ياپونىيە تاراتقۇلىرىنىڭ خەۋىرىگە قارىغاندا، ياپونىيە باش ۋەزىرى ئابى شىنزو مۇشۇ ئاينىڭ 21-كۈنى كورىيە زۇڭتۇڭى پارك گۆنھيېنىڭ نامىغا داغ تەگكۈزگەن دەپ شىكايەت قىلىنغان ياپونىيە مۇخبىرى كادوكاۋا شوتىن بىلەن كۆرۈشكەن ھەمدە ئۇنىڭدىن ھال سورىغان. كادوكاۋا شوتىن ياپونىيە «ئىقتىساد خەۋىرى» تاراتقۇسىنىڭ سىئولدا تۇرۇشلۇق تارمىقىنىڭ سابىق باشلىقى بولۇپ، بۇنىڭ ئالدىدا گۇناھسىز دەپ ھۆكۈم قىلىنغان.  خەۋەر قىلىنىشىچە، ئىككى تەرەپ سوت مەھكىمىسىنىڭ گۇناھسىز دەپ ھۆكۈم قىلىش قارارىنى چۆرىدەپ پىكىر ئالماشتۇرغان. كادوكاۋا شوتىن سۆھبەتتىن كېيىن تاراتقۇلارغا مۇنۇلارنى ئاشكارىلىشىچە، ئابى شىنزو كادوكاۋا شوتىندىن ئەھۋال سوراپ «سىزنىڭ گۇناھسىز دەپ ھۆكۈم قىلىنىشىڭىز ناھايىتى ياخشى بولدى، جاپا چەكتىڭىز.» دېگەن. ئىگىلىنىشچە، بۇ يىل 4-ئايدىمۇ ئابى شىنزو كادوكاۋا شوتىن بىلەن كۆرۈشكەن.

     كورىيە سېئۇل مەركىزى سوت مەھكىمىسى مۇشۇ ئاينىڭ 17-كۈنى كادوكاۋا شوتىننىڭ قارا چاپلاش نىيىتى يوق دېگەننى سەۋەب قىلىپ ئۇنى گۇناھسىز دەپ ھۆكۈم قىلغان. تەپتىش تارماقلىرى كادوكاۋا شوتىنغا بىر يىل ئالتە ئاي قاماق جازاسى بېرىشنى تەلەپ قىلغان ئىدى.

ئىگىلىنىشچە، 2014-يىلى 8-ئاينىڭ 3-كۈنى كادوكاۋا شوتىن «كورىيەنىڭ يىللار ناملىق پاراخوتى ۋەقەگە ئۇچرىغاندا پارك گۆنھيې زۇڭتۇڭ ئىز دېرەكسىز يوقاپ كېتىپ، زادى كىم بىلەن كۆرۈشتى؟» دېگەن بىر ماقالىنى يازغان، ھەمدە ئۇنى «ئىقتىساد گېزىتى» نىڭ تور بېتىگە چىقارغان. بۇ ماقالىدە مۇنداق دېيىلگەن:  يىللار ناملىق پاراخوت چۆكۈپ كەتكەندىن كېيىن، پارك گۆنھيې زۇڭتۇڭ 72 سائەت يوقاپ كەتتى، ئۇ بەلكىم كونا «ئاشىقى» سوڭ يۈنخى بىلەن كۆرۈشكىلى كەتكەن بولۇشى مۇمكىن.

       بۇ ماقالە ئېلان قىلىنىشى بىلەنلا، ئەل ئىچىدە زور غۇلغۇلا پەيدا قىلغان، ھەمدە ھەرخىل شەكىلدىكى كۆز قاراش، پەرەزلەر جاھاننى بىر ئالغان. تۆت كۈندىن كېيىن، كورىيە مەركىزى ھۆكۈمىتى بۇنىڭغا قارتا قاتتىق ئىنكاس قايتۇرۇپ «كادوكاۋا شوتىننىڭ مەسئۇلىيتىنى چوقۇم قاتتىق سۈرۈشتۈرۈش كېرەك» دېگەن. شۇ كۈنى يەنە ئەل ئىچىدىكى بىر قانچە گۇروھلار تەپتىش مەھكىمىسىگە كادوكاۋا شوتىننى ئەرز قىلغان.

    شۇ يىلى 10-ئايدا كورىيە تەپتىش تارماقلىرى «بەتنام چاپلاش» جىنايىتى بىلەن كادوكاۋا شوتىننىڭ ئۈستىدىن رەسمى ھالدا شىكايەت قىلغان. تەپتىش تارماقلىرىنىڭ دېيىشىچە، كادوكاۋا شوتىننىڭ ماقالىسى دۆلەت زۇڭتۇڭىنىڭ نامىغا داغ تەگكۈزگەن.