جۇڭگو ئاخبارات تورىنىڭ 22-مارتتىكى خەۋىرى، باغداش تورىدىن ئىرپان تەرجىمىسى:

فرانسىيە مېدىيەلىرىنىڭ خەۋىرىگە ئاساسلانغاندا، 22-مارت بېلگىيەدە يۈز بەرگەن ئارقىمۇئارقا پارتلىتىش ۋەقەسىدە ئاز دېگەندە 26 ئادەم قازا قىلغان، باشقا يەنە 136 ئادەم يارىدار بولغان. فرانسىيە پرېزىدېنتى ئولەند بۇ ۋەقەگە قارىتا سۆز قىلىپ، تېررورچىلار گەرچە پەقەت بېريۇسېلغا ھۇجۇم قىلغان بولسىمۇ، ئەمما نىشانى ئەمەلىيەتتە پۈتكۈل ياۋروپا ئىكەنلىكىنى ئېيتتى. ئۇ:«پۈتكۈل ياۋروپا زەربىگە ئۇچرىدى» دېدى.

خەۋەردە دېيىلىشىچە، ئولەند فرانسىيەنىڭ 2015-يىلى 1-ئاي ۋە 11-ئايدا تېررورلۇق ھۇجۇمىغا ئۇچرىغانلىقىنى، ھازىر بېلگىيە ئىكەنلىكىنى بىلدۈردى. پۈتكۈل ياۋروپادا بىخەتەرلىك خەۋىپى مەۋجۇت. شۇڭا، فرانسىيە ھۆكۈمىتى تېررورلۇققا قارشى تۇرۇش تەدبىرىنى داۋاملىق كۈچەيتىشنى قارار قىلغان.

ئولەندنىڭ بىلدۈرۈشىچە، فرانسىيە دۆلەت چېگرا لىنىيەسى، ئاممىۋى قاتناش ئەسلىھەلىرىدە ھوشيارلىقنى كۈچەيتىپ، ئوخشاش خىلدىكى ھۇجۇم قىلىش ۋەقەلىرىنىڭ يەنە يۈز بېرىشىنىڭ ئالدىنى ئالىدىكەن.