇيېتىرىنى مۇسادىرە قىلىش، سوئال-سوراق قىلىىپ تورغا چىقماسلىققا ۋەدىنامە يازدۇرۇشتەك ئەقەللىي توردىن پايدىلىنىپ ئۆز كۆز قاراشلىرىنى بايان قىلىش ھوقۇقىنى پايخان قىلىشقا ئورۇنىۋاتقان ئەھۋاللار ھەتتا ئۇنىڭدىنمۇ ئېغىر  قىلمىشلار ھېلىھەم دەۋران سۈرمەكتە.دائىرىلەرنىڭ بۇ خىل قىلمىشىنى ئەينى يىللىرى مۇستەبىت ياڭ زېڭشىننىڭ ئۇيغۇرلار رايونىدا يۈرگۈزگەن خەلقنى نادانلىقتا قالدۇرۇش  سېياسىتىنىڭ داۋامى دېمەسلىككە ئامالسىزمىز.ياڭ زېڭشىن ئەينى ۋاقىتتا مائارىپنى ئۇيغۇرلارغا قانداق دۈشمەن كۆرسەتكەن بولسا ھازىر بىر قىسىم قارا قورساق سولچىل كۈچلەر ئېنتېرنېت تورىنىمۇ ئۇيغۇرلارغا شۇنداق دۈشمەن كۆرسىتىشكە كۈچىمەكتە.   ئەمما، دەل مۇشۇنداق پەيىتتە يوپۇرغا ناھىيىسىنىڭ ھاكىمى قەيسەر قېيۇمنىڭ  ئىنتېرنېتتا ئۆزىگە يېزىلغان ئوچۇق خەتكە ئەستايىدىل مۇئامىلە قىلىپ ، خەتتە ئىنكاس قىلىنغان مەسىلىلەرگە جىددىي قاراپ ، ئۇنى ھەل قىلىش تەرەپدارىغا ئۆتۈش بىلەنلا قالماي يەنە ئىنتېرنېت تورىدا بۇ ھەقتە ئوچۇق ئىنكاس بىلدۈرىشى ھەقىقەتەنمۇ كىشىنىڭ قايىللىقى  ھەم ھۆرمىتىنى قوزغىماي قالمايدۇ. يۇقۇردا بىر توردىشىمىز دەپ ئۆتكىنىدەك گەرچە بۇ بۇ ئاللىبۇرۇن شۇنداق قىلىشقا ۋە ئومۇمىيلىشىشقا تېگىشلىك ئىش ھەم ھەيران قېلىپ ھاياجانلىنىشقا ۋە مۇنازىرە قىلىشقا تېگىشلىك مەسىلە-تېما بولماسلىقى كېرەك بولسىمۇ  ئەمما،  شۇنداق قىلىنمىغاچقا ۋە ئومۇمىيلاشمىغاچقا   ھاياجانلىنىشقا ۋە مۇنازىرە قىلىشقا تېگىشلىك بولۇپ قالدى.     ئۇيغۇر ئاپتونوم رايونىمىز ئىستىراتېگىيلىك ئورنى ئىنتايىن موھىم بولغان كۆپ مىللەتلىك چېگرا رايون  شۇنداقلا مۇقىملىقتىكى سەزگۈر رايون. مۇشۇ رايوننىڭ مۇقىملىقىنى يالغۇز ئارمىيە-ساقچى كۈچى ۋە سېياسىي جەھەتتىكى يۇقۇرى بېسىملىق ھارارەتكە تايىنىپلا ئىشقا ئاشۇرغىلى بولمايدۇ. بۇ جەھەتتە كەڭ خەلق ئاممىسىنىڭ ئىدىيە جەھەتتىكى بىردەكلىكى ۋە مايىللىقىنى قولغا كەلتۈرۈش ئىنتايىن موھىم. شۇڭا ، مۇقىملىقنىڭ ئاساسى بولغان خەلق ئامىسىنىڭ پارتىيە سېياسىتى ۋە دۆلەت قانۇنى يولغا قويغان دائىرە ئىچىدىكى يوللۇق تەلەپ-پىكىرلىرىنى ئىپادىلىشىگە كەڭ مۇھىت يارىتىپ بېرىش بىلەنلا قالماي يەنە ئۇلارنىڭ يوللۇق تەلەپ-پىكىرلىرىنى ئاڭلاپ ، ئۇنى ھەل قىلىش تەرەپدارىغا ئۆتۈش ئىنتايىن موھىم. بۇ جەھەتتە قەيسەر ھاكىمنى پوزىتسىيىسى روشەن ، كاللىسى ئوچۇق، يىراقنى كۆرەر ھاكىم؛ مۇقىملىقنىڭ ھەقىقى قوغدىغۇچىسى ؛ پارتىيە -ھۆكۈمەتنىڭ ياراملىق كادىرى؛ خەلق ئاممىسىنىڭ ياخشى رەھبىرى دېيىشكە بولىدۇ.ش ئۇ ئا ر غا دەل مۇشۇنداق كادىر لازىمدۇر.    نۆۋەتتىكى كۆپ ئۆزگىرىشلىك  مۇرەككەپ دۇنيا ۋەزىيىتىدە شۇنى چوقۇم ئېنىق تونۇش كېرەككى، ش ئۇ ئا ر غا نىسبەتەن ھۆكۈمەت ياقتۇرغان كادىرنى خەلق ياقتۇرماسلىق، خەلق ياقتۇرغان كادىرنى ھۆكۈمەت ياقتۇرماسلىقتەك قاتىمال ۋەزىيەتنى ئۆزگەرتىپ ، چوقۇم خەلق ياقتۇرغان كادىرنى تاللاپ ئىشقا قويۇش كېرەك. چۈنكى، ھاكىمىيەت قۇرۇشنىڭ ئاساسى خەلق ، ھاكىمىيەت يۈرگۈزۈشنىڭ مەقسىدىمۇ خەلق ئۈچۈندۇر. بۇ نۇقتىنى ئېتراپ قىلغاندا چوقۇم خەلق ئامىسىنىڭ پارتىيە سېياسىتى ۋە دۆلەت قانۇنى يولغا قويغان دائىرە ئىچىدىكى يوللۇق تەلەپ-پىكىرلىرىنى ئىپادىلىشىگە كەڭ مۇھىت يارىتىپ بېرىش بىلەنلا قالماي يەنە ئۇلارنىڭ يوللۇق تەلەپ-پىكىرلىرىنى ئاڭلاپ ، ئۇنى ھەل قىلىش تەرەپدارىغا ئۆتۈشكە قەتئىي سەل قارىماسلىق كېرەك. شۇنداقلا ، چوقۇم خەلق ئامىسىنىڭ پارتىيە سېياسىتى ۋە دۆلەت قانۇنى يولغا قويغان دائىرە ئىچىدىكى يوللۇق تەلەپ-پىكىرلىرىنى ئىپادىلىشىگە كەڭ مۇھىت يارىتىپ بېرىۋاتقان ئىنتېرنېت تورىنىڭ ئىجابىي رولىغىمۇ سەل قارىماسلىق كېرەك.   شۇڭا، خەلق ئاممىسىنىڭ ئەقەللىي پىكىر ئەركىنلىكىنى بوغۇدىغان، پۈتۈن دۇنيا ئېتراپ قىلىۋاتقان ئىنتېرنېت تورىنى دۈشمەن كۆرۈدىغان ، پارتىيە سېياسىتى ۋە دۆلەت قانۇنىنىغا زىت يەرلىك سېياسەتلەرنى تۈزۈپ ۋە ئۇنى مۇستەبىتلەرچە يۈرگۈزۈپ مۇقىمسىزلىق پەيدا قىلىۋاتقان ؛ بۇ ئارقىلىق ئاتالمىش «مىللىي بۆلگۈنچى» ۋە «تېرورچى»لارنى يرتىشتۈرىۋاتقان مەنپەئەتدارلار گۇرۇھىدىكىلەرنى بىر-بىرلەپ تارمار قىلىش لازىم.شۇنداق قىلماي تۇرۇپ  ئەبەدىي ئەمىنلىكنى ئىشقا ئاشۇرۇش بەسىي مۈشكۈلدۇر.مەۋجۇت مەسىلىلەرنى ئوتتۇرغا قويغانلىق قانداقتۇر پارتىيە-ھۆكۈمەتكە قارشى چىققانلىق ئەمەس بەلكى پارتىيە ھۆكۈمەتنىڭ ئەشۇ مەسىلىلەرنى بالەۇرراق تونۇپ يېتىپ، ئۇنى تۈزەش تەرەپدارىغا ئۆتۈشنى ئىلگىرى سۈرۈشنى مەقسەت قىلغانلىق ھېساپلىنىدۇ. ئەمما، يەرلىكتىكى بىر قىسىم ئەمەلدارلار ۋە سېياسىي قانۇن تارماقلىرى مەسىلە ئىنكاس قىلغۇچىلارنى قۇتراتقۇچىلار قاتارىدا قارا تىزىملىككە كىرگۈزۈپ ، قالايمىقان سېياسىي قالپاق كىيدۈرۈپ، جازالايدىغان قىلمىشلار ھەقىقەتەن مەۋجۇت. مانا بۇنىڭدىن نۇرغۇن ئادەملىرىمىز راسىت سۆزلىيەلمەيدىغان ، راسىتنى يوشۇرۇپ يالغاننى مەلۇم قىلىدىغان ھالەت شەكىللىنىشىگە يول ئاچىدۇ. بۇنىڭدىن سېياسىي ساھەلەردە لوگىكىلىق تەپەككۇرنىڭ تېخى ئومۇمىيلىشىپ بولالمىغانلىقىنى ، مەدەنىيەت زور ئىنقىلابىدىن قالغان ئاسارەتنىڭ تېخىچە ھۆكۈم سۈرىۋاتقانلىقىنى كۆرۈۋېلىش مۇمكىن.ئەسلىدە پارتىيە-ھۆكۈمەت تارماقلىرى مەسىلە ئىنكاس قىلغۇچىلارنى دۈشمەن كۆرمەستىن بەلكى ئۆز ئەتراپىغا بىر تۈركۈم راسىت سۆزلۈك زىيالىيلارنى توپلاپ ئۇلارنى مەۋجۇت مەسىلىلەرنى قېزىپ چىقىشقا ئىلھاملاندۇرسا بولاتتى.    قەيسەر ھاكىم، سىز نۇرغۇن ئويلىنىشلىرىڭىز، مونولوگلىرىڭىز ۋە تالايلىغان سوئاللىرىڭىزغا جاۋاب تېپىش نەتىجىسىدە ئۆزىڭىزگە خاس بىر تەپەككۇر بىلەن نۆۋەتتىكى قاتماللىقنى ئۆزگەرتىشكە ئىرادە قىپسىز. سىزنىڭ بۇ ھەركىتىڭىزنى پارتىيە-ھۆكۈمەت قوللايدۇ؛ خەلق ھېمايە قىلىدۇ. ئەمما، مەنپەئەتدارلار گۇرۇھىدىكىلەرنىڭ توسقۇنلۇقىغا ھەتتا زىيانكەشلىكىگە ئۇچرىشىڭىز مۇمكىن. ئەمما، ئۆز يولىڭىزدا تەۋرەنمەي ماڭسىڭىز  قىسمەن مەنپەئەتىڭىز ۋاقىتلىق زىيانغا ئۇچرىسىمۇ ئاخىر يەنىلا غالىبلار قاتارىدىن ئورۇن ئالالايسىز.    قەيسەر ھاكىم ، كوماندىروپكا مۇناسىۋىتى بىلەن بۈگۈن شايار ناھىيىسىگە كېلىپ  تەكلىماكان بويىدىكى بەردەم توغراقلىقلارنى كۆرۈپ بولۇپ ، كەچتە ناھىيە بازىرىغا كېلىپلا بۇ يەردىكى بۇرادەرلىرىمدىن سىزنىڭ باغداش تورىغا يوللىغان ئۇشبۇ تېمىڭىزنىڭ گېپىنى ئاڭلىدىم.كەچلىك تاماقتىن كېيىن ياتاققا قايتىپ ، ئىزلەپ كەلگەن ئەمما، كۆرۈشمىگىلى ئۇزۇن بولغان شاياردىكى دوسىتلىرىمنى ئۇزىتىۋېتىپ بۇ تېمىڭىزنى ئوقۇپ چىقىپ  ناھايتى خوش بولدۇم ھەم سىزدىن سۆيۈندۈم.نۇرغۇن ئىككىلىنىشلەردىن كېيىن ئاخىر جۇمھۇرىيەتنىڭ ئاساسىي قانۇنى بەرگەن ئەقەللىي يېزىقچىلىق پائالىيىتىممۇ مۇئەييەن چەكلىمىلەردىن خالىي بولالمايۋاتقان مەندەك بىر قانۇنلۇق ئاددىي گىرژدان «شايار مېھمانخانىسى» نىڭ 306-ياتىقىدا ئولتۇرۇپ  يېرىم كېچىدە يېزىپ ئولتۇرۇپتىمەن.بۇ يەردە يەنە مېنىڭ تورغا ھېرەسمەنلىكىمنى بىلىپ تور بار ياتاقنى ماڭا بېرىپ باشقا ياتاققا چىقىپ كەتكەن خەنزۇ رەھبىرىمگىمۇ رەھمەت ئېيىتماي تۇرالمايمەن. قەيسەر ھاكىم، ئاخىردا سىزگە «ئەمەلنىڭ ھۆرمىتى پىنسىيىگە چىققىچىە ، ئەلنىڭ ھۆرمىتى قىيامەتكىچە » دېگەن ھېكمەتنى سوۋغا قىلاي . ھازىرقى ئەمەلىيىتىڭىز كېيىنچە بۇنىڭ توغرىلىقىنى چوقۇم ئىسپاتلىغۇسى.

mahatjan

	قەيسەر ھاكىمنىڭ تورداشلار بىلەن سەمىمىيلىك بىلەن پىكىر ئالماشتۇرىشى تولىمۇ يا ياخشى ئەھۋال.ھەممە ھاكىم ياكى باشلىقلار قەيسەر ھاكىمدەك كەڭ ئامما بىلەن ئوچوق-يوروق پىكىر ئالماشتۇرالايدىغان بولسا خەلىق قانچە خۇشال بولوپ كىتەر ئىدى-ھە! چۈنكى؛-نېنىڭ ھالال بولسا چوڭ يولدا يەۋەر ،گىپىڭ توغرا بوسا خان ئالدىدىمۇ دەۋەر، دىگەن گەپ بار.

atilla705

	ئاپتونوم رايونلۇق پارتكومدا خىزمەت قىلىپ ھازىر جەنۇبى شىنجاڭدا خىزمەت قىلىۋاتقان بولسا مېنىڭچە دېھقانلارنىڭ مەسىلىسىگە كۆڭۈل بۆلۈشى ئېنىق. باشتىن ئاخىر جەنۇبى شىنجاڭ ۋە ياكى دېھقانلار بار يەردە چوڭ بولغان كادىرلارنىڭ يۈرەك باغرىلىرى تاش بولۇپ كەتكەن، دېھقانلارنىڭ نامراتلارنىڭ ئاھۇ - زارىغا ئانچە ۋاي دەپ كەتمەيدۇ..

دىيارىم

	hekmat-uyghur يوللىغان ۋاقتى  2013-5-16 11:01 PM مېنىڭچە  بۇ  ھاكىم  ھەقىقەتەن ئەستايىدىل ئىكەن.  ۋاق ... ھىكمەتكامغا يارىغان ئىكەن ماڭا تېخىمۇ يارايدۇ  ... چاقچاق ھە بۇ ھاكىمغا قول قويدۇم ، دىگەنلىرىنى ئەمەلىيلەشتۈرىشىنى ئۈمىد قىلىمەن .

kuktulpar

	يېڭى كەلگەن ھاكىمنىڭ خەلقپەرۋەر، نوشىرۋان ئادىلدەك ئادىل بولۇشىنى، كاڭشى خاندەك خەلق ئىچىگە چۆكۈپ، ئەڭ تۆۋەن قاتلامدىكى كەمبەغەل دېھقانلارنىڭ دەردىگە يېتىشىنى ئۈمىد قىلىمەن. بۇ ھاكىم ھەر ھالدا خەلقپەرۋەردەك قىلىدۇ. توردا جاۋاب يازغانلىقىدىن ئىنتايىن خۇرسەن بولدۇم. باشقا ناھىيىلەرنىڭ ھاكىملىرىمۇ يوپۇرغا ناھىيىسىگە يېڭىدىن كەلگەن بۇ يېڭى ھاكىمدىن چوقۇم ئۆگىنىشى كېرەك.

zulqinay

	!UYGHURJAN يوللىغان ۋاقتى  2013-5-16 11:21 PM يۇپۇرغىدا راسلا شۇنداق ئىش بار . ھاشارغا بارمىساق ھاش ...   توۋا!؟ئانام ھاشارغا كەتتى دىسىڭىز ھەيران قىلىۋاتىمەن.بىز تەرەپلەردە ھاشار يوق.ئېرىق-ئۆستەڭ چاپىدىغان ئىشلارنىمۇ دېھقانلار قىلمايدۇ.باشقىلارنىڭ ئېتىزىغا بېرىپ ھەقسىز ئىشلەيدىغان ئىش ھەرگىزمۇ يوق.ئىچىم ئەجەپ ئاچچىق بولدى.

larzan

	ھاكىمنىڭ جاۋابىدىن سۇيۇندۇم،ئاللا خالىسا شۇ يۇرتتىكى قېرىنداشلىرىمنىڭ قىيىنچىلىقلىرى ھەل بولغۇدەك.

Qabiljan

	يۇپۇرغىدا ھاشا كۆپ،گۇيخا دەيدىغان بىر ئەمگىگى بار ئۇ يىل بويى ئۈزۈلمەيدۇ.