ئامېرىكا ئىراققا ئالاھىدە قىسىم ئورۇنلاشتۇرۇپ «شام ئىسلام دۆلىتى»گە زەربە بېرىشنى تەلەپ قىلغان ئىدى، ئىراقنىڭ زۇڭلىسى رەت قىلدى

«ئوربىتا تورى خەۋىرى» فىرانسىيە خەلقئارا رادىيو ئىستانسىسىنىڭ 2-دېكابىر فىرانسىيە ئاخبارات ئاگېنتلىقىنىڭ خەۋىرىنى نەقىل قىلىشىچە، ئامېرىكا ئىراققا ئالاھىدە قىسىم ئورۇنلاشتۇرۇپ، رادىكال تەشكىلات «شام ئىسلام دۆلىتى»گە زەربە بېرىدىغانلىقىنى جاكارلىغان، بىراق ئىراقنىڭ زۇڭلىسى ئابادى، ئىراق چەتئەلنىڭ يەر يۈزى قىسمىنىڭ ۋەزىپە ئىجرا قىلىشىغا ئېھتىياجلىق ئەمەس، دېگەن.

ئابادىنىڭ 1- دېكابىر ئېلان قىلغان باياناتىدا دېيىلىشىچە، چەتئەلنىڭ يەر يۈزى ئۇرۇش قىلىش قىسمىنى ئىراققا ئورۇنلاشتۇرۇشنىڭ ھاجىتى يوق ئىكەن. باياناتتا يەنە، ئىراق ھۆكۈمىتى شۇنى تەكىتلەيدۇكى، ئىراقتا ھەرقانداق ھەربىي ھەرىكەت قوللانماقچى بولغانلار ياكى ئىراققا ھەربىي قىسىم ئەۋەتمەكچى بولغانلار، ئالاھىدە قىسىم بولۇش ياكى بولماسلىقىدىن قەتئىي نەزەر، چوقۇم ئىراقنىڭ ھۆكۈمىتىنىڭ ماقۇللۇقىنى ئېلىشى ۋە ئىراق ھۆكۈمىتى بىلەن ماسلىشىشى كېرەك، دېگەن.

ئىگىلىنىشىچە، ئامېرىكىنىڭ دۆلەت مۇداپىيە مىنىستىرى كات 1-دېكابىر، ئامېرىكىنىڭ «نىشان بەلگىسى يىراققا سەپەر قىلغۇچى ئالاھىدە قىسىمى»نى ئىراققا ئەۋەتىپ، شۇ جايدىكى قىسىم بىلەن ھەمكارلىشىپ «شام ئىسلام دۆلىتى»گە زەربە بېرىدىغانلىقىنى جاكارلىغان. كاتنىڭ بىلدۈرۈشىچە، بۇ ئالاھىدە قىسىم تۇيۇقسىز ھۇجۇم قىلىش، تۇتقۇنلارنى قۇتقۇزۇش، ئاخبارات توپلاش ۋە «شام ئىسلام دۆلىتى»نىڭ ئاتامانلىرىنى قولغا ئېلىش قاتارلىق ۋەزىپىلەرنى ئىجرا قىلىشى مۇمكىنكەن. ئامېرىكا ئىراققا ئالاھىدە قىسىم ئورۇنلاشتۇرغاندىن كېيىن، تېخىمۇ كۆپ تۇيۇقسىز ھۇجۇم قىلىش ھەرىكىتى مۆلچەرلەنگەن.

ئامېرىكىنىڭ دۆلەت ئىشلىرى كاتىپى كېررىي 2- دېكابىر، ئىراق ھۆكۈمىتىنىڭ ئامېرىكىنىڭ ئىراقتا ئالاھىدە قىسىم ئورۇنلاشتۇرۇش پىلانىغا تامامەن قۇلاق سالىدۇ، ئىككى دۆلەت ھۆكۈمىتى يېقىندىن ماسلىشىپ بۇ ئالاھىدە قىسىمىنىڭ قانداق ۋەزىپىلەرنى ئىجرا قىلىدىغانلىقىنى ئورۇنلاشتۇرىدۇ، دېگەن.