OPPO نىڭ VOOC دەپ نام بېرىلگەن تېز سۈرئەتتە زەرەتلەش تېخنىكىسى (ياكى چاقماق تېزلىكىدە زەرەتلەش تېخنىكىسى) نۇرغۇن كىشىلەرگە تونۇشلۇق، بۇ نۆۋەتتىكى ئاساسلىق تېز زەرەتلەش تېخنىكىلىرىنىڭ بىرى. چەتئەل تاراتقۇلىرىنىڭ خەۋىرىگە ئاساسلانغاندا، بۇ يىللىق MWC2016 چوڭ يىغىنىدا OPPO يېڭىدىن تەتقىق قىلىپ چىققان سىمسىز تېز سۈرئەتتە زەرەتلەش تېخنىكىسىنى نامايەن قىلىدىكەن.

        ئىلگىرىكى سىمسىز زەرەتلەش ئىقتىدارى گەرچە قولايلىق بولسىمۇ، ئەمما زەرەتلەش سۈرئىتىنىڭ ئاستا بولۇشى ئۇنىڭ تەرەققىياتىنى چەكلەپ تۇرۇۋاتقان ئاساسلىق ئامىلغا ئايلىنىپ قالغان، سامسۇڭ S6 تۈرىدىكى يانفونلار مەلۇم دەرىجىدە سىمسىز ھالدىكى تېز زەرەتلەشنى ئىشقا ئاشۇرغان، ئەمدىلىكتە OPPO ئۆزىنىڭ بۇ جەھەتتىكى يېڭى تېخنىكىسىنى مەيدانغا چىقىرىدىكەن.

ئۇچۇردا دېيىلىشىچە، OPPO شىركىتى سىمسىز زەرەتلەش تېخنىكىسى بىلەن VOOC تېز زەرەتلەش تېخنىكىسىنى بىرلەشتۈرۈپ، بۇ يىللىق يېڭى تېخنىكا بولغان «سىمسىز VOOC تېز زەرەتلەش تېخنىكىسى» نى ئېلان قىلىدىكەن.

يۇقارقىدىن باشقا، OPPO Find 9 يانفونى مۇشۇ قېتىملىق MWC2016 يىغىنىدا ئېلان قىلىنىشى مۇمكىن بولۇپ، ئۇنىڭغا دەل سىمسىز تېز زەرەتلەش تېخنىكىسى قوللىنىلىدىكەن، ئاساسلىق سەپلىمىسىگە كەلسەك، بۇ يانفونغا 4GB لىق ئىچكى ساقلىغۇچ، 32GB لىق ئاساس ساقلىغۇچ ۋە ئايلاندۇرغىلى بولىدىغان 20 مىليون پىكسېللىق كامېرا قاتارلىقلار ئىشلىتىلىدىكەن.