ئەجەپ بەك ئۇلۇغكەن بۇ ئىلىم دېگەن ،
ھەر زامان ھەر يەردە ھەمراھ بۇلۇركەن ،
نەدە بول شەنىڭنى ئۈستۈن قىلۇركەن ،
مال- دۇنيا كەتسىمۇ يەنە قالۇركەن ،
شۇنداق بەك ئۇلۇغكەن بۇ ئىلىم دېگەن .
مەيلى سەن كەتسەڭمۇ يىراق- يىراققا ،
ھەتتاكى بولساڭمۇ جەنۇب قۇتۇپتا ،
ۋە ياكى چۈشسەڭمۇ ئېغىر قاماققا ،
شۇچاغدا ئايلىنۇر ئۇ بىر قاناتقا ،
شۇنداق بەك ئۇلۇغكەن بۇ ئىلىم دېگەن .
ھېچقانداق بىركىشى سېتىپ ئالالماس ،
بەرسىمۇ مىڭ تىللا ۋە ياكى ئالماس ،
قىيامەت كەلسىمۇ سەندىن ئايرىلماس ،
مەھبۇبۇڭ بولسا گەر ئۇنچىلىك بولماس ،
شۇنداق بەك ئۇلۇغكەن بۇ ئىلىم دېگەن .
پايدىسىز كىيسەڭمۇ بېشىڭغا سەللە ،
قۇرئاندىن بىلمىسەڭ كىچىك بىر سۈرە ،
ئىلىمسىز قىلىنغان تائەتتىن كۆرە ،
گەر ئۇخلار بىلىملىك ساۋابى ئۆرە ،
شۇنداق بەك ئۇلۇغكەن بۇ ئىلىم دېگەن .
ئىلىمدۇر روھىڭغا مەنىۋى ئۇزۇق ،
قىلغىنكى ئەمەلنى ئۇنىڭغا قۇزۇق ،
مەرىپەت بولمىغان قەلىبدۇر بۇزۇق ،
ئىلىمسىز ئىبادەت قۇرۇقتۇر قۇرۇق ،
شۇنداق بەك ئۇلۇغكەن بۇ ئىلىم دېگەن .
ئالىمدۇر ئالەمگە قىلىنغان زىننەت ،
ئۇنىڭدىن دۇنياغا يېتەر ئاسارەت ،
قۇرت- قۇڭغۇز،قۇشلارمۇ كۆرگەچ ساخاۋەت،
ئىستىغفار تىلەركەن ئاڭا داۋامەت ،
شۇنداق بەك ئۇلۇغكەن بۇ ئىلىم دېگەن .
2007 - 7 - 7 ھەلەب شەھىرى - سۈرىيە
ئاپتور : مەدىنە مۇنەۋۋەر ئىسلام ئۇنىۋېرسىتى ئوقۇغۇچىسى.
مەنبە:ساجىيەتورى.
