جاھان ئاگېنتلىقى 9-مارت خەۋىرى؛ لەگلەك تورى تەرجىمىسى: يەمەن پرېزىدېنتى ھادى، قولتۇق ھەمكارلىق قۇرۇلتىيىدا، ھەر قايسى تەرەپلەر ئارىسىدا ئېلىپ بېرىلىدىغان سۆھبەتنىڭ رىيادتا داۋاملاشتۇرۇلىشنى تەلەپ قىلدى. سەئۇدى ئەرەبىستان ۋە قولتۇق ھەمكارلىق قۇرۇلتىيى ھادىينىڭ چاقىرىقىغا ئىجابىي جاۋاب بەردى.

يەمەن پرېزىدېنتى ئابدۇرەببۇ مەنسۇر ھادى، سەئۇدى ئەرەبىستان پادىشاھى سەلمان ئىبنى ئابدۇلئەزىزگە يازغان مەكتۇبىدا مۇنداق دېدى: «يەمەندە شىئە ھۇسىيلەرنىڭ ھەربىي ئۆزگىرىش قىلىشى سەۋەبىدىن ، دۆلىتىمىز دۇچ كەلگەن كىرزىسلارنى كۆزىتىۋاتىسىلەر، ھۇسىيلەر سەنئادىن ئايرىلىشمىزغا مەجبۇرلىدى. بىز بۇ قىيىن مەزگىلدە دۆلەتنى ئىدارە قىلىش ئۈچۈن ياخىشى شارائىتقا ئىگە بولغان ئەدەنگە كەلدۇق. قولتۇق ھەمكارلىق قۇرۇلتىيىنىڭ دۆلىتىمىزدە ئالغان رولى، يەمەننىڭ بىخەتەرلىكى ۋە مۇقىملىقىنى ساقلاشنى مەقسەت قىلغان بارلىق سىياسى گۇرۇپپىلار قاتنىشىدىغان يىغىننى رىيادتا ئۆتكۈزۈشنى تەلەپ قىلىمەن» دېدى.

سەئۇدى ئەرەبسىتان پادىشاھ سارىيىدىن ھادىينىڭ مەكتۇبىغا ئالاقىدار ئېلان قىلىنغان باياناتتا، «سەئۇدى ئەرەبىستاننىڭ قېرىنداش يەمەن خەلقىنىڭ يېنىدا تۇرىدىغانلىقى، قولتۇق ھەمكارلىق قۇرۇلتىيىغا ئەزا دۆلەتلەرنىڭ ۋە يەمەننىڭ بىخەتەرلكىنى چىقىش قىلىپ، پادىشاھ سەلمان، ھادىينىڭ بۇ ھەقتىكى تەلىپىنى قۇلتۇق ھەمكارلىق قۇرۇلتىيىغا ئەزا دۆلەتلەرگە ئىجابي شەكىلدە يەتكۈزدى» دېيىلدى. قولتۇق ھەمكارلىق قۇرۇلتىيىنىڭ ھادىينىڭ تەلىپىنى قۇبۇل قىلغانلىقى بىلدۈرۈلدى. يىغىننىڭ ئېچىلىش ۋاقتىغا ئالاقىدار بىرەر مەلۇمات بېرىلمىدى.