جاھان ئاگېنتلىقى 17-ماي خەۋىرى؛ لەگلەك تورى تەرجىمىسى: يەمەندە شىئە ھۇسىي قۇراللىقلىرىغا قارشى پرېزىدېنت مەنسۇر ھادىيغا ياردەم بېرىۋاتقان ھەر قايسى تەرەپلەر، يەمەندىكى كىرزسىكە ھەل قىلىش چارىسى تېپىش مەقسىتىدە يەكشەنبە كۈنى سەئۇدى ئەرەبىستان پايتەختى رىيادتا ئۇچرىشىدۇ. بۇ يىغىنغا ھۇسىي قۇراللىقلىرى ۋەكىللىرى قاتناشمايدۇ، ھۇسىيلەر سۆھبەت ئۇچرىشىشنى يەمەندە ئۆتكۈزۈش پىكىرىدە چىڭ تۇرماقتا. رىيادتىكى ئۇچرىشىشقا يەمەن پرېزىدېنتى مەنسۇر ھادىيغا ياردەم بەرگەن تەرەپلەر بىلەن بىرگە، سابىق پرېزىدېنت ئەلى ئابدۇللاھ سالىھنىڭ پارتىيىسى خەلق قۇرۇلتىيى پارتىيىسى، مۇسۇلمان قېرىنداشلارغا يېقىن بولغان ئىسلاھ پارتىيىسى ۋە جەنۇب ھەرىكىتى ۋەكىللىرى قاتنىشىدۇ. بۇ يىغىن ئ‍ۈچ كۈن داۋاملىشىدۇ.
يىغىن تەييارلىق كومىتىتى ئەزاسى ياسىن مەقاۋى، بۇ يىغىننىڭ مەقسىتىنىڭ ھۇسىي توپىلاڭچىلىرى ۋەيران قىلغان يەمەننى قايتا قۇرۇش، ۋە ھادى ھۆكۈمىتىگە ھەربي ۋە سىياسىي جەھەتتە ياردەم بېرىش ئىكەنلىكىنى بىلدۈردى.
پرېزىدېنت ھادىنىڭ تەشۋىقات ئىشخانا مەسئۇلى مۇختار راھبى، « رىيادتىكى ئۇچرىشىشقا ھۇسىيلەردىن باشقا بارلىق يەمەنلىك تەرەپلەر قاتنىشىدۇ، ھۇسىيلەرگە تەكلىپ ئەۋەتىلدى، ئەمما رەت قىلدى» دېدى.
يەمەندە ئىراننىڭ قوللىشى ئاستىدىكى شىئە ھۇسى قۇراللىقلىرى پايتەخت سەنئا قاتارلىق بىر قانچە رايۇنلارنى ئىشغال قىلىۋېلىپ، ھۆكۈمەتنى تارتىۋېلىپ، پارلامېنتنى تارقىتىۋەتكەندىن كېيىن، پرېزىدېنت ھادى ۋە باش مىنسترىنى تۇتقۇن قىلىۋالدى، ۋە يەمەندە ئۆتكۈنچى ھۆكۈمەت قۇرغانلىقىنى جاكارلىدى. پرېزىدېنت ھادىي نازاەت ئاستىدىن غەلبىلىك قېچىپ يەمەننىڭ جەنۇبىدىكى ئەدەن رايۇنىغا بېرىپ پائالىيەت قىلدى. ھۇسىيلەر يەمەننىڭ ھەر قايسى رايۇنلىرىدا ئۈزلۈكسىز كىڭەيگەندىن كېيىن ھادىي سەئۇدى ئەرەبىستاندا پاناھلىنىشقا مەجبۇر بولدى. يەمەن پرېزىدېنتى ھادىينىڭ جىددى مۇداخىلە چاقىرىقى بىلەن، سەئۇدى ئەرەبىستان باشچىلىقىدا بىرلەشمە ئىتتىپاق تەشكىللىنىپ 26-مارتتا يەمەندىكى شىئە ھۇسىي قۇراللىقلىرىغا «كەسكىن قارار بورىنى» ھەرىكىتى نامىدا ھاۋا ھۇجۇمى قوزغىدى. بۇ ھەربىي ھەرىكەت 21-ئاپرېلدا ئاياغلاشقان ئىدى. ئۇنىڭدىن كېيىن يەنە توقۇنۇش باشلاندى. 12-مايدا يەمەنگە ئىنسانپەرۋەرلىك ياردىمى يەتكۈزۈش مەقسىتىدە 5 كۈنلۈك ئۇرۇش توختىتىش كېلىشمى ئىمزالاندى، ئەمما كېلىشىم بۇزۇلدى.