11-ئاينىڭ 27-كۈنى چۈشتە، قۇرۇق بېنزىن تۇڭى باسقان بىر دېھقانچىلىققا ئىشلىتىدىغان ئۈچ چاقلىق ئاپتوموبىل ئېغىر دەرىجىدە نورمىدىن ئارتۇق يۈك بېسىپ يولغا چىققان بولۇپ، قاتناش ساقچىلىرى تەرىپىدىن تۇتۇپ قېلىنىپ تەكشۈرۈلگەن. مەزكۇر ئاپتوموبىل شوپۇرى خاتالىقىنى تونۇمىغان، قاتناش ساقچىسىنىڭ تەكشۈرۈشىگە ھەمكارلاشماي ساقچىلار سورىغان مەسىلىگە جاۋاب بېرىشنى رەت قىلغان. ئارقىدىن شوپۇر يانچۇقىدىن ئۆزىنىڭ «تىراكتور ھەيدەش كىنىشكىسىنى» چىقىرىپ قاتناش ساقچىسىغا بەرگەن. قاتناش ساقچىسى ھەيدەش كىنىشكىسىنىڭ ئارىسىغا قىستۇرۇلغان بىر پارچە قىزىل ئىسىم كارتىسى چوڭ-كىچىكلىكىدە ئۈستىگە «ئەيدىز كېسىلى بىلەن داۋالىنىش كىنىشكىسى» دەپ خەت بېسىلغان كىنىشكىنى كۆرگەن، لېكىن بۇ كىنىشكىدا ئالاقىدار تارماقلارنىڭ تامغىسى بېسىلمىغان بولۇپ، راست-يالغانلىقىنى پەرقلەندۈرگىلى بولمايدىكەن.

      قاتناش ساقچىسى ئۇنىڭغا تەربىيە بەرگەندىن كېيىن، ئۇنىڭ نورمىدىن ئارتۇق يۈك بېسىش قىلمىشىغا قارىتا قانۇن بويىچە 100 يۈەن جەرىمانە قويغان، شوپۇر ھېچنېمە دېمەي گۈلقەقەلىرى ئېچىلغان ھالدا پۇلنى تاپشۇرغان.

       بۇ ۋەقەنى بىر تەرەپ قىلغان قاتناش ساقچىسى مۇنداق دېدى: « ئەيدىز بىمارلىرىغا داۋالىنىش كىنىشكىسى» نى ئالغاندىن كېيىن ئۆزۈممۇ بىر ئاز قورقتۇم. بۇنداق كىنىشكا ئادەمگە ناھايىتى كۈچلۈك قورقۇنچ پەيدا قىلىدىكەن. لېكىن ئىلگىرىكى تەجرىبىلەرگە ئاساسلانغاندا، نۇرغۇن جايلاردا ۋەزىپە ئىجرا قىلىش داۋامىدا خىزمەتچى خادىملار ساختا «ئەيدىز كېسىلى داۋالىنىش كىنىشكىسى» گە يولۇقۇپ باققان.

قاتناش ساقچىسى جاڭ ⅩⅩ شوپۇرغا: «مەن سېنىڭ داۋالىنىش كارتاڭنىڭ يالغانلىقىنى بىلىمەن، بۇنىڭدىن كېيىن ھەرگىز ئىشلەتمىگىن» دېگەن. ساختىلىقى پاش بولۇپ قالغان شوپۇر كۈلۈپ تۇرۇپ قىزىل داۋالىنىش كىنىشكىسىنى يەنە يانچۇقىغا سالغان. قاتناش ساقچىسىنىڭ دېيىشىچە ئەنخۇي ئۆلكىسى لىشىن ناھىيەسىدە بۇنداق ئادەملەر كۆپ ئىكەن، بۇ گۇۋاھنامە مەيلى راست بولسۇن ياكى يالغان بولسۇن زۆرۈر تېپىلغاندا يەنە بەك ئەسقاتىدىكەن.

     توردىن ئىزدەش ئارقىلىق بايقىلىشىچە، يېقىنقى بىر نەچچە يىلدىن بۇيان ئەنخۇي ئۆلكىسى لىشىن ناھىيەسىدە بۇنىڭغا ئوخشاش «داۋالىنىش كىنىشكىسى» كۆتۈرۈۋېلىپ، دېھقانچىلىققا ئىشلىتىدىغان ئۈچ چاقلىق ئاپتوموبىل ھەيدەپ قائىدىگە خىلاپلىق قىلىدىغان، ئۆتكەلدىن بۆسۈپ ئۆتىدىغان ئەھۋاللار بولغان ئىكەن، بۇلارنىڭ ئىچىدىكى بەزى ئادەملەر ئەيدىز بىمارلىرى ئەمەس بولۇپ، پەقەت بۇ خىل ئۇسۇل بىلەن قاتناش ساقچىلىرىنى قورقۇتۇپ جازادىن قېچىش ئۈچۈن مۇشۇنداق قىلىدىكەن.

    لىشىن ناھىيەسىدىكى كەنت ئاھالىلىرى، 80-يىللاردا سىرتقا چىقىپ قان ساتقانلىق تۈپەيلىدىن، كەنتتىكى نۇرغۇن ئادەملەر ئەيدىز كېسىلى بىلەن يۇقۇملىنىپ قالغان، بۇ كېسەل بىلەن يۇقۇملانغان بىمارلارغا كېسەللىكلەرنى كونترول قىلىش مەركىزى قىزىل رەڭلىك «ئەيدىز كېسىلى بىلەن كېسەل گۇۋاھنامىسى» تارقاتقان، لېكىن ناھايىتى كۆپ كىشىلەر «داۋالىنىش كىنىشكىسى» نى ئالاھىدە ئورۇنغا ئىشلەتكىلى بولىدىغانلىقىنى بايقىغاندىن كېيىن، بۇ ئىشنى يامان ھېس قىلماي ئەكسىچە بىر پارچىدىن ساختا كىنىشكا ياسىتىپ، مۇھاپىزەت كۈنلۈكى ئورنىدا ئىشلەتكەن.