ئارتۇچ ؛ مېنىڭ ئۇسلۇبىمدىكى ناخشا تېكسىتلىرى

ئارتۇچ

قۇلانچى  ئانامسەن، ئانامدەك ئۇلۇغ


ئەمەتجان زۇنۇن ئارتۇچ


كۆز ئاچتىم قوينۇڭدا تاپتىم كۈچ -قۇۋۋەت،

مېھرىڭدىن مۇقەددەس سۆيگۈ  تاشىدۇ.

ئوت جىسمىڭ تەپتىدىن يانغان ھارارەت،

ۋۇجۇدلار  چۆلىگە گۈلخان ياقىدۇ.

ۋەسلىڭدىن ياغىدۇ ئالەمچە بەركەت،

ھېكمىتىڭ مەنزىلگە يوللار ئاچىدۇ.



قۇمالتاغ  قەددىدەك مەردانە ،مەغرۇر،

كۆز سالدىڭ جاھانغا قۇياشلىق تاڭدەك.

كۆكلىدى ئۈمىتلەر چىللىدى غورۇر،

پاك مىھنەت بېغىدا بەخىت چىچەكلەپ.

يورۇتتى تۈنلەرنى ئىلاھىي ئاق نۇر،

ياشناتتى ، كۈلدۈردى ئىلىم -مەرىپەت.



نۇرانە ئىزلاردىن سۈيۈندۈڭ ئۇزاق،

ئىجتىھات ئەيلىدى ئىشچان قىز -ئوغلان.

ئاسايىش كۈنلەردىن ئەل ئىجىل -ئىناق،

قاينايدۇ  يۈرەكتە ئوتلۇق ھاياجان.

ئۈندەيدۇ  نۇسرەتكە ئارزۇ -ئىشتىياق،

ئۇپۇققا  تۇتاشقان بۈيۈك بىر ئارمان.

ئارتۇچ

خۇشخۇي دىدار ئېسىل پەزىلەت


خۇشخۇي دىدار ئېسىل پەزىلەت ،
سالاملاردىن كۆڭۈل  يورۇيدۇ .
خۇش چىرايلار جاھانغا بېزەك ،
ئىناقلىقتىن ياشنايدۇ پۈتكۈل .

تۆكۈلىدۇ ئالەمچە بەركەت ،
شاتلىق سىڭغان ئوت يۈرەكلەردىن .
ئاتا قىلغاي ئىنسانىي قىممەت ،
ئۈمىد قونغان ساپ تېلەكلەردىن .

ئۆمۈر قىسقا بىباھا ھىممەت ،
رىشتىمىزدىن كۆكلەيدۇ ھايات .
ئىزىمىزدىن پارلىسا نۇسرەت ،
بەخىت قۇشى قاقىدۇ قانات .

قەدىرلەنسە مېھرى - مۇھەببەت ،
كۈلكىمىزگە جۈر بولغاي جاھان .
پاكلىق بىلەن ئۇلۇغ ھەقىقەت ،
چېچەكلەيدۇ دىللاردا ئارمان .

ئارتۇچ

مۇھەببەتتىن كۈندە بايرام كۈندە توي



يورۇق ئاڭدا سۈزۈك ئارمان ، خيال - ئوي ،

تاۋلىنىدۇ قىسمەت ئەيلەپ ئۆتەڭ ، ئوي ،

ياخشىلارنىڭ ئىزلىرىغا سۆيۈپ قوي ،

مۇھەببەتتىن كۈندە بايرام كۈندە توي .



ساپ نىيەتتىن تۆكۈلىدۇ قۇت - بەركەت ،

ھالال تەردىن خۇشال توقتۇر بۇ يۈرەك ،

ئىناقلقتىن - ئىجىللىقتىن يار نۇسرەت ،

مۇھەببەتتىن كۈندە ئايەم كۈندە توي .



ياخشى كۈڭۈل ئالەمدەك كەڭ ، تاڭدەك ئۇز ،

چىن سۆيگۈدۇر ھاياتلىققا بەرگەن تۇز ،

مېھرى - شەپقەت بىلەن ئېللىق جۇت ھەم مۇز ،

مۇھەببەتتىن كۈندە ئايەم كۈندە توي .



خۇش چىرايلار ، بۇغداي سۆزلەر دىلغا نۇر ،

خۇشخۇي دىدار ، ساغلام كۈلكە زەپ ھوزۇر ،

روھىمىزغا گۈزەل زىننەت پاك غورۇر ،

مۇھەببەتتىن كۈندە بايرام كۈندە توي .



مۇھەببەتتىن كۆڭۈللەر شات يايرىغاي ،

پاكلىق بىلەن ئۆمۈر بېغى ئاينىغاي ،

ۋىسال كۈيى كەڭ جاھانغا ياڭرىغاي ،

مۇھەببەتتىن كۈندە بايرام كۈندە توي .

ئارتۇچ

ۋىسال ئارا ئىنسان ئۇلۇغ جاھان ئۇز





قىسمەت دەشتى ئىنسان ئۈچۈن ئىمتىھان ،

چىن كۈلكىلەر بىباھاسىز ، تەڭداشسىز .

ئۈمىد ئىچرە چېچەكلەيدۇ ئەزىز جان ،

مۇھەببەتتىن يورۇق دۇنيا ، يورۇق ئىز .



تۆكۈلىدۇ بەركەت -  ئامەت نىيەتتىن ،

ھالال تەردىن ياشىرىدۇ يۈرەكلەر .

تاڭدەك كۆيۈپ ئادىمىيلىك خىسلەتتىن ،

گۈل كەلتۈرەر گۈلدەك خۇشبۇي تىلەكلەر .



ۋىسال ئىشقى ھاياتلىقنىڭ يىلتىزى ،

پاك تىنىقتىن رەڭدار ، گۈلگۈن پەسىللەر .

مېھرى-شەپقەت ئۆمۈر تۈنى يۇلتۇزى ،

بارچە قەلىب ئاپئاق نۇرغا كۆمۈلەر .



كۆڭۈل قانماس سۆيگۈ ئوتى رىشتىگە ،

كەم - كۇتىسىز  گۈزەل ھەممە ...جانان ئۇز .

نېمە يەتسۇن بەخىت پەيزى سىھرىگە ،

ۋىسال ئارا ئىنسان ئۇلۇغ جاھان ئۇز .

ئارتۇچ

قەدىرىمگە يېتىسەن گۈلۈم


ياخشى كۈنلەر تاشلاپ كەتكەندە ،

ھىجرانلاردا ھەسرەت چەككەندە ،

باغلىرىڭغا ئۈششۈك تەككەندە ،

قەدىرىمگە يېتىسەن گۈلۈم .


ئاھانەتلەر ئۆتىدۇ جاندىن ،

پۇشايمانغا قاچا يوق ئاندىن ،

كەتكۈڭ كېلەر يورۇق جاھاندىن ،

قەدىرىمگە يېتىسەن گۈلۈم .


مال -دۇنياغا تويىسەن شۇ چاغ ،

چىن مۇھەببەت ئەسلى چىمەنباغ ،

يۈرىگىڭنى پۇچىلايدۇ داغ ،

قەدىرىمگە يېتىسەن گۈلۈم .

ئارتۇچ

ھۈنەر بىلەن كۆكلەيدۇ ئادەم



گۈزەللىكتىن  ياشنايدۇ  ئالەم ،

ھالال تەردىن بەركەت - نۇسرەت جەم .

ھىكمەت ئارا شاتلىق مۇجەسسەم ،

ھۈنەر بىلەن  كۆكلەيدۇ ئادەم .



ئىلىم -پەندۇر پۈتمەس كۈچ ، قانات ،

ئېچىلىدۇ  تالاي تىلسىمات ،

ھۈنەر مېھرى قۇياشلىق ھايات ،

ھۈنەر بىلەن كۆكلەيدۇ ئادەم .



چېچەكلەيدۇ ئۈمىت - ئارمانلار ،

جۈپ قوللاردىن كۈلىدۇ جانلار ،

تاڭدەك كۆيۈپ ئۆتەر كارۋانلار ،

ھۈنەر بىلەن كۆكلەيدۇ ئادەم .



ھالال مىھنەت خىسلىتى ئۇلۇغ ،

ئەل -ئاۋامغا نىممىتى ئۇلۇغ ،

ھۈنەرۋەندۇر گۈل ئۆمۈرگە تۇغ ،

ھۈنەر بىلەن كۆكلەيدۇ ئادەم .

ئارتۇچ

چىن مۇھەببەت قېنى سەن قېنى



خازان بولدى پاك سۆيگۈ بېغى ،

يۈرەكلەردە دەرت - ئەلەم دېغى .

باستى ھجىران ، ئاھانەت تېغى ،

چىن مۇھەببەت قېنى سەن قېنى .



دۇنيا ئىزلەپ روھلار سەرسانە ،

مەئىشەت دەپ ئۆيلەر ۋەيرانە ،

ياخشىلارغا ياغدى ئەپسانە ،

چىن مۇھەببەت قېنى سەن قېنى .



قېرىنداشلار نەپ ئۈچۈن ئازدى ،

كۆڭۈللەرنى ۋەسۋەسە ئالدى ،

ئاقىللارنى ئەندىشكە سالدى ،

چىن مۇھەببەت قېنى سەن قېنى .



ئۇنتۇلماقتا گۈزەللىك ، ئەخلاق ،

خۈنۈكلشپ ئۆچمەس ئىز ، پىراق ،

مۇڭغا چۈمدى ئالتۇن قوڭغۇراق ،

چىن مۇھەببەت قېنى سەن قېنى .



قېنى شېرىن تاغ كەسكەن پەرھاد ،

ئانا زىمىن چەكمەكتە پەرياد ،

چاڭقاقلىققا چۈمۈلدى ھايات ،

چىن مۇھەببەت قېنى سەن قېنى .




ئادىمىيلىك ياتلىشىپ كەتتى ،

ئىنساب يوقاپ تابلىشىپ كەتتى ،

ھالال - ھارام ئارلىشىپ كەتتى ،

چىن مۇھەببەت قېنى سەن قېنى .



خەسسىسلەرنىڭ كۆزلىرىدە قان ،

غېرىبلارنىڭ كۆزلىرىدە نان ،

پۇلنى كۆزلەپ سېسىماقتا جان ،

چىن مۇھەببەت قېنى سەن قېنى .




ھاياتلىقنىڭ جېنى مۇھەببەت ،

ئۇلۇغلۇقتىن تۆكۈلگەي بەركەت ،

ئەھلى قۇچقاي مەنزىلدە نۇسرەت ،

چىن مۇھەببەت قېنى سەن قېنى .

ئارتۇچ

مۇھەببەتنىڭ شەرتى يوق



مۇھەببەتنىڭ شەرتى يوق ،
مۇھەببەتنىڭ نەرقى يوق .
مۇھەببەتسىز ئادەمنىڭ ،
ھايۋان بىلەن پەرقى يوق .


مۇھەببەت دەپ كۆيۈش ھەق ،
مۇھەببەت دەپ سۆيۈش ھەق ،
مۇھەببەت دەپ كۆنۈش ھەق ،
مۇھەببەتنىڭ شەرتى يوق .


ئەزىز جاننىڭ لەززىتى ،
ھاياتلىقنىڭ بەركىتى ،
ئادىمىيلىك شەۋكىتى ،
مۇھەببەتنىڭ شەرتى يوق .


قوشۇلىدۇ جانغا جان ،
قوشۇلىدۇ قانغا قان ،
ئەبەدىيلىك قۇت - ئارمان ،
مۇھەببەتنىڭ شەرتى يوق .


ئۈمىت -ۋاپا زەر بېزەك ،
مېھرى -شەپقەت ،ئوت يۈرەك ،
سۆيگۈگە نۇر ، ئوت كىرەك ،
مۇھەببەتنىڭ شەرتى يوق .

ئارتۇچ

دېھقان ئاتا



سەن تۆككەن قان -تەردىن ياشناپ ئانا يەر ،
نەۋ باھار ۋەسلىدە خۇشخۇي كۈلىدۇ .
چىللايسەن ئەجرىڭدىن سۈپسۈزۈك سەھەر ،
مېھرىڭدىن نۇرلۇنۇپ قۇياش كۆيىدۇ .


پاكلىغىڭ سىھرىدە دىيانەت سۆيگەن ،
نۇرانە روھىڭغا ھىدايەت ھەمرا .
ھەر باسقان ئىزىڭدىن گىياھلار ئۈنگەن ،
ئاقلىغىڭ تەپتىدە كۆكلەيدۇ دۇنيا .


مىھنەتتىن تۆكۈلگەن ئالەمچە بەركەت ،
ھالاللىق ئۆمرۈڭگە بىباھا بېزەك .
ھاياتقا باغلايسەن ئوتلۇق مۇھەببەت ،
ئارمانلار قەلبىڭدە ئاچىدۇ چېچەك .


قانائەت ، پەزىلەت ...ئېسىل خىسلىتىڭ ،
ئاز ھامان شەنىڭگە پۈتۈلسە داستان .
بىر تىنىق قالغۇچە سۇنىسەن ھىممەت ،
ئۇلۇغلۇق بابىدا سەن بۈيۈك كارۋان .

ئارتۇچ

مۇھەببەتكە مۇھەببەت كىرەك


ئىنسان ئۇلۇغ بولسا ئوت يۈرەك ،
يۈرىگىدە  تۇرسا ساپ تىلەك .
مۇھەببەتسىز جاھان قىيامەت ،
مۇھەببەتكە مۇھەببەت كىرەك .


مۇھەببەت بار قىلدى ھەممىنى ،
باغلاپ ئوتلۇق ، پۈتمەس رىشتىنى ،
بەردى جاندىن بۈيۈك ئىشقىنى ،
مۇھەببەتكە مۇھەببەت كىرەك .


مۇھەببەتسىز ياشاش مەنىسىز ،
مۇھەببەتسىز ئادەم قەدىرسىز ،
مۇھەببەتسىز بولماس يورۇق ئىز ،
مۇھەببەتكە مۇھەببەت كىرەك .


مۇھەببەتنىڭ تۇغى ۋاپادۇر ،
ھەق -ئادالەت ، ئەخلاق ، ھايادۇر ،
مۇھەببەتنىڭ ۋەسلى ، لاۋادۇر ،
مۇھەببەتكە مۇھەببەت كىرەك .


مۇھەببەتتىن تۆكۈلگەن بەركەت ،
مۇھەببەتتىن ئويغاق ھەقىقەت ،
مۇھەببەتتىن قۇچىمىز نۇسرەت ،
مۇھەببەتكە مۇھەببەت كىرەك .

ئارتۇچ

سەن كەلمىسەڭ باھار بولامدۇ




سەنسىز كۈنگە كۆڭۈل ئۇنامدۇ ،

بەخىت قۇشى باشقا قونامدۇ .

قۇشلار سايراپ بەزمە قۇرامدۇ ،

سەن كەلمىسەڭ باھار بولامدۇ .




دالىلاردا ئېچىلدى گۈللەر ،

ئەگىز ئېقىپ ياشنىدى كۆللەر ،

مۇھەببەتتىن ياڭرىدى كۈيلەر ،

سەن كەلمىسەڭ باھار بولامدۇ .




ئۇچتى كۆكتە تۇرنىلار قاتار ،

قىز- يىگىتلەر ھۆسنى نۇر ناھار ،

ساپ ھاۋادىن دىلدا ئىپتىخار ،

سەن كەلمىسەڭ باھار بولامدۇ .




يېشىللىققا پۈركەندى ئالەم ،

ۋىسال كۈتۈپ ئۈمىتلىك ئەلەم ،

دىدارىڭسىز ياشىماق ماتەم ،

سەن كەلمىسەڭ باھار بولامدۇ .

ئارتۇچ

ئۆمۈر دېگەن ئەزەلدىن شۇنداق



يۈرەكلەرنى نەمدەيدۇ شاتلىق ،

ئۆمۈر دېگەن ئەزەلدىن شۇنداق .

ھالال يېگەن زاغرا نان تاتلىق ،

ئۆمۈر دېگەن ئەزەلدىن شۇنداق .




زىمىستانسىز كەلمەيدۇ باھار ،

سۆيگۈ ، نەپرەت دىللاردا ئىزھار .

ئاقىل روھى ئۇيقۇدىن بىدار ،

ئۆمۈر دېگەن ئەزەلدىن شۇنداق .



قېرى تەقدىر قىلمايدۇ شەپقەت ،

ياخشى يولدا كۈتىدۇ قىسمەت ،

مەنزىللەردە ئەل كۆزى ئەلگەك ،

ئۆمۈر دېگەن ئەزەلدىن شۇنداق .



دۇنيا ئىزدەپ تاپقىنىڭ قالار ،

چاچقۇ ، ئىزلار چاچقىنىڭ قالار ،

قۇت دەپ قۇچاق ئاچقىنىڭ قالار ،

ئۆمۈر دېگەن ئەزەلدىن شۇنداق .

ئارتۇچ

پاكلىق


ئەزىز جانغا تۇتىيا پاكلىق ،
ھاياتلىققا نۇر - زىيا پاكلىق .
پاكلىق بىلەن ياشنايدۇ جاھان ،
روھىمىزغا خوپ داۋا پاكلىق .


مۇھەببەتتىن ئىنسان يارالدۇق ،
مېھرىمىزدىن نۇردەك تارالدۇق ،
پاك ، مېھرىبان قەۋىم سانالدۇق ،
دىللار ئارا قۇت ، ۋاپا پاكلىق .


ھالال تەردە بەركەت ، نۇسرەت بار ،
ياخشىلارغا ئەل -ۋەتەن دىلدار ،
تىلەكلەردە شاتلىق ئىپتىخار ،
مەنزىللەردە ساپ ھاۋا پاكلىق .


پاك نىيەتتىن ئۇلۇغلۇق كېلۇر ،
ئېسىل خىسلەت بىباھا زەردۇر ،
گۈلگۈن ئۆمۈر تەختىدۇر غورۇر ،
ۋىسال بەختى شات ناۋا پاكلىق .

ئارتۇچ

ئانا قەسىدىسى


مېھرىڭىزدىن نۇرانە تاڭلار ،
چېھرىڭىزدىن كۆكلىگەن باغلار .
بالام دەيسىز بىر ئۆمۈر تىنماي ،
جىسمىڭىزدىن مەزمۇتتۇر تاغلار .


قولىڭىزدا تەۋرەنسە دۇنيا ،
ئەجرىڭىز بار تامامى جاندا .
پەرىشتىدەك بەركەت ياغىدۇ ،
ھايات ئەزىز ئويغانغان ئاڭدا .


بالامنىڭ دەپ تاپقان تەرگەننى ،
بالامنىڭ دەپ ئېگەم بەرگەننى .
سىزنى يۈدۈپ مەككىگە بارسام ،
ئادا بولماس بىر رەت ئەمگەننى .


ئىزىڭىزدا جەننەت جىلۋىسى ،
روھىڭىزدۇر سۆيگۈ قىبلىسى .
مەڭگۈ سىزگە قەرزىدار ئىنسان ،
ئۈزۈلمەيدۇ ئوتلۇق رىشتىسى .

ئارتۇچ

سەھرا قىزى


مىھىرلىك كۆزۈڭدىن تۆكۈلىدۇ نۇر،

پەرىشە قەددىدەك نۇرلۇق جىلۋىگەر.

چوغ بولۇپ ئاقىدۇ مۇھەببەت ،غورۇر،

سۆيگەندەك زىمىننى سۈپسۈزۈك سەھەر،


قۇياشتەك پارلىغان ئاپئاق يۈزۈڭدە،

تەبەسسۈم شۇقەدەر ئوتلۇق، بىغۇبار.

تاغ سۈيىدەك زىل ، جاراڭلىق كۈيۈڭدە،

چىچەكلەر ئاچىدۇ قۇتلۇق نەۋ باھار.


كېلىسەن سەھرادا خۇش ئىپار چېچىپ،

ئويغۇتۇپ كۆڭۈلدە ياپيېشىل ئۈمىت.

مىننەتسىز ئەجرىڭدە بەركەتلەر تېپىپ،

توغراقتەك كۆكلەيسەن جۇتتا تاۋلىنىپ.


پاكلىغىڭ ھىممىتى ھاياتقا ئەنداز،

نۇرانە ئىزلىرىڭ ئەل-يۇرتقا بەركەت.

دىيانەت  كۆكىدە قىلىسەن  پەرۋاز،

ئايىغىڭ ئاستىدا كۈلىدۇ جەننەت.