ئارتۇچ : بايراملىق ناخشا تېكىستلىرى

ئارتۇچ

ئانا قەسىدىسى

ئەمەتجان زۇنۇن ئارتۇچ


مېھرىڭىزدىن نۇرانە تاڭلار ،
چېھرىڭىزدىن كۆكلىگەن باغلار .
بالام دەيسىز بىر ئۆمۈر تىنماي ،
جىسمىڭىزدىن مەزمۇتتۇر تاغلار .

قولىڭىزدا تەۋرەنسە دۇنيا ،
ئەجرىڭىز بار تامامى جاندا .
پەرىشتىدەك بەركەت ياغىدۇ ،
ھايات ئەزىز ئويغانغان ئاڭدا .

بالامنىڭ دەپ تاپقان تەرگەننى ،
بالامنىڭ دەپ ئېگەم بەرگەننى .
سىزنى يۈدۈپ مەككىگە بارسام ،
ئادا بولماس بىر رەت ئەمگەننى .

ئىزىڭىزدا جەننەت جىلۋىسى ،
روھىڭىزدۇر سۆيگۈ قىبلىسى .
مەڭگۈ سىزگە قەرزىدار ئىنسان ،
ئۈزۈلمەيدۇ ئوتلۇق رىشتىسى .

ئارتۇچ

سەھرا قىزى


ئەمەتجان زۇنۇن ئارتۇچ


مېھىرلىك كۆزۈڭدىن تۆكۈلىدۇ نۇر،

پەرىشتە قەددىدەك نۇرلۇق جىلۋىگەر.

چوغ بولۇپ ئاقىدۇ مۇھەببەت ،غورۇر،

سۆيگەندەك زىمىننى سۈپسۈزۈك سەھەر .


قۇياشتەك پارلىغان ئاپئاق يۈزۈڭدە،

تەبەسسۈم شۇقەدەر ئوتلۇق، بىغۇبار.

تاغ سۈيىدەك زىل ، جاراڭلىق كۈيۈڭدە،

چىچەكلەر ئاچىدۇ قۇتلۇق نەۋ باھار.


كېلىسەن سەھرادا خۇش ئىپار چېچىپ،

ئويغۇتۇپ كۆڭۈلدە ياپيېشىل ئۈمىت.

مىننەتسىز ئەجرىڭدە بەركەتلەر تېپىپ،

توغراقتەك كۆكلەيسەن جۇتتا تاۋلىنىپ.


پاكلىغىڭ ھىممىتى ھاياتقا ئەنداز،

نۇرانە ئىزلىرىڭ ئەل-يۇرتقا بەركەت.

دىيانەت  كۆكىدە قىلىسەن  پەرۋاز،

ئايىغىڭ ئاستىدا كۈلىدۇ جەننەت.

ئارتۇچ

يارىم كېلىدۇ

ئەمەتجان زۇنۇن ئارتۇچ


توسمىغىن ئالدىمنى مەيىن شاماللار،
لالىدەك ئېچىلىپ يارىم كېلىدۇ.
ھۆسىنىدىن ھەيرەتتە سۈپسۈزۈك تاڭلار،
تاڭدىنمۇ جىلۋىلىك نازىم كېلىدۇ.

نازلىرى بۇلبۇلدەك ئەيلەيدۇ خەندان،
خەندانى خۇشناۋا سازىم كېلىدۇ.
سازلارنىڭ پەيزىدە سۈيۈنىدۇ جان،
مېھرى نۇر، باغرى ئوت يازىم كېلىدۇ.

شۇ يازدا پارلىغان سۆيگۈ، قۇت-ئامەت،
ئارمانىم، دەرمانىم، بارىم كېلىدۇ.
ۋىسالغا ئىنتىزار بۇندا بىر قامەت،
جېنىمغا جان قوشۇپ جانىم كېلىدۇ.

ئارتۇچ

ئانىلارنى ئۇلۇغلايلى بىز


ئەمەتجان زۇنۇن ئارتۇچ


ئوتلۇق مېھرى تەپتى نۇر  قۇياش ،

پەرشتىگە خىسلىتى  تەڭداش ،

يۈرىگىدىن ئاقمىسۇن قان -ياش ،

ئانىلارنى ئۇلۇغلايلى بىز .



ئەجرى بىلەن ياشنايدۇ دۇنيا ،

ھاياتلىققا ئەيلەيدۇ ۋاپا ،

ھەق يولىدا بارلىغى پىدا ،

ئانىلارنى ئۇلۇغلايلى بىز .



روھى ئويغاق جاپا - قىسمەتتىن ،

بۈيۈك رىشتى چاقناپ مىھنەتتىن ،

ۋىسال تاپقان پاكلىق ، بەركەتتىن ،

ئانىلارنى ئۇلۇغلايلى بىز .



ئارمانلىرى ئاچقان گۈل - چېچەك  ،

تىلەپ شاتلىق ،تەۋپىق ، ھىدايەت ،

ئىزلىرىنى سۆيگەن قۇت - نۇسرەت ،

ئانىلارنى ئۇلۇغلايلى بىز .

ئارتۇچ

ئانام

ئەمەتجان زۇنۇن ئارتۇچ


ئىككى دۇنيالىق بەختىمگە دەرمان ،
پاك ئەجرىڭ بىلەن بەردىڭسەن ئىمكان ،
ھايات ياشنايدۇ كۆكلەيدۇ ئارمان ،
ئۇلۇغسەن بۈيۈك مېھرىبان ئانام .


ئاياپ قويمىسا تەقدىر - قىسمەتلەر ،
ھامان ياغدۇردۇڭ بەركەت - ھىممەتلەر ،
روھىڭدا  كامال  مېھرى  - شەپقەتلەر ،
ئۇلۇغسەن بۈيۈك  قەدىردان ئانام  .


ئىزىڭنى سۆيگەن ۋاپا  ،  دىيانەت  ،
جىسمىڭدا كۈلگەن پاكلىق ، ئادالەت ،
چىن ۋىسال سۈرگەن تەۋپىق ، ھىدايەت ،
ئۇلۇغسەن بۈيۈك  پاسىبان  ئانام  .


تاۋلاپ ئۆتىدۇ ھايات سەيناسى  ،
سەن بىلەن تېرەن مەزمۇن - مەناسى ،
نۇرانە مەڭگۈ  يارقىن جۇلاسى  ،
ئۇلۇغسەن بۈيۈك نۇر جاھان ئانام  .

ئارتۇچ

ئانا

ئەمەتجان زۇنۇن ئارتۇچ


ھاياتلىق ئىزلىرى خۇشبۇي قاقاس چۆللەردە مېھرىڭ بار ،

ۋىسال دەملەر  قۇچاق ئاچقان يورۇق تۈنلەردە مېھرىڭ بار .


ھالال ئەجرىڭ نۇرى بىرلە داۋانلاردىن ئېشىپ كەلدۇق ،

سەھەر - تاڭ پەيزىدە شاتلىق گۈزەل كۈيلەردە مېھرىڭ بار .


ۋاپا ، پاكلق ئارا ياشناپ تەسەددۇق ئەيلىدىڭ ھەرچاغ ،

دىيانەت قەسرىدە ياڭراق ، تېرەن ئۈنلەردە مېھرىڭ بار .


جاھاننى كۆكلىتىپ ئۆتكەن كۆيۈك باغرىدا جان كۈلگەن ،

ھىدىڭدىن ئۇز  ھۆسىن تۈزگەن قىزىلگۈللەردە مېھرىڭ بار .


ئىلاھىي ئوت غورۇر  ئىشقىڭ ئۈزۈلمەيدۇ ئەبەد رىشتىڭ ،

بۈيۈك ئارمانغا يانداشقان ئۇلۇغ كۈنلەردە مېھرىڭ بار  .

ئارتۇچ

ئەتىرگۈل پۇرايدۇ سەن ماڭغان يوللار


ئەمەتجان زۇنۇن ئارتۇچ


ئەتىرگۈل پۇرايدۇ سەن ماڭغان يوللار ،
ھېدىڭدىن مەسىت بولۇپ ئوينايدۇ شامال .
شاتلىنىپ سايرايدۇ ناۋاكەش قۇشلار ،
ئاپتاپنىڭ باغرىغا سىڭىدۇ خىيال .

ئەتىرگۈل  پۇرايدۇ سەن ماڭغان يوللار ،
چۈشلەرگە باشلايدۇ ۋىسال جىلۋىسى .
قۇت رەڭگى  ئاقىدۇ سۈپسۈزۈك سۇلار ،
نىلۇفەر  مۇڭلۇنۇپ تۆككەن  سىرىنى  .

ئەتىرگۈل  پۇرايدۇ سەن ماڭغان يوللار  ،
سەھرالار ئانامدەك سالام يوللايدۇ .
مەي باغلاپ پىشىدۇ ساماۋى ئويلار ،
سەھەردەك ۋەسلىگە يۈرەك تويمايدۇ .

ئەتىرگۈل پۇرايدۇ سەن ماڭغان يوللار ،
قەددىڭدىن  ، مېھرىڭدىن نۇر ئالغان قۇياش .
رەشىكلىك ئوتىدا كۆيىدۇ قىزلار ،
مەردانە ئىزلىرىڭ جەننەتكە تۇتاش  .

makan

ئەجرىڭىزگە كۆپ تەشەككۈر

شىرلان

ئىسىل شىرىلار  

گىتتارماھىرى

ياخشى

burkut

ياخشى يېزىلىپتۇ ئەجىرىڭىزگە كۆپ رەخمەت